Devi Bhagavata Purana · Chapter 6.16

haihayairdhanāharaṇena saha bhṛgūṇāṃ vadhavarṇanam
janamejaya uvāca
kule kasya samutpannāḥ kṣatriyā haihayāśca te /
brahmahatyāmanādṛtya nijaghnurbhārgavāṃśca ye

vairasya kāraṇaṃ teṣāṃ kiṃ me brūhi pitāmaha /
nimittena vinā krodhaṃ kathaṃ kurvanti sattamāḥ

vairaṃ purohitaiḥ sārdhaṃ kasmātteṣāmajāyata /
nālpahetorhi tadvairaṃ kṣatriyāṇāṃ bhaviṣyati

anyathā brāhmaṇān pūjyānkathaṃ jaghnuranāgasaḥ /
bāhujā balavanto'pi pāpabhītāḥ kathaṃ na te

svalpe'parādhe ko hanyādvāḍavānkṣatriyarṣabhaḥ /
sandeho me muniśreṣṭha kāraṇaṃ vaktumarhasi

sūta uvāca
iti pṛṣṭastadā tena rājñā satyavatīsutaḥ /
uvāca paramaprītaḥ kathāṃ saṃsmṛtya cetasā

vyāsa uvāca
śṛṇu pārikṣite vārtāṃ kṣatriyāṇāṃ purātanīm /
āścaryakāriṇīṃ samyagviditāṃ ca purā mayā

kārtavīryeti nāmnābhūddhaihayaḥ pṛthivīpatiḥ /
sahasrabāhurbalavānarjuno dharmatatparaḥ

dattātreyasya śiṣyo'bhūdavatāro hareriva /
siddhaḥ sarvārthadaḥ śākto bhṛgūṇāṃ yājya eva saḥ

yajvā paramadharmiṣṭhaḥ sadā dānaparāyaṇaḥ /
dadau vittaṃ bhṛgubhyo'sau kṛtvā yajñānanekaśaḥ

dhaninaste dvijā jātā bhṛgavo nṛpadānataḥ /
hayarat‍nasamṛddhyāḍhyāḥ sañjātāḥ prathitā bhuvi

svaryāte nṛpaśārdūle kārtavīryārjune punaḥ /
haihayā nirdhanā jātāḥ kālena mahatā nṛpa

dhanakāryaṃ samutpannaṃ haihayānāṃ kadācana /
yāciṣṇavo'bhijagmustānbhūgūṃste haihayā nṛpa

vinayaṃ kṣatriyāḥ kṛtvāpyayācanta dhanaṃ bahu /
na daduste'tilobhārtā nāsti nāstītivādinaḥ

bhūmau ca nidadhuḥ kecid‌bhṛgavo dhanamuttamam /
daduḥ kecid‌dvijātibhyo jñātvā kṣatriyato bhayam

kṛtvā sthānāntare dravyaṃ brāhmaṇā bhayavihvalāḥ /
tyaktvā''śramānyayuḥ sarve bhṛgavastṛṣṇayānvitāḥ

yājyāṃśca duḥkhitāndṛṣṭvā na dadurlobhamohitāḥ /
palāyitvā gatāḥ sarve giridurgānupāśritāḥ

tataste haihayāstāta duḥkhitāḥ kāryagauravāt /
bhṛgūṇāmāśramāñjagmurdravyārthaṃ kṣatriyarṣabhāḥ

bhṛgūṃstu nirgatānvīkṣya śūnyāṃstyaktyā gṛhānatha /
cakhanurbhūtalaṃ tatra dravyārthaṃ haihayā bhṛśam

khanatādhigataṃ vittaṃ kenacid‌bhṛguveśmani /
dadṛśuḥ kṣatriyāḥ sarve tadvittaṃ śramakarśitāḥ

yatra yatra samutpannaṃ bhūri dravyaṃ mahītalāt /
tadā te pārśvabhāgasthabrāhmaṇānāṃ gṛhāṇyapi

nirbhidya haihayā dravyaṃ dadṛśurdhanalipsayā /
brāhmaṇāścukuśaḥ sarve bhītāśca śaraṇaṃ gatāḥ

aticinvatsu viprāṇāṃ bhavanānniḥsṛtaṃ bahu /
nijaghnustāñcharaiḥ kopādvāḍavāñcharaṇāgatān

yayuste giridurgāṃśca yatra vai bhṛgavaḥ sthitāḥ /
āgarbhādanukṛntantaśceruścaiva mahīmimām

prāptānprāptānbhṛgūnsarvānnijaghnurniśitaiḥ śaraiḥ /
ābālavṛddhānaparānavamanya ca pātakam

evamutpāṭyamāneṣu bhārgaveṣu yatastataḥ /
hanyurgarbhāṃśca nārīṇāṃ gṛhītvā haihayā bhṛśam

rurudustāḥ striyaḥ kāmaṃ kurarya iva duḥkhitāḥ /
garbhāśca kṛntitā yāsāṃ kṣatriyaiḥ pāpaniścayaiḥ

anye'pyāhuśca tāndṛptānmunayastīrthavāsinaḥ /
muñcantu kṣatriyāḥ krodhaṃ brāhmaṇeṣu bhayāvaham

ayuktametadārabdhaṃ bhavad‌bhiḥ karma garhitam /
yad‌garbhānbhṛgupat‍nīnāṃ nihanyuḥ kṣatriyarṣabhāḥ

atyugrapuṇyapāpānāmihaiva phalamāpnuyāt /
tasmājjugupsitaṃ karma tyaktavyaṃ bhūtimicchatā

tānāhurhaihayāḥ kruddhā munīnatha dayāparān /
bhavantaḥ sādhavaḥ sarve nārthajñāḥ pāpakarmaṇām

ebhirhṛtaṃ dhanaṃ sarvaṃ pūrvajānāṃ mahātmanām /
vañcayitvā chalābhijñairmārge pāṭaccarairiva

ete pratārakā dambhāstādṛśā bakavṛttayaḥ /
utpanne ca mahākārye prārthitā vinayena te

na daduḥ prārthitaṃ viprāḥ pādavṛddhyāpi yācitāḥ /
nāstītivādinaḥ stabdhāḥ duḥkhitānvīkṣya yājyakān

dhanaṃ prāptaṃ kārtavīryād‌rakṣitaṃ kena hetunā /
na kṛtāḥ kratavaḥ kiṃ tairdānaṃ cārthiṣu bhūriśaḥ

na sañcitavyaṃ vipraistu dhanaṃ cāpi kadācana /
yaṣṭavyaṃ vidhivaddeyaṃ bhoktavyaṃ ca yathāsukham

dravye caurabhayaṃ proktaṃ tathā rājabhayaṃ dvijāḥ /
vahnerbhayaṃ mahāghoraṃ tathā dhūrtabhayaṃ mahat

yena kenāpyupāyena dhanaṃ tyajati rakṣakam /
athavāsau mṛto yāti dravyaṃ tyaktvā hyasad‌gatim

pādavṛddhyā tathāsmābhiḥ prārthitaṃ vinayānvitaiḥ /
tathāpi lobhasandigdhairna dattaṃ naḥ purohitaiḥ

dānaṃ bhogastathā nāśo dhanasya gatirīdṛśī /
dānabhogau kṛtīnāṃ ca nāśaḥ pāpātmanāṃ kila

na dātā na ca yo bhoktā kṛpaṇo guptitatparaḥ /
rājñāsau sarvathā daṇḍyo vañcako duḥkhabhāṅnaraḥ

tasmādvayaṃ gurūnetānvañcakānbrāhmaṇādhamān /
hantuṃ samudyatāḥ sarve na krodhavyaṃ mahātmabhiḥ

vyāsa uvāca
ityuktvā hetumadvākyaṃ tānāśvāsya munīnatha /
viceruśca vicinvānā bhṛgudārānanekaśaḥ

bhayārtā bhṛgupat‍nyastu himavantaṃ dharādharam /
prapedire rudantyaśca vepamānāḥ kṛśā bhṛśam

evaṃ te haihayairviprāḥ pīḍitā dhanakāmukaiḥ /
nihatāśca yathākāmaṃ saṃrabdhaiḥ pāpakarmabhiḥ

lobha eva manuṣyāṇāṃ dehasaṃstho mahāripuḥ /
sarvaduḥkhākaraḥ prokto duḥkhadaḥ prāṇanāśakaḥ

sarvapāpasya mūlaṃ hi sarvadā tṛṣṇayānvitaḥ /
virodhakṛttrivarṇānāṃ sarvārteḥ kāraṇaṃ tathā

lobhāttyajanti dharmaṃ vai kuladharmaṃ tathaiva hi /
mātaraṃ bhrātaraṃ hanti pitaraṃ bāndhavaṃ tathā

guruṃ mitraṃ tathā bhāryāṃ putraṃ ca bhaginīṃ tathā /
lobhāviṣṭo na kiṃ kuryādakṛtyaṃ pāpamohitaḥ

krodhātkāmādahaṅkārāllobha eva mahāripuḥ /
prāṇāṃstyajati lobhena kiṃ punaḥ syādanāvṛtam

pūrvajāste mahārāja dharmajñāḥ satpathe sthitāḥ /
pāṇḍavāḥ kauravāścaiva lobhena nidhanaṃ gatāḥ

yatra bhīṣmaśca droṇaśca kṛpaḥ karṇaśca bāhlikaḥ /
bhīmaseno dharbhaputrastathaivārjunakeśavau

tathāpi yuddhamatyugraṃ kṛtaṃ taiśca parasparam /
kuṭumbakadanaṃ bhūri kṛtaṃ lobhāturairiha

hato droṇo hato bhīṣmastathaiva pāṇḍavātmajāḥ /
bhrātaraḥ pitaraḥ putrāḥ sarve vai nihatā raṇe

tasmāllobhābhibhūtastu kiṃ na kuryānnaraḥ kila /
haihayairnihatāḥ sarve bhṛgavaḥ pāpabuddhibhiḥ

iti śrīmaddevībhāgavate mahāpurāṇe'ṣṭādaśasāhasryāṃ saṃhitāyāṃ ṣaṣṭhaskandhe
haihayairdhanāharaṇena saha bhṛgūṇāṃ vadhavarṇanaṃ nāma ṣoḍaśo'dhyāyaḥ