Devi Bhagavata Purana · Chapter 6.5

devīsamārādhanāya devakṛtastutivarṇanam
vyāsa uvāca
tathā cintāturānvīkṣya sarvānmarvārthatattvavit /
prāha premabharod‌bhrāntānmādhavo medinīpate

viṣṇuruvāca
kiṃ maunamāśritā yūyaṃ bruvantu kāraṇaṃ surāḥ /
sadasadvāpi yacchrutvā yatiṣye tannivāraṇe

devā ūcuḥ
kimajñātaṃ tava vibho triṣu lokeṣu vartate /
sarvaṃ veda bhavānkāryaṃ kiṃ pṛcchasi punaḥ punaḥ

tvayā pūrvaṃ balirbaddhaḥ śakro devādhipaḥ kṛtaḥ /
vāmanaṃ vapurāsthāya krāntaṃ tribhuvanaṃ padaiḥ

amṛtaṃ tvāhṛtaṃ viṣṇo daityāśca vinipātitāḥ /
tvaṃ prabhuḥ sarvadevānāṃ sarvāpadvinivāraṇe

viṣṇuruvāca
na bhetavyaṃ suravarā vedmyupāyaṃ susammatam /
tadvadhāya pravakṣyāmi yena saukhyaṃ bhaviṣyati

avaśyaṃ karaṇīyaṃ me bhavatāṃ hitamātmanā /
buddhyā balena cārthena yena kenacchalena vā

upāyāḥ khalu catvāraḥ kathitāstattvadarśibhiḥ /
sāmādayaḥ suhṛtsveva durhṛdeṣu viśeṣataḥ

brahmaṇāsya varo dattastapasā''rādhitena ca /
durjayatvaṃ ca samprāptaṃ varadānaprabhāvataḥ

ajeyaḥ sarvabhūtānāṃ tvaṣṭrā samupapāditaḥ /
tato balena vṛddhiṃ sa prāptaḥ parapurañjayaḥ

duḥsādhyo'sau surāḥ śatrurvinā sāmapratāraṇam /
pralobhya vaśamāneyo hantavyastu tataḥ param

gacchadhvaṃ sarvagandharvā yatrāsti balavattaraḥ /
sāma tasya prayuñjadhvaṃ tata enaṃ vijeṣyatha

saṅgamya śapathātkṛtvā viśvāsya samayena hi /
mitratvaṃ ca samādhāya hantavyaḥ prabalo ripuḥ

adṛśyaḥ sampravekṣyāmi vajramasya varāyudham /
sāhāyyaṃ ca kariṣyāmi śakrasyāhaṃ surottamāḥ

samayaṃ ca pratīkṣadhvaṃ sarvathaivāyuṣaḥ kṣaye /
maraṇaṃ vibudhāstasya nānyathā sambhaviṣyati

gacchadhvamṛṣibhiḥ sārdhaṃ gandharvāḥ kapaṭāvṛtāḥ /
indreṇa saha mitratvaṃ kurudhvaṃ vākyadānataḥ

yathā sa yāti viśvāsaṃ tathā kāryaṃ pratāraṇam /
gupto'haṃ sampravekṣyāmi paviṃ sañchāditaṃ dṛḍham

viśvastaṃ maghavā śatruṃ haniṣyati na cānyathā /
viśvāsasya kṛte pāpaṃ kṛtvā śakrastu pṛṣṭhataḥ

matsahāyo'tha vajreṇa śātayiṣyati pāpinam /
na doṣo'tra śaṭhe śatrau śāṭhyameva prakurvataḥ

nānyathā balavānvadhyaḥ śūradharmeṇa jāyate /
vāmanaṃ rūpamādhāya mayāyaṃ vañcito baliḥ

kṛtvā ca mohinīveṣaṃ daityāḥ sarve'pivañcitāḥ /
bhavantaḥ sahitāḥ sarve devīṃ bhagavatīṃ śivām

gacchadhvaṃ śaraṇaṃ bhāvaiḥ stotramantraiḥ surottamāḥ /
sāhāyyaṃ sā yogamāyā bhavatāṃ saṃvidhāsyati

vandāmahe sadā devīṃ sāttvikīṃ prakṛtiṃ parām /
siddhidāṃ kāmadāṃ kāmāṃ durāpāmakṛtātmabhiḥ

indro'pi tāṃ samārādhya haniṣyati ripuṃ raṇe /
mohinī sā mahāmāyā mohayiṣyati dānavam

mohito māyayā vṛtraḥ sukhasādhyo bhaviṣyati /
prasannāyāṃ parāmbāyāṃ sarvaṃ sādhyaṃ bhaviṣyati

nocenmanorathāvāptirna kasyāpi bhaviṣyati /
antaryāmisvarūpā sā sarvakāraṇakāraṇā

tasmāttāṃ viśvajananīṃ prakṛtiṃ paramādṛtāḥ /
bhajadhvaṃ sāttvikairbhāvaiḥ śatrunāśāya sattamāḥ

purā mayāpi saṃgrāmaṃ kṛtvā paramadāruṇam /
pañcavarṣasahasrāṇi nihatau madhukaiṭabhau

stutā mayā tadātyarthaṃ prasannā prakṛtiḥ parā /
mohitau tau tadā daityau chalena ca mayā hatau

vipralabdhau mahābāhū dānavau madagarvitau /
tathā kurudhvaṃ prakṛterbhajanaṃ bhāvasaṃyutāḥ

sarvathā kāryasiddhiṃ sā kariṣyati surottamāḥ /
evaṃ te dattamatayo viṣṇunā prabhaviṣṇunā

jagmuste meruśikharaṃ mandāradrumamaṇḍitam /
ekānte saṃsthitā devāḥ kṛtvā dhyānaṃ japaṃ tapaḥ

tuṣṭuvurjagatāṃ dhātrīṃ sṛṣṭisaṃhārakāriṇīm /
bhaktakāmadughāmambāṃ saṃsārakleśanāśinīm

devā ūcuḥ
devi prasīda paripāhi surānprataptān
vṛtrāsureṇa samare paripīḍitāṃśca /
dīnārtināśanapare paramārthatattve
prāptāṃstvadaṅ‌ghrikamalaṃ śaraṇaṃ sadaiva

tvaṃ sarvaviśvajananī paripālayāsmān
putrānivātipatitān ripusaṅkaṭe'smin /
mātarna te'styaviditaṃ bhuvanatraye'pi
kasmādupekṣasi surānasuraprataptān

trailokyametadakhilaṃ vihitaṃ tvayaiva
brahmā hariḥ paśupatistava vāsanotthāḥ /
kurvanti kāryamakhilaṃ svavaśā na te te
bhrūbhaṅgacālanavaśādviharanti kāmam

mātā sutānparibhavātparipāti dīnān
rītistvayaiva racitā prakaṭāparādhān /
kasmānna pālayasi devi vināparādhā-
nasmāṃstvadaṅ‌ghriśaraṇānkaruṇārasābdhe

nūnaṃ madaṅ‌ghribhajanāptapadāḥ kilaite
bhaktiṃ vihāya vibhave sukhabhogalubdhāḥ /
neme kaṭākṣaviṣayā iti cenna caiṣā
rītiḥ sute jananakartari cāpi dṛṣṭā

doṣo na no'tra janani pratibhāti citte
yatte vihāya bhajanaṃ vibhave nimagnāḥ /
mohastvayā viracitaḥ prabhavatyasau na-
stasmātsvabhāvakaruṇe dayase kathaṃ na

pūrvaṃ tvayā janani daityapatirbaliṣṭho
vyāpādito mahiṣarūpadharaḥ kilājau /
asmatkṛte sakalalokabhayāvaho'sau
vṛtraṃ kathaṃ na bhayadaṃ vidhunoṣi mātaḥ

śumbhastathātibalavānanujo niśumbha-
stau bhrātarau tadanugā nihatā hatau ca /
vṛtraṃ tathā jahi khalaṃ prabalaṃ dayārdre
mattaṃ vimohaya tathā na bhavedyathāsau

tvaṃ pālayādya vibudhānasureṇa mātaḥ
santāpitānatitarāṃ bhayavihvalāṃśca /
nānyo'sti ko'pi bhuvaneṣu surārtihantā
yaḥ kleśajālamakhilaṃ nidahetsvaśaktyā

vṛtre dayā tava yadi prathitā tathāpi
jahyenamāśu janaduḥkhakaraṃ khalaṃ ca /
pāpātsamuddhara bhavāni śaraiḥ punānā
nocetprayāsyati tamo nanu duṣṭabuddhiḥ

te prāpitāḥ suravanaṃ vibudhārayo ye
hatvā raṇe'pi viśikhaiḥ kila pāvitāste /
trātā na kiṃ nirayapātabhayāddayārdre
yacchatravo'pi na hi kiṃ vinihaṃsi vṛtram

jānīmahe ripurasau tava sevako na
prāyeṇa pīḍayati naḥ kila pāpabuddhiḥ /
yastāvakastviha bhavedamarānasau kiṃ
tvatpādapaṅkajaratānnanu pīḍayedvā

kurmaḥ kathaṃ janani pūjanamadya te'mba
puṣpādikaṃ tava vinirmitameva yasmāt /
mantrā vayaṃ ca sakalaṃ paraśaktirūpaṃ
tasmād‌bhavāni caraṇe praṇatāḥ sma nūnam

dhanyāsta eva manujā hi bhajanti bhaktyā
pādāmbujaṃ tava bhavābdhijaleṣu potam /
yaṃ yogino'pi manasā satataṃ smaranti
mokṣārthino vigatarāgavikāramohāḥ

ye yājñikāḥ sakalavedavido'pi nūnaṃ
tvāṃ saṃsmaranti satataṃ kila homakāle /
svāhāṃ tu tṛptijananīmamareśvarāṇāṃ
bhūyaḥ svadhāṃ pitṛgaṇasya ca tṛptihetum

medhāsi kāntirasi śāntirapi prasiddhā
buddhistvameva viśadārthakarī narāṇām /
sarvaṃ tvameva vibhavaṃ bhuvanatraye'smi-
nkṛtvā dadāsi bhajatāṃ kṛpayā sadaiva

vyāsa uvāca
evaṃ stutā surairdevī pratyakṣā sābhavattadā /
cārurūpadharā tanvī sarvābharaṇabhūṣitā

pāśāṃkuśavarābhītilasad‌bāhucatuṣṭayā /
raṇatkiṅ‌kiṇikājālarasanābaddhasatkaṭiḥ

kalakaṇṭhīravā kāntā kvaṇatkaṅkaṇanūpurā /
candrakhaṇḍasamābaddharat‍namaulivirājitā

mandasmitāravindāsyā netratrayavibhūṣitā /
pārijātaprasūnācchanālavarṇasamaprabhā

raktāmbaraparīdhānā raktacandanacarcitā /
prasādasumukhī devī karuṇārasasāgarā

sarvaśṛṅgāraveṣāḍhyā sarvadvaitāraṇiḥ parā /
sarvajñā sarvakartrī ca sarvādhiṣṭhānarūpiṇī

sarvavedāntasaṃsiddhā saccidānandarūpiṇī /
praṇemustāṃ samālokya surā devīṃ puraḥsthitām

tānāha praṇatānambā kiṃ vaḥ kāryaṃ bruvantu mām /
devā ūcuḥ
mohayainaṃ ripuṃ vṛtraṃ devānāmatiduḥkhadam

yathā viśvasate devāṃstathā kuru vimohitam /
āyudhe ca balaṃ dehi hataḥ syādyena vā ripuḥ

vyāsa uvāca
tathetyuktvā bhagavatī tatraivāntaradhīyata /
svāni svāni niketāni jagmurdevā mudānvitāḥ

iti śrīmaddevībhāgavate mahāpurāṇe'ṣṭādaśasāhasryāṃ saṃhitāyāṃ ṣaṣṭhaskandhe
devīsamārādhanāya devakṛtastutivarṇanaṃ nāma pañcamo'dhyāyaḥ