Devi Bhagavata Purana · Chapter 4.6

apsarāṃ nārāyaṇasamīpe prārthanākaraṇam
vyāsa uvāca
prathamaṃ tatra samprāpto vasantaḥ parvatottame /
puṣpitāḥ pādapāḥ sarve dvirephālivirājitāḥ

āmrāśca bakulā ramyāstilakāḥ kiṃśukāḥ śubhā /
sālāstālāstamālāśca madhūkāḥ puṣpitā babhuḥ

babhūvuḥ kokilālāpā vṛkṣāgreṣu manoharāḥ /
vallyo'pi puṣpitāḥ sarvā āliliṅgurnagottamān

prāṇinaḥ svāsu bhāryāsu premayuktāḥ smarāturāḥ /
babhūvuścātimattāśca krīḍāsaktāḥ parasparam

vavurmandāḥ sugandhāśca susparśā dakṣiṇānilāḥ /
indriyāṇi pramāthīni munīnāmapi cābhavan

ratiyuktastataḥ kāmaḥ pūrayanpañcamārgaṇān /
cakāra tvaritastatra vāsaṃ badarikāśrame

rambhā tilottamādyāśca gatvā tatra varāśrame /
gānaṃ cakuḥ sugītajñāḥ svaratānasamanvitam

tacchrutvā madhurod‌gītaṃ kokilānāñca kūjitam /
bhramarālivirāvañca prabuddhau tau munīśvarau

ṛturājamakāle tu dṛṣṭvā tau puṣpitaṃ vanam /
jātau cintāparau tatra naranārāyaṇāvṛṣī

kimadya śiśirāpāyaḥ saṃbhṛtaḥ samayaṃ vinā /
prāṇino vihvalāḥ sarve lakṣyante'tismarāturāḥ

kāladharmaviparyāsaḥ kathamadya durāsadaḥ /
naraṃ nārāyaṇaḥ prāha vismayotkullalocanaḥ

nārāyaṇa uvāca
paśya bhrātarime vṛkṣāḥ puṣpitāḥ pratibhānti vai /
kokilālāpasaṅghuṣṭā bhramarālivirājitāḥ

śiśiraṃ bhīmamātaṅgaṃ dārayansvakharairnakhaiḥ /
vasantakesarī prāptaḥ palāśakusumairmune

raktāśokakarā tanvī devarṣe kiṃśukāṅ‌ghrikā /
nīlāśokakacā śyāmā vikāsikamalānanā

nīlendīvaranetrā sā bilvavṛkṣaphalastanī /
prosphullakundaradanā mañjarīkarṇaśobhitā

bandhujīvādharā śubhrā sindhuvāranakhod‌bhavā /
puṃskokilasvarā puṇyā kadambavasanā śubhā

barhivṛndakalāpā ca sārasasvananūpurā /
vāsantī baddharaśanā mattahaṃsagatistathā

putrajīvāṃśukanyastaromarājivirājitā /
vasantalakṣmīḥ samprāptā brahman badarikāśrame

akāle kimiyaṃ prāptā vismayo'yaṃ mamādhunā /
tapovighnakarā nūnaṃ devarṣe paricintaya

śrūyate suranārīṇāṃ gānaṃ dhyānavināśanam /
āvayostapibhaṅgāya kṛtaṃ maghavatā kila

ṛturāḍanyathākāle prītiṃ sañjanayetkatham /
vighno'yaṃ vihito bhāti bhītenāsuraśatruṇā

vātāḥ sugandhāḥ śītāśca samāyānti manoharāḥ /
nānyatkāraṇamastīha śatakratukṛtiṃ vinā

iti bruvati viprāgrye deve nārāyaṇe vibhau /
sarve dṛṣṭipathaṃ prāptā manmathapramukhāstadā

dadarśa bhagavānsarvānnaro nārāyaṇastathā /
vismayāviṣṭamanasau babhūvaturubhāvapi

manmathaṃ menakāṃ caiva rambhāṃ caiva tilottamām /
puṣpagandhāṃ sukeśīṃ ca mahāśvetāṃ manoramām

pramadvarāṃ dhṛtācīñca gītajñāṃ cāruhāsinīm /
candraprabhāṃ ca somāṃ ca kokilālāpamaṇḍitām

vidyunmālāmbujākṣyau ca tathā kāñcanamālinīm/
etāścānyā varārohā dṛṣṭāstābhyāṃ tadāntike

tāsāṃ dvyaṣṭasahasrāṇi pañcāśadadhikāni ca /
vīkṣya tau vismitau jātau kāmasainyaṃ suvistaram

praṇamyāgre sthitāḥ sarvā devavārāṅganāstadā /
divyābharaṇabhūṣāḍhyā divyamālopaśobhitāḥ

jaguśchalena tāḥ sarvāḥ pṛthivyāmatidurlabham /
tattathāvasthitaṃ divyaṃ manmathādivivardhanam

śuśrāva bhagavānviṣṇurnaro nārāyaṇastadā /
śrutvā provāca tāstatra prītyā nārāyaṇo muniḥ

āsyatāṃ sukhamatraiva karomyātithyamad‌bhutam /
bhavatyo'tithidharmeṇa prāptāḥsvargātsumadhyamāḥ

vyāsa uvāca
sābhimānastu sañcātastadā nārāyaṇo muniḥ /
indreṇa preṣitā nūnaṃ tathā vighnacikīrṣayā

varākyaḥ kā imāḥ sarvāḥ sṛjāmyadya navāḥ kila /
etābhyo divyarūpāśca darśayāmi tapobalam

iti sañcintya manasā kareṇoruṃ pratāḍya vai /
tarasotpādayāmāsa nārīṃ sarvāṅgasundarīm

nārāyaṇorusambhūtā hyurvaśīti tataḥ śubhā /
dadṛśustāḥ sthitāstatra vismayaṃ paramaṃ yayuḥ

tāsāṃ ca paricaryārthaṃ tāvatīścātisundarīḥ /
prāduścakāra tarasā tadā munirasambhramaḥ

gāyantyaśca hasantyaśca nānopāyanapāṇayaḥ /
praṇemustā munī sarvāḥ sthitāḥ kṛtvāñjaliṃ puraḥ

tāṃ vīkṣya vibhramakarīṃ tapaso vibhūtiṃ //
devāṅganā hi mumuhuḥ pravimohayantyaḥ /
ūcuśca tau pramuditānanapadyaśobhā
romod‌gamollasitacārunijāṅgavallyaḥ

kuryuḥ kathaṃ stutimaho tapaso mahattvaṃ
dhairyaṃ tathaiva bhavatāmabhivīkṣya bālāḥ /
asmatkaṭākṣaviṣadigdhaśareṇa dagdhaḥ
ko vā na tatra bhavatāṃ manaso vyathā na

jñātau yuvāṃ narahareḥ paramāṃśabhūtau
devau munī śamadamādinidhī sadaiva /
sevānimittamiha no gamanaṃ na kāmaṃ
kāryaṃ hareḥ śatamakhasya vidhātumeva

bhāgyena kena yuvayoḥ kila darśanaṃ naḥ
sampāditaṃ na viditaṃ khalu sañcitaṃ tat /
cittaṃ kṣamaṃ nijajane vihitaṃ yuvābhyā-
masmadvidhe kila kṛtāgasi tāpamuktam

kurvanti naiva vibudhāstapaso vyayaṃ vai
śāpena tucchaphaladena mahānubhāvāḥ /
vyāsa uvāca
itthaṃ niśamya vacanaṃ surakāminīnāṃ
tāvūcaturmunivarau vinayānatānām

prītau prasannavadanau jitakāmalobhau
dharmātmajau nijataporuciśobhitāṅgau /
naranārāyaṇāvūcatuḥ
bruvantu vāñchitān kāmāndadāvastuṣṭamānasau

yāntu svargaṃ gahītvemāmurvaśīṃ cārulocanām /
upāyanamiyaṃ bālā gacchatvadya manoharā

dattāvābhyāṃ maghavataḥ prīṇanāyorusambhavā /
svastyastu sarvadevebhyo yatheṣṭaṃ pravrajantu ca

( na kasyāpi tapovighnaṃ prakartavyamataḥ param /) //
devya ūcuḥ
kva gacchāmo mahābhāga prāptāste pādapaṅkajam /
nārāyaṇa suraśreṣṭha bhaktyā paramayā mudā

vāñchitaṃ cedvaraṃ nātha dadāsi madhusūdana /
tuṣṭaḥ kamalapatrākṣa bravīmo manasepsitam

patistvaṃ bhava deveśa varamenaṃ parantapa /
bhavāmaḥ prītiyuktāstvāṃ sevituṃ jagadīśvara

tvayā cotpāditā nāryaḥ santyanyāścārulocanāḥ /
urvaśyādyāstathā yāntu svargaṃ vai bhavadājñayā

strīṇāṃ ṣoḍaśasāhasraṃ tiṣṭhatvatra śatārdhakam /
sevāṃ te'tra kariṣyāmo yuvayostāpasottamau

vāñchitaṃ dehi deveśa satyavāgbhava mādhava /
āśābhaṅgo hi nārīṇāṃ hiṃsanaṃ parikīrtitam

kāmārtānāñca munibhirdharmajñaistattvadarśibhiḥ /
bhāgyayogādiha prāptāḥ svargātpremapariplutāḥ

tyaktuṃ nārhasi deveśa samartho'si jagatpate /
nārāyaṇa uvāca
pūrṇaṃ varṣasahasraṃ tu tapastaptaṃ mayātra vai

jitendriyeṇa cārvaṅgyaḥ kathaṃ bhaṅgaṃ karomyataḥ /
necchā kāme sukhe kācitsukhadharmavināśake

paśūnāmapi sādharmye rameta matimānkatham /
apsarasa ūcuḥ
śabdādīnāṃ ca pañcānāṃ madhye sparśasukhaṃ varam

ānandarasamūlaṃ vai nānyadasti sukhaṃ kila /
ato'smākaṃ mahārāja vacanaṃ kuru sarvathā

nirbharaṃ sukhamāsādya carasva gandhamādane /
yadi vāñchasi nākatvaṃ nādhiko gandhamādanāt

ramasvātra śubhe sthāne prāpya sarvāḥ surāṅganāḥ

iti śrīmaddevībhāgavate mahāpurāṇe'ṣṭādaśasāhasryāṃ saṃhitāyāṃ caturthaskandhe //
apsarasāṃ nārāyaṇasamīpe prārthanākaraṇaṃ nāma ṣaṣṭho'dhyāyaḥ