Devi Bhagavata Purana · Chapter 5.19

devīsāntvanam
vyāsa uvāca
atha pramuditāḥ sarve devā indrapurogamāḥ /
mahiṣaṃ nihataṃ dṛṣṭvā tuṣṭuvurjagadambikām

devā ūcuḥ
brahmā sṛjatyavati viṣṇuridaṃ maheśaḥ
śaktyā tavaiva harate nanu cāntakāle //
īśā na te'pi ca bhavanti tayā vihīnā-
stasmāttvameva jagataḥ sthitināśakartrī

kīrtirmatiḥ smṛtigatī karuṇā dayā tvaṃ
śraddhā dhṛtiśca vasudhā kamalājapā ca /
puṣṭiḥ kalātha vijayā girijā jayā tvaṃ
tuṣṭiḥ pramā tvamasi buddhirumā ramā ca

vidyā kṣamā jagati kāntirapīha medhā
sarvaṃ tvameva viditā bhuvanatraye'smin /
ābhirvinā tava tu śaktibhirāśu kartuṃ
ko vā kṣamaḥ sakalalokanivāsabhūme

tvaṃ dhāraṇā nanu na cedasi kūrmanāgau
dhartuṃ kṣamau kathamilāmapi tau bhavetām /
pṛthvī na cettvamasi vā gagane kathaṃ sthā-
syatyetadamba nikhilaṃ bahubhārayuktam

ye vā stuvanti manujā amarānvimūḍhā
māyāguṇaistava caturmukhaviṣṇurudrān /
śubhrāṃśuvahniyamavāyugaṇeśamukhyān
kiṃ tvāmṛte janani te prabhavanti kārye

ye juhvati pravitate'lpadhiyo'mba yajñe
vahnau surānsamadhikṛtya haviḥ samṛddham /
svāhā na cettvamasi te kathamāpuraddhā
tvāmeva kiṃ na hi yajanti tato hi mūḍhāḥ

bhogapradāsi bhavatīha carācarāṇāṃ
svāṃśairdadāsi khalu jīvanameva nityam /
svīyānsurāñjanani poṣayasīha yadva-
ttadvatparānapi ca pālayasīti hetoḥ

mātaḥ svayaṃviracitānvipine vinodā-
dvandhyānpalāśarahitāṃśca kaṭūṃśca vṛkṣān /
nocchedayanti puruṣā nipuṇāḥ kathañci-
ttasmāttvamapyatitarāṃ paripāsi daityān

yattvaṃ tu haṃsi raṇamūrdhni śarairarātī-
ndevāṅganāsuratakelimatīnviditvā /
dehāntare'pi karuṇārasamādadānā
tatte caritramidamīpsitapūraṇāya

citraṃ tvamī yadasubhī rahitā na santi
tvaccintitena danujāḥ prathitaprabhāvāḥ /
yeṣāṃ kṛte janani dehanibandhanaṃ te
krīḍārasastava na cānyataro'tra hetuḥ

prāpte kalāvahaha duṣṭatare ca kāle
na tvāṃ bhajanti manujā nanu vañcitāste /
dhūrtaiḥ purāṇacaturairhariśaṅkarāṇāṃ
sevāparāśca vihitāstava nirmitānām

jñātvā surāṃstava vaśānasurārditāṃśca
ye vai bhajanti bhuvi bhāvayutā vibhagnān /
dhṛtvā kare suvimalaṃ khalu dīpakaṃ te
kūpe patanti manujā vijale'tighore

vidyā tvameva sukhadāsukhadāpyavidyā
mātastvameva jananārtiharā narāṇām /
mokṣārthibhistu kalitā kila mandadhībhi-
rnārādhitā janani bhogaparaistathājñaiḥ

brahmā haraśca harirapyaniśaṃ śaraṇyaṃ
pādāmbujaṃ tava bhajanti surāstathānye /
tadvai na ye'lpamatayo manasā bhajanti
bhrāntāḥ patanti satataṃ bhavasāgare te

caṇḍi tvadaṅ‌ghrijalajottharajaḥprasādai-
rbrahmā karoti sakalaṃ bhuvanaṃ bhavādau /
śauriśca pāti khalu saṃharate harastu
tvāṃ sevate na manujastviha durbhago'sau

vāgdevatā tvamasi devi surāsurāṇāṃ
vaktuṃ na te'maravarāḥ prabhavanti śaktāḥ /
tvaṃ cenmukhe vasasi naiva yadaiva teṣāṃ
yasmād‌bhavanti manujā na hi tadvihīnāḥ

śapto haristu bhṛguṇā kupitena kāmaṃ
mīno babhūva kamaṭhaḥ khalu sūkarastu /
paścānnṛsiṃha iti yaśchalakṛddharāyāṃ
tānsevatāṃ janani mṛtyubhayaṃ na kiṃ syāt

śambhoḥ papāta bhuvi liṅgamidaṃ prasiddhaṃ
śāpena tena ca bhṛgorvipine gatasya /
taṃ ye narā bhuvi bhajanti kapālinaṃ tu
teṣāṃ sukhaṃ kathamihāpi paratra mātaḥ

yo'bhūd‌ gajānanagaṇādhipatirmaheśā-
ttaṃ ye bhajanti manujā vitathaprapannāḥ /
jānanti te na sakalārthaphalapradātrīṃ
tvāṃ devi viśvajananīṃ sukhasevanīyām

citraṃ tvayārijanatāpi dayārdrabhāvā-
ddhatvā raṇe śitaśarairgamitā dyulokam /
nocetsvakarmanicite niraye nitāntaṃ
duḥkhātiduḥkhagatimāpadamāpatetsā

brahmā haraśca harirapyuta garvabhāvā-
jjānanti te'pi vibudhā na tava prabhāvam /
ke'nye bhavanti manujā vidituṃ samarthāḥ
sammohitāstava guṇairamitaprabhāvaiḥ

kliśyanti te'pi munayastava durvibhāvyaṃ
pādāmbujaṃ na hi bhajanti vimūḍhacittāḥ /
sūryāgnisevanaparāḥ paramārthatattvaṃ
jñātaṃ na taiḥ śrutiśatairapi vedasāram

manye guṇāstava bhuvi prathitaprabhāvāḥ
kurvanti ye hi vimukhānnanu bhaktibhāvāt /
lokānsvabuddhiracitairvividhāgamaiśca
viṣṇvīśabhāskaragaṇeśaparānvidhāya

kurvanti ye tava padādvimukhānnarāgryā-
nsvoktāgamairhariharārcanabhaktiyogaiḥ /
teṣāṃ na kupyasi dayāṃ kuruṣe'mbike tvaṃ
tānmohamantranipuṇānprathayasyalaṃ ca

turye yuge bhavati cātibalaṃ guṇasya
turyasya tena mathitānyasadāgamāni /
tvāṃ gopayanti nipuṇāḥ kavayaḥ kalau vai
tvatkalpitānsuragaṇānapi saṃstuvanti

dhyāyanti muktiphaladāṃ bhuvi yogasiddhāṃ
vidyāṃ parāñca munayo'tiviśuddhasattvāḥ /
te nāpnuvanti jananījaṭhare tu duḥkhaṃ
dhanyāsta eva manujāstvayi ye vilīnāḥ

cicchaktirasti paramātmani yena so'pi
vyakto jagatsu vidito bhavakṛtyakartā /
ko'nyastvayā virahitaḥ prabhavatyamuṣmin
kartuṃ vihartumapi sañcalituṃ svaśaktyā

tattvāni cidvirahitāni jagadvidhātuṃ
kiṃ vā kṣamāṇi jagadamba yato jaḍāni /
kiṃ cendriyāṇi guṇakarmayutāni santi
devi tvayā virahitāni phalaṃ pradātum

devā makheṣvapi hutaṃ munibhiḥ svabhāgaṃ
gṛhṇīyuramba vidhivatpratipāditaṃ kim /
svāhā na cettvamasi tatra nimittabhūtā
tasmāttvameva nanu pālayasīva viśvam

sarvaṃ tvayedamakhilaṃ vihitaṃ bhavādau
tvaṃ pāsi vai hariharapramukhāndigīśān /
kāle'tsi viśvamapi te caritaṃ bhavādyaṃ
jānanti naiva manujāḥ kva nu mandabhāgyāḥ

hatvāsuraṃ mahiṣarūpadharaṃ mahograṃ
mātastvayā suragaṇaḥ kila rakṣito'yam /
kāṃ te stutiṃ janani mandadhiyo vidāmo
vedā gatiṃ tava yathārthatayā na jagmuḥ

kāryaṃ kṛtaṃ jagati no yadasau durātmā
vairī hato bhuvanakaṇṭakadurvibhāvyaḥ /
kīrtiḥ kṛtā nanu jagatsu kṛpā vidheyā-
pyasmāṃśca pāhi janani prathitaprabhāve

vyāsa uvāca
evaṃ stutā surairdevī tānuvāca mṛdusvarā /
anyatkāryaṃ ca duḥsādhyaṃ bruvantu surasattamāḥ

yadā yadā hi devānāṃ kāryaṃ syādatidurghaṭam /
smartavyāhaṃ tadā śīghraṃ nāśayiṣyāmi cāpadam

devā ūcuḥ
sarvaṃ kṛtaṃ tvayā devi kāryaṃ naḥ khalu sāmpratam /
yadayaṃ nihataḥ śatrurasmākaṃ mahiṣāsuraḥ

smariṣyāmo yathā te'mba sadaiva padapaṅkajam /
tathā kuru jaganmātarbhaktiṃ tvayyapyacañcalām

aparādhasahasrāṇi mātaiva sahate sadā /
iti jñātvā jagadyoniṃ na bhajante kuto janāḥ

dvau suparṇo tu dehe'smiṃstayoḥ sakhyaṃ nirantaram /
nānyaḥ sakhā tṛtīyo'sti yo'parādhaṃ saheta hi

tasmājjīvaḥ sakhāyaṃ tvāṃ hitvā kiṃ nu kariṣyati /
pāpātmā mandabhāgyo'sau suramānuṣayoniṣu

prāpya dehaṃ suduṣprāpaṃ na smarettvāṃ narādhamaḥ /
manasā karmaṇā vācā brūmaḥ satyaṃ punaḥ punaḥ

sukhe vāpyathavā duḥkhe tvaṃ naḥ śaraṇamad‌bhutam /
pāhi naḥ satataṃ devi sarvaistava varāyudhaiḥ

anyathā śaraṇaṃ nāsti tvatpādāmbujareṇutaḥ /
vyāsa uvāca
evaṃ stutā surairdevī tatraivāntaradhīyata /
vismayaṃ paramaṃ jagmurdevāstāṃ vīkṣya nirgatām

iti śrīmaddevībhāgavate mahāpurāṇe'ṣṭādaśasāhasryāṃ saṃhitāyāṃ
pañcamaskandhe devīsāntvanaṃ nāmaikonaviṃśo'dhyāyaḥ