Devi Bhagavata Purana · Chapter 7.12

triśaṅkūpākhyānavarṇanam
evaṃ prabodhitaḥ pitrā triśaṅkuḥ praṇato nṛpaḥ /
tatheti pitaraṃ prāha premagad‌gadayā girā

viprānāhūya mantrajñānvedaśāstraviśāradān /
abhiṣekāya sambhārān kārayāmāsa satvaram

salilaṃ sarvatīrthānāṃ samānāyya viśāṃpatiḥ /
prakṛtīśca samāhūya sāmantānbhūpatīṃstathā

puṇye'hni vidhivattasmai dadāvāsanamuttamam /
abhiṣicya sutaṃ rājye triśaṅkuṃ vidhivatpitā

tṛtīyamāśramaṃ puṇyaṃ jagrāha bhāryayā yutaḥ /
vane tripathagākūle cacāra duścaraṃ tapaḥ

kāle prāpte yayau svargaṃ pūjitastridaśairapi /
indrāsanasamīpastho rarāja ravivatsadā

rājovāca pūrvaṃ bhagavatā proktaṃ kathāyogena sāmpratam /
satyavrato vasiṣṭhena śapto dogdhrīvadhātkila

kupitene piśācatvaṃ prāpito guruṇā tataḥ /
kathaṃ muktaḥ piśācatvādityetatsaṃśayaḥ prabho

na siṃhāsanayogyo hi bhavecchāpasamanvitaḥ /
muninā mocitaḥ śāpātkenānyena ca karmaṇā

etanme brūhi viprarṣe śāpamokṣaṇakāraṇam /
ānītastu kathaṃ pitrā svagṛhe tādṛśākṛtiḥ

vyāsa uvāca -
vasiṣṭhena ca śapto'sau sadyaḥ paiśācatāṃ gataḥ /
durveṣaścātidurdharṣaḥ sarvalokabhayaṅkaraḥ

yadaivopāsitā devī bhaktyā satyavratena ha /
tayā prasannayā rājan divyadehaḥ kṛtaḥ kṣaṇāt

piśācatvaṃ gataṃ tasya pāpaṃ caiva kṣayaṃ gatam /
vipāpmā cātitejasvī sambhūtastatkṛpāmṛtāt

vasiṣṭho'pi prasannātmā jātaḥ śaktiprasādataḥ /
pitāpi ca babhūvāsya premayuktastvanugrahāt

rājyaṃ śaśāsa dharmātmā mṛte pitari pārthivaḥ /
īje ca vividhairyajñairdevadevīṃ sanātanīm

tasya putro babhūvātha hariścandraḥ suśobhanaḥ /
lakṣaṇaiḥ śāstranirdiṣṭaiḥ saṃyutaścātisundaraḥ

yuvarājaṃ sutaṃ kṛtvā triśaṅkuḥ pṛthivīpatiḥ /
mānuṣeṇa śarīreṇa svargaṃ bhoktuṃ mano dadhe

vasiṣṭhasyāśramaṃ gatvā praṇamya vidhivannṛpaḥ /
uvāca vacanaṃ prītaḥ kṛtāñjalipuṭastadā

rājovāca -
brahmaputra mahābhāga sarvamantraviśārada /
vijñaptiṃ me sumanasā śrotumarhasi tāpasa

icchā me'dya samutpannā svargalokasukhāya ca /
anenaiva śarīreṇa bhogānbhoktumamānuṣān

apsarobhiśca saṃvāsaḥ krīḍituṃ nandane vane /
devagandharvagānaṃ ca śrotavyaṃ madhuraṃ kila

yājaya tvaṃ makhenāśu tādṛśena mahāmune /
yathānena śarīreṇa vase lokaṃ triviṣṭapam

samartho'si muniśreṣṭha kuru kāryaṃ mamādhunā /
prāpayāśu makhaṃ kṛtvā devalokaṃ durāsadam

vasiṣṭha uvāca -
rājan mānuṣadehena svarge vāsaḥ sudurlabhaḥ /
mṛtasya hi dhruvaṃ svargaḥ kathitaḥ puṇyakarmaṇā

tasmād‌ bibhemi sarvajña durlabhācca manorathāt /
apsarobhiśca saṃvāso jīvamānasya durlabhaḥ

kuru yajñānmahābhāga mṛtaḥ svargamavāpsyasi /
vyāsa uvāca -
ityākarṇya vacastasya rājā paramadurmanāḥ

uvāca vacanaṃ bhūyo vasiṣṭhaṃ pūrvaroṣitam /
na tvaṃ yājayase brahman garvāveśācca māṃ yadi

anyaṃ purohitaṃ kṛtvā yakṣye'haṃ kila sāmpratam /
tacchrutvā vacanaṃ tasya vasiṣṭhaḥ kopasaṃyutaḥ

śaśāpa bhūpatiṃ ceti cāṇḍālo bhava durmate /
anena tvaṃ śarīreṇa śvapaco bhava satvaram

svargakṛntana pāpiṣṭha surabhīvadhadūṣita /
brahmapat‍nīharocchinna dharmamārgavidūṣaka

na te svargagatiḥ pāpa mṛtasyāpi kathañcana /
vyāsa uvāca -
ityukto guruṇā rājaṃstriśaṅkustatkṣaṇādapi

tatra tena śarīreṇa babhūva śvapacākṛtiḥ /
kuṇḍale'śmamaye vāpi jāte tasya ca tatkṣaṇāt

dehe candanagandhaśca vigandho hyabhavattadā /
nīlavarṇe'tha sañjāte divye pītāmbare tanau

rājavarṇo'bhavaddehaḥ śāpāttasya mahātmanaḥ /
śaktyupāsakaroṣeṇa phalametadabhūnnṛpa

tasmācchrīśaktibhakto hi nāvamānyaḥ kadācana /
gāyatrījapaniṣṭho hi vasiṣṭho munisattamaḥ

dṛṣṭvā nindyaṃ nijaṃ dehaṃ rājā duḥkhamavāptavān /
na jagāma gṛhe dīno vanamevābhito yayau

cintayāmāsa duḥkhārtāstriśaṅkuḥ śokavihvalaḥ /
kiṃ karomi kva gacchāmi deho me'tīva ninditaḥ

kartavyaṃ naiva paśyāmi yena me duḥkhasaṃkṣayaḥ /
gṛhe gacchāmi cetputraḥ pīḍito'dya bhaviṣyati

bhāryāpi śvapacaṃ dṛṣṭvā nāṅ‌gīkāraṃ kariṣyati /
sacivā nādariṣyanti vīkṣya māmīdṛśaṃ punaḥ

jñātayo bandhuvargaśca saṅgato na bhajiṣyati /
sarvaistaktasya me nūnaṃ jīvitānmaraṇaṃ varam

viṣaṃ vā bhakṣayitvādya patitvā vā jalāśaye /
kṛtvā vā kaṇṭhapāśaṃ ca dehatyāgaṃ karomyaham

agnau vā jvalite dehaṃ juhomi vidhivad‌ balāt /
kṛtvā vānaśanaṃ prāṇāṃstyajāmi dūṣitānbhṛśam

ātmahatyā bhavennūnaṃ punarjanmani janmani /
śvapacatvaṃ ca śāpaśca hatyādoṣād‌bhavedapi

punarvicārya bhūpālaścetasā samacintayat /
ātmahatyā na kartavyā sarvathaiva mayādhunā

bhoktavyaṃ svakṛtaṃ karma dehenānena kānane /
bhogenāsya vipākasya bhavitā sarvathā kṣayaḥ

prārabdhakarmaṇāṃ bhogādanyathā na kṣayo bhavet /
tasmānmayātra bhoktavyaṃ kṛtaṃ karma śubhāśubham

kurvanpuṇyāśramābhyāśe tīrthānāṃ sevanaṃ tathā /
smaraṇaṃ cāmbikāyāstu sādhūnāṃ sevanaṃ tathā

evaṃ karmakṣayaṃ nūnaṃ kariṣyāmi vane vasan /
bhāgyayogātkadācittu bhavetsādhusamāgamaḥ

iti sañcintya manasā tyaktvā svanagaraṃ nṛpaḥ /
gaṅgātīre gataḥ kāmaṃ śocaṃstatraiva saṃsthitaḥ

hariścandrastadā jñātvā pituḥ śāpasya kāraṇam /
duḥkhitaḥ sacivāṃstatra preṣayāmāsa pārthivaḥ

sacivāstatra gatvā''śu tamūcuḥ praśrayānvitāḥ /
praṇamya śvapacākāraṃ niḥśvasantaṃ muhurmuhuḥ

rājan putreṇa te nūnaṃ preṣitānsamupāgatān /
avehi sacivāṃstvaṃ no hariścandrājñayā sthitān

yuvarājasutaḥ prāha yattacchṛṇu narādhipa /
ānayadhvaṃ nṛpaṃ yūyaṃ sammānya pitaraṃ mama

tasmād‌rājan samāgaccha rājyaṃ prati gatavyathaḥ /
sevāṃ sarve kariṣyanti sacivāśca prajāstathā

guruṃ prasādayiṣyāmaḥ sa yathā tu dayeta vai /
prasanno'sau mahātejā duḥkhasyāntaṃ kariṣyati

iti putreṇa te rājan kathitaṃ bahudhā kila /
tasmād‌ gamanamevāśu rocatāṃ nijasadmani

vyāsa uvāca -
iti teṣāṃ nṛpaḥ śrutvā bhāṣitaṃ śvapacākṛtiḥ /
svagṛhaṃ gamanāyāsau na matiṃ kṛtavānataḥ

tānuvāca tadā vākyaṃ vrajantu sacivāḥ puram /
gatvā puraṃ mahābhāgā bruvantu vacanācca me

nāgamiṣyāmyahaṃ putra kuru rājyamatandritaḥ /
mānayanbrāhmaṇāndevānyajanyajñairanekaśaḥ

nāhaṃ śvapacaveṣeṇa garhitena mahātmabhiḥ /
āgamiṣyāmyayodhyāyāṃ sarve gacchantu mā ciram

putraṃ siṃhāsane sthāpya hariścandraṃ mahābalam /
kurvantu rājyakarmāṇi yūyaṃ tatra mamājñayā

ityādiṣṭāstataste tu ruruduścāturā bhṛśam /
sacivā niryayustūrṇaṃ natvā taṃ ca vanāśramāt

ayodhyāyāmupāgatya puṇye'hni vidhipūrvakam /
abhiṣekaṃ tadā cakrurhariścandrasya mūrdhni te

abhiṣiktastu tejasvī sacivaiśca nṛpājñayā /
rājyaṃ cakāra dharmiṣṭhaḥ pitaraṃ cintayanbhṛśam

iti śrīmaddevībhāgavate mahāpurāṇe'ṣṭādaśasāhasryāṃ saṃhitāyāṃ
saptamaskandhe triśaṅkūpākhyānavarṇanaṃ nāma dvādaśo'dhyāyaḥ