Devi Bhagavata Purana · Chapter 4.2

karmaṇo janmādikāraṇatvanirūpaṇam
sūta uvāca
evaṃ pṛṣṭaḥ purāṇajño vyāsaḥ satyavatīsutaḥ /
parīkṣitasutaṃ śāntaṃ tato vai janamejayam

uvāca saṃśayacchettṛ vākyaṃ vākyaviśāradaḥ /
vyāsa uvāca
rājan kimetadvaktavyaṃ karmaṇāṃ gahanā gatiḥ

durjñeyā kila devānāṃ mānavānāṃ ca kā kathā /
yadā samutthitaṃ caitadbrahmāṇḍaṃ triguṇātmakam

karmaṇaiva samutpattiḥ sarveṣāṃ nātra saṃśayaḥ /
anādinidhanā jīvāḥ karmabījasamud‌bhavāḥ

nānāyoniṣu jāyante mriyante ca punaḥ punaḥ /
karmaṇā rahito dehasaṃyogo na kadācana

śubhāśubhaistathā miśraiḥ karmabhirveṣṭitaṃ tvidam /
trividhāni hi tānyāhurbudhāstattvavidaśca ye

sañcitāni bhaviṣyanti prārabdhāni tathā punaḥ /
vartamānāni dehe'smiṃstraividhyaṃ karmaṇāṃ kila

brahmādīnāṃ ca sarveṣāṃ tadvaśatvaṃ narādhipa /
sukhaṃ duḥkhaṃ jarāmṛtyuharṣaśokādayastathā

kāmakrodhau ca lobhaśca sarve dehagatā guṇāḥ /
daivādhīnāśca sarveṣāṃ prabhavanti narādhipa

rāgadveṣādayo bhāvāḥ svarge'pi prabhavanti hi /
devānāṃ mānavānāñca tiraścāṃ ca tathā punaḥ

vikārāḥ sarva evaite dehena saha saṅgatāḥ /
pūrvavairānuyogena snehayogena vai punaḥ

utpattiḥ sarvajantūnāṃ vinā karma na vidyate /
karmaṇā bhramate sūryaḥ śaśāṅkaḥ kṣayarogavān

kapālī ca tathā rudraḥ karmaṇaiva na saṃśayaḥ /
anādinidhanaṃ caitatkāraṇaṃ karma vidyate

teneha śāśvataṃ sarvaṃ jagatsthāvarajaṅgamam /
nityānityavicāre'tra nimagnā munayaḥ sadā

na jānanti kimetadvai nityaṃ vānityameva ca /
māyāyāṃ vidyamānāyāṃ jagannityaṃ pratīyate

kāryābhāvaḥ kathaṃ vācyaḥ kāraṇe sati sarvathā /
māyā nityā kāraṇañca sarveṣāṃ sarvadā kila

karmabījaṃ tato'nityaṃ cintanīyaṃ sadā budhaiḥ /
bhramatyeva jagatsarvaṃ rājankarmaniyantritam

nānāyoniṣu rājendra nānādharmamayeṣu ca /
icchayā ca bhaveñcanma viṣṇoramitatejasaḥ

yuge yugeṣvanekāsu nīcayoniṣu tatkatham /
tyaktvā vaikuṇṭhasaṃvāsaṃ sukhabhogānanekaśaḥ

viṇmūtramandire vāsaṃ saṃtrastaḥ ko'bhivāñchati /
puṣpāvacayalīlāṃ ca jalakeliṃ sukhāsanam

tyaktvā garbhagṛhe vāsaṃ ko'bhivācchati buddhimān /
tūlikāṃ mṛdusaṃyuktāṃ divyāṃ śayyāṃ vinirmitām

tyaktvādhomukhavāsaṃ ca ko'bhivāñchati paṇḍitaḥ /
gītaṃ nṛtyañca vādyañca nānābhāvasamanvitam

muktvā ko narake vāsaṃ manasāpi vicintayet /
sindhujād‌bhutabhāvānāṃ rasaṃ tyaktvā sudustvajam

viṇmūtrarasapānañja ka icchenmatimānnaraḥ /
garbhavāsātparo nāsti narako bhuvanatraye

tad‌bhītāśca prakurvanti munayo dustaraṃ tapaḥ /
hitvā bhogañca rājyañca vane yānti manasvinaḥ

yad‌bhītāstu vimūḍhātmā kastaṃ sevitumicchati /
garbhe tudanti kṛmayo jaṭharāgnistapatyadhaḥ

vapāsaṃveṣṭanaṃ kūraṃ kiṃ sukhaṃ tatra bhūpate /
varaṃ kārāgṛhe vāso bandhanaṃ nigaḍairvaram

alpamātraṃ kṣaṇaṃ naiva garbhavāsaḥ kvacicchubhaḥ /
garbhavāse mahadduḥkhaṃ daśamāsanivāsanam

tathā niḥsaraṇe duḥkhaṃ yoniyantre'tidāruṇe /
bālabhāve tadā duḥkhaṃ mūkājñabhāvasaṃyutam

kṣutṛṣṇāvedanāśaktaḥ paratantro'tikātaraḥ /
kṣudhite rudite bāle mātā cintāturā tadā

bheṣajaṃ pātumicchantī jñātvā vyādhivyathāṃ dṛḍhām /
nānāvidhāni duḥkhāni bālabhāve bhavanti vai

kiṃ sukhaṃ vibudhā dṛṣṭvā janma vāñchanti cecchayā /
saṃgrāmamamaraiḥ sārdhaṃ sukhaṃ tyaktvā nirantaram

kartumicchecca ko mūḍhaḥ śramadaṃ sukhanāśanam /
sarvathaiva nṛpaśreṣṭha sarve brahmādayaḥ surāḥ

kṛtakarmavipākena prāpnuvanti sukhāsukhe /
avaśyameva bhoktavyaṃ kṛtaṃ karma śubhāśubham /
dehavad‌bhirnṛbhirdevaistiryagbhiśca nṛpottama

tapasā dānayajñaiśca mānavaścendratāṃ vrajet /
kṣīṇe puṇye'tha śakro'pi patatyeva na saṃśayaḥ

rāmāvatārayogena devā vānaratāṃ gatāḥ /
tathā kṛṣṇasahāyārthaṃ devā yādavatāṃ gatāḥ

evaṃ yuge yuge viṣṇuravatārānanekaśaḥ /
karoti dharmarakṣārthaṃ brahmaṇā prerito bhṛśam

punaḥ punarharerevaṃ nānāyoniṣu pārthiva /
avatārā bhavantyanye rathacakravadad‌bhutāḥ

daityānāṃ hananaṃ karma kartavyaṃ hariṇā svayam /
aṃśāṃśena pṛthivyāṃ vai kṛtvā janma mahātmanā

tadahaṃ saṃpravakṣyāmi kṛṣṇajanmakathāṃ śubhām /
sa eva bhagavānviṣṇuravatīrṇo yadoḥ kule

kaśyapasya muneraṃśo vasudevaḥ pratāpavān /
govṛttirabhavadrājan pūrvaśāpānubhāvataḥ

kaśyapasya ca dve pat‍nyau śāpādatra mahīpate /
aditiḥ surasā caivamāsatuḥ pṛthivīpate

devakī rohiṇī cobhe bhaginyau bharatarṣabha /
varuṇena mahāñchāpo dattaḥ kopāditi śrutam

rājovāca
kiṃ kṛtaṃ kaśyapenāgo yena śapto mahānṛṣiḥ /
sabhāryaḥ sa kathaṃ jātastadvadasva mahāmate

kathañca bhagavānviṣṇustatra jāto'sti gokule /
vāsī vaikuṇṭhanilaye ramāpatirakhaṇḍitaḥ

nideśātkasya bhagavānvartate prabhuravyayaḥ /
nārāyaṇaḥ suraśreṣṭho yugādiḥ sarvadhārakaḥ

sa kathaṃ sadanaṃ tyaktvā karmavāniva mānuṣe /
karoti jananaṃ kasmādatra me saṃśayo mahān

prāpya mānuṣadehaṃ tu karoti ca viḍambanam /
bhāvānnānāvidhāṃstatra mānuṣe duṣṭajanmani

kāmaḥ krodho'marṣaśokau vairaṃ prītiśca karhicit /
sukhaṃ duḥkhaṃ bhayaṃ nṝṇāṃ dainyamārjavameva ca

duṣkṛtaṃ sukṛtaṃ caiva vacanaṃ hananaṃ tathā /
poṣaṇaṃ calanaṃ tāpo vimarśaśca vikatthanam

lobho dambhastathā mohaḥ kapaṭaḥ śocanaṃ tathā /
ete cānye tathā bhāvā mānuṣye sambhavanti hi

sa kathaṃ bhagavānviṣṇustvaktyā sukhamanaśvaram /
karoti mānuṣaṃ janma bhāvaistaistairabhidrutam

kiṃ sukhaṃ mānuṣaṃ prāpya bhuvi janma munīśvara /
kiṃ nimittaṃ hariḥ sākṣād‌garbhavāsaṃ karoti vai

garbhaduḥkhaṃ janmaduḥkhaṃ bālabhāve tathā punaḥ /
yauvane kāmajaṃ duḥkhaṃ gārhastye'timahattaram

duḥkhānyetānyavāpnoti mānuṣe dvijasattama /
kathaṃ sa bhagavānviṣṇuravatārānpunaḥ punaḥ

prāpya rāmāvatāraṃ hi hariṇā brahmayoninā /
duḥkhaṃ mahattaraṃ prāptaṃ vanavāse'tidāruṇe

sītāvirahajaṃ duḥkhaṃ saṃgrāmaśca punaḥ punaḥ /
kāntātyāgo'pyanenaivamanubhūto mahātmanā

tathā kṛṣṇāvatāre'pi janma rakṣāgṛhe punaḥ /
gokule gamanaṃ caiva gavāṃ cāraṇamityuta

kaṃsasya hananaṃ kaṣṭād‌ dvārakāgamanaṃ punaḥ /
nānāsaṃsāraduḥkhāni bhuktavānbhagavān katham

svecchayā kaḥ pratīkṣeta mukto duḥkhāni jñānavān /
saṃśayaṃ chindhi sarvajña mama cittapraśāntaye

iti śrīmaddevībhāgavate mahāpurāṇe'ṣṭādaśasāhasryāṃ sahitāyāṃ //
caturthaskandhe karmaṇo janmādikāraṇatvanirūpaṇaṃ nāma dvitīyo'dhyāyaḥ