Devi Bhagavata Purana · Chapter 6.17

haihayānāmutpattiprasaṅge ramāviṣṇusaṃvādavarṇanam
janamejaya uvāca
kathaṃ tāśca striyaḥ sarvā bhṛgūṇāṃ duḥkhasāgarāt /
muktā vaṃśaḥ punasteṣāṃ brāhmaṇānāṃ sthiro'bhavat

haihayaiḥ kiṃ kṛtaṃ kāryaṃ hatvā tānbrāhmaṇānapi /
kṣatriyairlobhasaṃyuktaiḥ pāpācārairvadasva tat

na tṛptirasti me brahman pibataste kathāmṛtam /
pāvanaṃ sukhadaṃ nṝṇāṃ paraloke phalapradam

vyāsa uvāca
śṛṇu rājanpravakṣyāmi kathāṃ pāpapraṇāśinīm /
yathā striyastu tā muktā duḥkhāttasmādduratyayāt

bhṛgupat‍nyo yadā rājan himavantaṃ giriṃ gatāḥ /
bhayatrastā vibhagnāśā haihayaiḥ pīḍitā bhṛśam

gaurīṃ tatra tu saṃsthāpya mṛṇmayīṃ saritastaṭe /
upoṣaṇaparāścakrurniścayaṃ maraṇaṃ prati

svapne gatvā tadā devī prāha tāḥ pramadottamāḥ /
yuṣmāsu madhye kasyāścid‌bhavitā corujaḥ pumān

madaṃśaśaktisambhinnaḥ sa vaḥ kāryaṃ vidhāsyati /
ityādiśya parāmbā sā paścādantarhitābhavat

jāgṛtāstu tataḥ sarvā mudamāpurvarāṅganāḥ /
kācittāsāṃ bhayodvignā kāminī caturā bhṛśam

dadhāra coruṇaikena garbhaṃ sā kulavṛddhaye /
palāyanaparā dṛṣṭā kṣatriyairbrāhmaṇī yadā

vihvalā tejasā yuktā tadā te dudruvurbhṛśam /
gṛhyatāṃ vadhyatāṃ nārī sagarbhā yāti satvarā

iti bruvantaḥ samprāptāḥ kāminīṃ khaḍgapāṇayaḥ /
sā bhayārtā tu tāndṛṣṭvā ruroda samupāgatān

garbhasya rakṣaṇārthaṃ sā cukrośātibhayāturā /
rudatīṃ mātaraṃ śrutvā dīnāṃ prāṇavivarjitām

nirādhārāṃ krandamānāṃ kṣatriyairbhṛśatāpitām /
gṛhītāmiva siṃhena sagarbhāṃ hariṇīṃ yathā

sāśrunetrāṃ vepamānāṃ saṅkrudhya bālakastadā /
bhittvoruṃ nirjagāmāśu garbhaḥ sūrya ivāparaḥ

muṣṇandṛṣṭīḥ kṣatriyāṇāṃ tejasā bālakaḥ śubhaḥ /
darśanād‌bālakasyāśu sarve jātā vilocanāḥ

babhramurgiridurgeṣu janmāndhā iva kṣatriyāḥ /
cintitaṃ manasā sarvaiḥ kimetaditi sāmpratam

sarve cakṣurvihīnā yajjātā sma bāladarśanāt /
brāhmaṇyāstu prabhāvo'yaṃ satīvratabalaṃ mahat

kṣaṇādvāmoghasaṅkalpāḥ kiṃ kariṣyantiduḥkhitāḥ /
iti sañcintya manasā netrahīnā nirāśrayāḥ

brāhmaṇīṃ śaraṇaṃ jagmurhaihayā gatacetasaḥ /
praṇemustāṃ bhayatrastāṃ kṛtāñjalipuṭāśca te

ūcuścaināṃ bhayodvignāṃ dṛṣṭyarthaṃ kṣatriyarṣabhāḥ /
prasīda subhage mātaḥ sevakāste vayaṃ kila

kṛtāparādhā rambhoru kṣatriyāḥ pāpabuddhayaḥ /
darśanāttava tanvaṅ‌gi jātāḥ sarve vilocanāḥ

mukhaṃ te naiva paśyāmo janmāndhā iva bhāmini /
ad‌bhutaṃ te tapo vīryaṃ kiṃ kurmaḥ pāpakāriṇaḥ

śaraṇaṃ te prapannāḥ smo dehi cakṣūṃṣi mānade /
andhatvaṃ maraṇādugraṃ kṛpāṃ kartuṃ tvamarhasi

punardṛṣṭipradānena sevakānkṣatriyānkuru /
uparamya ca gacchema sahitāḥ pāpakarmaṇaḥ

ataḥ paraṃ na kartavyamīdṛśaṃ karma karhicit /
bhārgavāṇāṃ tu sarveṣāṃ sevakāḥ smo vayaṃ kila

ajñānādyatkṛtaṃ pāpaṃ kṣantavyaṃ tattvayādhunā /
vairaṃ nātaḥ paraṃ kvāpi bhṛgubhiḥ kṣatriyaiḥ saha

kartavyaṃ śapathaiḥ samyagvartitavyaṃ tu haihayaiḥ /
saputrā bhava suśroṇi praṇatāḥ smo vayaṃ ca te

prasādaṃ kuru kalyāṇi na dviṣyāmaḥ kadācana /
vyāsa uvāca
iti teṣāṃ vacaḥ śrutvā brāhmaṇī vismayānvitā

tānāha praṇatānduḥsthānāśvāsya gatalocanān /
gṛhītā na mayā dṛṣṭiryuṣmākaṃ kṣatriyāḥ kila

nāhaṃ ruṣānvitā satyaṃ kāraṇaṃ śṛṇutādya yat /
ayaṃ ca bhārgavo nūnamūrujaḥ kupito'dya vaḥ

cakṣūṃṣi tena yuṣmākaṃ stambhitāni ruṣāvatā /
svabandhūnnihatāñjñātvā garbhasthānapi kṣatriyaiḥ

anāgaso dharmaparāṃstāpasāndhanakāmyayā /
garbhānapi yadā yūyaṃ bhṛgūnaghnaṃstu putrakāḥ

tadāyamūruṇā garbho mayā varṣaśataṃ dhṛtaḥ /
ṣaḍaṅgaścākhilo vedo gṛhīto'nena cāñjasā

garbhasthenāpi bālena bhṛguvaṃśavivṛddhaye /
so'pi pitṛvadhānnūnaṃ krotheddho hantumicchati

bhagavatyāḥ prasādena jāto'yaṃ mama bālakaḥ /
tejasā yasya divyena cakṣūṃṣi muṣitāni vaḥ

tasmādaurvaṃ sutaṃ me'dya yācadhvaṃ vinayānvitāḥ /
praṇipātena tuṣṭo'sau dṛṣṭiṃ vaḥ pratimokṣyati

vyāsa uvāca
tacchrutvā vacanaṃ tasyā haihayāstuṣṭuvuśca tam /
praṇemurvinayopetā ūrujaṃ munisattamam

sa santuṣṭo babhūvātha tānuvāca vicakṣuṣaḥ /
gacchadhvaṃ svagṛhānbhūpā mamākhyānakṛtaṃ vacaḥ

avaśyambhāvibhāvāste bhavanti devanirmitāḥ /
nātra śokastu kartavyaḥ puruṣeṇa vijānatā

pūrvavadṛṣayaḥ sarve prāpnuvantu yathāsukham /
vrajantu vigatakrodhā bhavanāni yathāsukham

iti tena samādiṣṭā haihayāḥ prāptalocanāḥ /
aurvamāmantrya jagmuste sadanāni yathāruci

brāhmaṇī taṃ sutaṃ divyaṃ gṛhītvā svāśramaṃ gatā /
pālayāmāsa bhūpāla tejasvinamatandritā

evaṃ te kathitaṃ rājan bhṛgūṇāṃ tu vināśanam /
lobhāviṣṭaiḥ kṣatriyaiśca yatkṛtaṃ pātakaṃ kila

janamejaya uvāca
śrutaṃ mayā mahatkarma kṣatriyāṇāñca dāruṇam /
kāraṇaṃ lobha evātra duḥkhadaścobhayostu saḥ

kiñcitpraṣṭumihecchāmi saṃśayaṃ vāsavīsuta /
haihayāste kathaṃ nāmnā khyātā bhuvi nṛpātmajāḥ

yadostu yādavāḥ kāmaṃ bharatād‌bhāratāstathā /
haihayaḥ ko'pi rājābhūtteṣāṃ vaṃśe pratiṣṭhitaḥ

tadahaṃ śrotumicchāmi kāraṇaṃ karuṇānidhe /
haihayāste kathaṃ jātāḥ kṣatriyāḥ kena karmaṇā

vyāsa uvāca
haihayānāṃ samutpattiṃ śṛṇu bhūpa savistarām /
purātanīṃ supuṇyāṃ ca kathāṃ pāpapraṇāśinīm

kasmiṃścitsamaye bhūpa sūryaputraḥ suśobhanaḥ /
revanteti ca vikhyāto rūpavānamitaprabhaḥ

[http://puranastudy.freeoda.com/pur_index3/uchchaish.htm uccaiḥśrava]samāruhya hayarat‍naṃ manoharam /
jagāma viṣṇusadanaṃ vaikuṇṭhaṃ bhāskarātmajaḥ

bhagavaddarśanākāṃkṣī hayārūḍho yadāgataḥ /
hayasthastu tadā dṛṣṭo lakṣmyāsau ravinandanaḥ

ramā vīkṣya hayaṃ divyaṃ bhrātaraṃ sāgarod‌bhavam /
rūpeṇa vismitā tasya tasthau stambhitalocanā

bhagavānapi taṃ dṛṣṭvā hayārūḍhaṃ manoharam /
āgacchantaṃ ramāṃ viṣṇuḥ papraccha praṇayātprabhuḥ

ko'yamāyāti cārvaṅ‌gi hayārūḍha ivāparaḥ /
smaratejastanuḥ kānte mohayanbhuvanatrayam

prekṣamāṇā tadā lakṣmīstaccittā daivayogataḥ /
novāca vacanaṃ kiñcitpṛṣṭāpi ca punaḥ punaḥ

vyāsa uvāca
aśvāsaktamatiṃ vīkṣya kāminīmatimohitām /
paśyantīṃ paramapremṇā cañcalākṣīṃ ca cañcalām

tāmāha bhagavānkuddhaḥ kiṃ paśyasi sulocane /
mohitā ca hariṃ dṛṣṭvā pṛṣṭā naivābhibhāṣase

sarvatra ramase yasmādramā tasmād‌bhaviṣyasi /
cañcalatvāccaletyevaṃ sarvathaiva na saṃśayaḥ

prākṛtā ca yathā nārī nūnaṃ bhavati cañcalā /
tathā tvamapi kalyāṇi sthirā naiva kadācana

tvaṃ hayaṃ matsamīpasthā samīkṣya yadi mohitā /
vaḍavā bhava vāmoru martyaloke'tidāruṇe

iti śaptā ramā devī hariṇā daivayogataḥ /
ruroda vepamānā sā bhayabhītātiduḥkhitā

tamuvāca ramānātha śaṅ‌kitā cāruhāsinī /
praṇamya śirasā devaṃ svapatiṃ vinayānvitā

devadeva jagannātha karuṇākara keśava /
svalpe'parādhe govinda kasmācchāpaṃ dadāsi me

na kadācinmayā dṛṣṭaḥ krodhaste hīdṛśaḥ prabho /
kva gataste mayi snehaḥ sahajo na tu naśvaraḥ

vajrapātastu śatrau vai kartavyo na suhṛjjane /
sadāhaṃ varayogyā te śāpayogyā kathaṃ kṛtā

prāṇāṃstyakṣyāmi govinda paśyato'dya tavāgrataḥ /
kathaṃ jīve tvayā hīnā virahānalatāpitā

prasādaṃ kuru deveśa śāpādasmātsudāruṇāt /
kadā muktā samīpaṃ te prāpnomi sukhadaṃ vibhau

hariruvāca
yadā te bhavitā putraḥ pṛthivyāṃ matsamaḥ priye /
tadā māṃ prāpya tanvaṅ‌gi sukhitā tvaṃ bhaviṣyasi

iti śrīmaddevībhāgavate mahāpurāṇe'ṣṭādaśasāhasryāṃ saṃhitāyāṃ ṣaṣṭhaskandhe
haihayānāmutpattiprasaṅge ramāviṣṇusaṃvādavarṇanaṃ nāma saptadaśo'dhyāyaḥ