Devi Bhagavata Purana · Chapter 5

atha pañcamo'dhyāyaḥ
ṛṣaya ūcuḥ/
sūta sūta mahābhāga śrutaṃ māhātmyamuttamam /
adhunā śrotumicchāmaḥ purāṇaśravaṇe vidhim

sūta uvāca/
śrūyatāṃ munayaḥ sarve purāṇaśravaṇe vidhim /
narāṇāṃ śṛṇvatāṃ yena siddhiḥ syātsārvakāmikī

ādau daivajñamāhūya muhūrtaṃ kalpayetsudhīḥ /
ārabhya śucimāsaṃ tu māsaṣaṭkaṃ śubhāvaham

hastāśvimūlapuṣyarkṣe brahmamaitrenduvaiṣṇave /
sattithau śubhavāre ca purāṇaśravaṇaṃ śubham

gurubhādveda४vedā४bja१śarāṃ५gā६bdhi४guṇaiḥ४kramāt /
dharmāptirindirāprāptiḥ kathāsiddhiḥ paraṃ sukham

pīḍā'tha bhūpatibhayaṃ jñānaprāptiḥ kramātphalam /
purāṇaśravaṇe cakraṃ śodhayecchivabhāṣitam

athavā prītaye devyā navarātracatuṣṭaye /
śṛṇuyādanyamāse'pi tithivārarkṣaśodhite

saṃbhāraṃ tādṛśaṃ kāryaṃ vivāhādau ca yādṛśam /
navāhyajñe cāpyasminvidheyaṃ yatnato budhaiḥ

sahāyā bahavaḥ kāryā dambhalobhavivarjitāḥ /
caturāśca vadānyāśca devībhaktiparā narāḥ

preṣyā yatnena vārteyaṃ deśe deśe jane jane /
āgantavyamihāvaśyaṃ kathā devyā bhaviṣyati

saurāśca gāṇapatyāśca śaivāḥ śāktāśca vaiṣṇavāḥ /
sarveṣāmapi sevyeyaṃ yato devāḥ saśaktayaḥ

śrīmaddevībhāgavatapīyūṣarasalolupaiḥ /
āgaṃtavyaṃ viśeṣeṇa kathārthaṃ prematatparaiḥ

brāhmaṇādyāśca ye varṇāḥ striyaścāśramiṇastathā /
sakāmāścāpi niṣkāmāḥ pātavyaṃ taiḥ kathāmṛtam

nāvakāśaḥ kadācitsyānnavāhaśravaṇe'pi taiḥ /
āgaṃtavyaṃ yathākālaṃ yajñe puṇyā kṣaṇasthitiḥ

vinayenaiva karttavyamevamākāraṇaṃ nṛṇām /
āgatānāṃ ca karttavyaṃ vāsasthānaṃ yathocitam १५ //
kathāsthānaṃ prakarttavyaṃ bhūmau mārjanapūrvakam /
lepanaṃ gomayenātha viśālāyāṃ manoramam

kāryastu maṇḍapo ramyo raṃbhāstaṃbhopaśobhitaḥ /
vitānamupariṣṭhāttu patākādhvaja rājitaḥ

vaktuścaivāsanaṃ divyaṃ sukhāstaraṇasaṃyutam /
racitavyaṃ prayatnena prāṅmukhaṃ vāpyudaṅmukham

yathocitāni kurvīta śrotṝṇāmāsanāni ca /
nṛṇāṃ caivātha nārīṇāṃ kathāśravaṇahetave

vāgmī dāṃtaśca śāstrajño devyārādhanatatparaḥ /
dayālunispṛho dakṣo dhīro vaktottamo mataḥ

brahmaṇyo devatābhaktaḥ kathārasaparāyaṇaḥ /
udāro'lolupo namraḥ śrotā hiṃsādivarjitaḥ

pākhaṇḍanirato lubdhaḥ straiṇo dharmadhvajastathā /
niṣṭhuraḥ krodhano vaktā devīyajñe na śasyate

saṃśayacchedanāyaika: paṇḍitaśca tathāguṇaḥ /
śrotṛbodhakṛdavyagraḥ kāryyo vaktuḥ sahāyakṛt

muhūrtaṃ divasādarvāgvaktṛśrotādibhirjanaiḥ /
karttavyaṃ kṣaurakarmādi tato niyamakalpanam

aruṇodayavelāyāṃ snāyācchaucaṃ vidhāya ca /
saṃdhyā tarpaṇakāryaṃ ca nityaṃ saṃkṣepataścaret // २५ /
kathāśravaṇayogyatvasiddhaye gāśca dāpayet /
samastavighnahartāramādau gaṇapatiṃ yajet

kalaśāṃścāpi saṃsthāpya pūjayettatra digbhavān /
vaṭukaṃ kṣetrapālaṃ ca yoginīrmātṛkāstathā

tulasīṃ cāpi saṃpūjya grahānviṣṇuṃ ca śaṃkaram /
navākṣareṇa manunā pūjayejjagadambikām

sarvopacāraiḥ saṃpūjya śrībhāgavatapustakam /
śrīdevyā vāṅmayīṃ mūrtiṃ yathāvacchobhanākṣaram २९//
kathāvighnopaśāṃtyarthaṃ vṛṇuyāttaṃ ca vāḍavān /
jāpyo navārṇamaṃtrastaiḥ pāṭhyaḥ saptaśatīstavaḥ ३० //
pradakṣiṇanamaskārānkṛtvāṃte stutimācaret /
kātyāyani mahāmāye bhavāni bhuvaneśvari

saṃsārasāgare magnaṃ māmuddhara kṛpāmaye /
brahmaviṣṇuśivārādhye prasīda jagadaṃbike

manobhilaṣitaṃ devi varaṃ dehi namo'stu te /
iti saṃprārthya śṛṇuyātkathāṃ niyatamānasaḥ

vaktāraṃ cāpi saṃpūjya vyāsabuddhyā tadātmavān /
mālyālaṃkāravastrādyaiḥ saṃbhūṣya' prārthayecca tam

sarvaśāstretihāsajña vyāsarūpa namo'stu te /
kathācaṃdrodayenāṃtastamaḥstomaṃ nirākuru // ३५
tadagre tu navāhāntaṃ karttavyā niyamāstadā /
viprādīnupaveśyādau saṃpūjyopaviśetsvayam

śrotavyaṃ sāvadhānena caturvargaphalāptaye /
gṛhaputrakalatrāptaghanacintāmapāsya ca

sūryodayaṃ samārabhya kiṃcitsūrye'vaśeṣite /
muhūrtamātraṃ viśramya madhyāhne vācayetsudhīḥ

malamūtrajayāyaiṣāṃ laghu bhojanamiṣyate /
haviṣyānnaṃ varaṃ bhojyaṃ sakṛdeva kathārthinā

athavā syātphalāhārī payobhugvā ghṛtāśanaḥ /
yathā syānna kathāvighnastathā kāryaṃ vicakṣaṇaiḥ ४० //
kathāśravaṇaniṣṭhānāṃ vakṣyāmi niyamaṃ dvijāḥ /
brahmaviṣṇumaheśānāṃ madhye ye bhedadarśinaḥ

devībhaktivihīnā ye pākhaṇḍā hiṃsakāḥ khalāḥ /
vipradruho nāstikā ye na te yogyāḥ kathāśrave

brahmasvaharaṇe lubdhāḥ paradāradhaneṣu ca /
devasvaharaṇe teṣāṃ nādhikāraḥ kathāśrave

brahmacārī ca bhūśāyī satyavaktā jitendriyaḥ /
kathāsamāptau bhuṃjīta patrāvalyāṃ yatātmavān ४४ //
vṛṃtāṃkaṃ ca kalindaṃ ca tailaṃ ca dvidalaṃ madhu /
dagdhamannaṃ paryuṣitaṃ bhāvaduṣṭaṃ tyajedvratī

āmiṣaṃ ca masūrānnamudakyā dṛṣṭameva ca /
rasonaṃ mūlakaṃ hiṃguṃ palāṃḍuṃ gṛñjanaṃ tathā

kūṣmāṃḍanalikāśākaṃ na bhuṃjīta kathāvratī /
kāmaṃ krodhaṃ madaṃ lobhaṃ daṃbhaṃ mānaṃ ca varjayet

vipradhrukpatitavrātyaśvapākayavanāṃtyajaiḥ /
udakyayā vedabāhyairna vadedyaḥ kathāvratī

vedagoguruviprāṇāṃ strīrājñāṃ mahatāṃ tathā /
devānāṃ devabhaktānāṃ na niṃdāṃ śṛṇuyādapi

vinayaṃ cārjavaṃ śaucaṃ dayāṃ ca mitabhāṣaṇam /
udāraṃ mānasaṃ caiva kuryādyastu kathāvratī

vaṃdhyā vā kākavaṃdhyā vā durbhagā vā mṛtārbhakā /
daridraścānapatyaśca bhaktyemāṃ śṛṇuyātkathām

vaṃdhyā vā kākavaṃdhyā vā durbhagā vā mṛtārbhakā /
patadgarbhāṃganā yā ca tābhiḥ śrāvyā tathā kathā ५२ //
dharmārthakāmamokṣāṃśca yo vāṃchati vinā śramam /
bhagavatyā bhāgavataṃ śrotavyaṃ tena yatnataḥ

kathādināni caitāni nayayajñaiḥ samāni hi /
teṣu dattaṃ hutaṃ japtamanantaphaladaṃ bhavet

evaṃ vrataṃ navāhaṃ tu kṛtvodyāpanamācaret /
mahāṣṭamīvrataṃ yadvattathā kāryaṃ phalepsubhiḥ

niṣkāmāḥ śravaṇenaiva pūtā muktiṃ vrajanti hi /
bhogamokṣapradā nṝṇāṃ yato bhagavatī parā

pustakasya ca vaktuśca pūjā kāryā tu nityaśaḥ /
vaktrā dattaṃ prasādaṃ tu gṛhṇādbhaktipūrvakam

kumārī: pūjayennityaṃ bhojayetprārthayecca yaḥ /
suvāsinīśca viprāṃśca tasya siddhirna saṃśayaḥ

gāyatryā nāmasāhasraṃ samāptāvatha vā paṭhet /
viṣṇornāmasahasraṃ ca sarvadoṣopaśāntaye

yasya smṛtyā ca nāmoktyā tapoyajñakriyādiṣu /
nyūnaṃ saṃpūrṇatāṃ yāti tasmādviṣṇuṃ ca kīrtayet ६० //
devyāḥ saptaśatīmaṃtraiḥ samāptau homamācaret /
devīmāhātmyamūlena navārṇamanunā'thavā

gāyatryā tvathavā homaḥ pāyasena sasarpiṣā /
yato bhāgavataṃ tvetadgāyatrīmayamīritam

vācakaṃ toṣayetsamyagvastrabhūṣādhanādibhiḥ /
prasanne vācake sarvāḥ prasannā tasya devatāḥ

brāhmaṇānbhojayedbhaktyā dakṣiṇābhiśca toṣayet !
pṛthivyāṃ devarūpāste tuṣṭeṣveṣvīpsitaṃ phalam

suvāsinī: kumārīśca devībhaktayā ca bhojayet /
tābhyo'pi dakṣiṇāṃ dattvā prārthayetsiddhimātmanaḥ

dadyāddānāni cānyāni suvarṇaṃ gāḥ payasvinīḥ /
hayānibhānmedinīṃ ca tasya syādakṣayaṃ phalam

devībhāgavataṃ caitallikhitaṃ śobhanākṣaram /
hemasiṃhāsane sthāpyaṃ paṭṭavastreṇa veṣṭitam

aṣṭamyāṃ vā navamyāṃ ca vācakāyārcitāya ca /
dadyātsa bhogānbhuktveha durlabhaṃ mokṣamāpnuyāt ६८ // //
daridro durbalo bālastaruṇo jaraṭho'pi vā /
purāṇavettā vaidyaḥ syātpūjyo mānyaśca sarvadā

santi lokasya bahavo guravo guṇajanmataḥ /
sarveṣāmapi teṣāṃ ca purāṇajñaḥ paro guruḥ

paurāṇiko brāhmaṇastu vyāsāsanasamāśritaḥ /
asamāpte prasaṃge tu namaskuryānna kasyacit

paurāṇikīṃ kathāṃ divyāṃ ye'pi śṛṇvaṃtyabhaktitaḥ /
teṣāṃ puṇyaphalaṃ nāsti duḥkhadāridryabhāginām

asaṃpūjya purāṇaṃ tu tāmbūlakusumādibhiḥ /
ye śṛṇvaṃti kathāṃ devyāste daridrā bhavaṃti hi ७३ //
kīrtyamānāṃ kathāṃ tyaktvā ye vrajaṃtyanyato narāḥ /
bhogāntare praṇaśyaṃti teṣāṃ dārāśca sampadaḥ

ye ca tuṃgāsanārūḍhāḥ kathāṃ śṛṇvaṃti dāṃbhikāḥ /
te vāyasā bhavaṃtyatra bhuktvā nirayayātanām

`
ye cāḍhyāsanasaṃsthāśca ye vīrāsanasaṃsthitāḥ /
śṛṇvaṃti ca kathāṃ divyāṃ te syurarjunaśākhinaḥ ७६ //
kathāyāṃ kīrtyamānāyāṃ ye vadaṃti duruttaram /
rāsabhāste bhavaṃtīha kṛkalāsāstataḥ param

niṃdaṃti ye purāṇajñānkathāṃ vā pāpahāriṇīm /
te tu janmaśataṃ duṣṭāḥ śunakāḥ syurna saṃśayaḥ

ye śṛṇvaṃti kathāṃ vaktuḥ samānāsanasaṃsthitāḥ /
gurutalpasamaṃ pāpaṃ labhaṃte narakālayāḥ

ye cāpraṇamya śṛṇvaṃti te bhavanti viṣadrumāḥ /
śayānā ye'pi śṛṇvaṃti bhavaṃtyajagarāhayaḥ

ye kadācana paurāṇīṃ na śṛṇvaṃti kathāṃ narāḥ /
te ghoraṃ narakaṃ bhuktvā bhavanti grāmasūkarāḥ

ye kathāṃ nānumodaṃte vighnaṃ kurvanti ye śaṭhāḥ /
koṭyabdaṃ nirayaṃ bhuktvā bhavaṃti grāmasūkarāḥ ८२ //
āsanaṃ bhājanaṃ dravyaṃ phalaṃ vastrāṇi kambalam /
purāṇajñāya yacchanti te vrajanti hareḥ padam

purāṇapustakasyāpi ye paṭṭavasanaṃ navam /
prayacchanti śubhaṃ sūtraṃ te narāḥ sukhabhāginaḥ

purāṇānāṃ tu sarveṣāṃ śravaṇādyatphalaṃ labhet /
tasmācchataguṇaṃ puṇyaṃ devībhāgavatāllabhet

yathā saritsu pravarā gaṃgā deveṣu śaṃkaraḥ /
kāvye rāmāyaṇaṃ yadvajjyotiṣmatsu yathā raviḥ

āhlādakānāṃ candraśca dhanānāṃ ca yathā yaśaḥ /
kṣamāvatāṃ yathā bhūmirgāmbhīrye sāgaro yathā

!
maṃtrāṇāṃ caiva sāvitrī pāpanāśe harismṛtiḥ /
aṣṭādaśapurāṇānāṃ devībhāgavataṃ tathā

yena kenāpyupāyena navakṛtvaḥ śṛṇoti cet /
na śakyaṃ tatphalaṃ vaktuṃ jīvanmuktaḥ sa eva ha

rājaśatrubhaye prāpte mahāmārībhaye tathā /
durbhikṣe rāṣṭrabhaṃge ca tacchāṃtyai śṛṇuyādidam

bhūtapretavināśāya rājyalābhāya śatrutaḥ /
putralābhāya śṛṇuyāddevībhāgavataṃ dvijāḥ

śrīmadbhāgavataṃ yastu paṭhedvā śṛṇuyādapi /
ślokārddhaṃ ślokapādaṃ vā saṃyāti paramāṃ gatim

bhagavatyā svayaṃ devyā ślokārddhena prakāśitam /
śiṣyapraśiṣyadvāreṇa tadeva vipulīkṛtam

na gāyatryāḥ paro dharmo na gāyatryāḥ paraṃ tapaḥ /
na gāyatryāḥ samo devo na gāyatryāḥ paro manuḥ

gātāraṃ trāyate yasmādgāyatrī tena socyate /
sā'tra bhāgavate devī sarahasyā pratiṣṭhitā

ato bhāgavatasyāsya devyāḥ prītikarasya ca /
mahāṃtyapi purāṇāni kalāṃ nārhaṃti ṣoḍaśīm

śrīmadbhāgavataṃ purāṇamamalaṃ yadbrāhmaṇānāṃ dhanaṃ
dharmo dharmasutena yatra gadito nārāyaṇenāmalaḥ /
gāyatryāśca rahasyamatra ca maṇidvīpaśca saṃvarṇitaḥ
śrīdevyā himabhūbhṛte bhagavatī gītā ca gītā svayam

tasmānnāsya purāṇasya loke'nyatsadṛśaṃ param /
ataḥ sadaiva saṃsevyaṃ devībhāgavataṃ dvijāḥ

yasyāḥ prabhāvamakhilaṃ na hi veda dhātā no vā harirna giriśo na hi cāpyanantaḥ /
aṃśāṃśakā api ca te kimutānyadevāstasyai namo'stu satataṃ jagadambikāyai

yatpādapaṃkajarajaḥ samavāpya viśvaṃ brahmā sṛjatyanudinaṃ ca bibharti viṣṇuḥ /
rudraśca saṃharati netarathā samarthāstasyai namo'stu satataṃ jagadambikāyai

sudhākūpārāṃtastridaśataruvāṭī vilasite maṇidvīpe cintāmaṇimayagṛhe citrarucire /
virājantīmambāṃ paraśivahṛdi smeravadanāṃ naro dhyātvā bhogaṃ bhajati khalu mokṣaṃ ca labhate

brahmeśācyutaśakrādyairmaharṣibhirupāsitā/
jagataḥ śreyase sā'stu maṇidvīpādhidevatā

iti śrīskandapurāṇe mānasakhaṇḍe devībhāgavatamāhātmye vaṇavidhivarṇanaṃ nāma pañcamo'dhyāyaḥ

samāptamidaṃ skāndīyaṃ śrīmaddevībhāgavatamāhātmyam /