Devi Bhagavata Purana · Chapter 5.16

mahiṣadvārā devīprabodhanam
vyāsa uvāca
teṣāṃ tadvacanaṃ śrutvā krodhayukto narādhipaḥ /
dārukaṃ prāha tarasā rathamānaya me'd‌bhutam

sahasrakharasaṃyuktaṃ patākādhvajabhūṣitam /
āyudhaiḥ saṃyutaṃ śubhraṃ sucakraṃ cārukūbaram

sūto'pi rathamānīya tamuvāca tvarānvitaḥ /
rājan ratho'yamānīto dvāri tiṣṭhati bhūṣitaḥ

sarvāyudhasamāyukto varāstaraṇasaṃyutaḥ /
ānītaṃ taṃ rathaṃ jñātvā dānavendro mahābalaḥ

mānuṣaṃ dehamāsthāya saṃgrāme gantumudyataḥ /
vicārya manasā ceti devī māṃ prekṣya durmukham

śṛṅ‌giṇaṃ mahiṣaṃ nūnaṃ vimanā sā bhaviṣyati /
nārīṇāṃ ca priyaṃ rūpaṃ tathā cāturyamityapi

tasmād‌rūpaṃ ca cāturyaṃ kṛtvā yāsyāmi tāṃ prati /
yathā māṃ vīkṣya sā bālā premayuktā bhaviṣyati

mamāpi ca tadaiva syātsukhaṃ nānyasvarūpataḥ /
iti sañcintya manasā dānavendro mahābalaḥ

tyaktvā tanmāhiṣaṃ rūpaṃ babhūva puruṣaḥ śubhaḥ /
sarvāyudhadharaḥ śrīmāṃścārubhūṣaṇabhūṣitaḥ

divyāmbaradharaḥ kāntaḥ puṣpabāṇa ivāparaḥ /
rathopaviṣṭaḥ keyūrasragvī bāṇadhanurdharaḥ

senāparivṛto devīṃ jagāma madagarvitaḥ /
manojñaṃ rūpamāsthāya māninīnāṃ manoharam

tamāgataṃ samālokya daityānāmadhipaṃ tadā /
bahubhiḥ saṃvṛtaṃ vīrairdevī śaṅkhamavādayat

sa śaṅkhaninadaṃ śrutvā janavismayakārakam /
samīpametya devyāstu tāmuvāca hasanniva

devi saṃsāracakre'sminvartamāno janaḥ kila /
naro vātha tathā nārī sukhaṃ vāñchati sarvathā

sukhaṃ saṃyogajaṃ nṝṇāṃ nāsaṃyoge bhavediha /
saṃyogo bahudhā bhinnastānbravīmi śṛṇuṣva ha

bhedānsuprītihetūtthānsvabhāvotthānanekaśaḥ /
tatra prītibhavānādau kathayāmi yathāmati

mātāpitrostu putreṇa saṃyogastūttamaḥ smṛtaḥ /
bhrāturbhrātrā tathā yogaḥ kāraṇānmadhyamo mataḥ

uttamasya sukhasyaiva dātṛtvāduttamaḥ smṛtaḥ /
tasmādalpasukhasyaiva pradātṛtvācca madhyamaḥ

nāvikānāṃ tu saṃyogaḥ smṛtaḥ svābhāviko budhaiḥ /
vividhāvṛtacittānāṃ prasaṅgaparivartinām

atyalpasukhadātṛtvātkaniṣṭho'yaṃ smṛto budhaiḥ /
atyuttamastu saṃyogaḥ saṃsāre sukhadaḥ sadā

nārīpuruṣayoḥ kānte samānavayaso sadā /
saṃyogo yaḥ samākhyātaḥ sa evātyuttamaḥ smṛtaḥ

atyuttamasukhasyaiva dātṛtvātsa tathāvidhaḥ /
cāturyarūpaveṣādyaiḥ kulaśīlaguṇaistathā

parasparasamutkarṣaḥ kathyate hi parasparam /
taṃ cetkaroṣi saṃyogaṃ vīreṇa ca mayā saha

atyuttamasukhasyaiva prāptiḥ syātte na saṃśayaḥ /
nānāvidhāni rūpāṇi karomi svecchayā priye

indrādayaḥ surāḥ sarve saṃgrāme vijitā mayā /
rat‍nāni yāni divyāni bhavane'sminmamādhunā

bhuṃkṣva tvaṃ tāni sarvāṇi yatheṣṭaṃ dehi vā yathā /
paṭṭarājñī bhavādya tvaṃ dāso'smi tava sundari

vairaṃ tyaje'haṃ devaistu tava vākyānna saṃśayaḥ /
yathā tvaṃ sukhamāpnoṣi tathāhaṃ karavāṇi vai

ājñāpaya viśālākṣi tathāhaṃ prakaromyatha /
cittaṃ me tava rūpeṇa mohitaṃ cārubhāṣiṇi

āturo'smi varārohe prāptaste śaraṇaṃ kila /
prapannaṃ pāhi rambhoru kāmabāṇaiḥ prapīḍitam

dharmāṇāmuttamo dharmaḥ śaraṇāgatarakṣaṇam /
tvadīyo'smyasitāpāṅ‌gi sevako'haṃ kṛśodari

maraṇāntaṃ vacaḥ satyaṃ nānyathā prakaromyaham /
pādau nato'smi tanvaṅ‌gi tyaktvā nānāyudhāni te

dayāṃ kuru viśālākṣi tapto'smi kāmamārgaṇaiḥ /
janmaprabhṛti cārvaṅ‌gi dainyaṃ nācaritaṃ mayā

brahmādīnīśvarānprāpya tvayi tadvidadhāmyaham /
caritaṃ mama jānanti raṇe brahmādayaḥ surāḥ

so'pyahaṃ tava dāso'smi manmukhaṃ paśya bhāmini /
vyāsa uvāca
iti bruvāṇaṃ taṃ daityaṃ devī bhagavatī hi sā

prahasya sasmitaṃ vākyamuvāca varavarṇinī /
devyuvāca
nāhaṃ puruṣamicchāmi paramaṃ puruṣaṃ vinā

tasya cecchāsmyahaṃ daitya sṛjāmi sakalaṃ jagat /
sa māṃ paśyati viśvātmā tasyāhaṃ prakṛtiḥ śivā

tatsānnidhyavaśādeva caitanyaṃ mayi śāśvatam /
jaḍāhaṃ tasya saṃyogātprabhavāmi sacetanā

ayaskāntasya sānnidhyādayasaścetanā yathā /
na grāmyasukhavāñchā me kadācidapi jāyate

mūrkhastvamasi mandātman yatstrīsaṅgaṃ cikīrṣasi /
narasya bandhanārthāya śṛṅkhalā strī prakīrtitā

lohabaddho'pi mucyeta strībaddho naiva mucyate /
kimicchasi ca mandātman mūtrāgārasya sevanam

śamaṃ kuru sukhāya tvaṃ śamātsukhamavāpsyasi /
nārīsaṅge mahadduḥkhaṃ jānankiṃ tvaṃ vimuhyasi

tyaja vairaṃ suraiḥ sārdhaṃ yatheṣṭaṃ vicarāvanau /
pātālaṃ gaccha vā kāmaṃ jīvitecchā yadasti te

athavā kuru saṃgrāmaṃ balavatyasmi sāmpratam /
preṣitāhaṃ suraiḥ sarvaistava nāśāya dānava

satyaṃ bravīmi yenādya tvayā vacanasauhṛdam /
darśitaṃ tena tuṣṭāsmi jīvangaccha yathāsukham

satāṃ saptapadī maitrī tena muñcāmi jīvitam /
maraṇecchāsti cedyuddhaṃ kuru vīra yathāsukham

haniṣyāmi mahābāho tvāmahaṃ nātra saṃśayaḥ /
vyāsa uvāca
iti tasyā vacaḥ śrutvā dānavaḥ kāmamohitaḥ

uvāca ślakṣṇayā vācā madhuraṃ vacanaṃ tataḥ /
bibhemyahaṃ varārohe tvāṃ prahartuṃ varānane

komalāṃ cārusarvāṅgīṃ nārīṃ naravimohinīm /
jitvā hariharādīṃśca lokapālāṃśca sarvaśaḥ

kiṃ tvayā saha yuddhaṃ me yuktaṃ kamalalocane /
rocate yadi cārvaṅ‌gi vivāhaṃ kuru māṃ bhaja

noced‌ gaccha yatheṣṭaṃ te deśaṃ yasmātsamāgatā /
nāhaṃ tvāṃ prahariṣyāmi yato maitrī kṛtā tvayā

hitamuktaṃ śubhaṃ vākyaṃ tasmād‌ gaccha yathāsukham /
kā śobhā me bhavedante hatvā tvāṃ cārulocanām

strīhatyā bālahatyā ca brahmahatyā duratyayā /
gṛhītvā tvāṃ gṛhaṃ nūnaṃ gacchāmyadya varānane

tathāpi me phalaṃ na syād‌balād‌bhogasukhaṃ kutaḥ /
prabravīmi sukeśi tvāṃ vinayāvanato yataḥ

puruṣasya sukhaṃ na syādṛte kāntāmukhāmbujāt /
tattathaiva hi nārīṇāṃ na syācca puruṣaṃ vinā

saṃyoge sukhasambhūtirviyoge duḥkhasambhavaḥ /
kāntāsi rūpasampannā sarvābharaṇabhūṣitā

cāturyaṃ tvayi kiṃ nāsti yato māṃ na bhajasyaho /
tavopadiṣṭaṃ kenedaṃ bhogānāṃ parivarjanam

vañcitāsi priyālāpe vairiṇā kenacittviha /
muñcāgrahamimaṃ kānte kuru kāryaṃ suśobhanam

sukhaṃ tava mamāpi syādvivāhe vihite kila /
viṣṇurlakṣyā sahābhāti sāvitryā ca sahātmabhūḥ

rudro bhāti ca pārvatyā śacyā śatamakhastathā /
kā nārī patihīnā ca sukhaṃ prāpnoti śāśvatam

yena tvamasitāpāṅ‌gi na karoṣi patiṃ śubham /
kāmaḥ kvādya gataḥ kānte yastvāṃ bāṇaiḥ sukomalaiḥ

mādanaiḥ pañcabhiḥ kāmaṃ na tāḍayati mandadhīḥ /
manye'hamiva kāmo'pi dayāvāṃstvayi sundari

abaleti ca manvāno na prerayati mārgaṇān /
manobhavasya vairaṃ vā kimapyasti mayā saha

tena ca tvayyarālākṣi na muñcati śilīmukhān /
athavā me'hitairdevairvārito'sau jhaṣadhvajaḥ

sukhavidhvaṃsibhistena tvayi na praharatyapi /
tyaktvā māṃ mṛgaśāvākṣi paścāttāpaṃ kariṣyasi

mandodarīva tanvaṅ‌gi parityajya śubhaṃ nṛpam /
anukūlaṃ patiṃ paścātsā cakāra śaṭhaṃ patim /
kāmārtā ca yadā jātā mohena vyākulāntarā

iti śrīmaddevībhāgavate mahāpurāṇe'ṣṭādaśasāhasryāṃ saṃhitāyāṃ
pañcamaskandhe mahiṣadvārā devīprabodhanaṃ nāma ṣoḍaśo'dhyāyaḥ