Devi Bhagavata Purana · Chapter 7.24

hariścandracintāvarṇanam
śaunaka uvāca -
tataḥ kimakarod‌rājā cāṇdālasya gṛhe gataḥ /
tad‌ brūhi sūtavarya tvaṃ pṛcchataḥ satvaraṃ hi me

sūta uvāca -
viśvāmitre gate vipre śvapaco hṛṣṭamānasaḥ /
viśvāmitrāya tad‌ dravyaṃ dattvā baddhvā nareśvaram

asatyo yāsyasītyuktvā daṇḍenātāḍayattadā /
daṇḍaprahārasambhrāntamatīva vyākulendriyam

iṣṭabandhuviyogārtamānīya nijapakkaṇe /
nigaḍe sthāpayitvā taṃ svayaṃ suṣvāpa vijvaraḥ

nigaḍasthastato rājā vasaṃścāṇḍālapakkaṇe /
annapāne parityajya sadā vai tadaśocayat

tanvī dīnamukhī dṛṣṭvā bālaṃ dīnamukhaṃ puraḥ /
māṃ smarantyasukhāviṣṭā mokṣayiṣyati nau nṛpaḥ

upāttavitto viprāya dattvā vittaṃ pratiśrutam /
rodamānaṃ sutaṃ vīkṣya māṃ ca sambodhayiṣyati

tātapārśvaṃ vrajāmīti rudantaṃ bālakaṃ punaḥ /
tāta tāteti bhāṣantaṃ tathā sambodhayiṣyati

na sā māṃ mṛgaśāvākṣī vetti cāṇḍālatāṃ gatam /
rājyanāśaḥ suhṛttyāgo bhāryātanayavikrayaḥ

tataścāṇḍālatā ceyamaho duḥkhaparamparā /
evaṃ sa nivasannityaṃ smaraṃśca dayitāṃ sutam

nināya divasān rājā caturo vidhipīḍitaḥ /
athāhni pañcame tena nigaḍānmocito nṛpaḥ

cāṇḍālenānuśiṣṭaśca mṛtacailāpahāraṇe /
kruddhena paruṣairvākyairnirbhatsya ca punaḥ punaḥ

kāśyāśca dakṣiṇe bhāge śmaśānaṃ vidyate mahat /
tad‌rakṣasva yathānyāyaṃ na tyājyaṃ tattvayā kvacit

imaṃ ca jarjaraṃ daṇḍaṃ gṛhītvā yāhi mā ciram /
vīrabāhorayaṃ daṇḍa iti ghoṣasva sarvataḥ

sūta uvāca -
kasmiṃścidatha kāle tu mṛtacailāpahārakaḥ /
hariścandro'bhavad‌rājā śmaśāne dad‌vaśānugaḥ

cāṇḍālenānuśiṣṭastu mṛtacailāpahāriṇā /
rājā tena samādiṣṭo jagāma śavamandiram

puryāstu dakṣiṇe deśe vidyamānaṃ bhayānakam /
śavamālyasamākīrṇaṃ durgandhaṃ bahudhūmakam

śmaśānaṃ ghorasannādaṃ śivāśatasamākulam /
gṛddhragomāyusaṃkīrṇaṃ śvavṛndaparivāritam

asthisaṅghātasaṅkīrṇaṃ mahādurgandhasaṃkulam /
ardhadagdhaśavāsyāni vikasaddantapaṃktibhiḥ

hasantīvāgnimadhyasthakāyasyaivaṃ vyavasthitiḥ /
nānāmṛtasuhṛnnādaṃ mahākolāhalākulam

hā putra mitra hā bandho bhrātarvatsa priyādya me /
hāpyate bhāgineyārha hā mātula pitāmaha

mātāmaha pitaḥ pautra kva gato'syehi bāndhava /
iti śabdaiḥ samākīrṇaṃ bhairavaiḥ sarvadehinām

jvalanmāṃsavasāmedacchūmiti dhvanisaṅkulam /
agneścaṭacaṭāśabdo bhairavo yatra jāyate

kalpāntasadṛśākāraṃ śmaśānaṃ tatsudāruṇam /
sa rājā tatra samprāpto duḥkhādevamaśocata

hā bhṛtyā mantriṇo yūyaṃ kva tad‍rājyaṃ kulocitam /
hā priya putra me bāla māṃ tyaktvā mandabhāgyakam

brāhmaṇasya ca kopena gatā yūyaṃ kva dūrataḥ /
vinā dharmaṃ manuṣyāṇāṃ jāyate na śubhaṃ kvacit

yat‍nato dhārayettasmātpuruṣo dharmameva hi /
ityevaṃ cintayaṃstatra cāṇḍāloktaṃ punaḥ punaḥ

malena digdhasarvāṅgaḥ śavānāṃ darśane vrajan /
lakuṭākārakalpaśca dhāvaṃścāpi tatastataḥ

asmiñchava idaṃ maulyaṃ śataṃ prāpsyāmi cāgrataḥ /
idaṃ mama idaṃ rājña idaṃ cāṇḍālakasya ca

ityevaṃ cintayan rājā vyavasthāṃ dustarāṃ gataḥ /
jīrṇaikapaṭasugranthikṛtakanthāparigrahaḥ

citābhasmarajoliptamukhabāhūdarāṅ‌ghrikaḥ /
nānāmedovasāmajjāliptapāṇyaṅguliḥ śvasan

nānāśavaudanakṛtakṣunnivṛttiparāyaṇaḥ /
tadīyamālyasaṃśleṣakṛtamastakamaṇḍalaḥ

na rātrau na divā śete hāheti pravadanmuhuḥ /
evaṃ dvādaśa māsāstu nītā varṣaśatopamāḥ

iti śrīmaddevībhāgavate mahāpurāṇe'ṣṭādaśasāhasryāṃ saṃhitāyāṃ
saptamaskandhe hariścandracintāvarṇanaṃ nāma caturviṃśo'dhyāyaḥ