Devi Bhagavata Purana · Chapter 4.25

parāśakteḥ sarvajñatvakathanam
rājovāca
sandeho me muniśreṣṭha jāyate vacanāttava /
vaiṣṇavāṃśe bhagavati duḥkhotpattiṃ vilokya ca

nārāyaṇāṃśasambhūto vāsudevaḥ pratāpavān /
kathaṃ sa sūtikāgārāddhṛto bālo harerapi

suguptanagare ramye gupte'tha sūtikāgṛhe /
praviśya tena daityena gṛhīto'sau kathaṃ śiśuḥ

na jñāto vāsudevena citrametanmamād‌bhutam /
jāyate mahadāścaryaṃ citte satyavatīsuta

brūhi tatkāraṇaṃ brahmanna jñātaṃ keśavena yat /
haraṇaṃ tatrasaṃsthena śiśorvā sūtikāgṛhāt

vyāsa uvāca
māyā balavatī rājannarāṇāṃ buddhimohinī /
śāmbhavī viśrutā loke ko vā mohaṃ na gacchati

mānuṣaṃ janma samprāpya guṇāḥ sarve'pi mānuṣāḥ /
bhavanti dehajā kāmaṃ na devā nāsurāstadā

kṣuttṛṇnidrā bhayaṃ tandrā vyāmohaḥ śokasaṃśayaḥ /
harṣaścaivābhimānaśca jarāmaraṇameva ca

ajñānaṃ glāniraprītirīrṣyāsūyā madaḥ śramaḥ /
ete dehabhavā bhāvāḥ prabhavanti narādhipa

yathā hemamṛgaṃ rāmo na bubodha purogatam /
jānakyā haraṇañcaiva jaṭāyumaraṇaṃ tathā

abhiṣekadine rāmo vanavāsaṃ na veda ca /
tathā na jñātavān rāmaḥ svaśokānmaraṇaṃ pituḥ

ajñavadvicacārāsau paśyamāno vane vane /
jānakīṃ na vivedātha rāvaṇena hṛtāṃ balāt

sahāyān vānarānkṛtvā hatvā śakrasutaṃ balāt /
sāgare setubandhañca kṛtvottīrya saritpatim

preṣayāmāsa sarvāsu dikṣu tānkapikuñjarān /
saṃgrāmaṃ kṛtavānghoraṃ duḥkhaṃ prāpa raṇājire

bandhanaṃ nāgapāśena prāpa rāmo mahābalaḥ /
garuḍānmokṣaṇaṃ paścādanvabhūd‌raghunandanaḥ

ahanad‌rāvaṇaṃ saṃkhye kumbhakarṇaṃ mahābalam /
meghanādaṃ nikumbhañca kupito raghunandanaḥ

adūṣyatvañca jānakyā na viveda janārdanaḥ /
divyañca kārayāmāsa jvalite'gnau praveśanam

lokāpavādācca paraṃ tatastatyāja tāṃ priyām /
adūṣyāṃ dūṣitāṃ matvā sītāṃ daśarathātmajaḥ

na jñātau svasutau tena rāmeṇa ca kuśīlavau /
muninā kathitau tau tu tasya putrau mahābalau

pātālagamanaṃ caiva jānakyā jñātavānna ca /
rāghavaḥ kopasaṃyukto bhrātaraṃ hantumudyataḥ

kālasyāgamanañcaiva na viveda kharāntakaḥ /
mānuṣaṃ dehamāśritya cakre mānuṣaceṣṭitam

tathaiva mānuṣānbhāvānnātra kāryā vicāraṇā /
pūrvaṃ kaṃsabhayātprāpto gokule yadunandanaḥ

jarāsandhabhayātpaścād‌ dvāravatyāṃ gato hariḥ /
adharmaṃ kṛtavānkṛṣṇo rukmiṇyā haraṇañca yat

śiśupālavṛtāyāśca jānandharmaṃ sanātanam /
śuśoca bālakaṃ kṛṣṇaḥ śambareṇa hṛtaṃ balāt

mumoda jānanputraṃ taṃ harṣaśokayutastataḥ /
satyabhāmājñayā yattu yuyudhe svargataḥ kila

indreṇa pādapārthaṃ tu strījitatvaṃ prakāśayan /
jahāra kalpavṛkṣaṃ yaḥ parābhūya śatakratum

māninīmānarakṣārthaṃ hariścitradharaḥ prabhuḥ /
baddhvā vṛkṣe hariṃ satyā nāradāya dadau patim

dattvātha kānakaṃ kṛṣṇaṃ mocayāmāsa bhāminī /
dṛṣṭvā putrānpuruguṇānpradyumnapramukhānatha

kṛṣṇaṃ jāmbavatī dīnā yayāce santatiṃ śubhām /
sa yayau parvataṃ kṛṣṇastapasyākṛtaniścayaḥ

upamanyurmuniryatra śivabhaktaḥ parantapaḥ /
upamanyuṃ guru kṛtvā dīkṣāṃ pāśupato hariḥ

jagrāha putrakāmastu muṇḍī daṇḍī babhūva ha /
ugraṃ tatra tapastepe māsamekaṃ phalāśanaḥ

jajāpa śivamantraṃ tu śivadhyānaparo hariḥ /
dvitīye tu jalāhārastiṣṭhannekapadā hariḥ

tṛtīye vāyubhakṣastu pādāṅguṣṭhāgrasaṃsthitaḥ /
ṣaṣṭhe tu bhagavān rudraḥ prasanno bhaktibhāvataḥ

darśanañca dadau tatra somaḥ somakalādharaḥ /
ājagāma vṛṣārūḍhaḥ surairindrādibhirvṛtaḥ

brahmaviṣṇuyutaḥ sākṣādyakṣagandharvasevitaḥ /
sambodhayanvāsudevaṃ śaṅkarastamuvāca ha

tuṣṭo'smi kṛṣṇa tapasā tavogreṇa mahāmate /
dadāmi vācchitānkāmānbrūhi yādavanandana

mayi dṛṣṭe kāmapūre kāmaśeṣo na sambhavet /
vyāsa uvāca
taṃ dṛṣṭvā śaṅkaraṃ tuṣṭaṃ bhagavāndevakīsutaḥ

papāta pādayostasya daṇḍavatpremasaṃyutaḥ /
stutiṃ cakāra deveśo meghagambhīrayā girā

sthitastu purataḥ śambhorvāsudevaḥ sanātanaḥ /
śrīkṛṣṇa uvāca
devadeva jagantātha sarvabhūtārtināśana

viśvayone surārighna namastrailokyakāraka /
nīlakaṇṭha namastubhyaṃ śūline te namo namaḥ

śailajāvallabhāyāśca yajñaghnāya namo'stu te /
dhanyo'haṃ kṛtakṛtyo'haṃ darśanāttava suvrata

janma me saphalaṃ jātaṃ natvā te pādapaṅkajam /
baddho'haṃ strīmayaiḥ pāśaiḥ saṃsāre'smiñjagad‌guro

śaraṇaṃ te'dya samprāpto rakṣaṇārthaṃ trilocana /
samprāpya mānuṣaṃ janma khinno'haṃ duḥkhanāśana

trāhi māṃ śaraṇaṃ prāptaṃ bhavabhītaṃ bhavādhunā /
garbhavāse mahadduḥkhaṃ prāptaṃ madanadāhaka

janmataḥ kaṃsabhayajamanubhūtaṃ ca gokule /
jāto'haṃ nandagopālo ballavājñākarastathā

gorajaḥkīrṇakeśastu bhramanvṛndāvane ghane /
mleccharājabhayatrasto gato dvāravatīṃ punaḥ

tyaktvā pitryaṃ śubhaṃ deśaṃ mādhuraṃ durlabhaṃ vibho /
yayātiśāpabaddhena tasmai dattaṃ bhayādvibho

rājyaṃ supuṣṭamapi ca dharmarakṣāpareṇa ca /
ugrasenasya dāsatvaṃ kṛtaṃ vai sarvadā mayā

rājāsau yādavānāṃ vai kṛto naḥ pūrvajaiḥ kila /
gārhasthyaṃ duḥkhadaṃ śambho strīvaśyaṃ dharmakhaṇḍanam

pāratantryaṃ sadā bandhamokṣavārtātra durlabhā /
rukyiṇyāstanayāndṛṣṭvā bhāryā jāmbavatī mama

prerayāmāsa putrārthaṃ tapase madanāntaka /
sakāmena mayā taptaṃ tapaḥ putrārthamadya vai

lajjā bhavati deveśa prārthanāyāṃ jagad‍guro /
kastvāmārādhya deveśaṃ muktidaṃ bhaktavatsalam

prasannaṃ yācate mūḍhaḥ phalaṃ tucchaṃ vināśi yat /
so'yaṃ māyāvimūḍhātmā yāce putrasukhaṃ vibho

kāminyā preritaḥ śambho muktidaṃ tvāṃ jagatpate /
jānāmi duḥkhadaṃ śambho saṃsāraṃ duḥkhasādhanam

anityaṃ nāśadharmāṇaṃ tathāpi viratirna me /
śāpānnārāyaṇāṃśo'haṃ jāto'smi kṣitimaṇḍale

bhoktuṃ bahutaraṃ duḥkhaṃ māyāpāśena yantritaḥ /
vyāsa uvāca
ityuktavantaṃ govindaṃ pratyuvāca maheśvaraḥ

bahavaste bhaviṣyanti putrāḥ śatruniṣūdana /
strīṇāṃ ṣoḍaśasāhasraṃ bhaviṣyati śatārdhakam

tāsu putrā daśa daśa bhaviṣyanti mahābalāḥ /
ityuktvopararāmāśu śaṅkaraḥ priyadarśanaḥ

uvāca girijā devī praṇataṃ madhusūdanam /
kṛṣṇa kṛṣṇa mahābāho saṃsāre'sminnarādhipa

gṛhasthapravaro loke bhaviṣyati bhavāniha /
tato varṣaśatānte tu dvijaśāpājjanārdana

gāndhāryāśca tathā śāpād‌bhavitā te kulakṣayaḥ /
parasparaṃ nihatyājau putrāste śāpamohitāḥ

gamiṣyanti kṣayaṃ sarve yādavāśca tathāpare /
sānujastvaṃ tathā dehaṃ tyaktvā yāsyasi vai divam

śokastatra na kartavyo bhavitavyaṃ prati prabho /
avaśyambhāvibhāvānāṃ pratīkāro na vidyate

tatra śoko na kartavyo nūnaṃ mama mataṃ sadā /
aṣṭāvakrasya śāpena bhāryāste madhusūdana

caurebhyo grahaṇaṃ kṛṣṇa gamiṣyanti mṛte tvayi /
vyāsa uvāca
ityuktvāntardadhe śambhuḥ somaḥ sasuramaṇḍalaḥ

upamanyuṃ praṇamyātha kṛṣṇo'pi dvārakāṃ yayau /
yasmād‌ brahmādayo rājan santi yadyapyadhīśvarāḥ

tathāpi māyākallolayogasaṃkṣubhitāntarāḥ /
tadadhīnāḥ sthitāḥ sarve kāṣṭhaputtalikopamāḥ

yathā yathā pūrvabhavaṃ karma teṣāṃ tathā tathā /
prerayatyaniśaṃ māyā parabrahmasvarūpiṇī

na vaiṣamyaṃ na nairghṛṇyaṃ bhagavatyāṃ kadācana /
kevalaṃ jīvamokṣārthaṃ yatate bhuvaneśvarī

yadi sā naiva sṛjyeta jagadetaccarācaram /
tadā māyāṃ vinā bhūtaṃ jaḍaṃ syādeva nityaśaḥ

tasmātkāruṇyamāśritya jagajjīvādikaṃ ca yat /
karoti satataṃ devī prerayatyaniśaṃ ca tat

tasmād‌ brahmādimohe'sminkartavyaḥ saṃśayo na hi /
māyāntaḥpātinaḥ sarve māyādhīnāḥ surāsurāḥ

svatantrā saiva deveśī svecchācāravihāriṇī /
tasmātsarvātmanā rājan sevanīyā maheśvarī

nātaḥ parataraṃ kiñcidadhikaṃ bhuvanatraye /
etaddhi janmasāphalyaṃ parāśakteḥ padasmṛtiḥ

mābhūttatra kule janma yatra devī na daivatam /
ahaṃ devī na cānyo'smi brahmaivāhaṃ na śokabhāk

ityabhedena tāṃ nityāṃ cintayejjagadambikām /
jñātvā gurumukhādenāṃ vedāntaśravaṇādibhiḥ

nityamekāgramanasā bhāvayedātmarūpiṇīm /
mukto bhavati tenāśu nānyathā karmakoṭibhiḥ

śvetāśvatarādayaḥ sarve ṛṣayo nirmalāśayāḥ /
ātmarūpāṃ hṛdā jñātvā vimuktā bhavabandhanāt

brahmaviṣṇvādayastadvad‌ gaurīlakṣmyādayastathā /
tāmeva samupāsante saccidānandarūpiṇīm

iti te kathitaṃ rājan yadyatpuṣṭaṃ tvayānagha /
prapañcatāpatrastena kiṃ bhūyaḥ śrotumicchasi

etatte kathitaṃ rājanmayākhyānamanuttamam /
sarvapāpaharaṃ puṇyaṃ purāṇaṃ paramād‌bhutam

ya idaṃ śṛṇuyānnityaṃ purāṇaṃ vedasammitam /
sarvapāpavinirmukto devīloke mahīyate

sūta uvāca
etanmayā śrutaṃ vyāsātkathyamānaṃ savistaram /
purāṇaṃ pañcamaṃ nūnaṃ śrīmad‌bhāgavatābhidham

iti śrīmaddevībhāgavate mahāpurāṇe'ṣṭādaśasāhasryāṃ saṃhitāyāṃ
caturthaskandhe parāśakteḥ sarvajñatvakathanaṃ nāma pañcaviṃśo'dhyāyaḥ