Devi Bhagavata Purana · Chapter 4.11

śukramāturvadhavarṇanam
vyāsa uvāca
tathā gateṣu deveṣu kāvyastānpratyuvāca ha /
brahmaṇā pūrvamuktaṃ yacchruṇudhvaṃ dānavottamāḥ

viṣṇurdaityavadhe yukto haniṣyati janārdanaḥ /
vārāharūpaṃ saṃsthāya hiraṇyākṣo yathā hataḥ

yathā nṛsiṃharūpeṇa hiraṇyakaśipurhataḥ /
tathā sarvānkṛtotsāho haniṣyati na cānyathā

na me mantrabalaṃ samyakpratibhāti yathā harim /
jetuṃ yūyaṃ samarthāḥ stha mayā trātāḥ surānatha

tasmātkālaṃ pratīkṣadhvaṃ kiyantaṃ dānavottamāḥ /
ahamadya mahādevaṃ mantrārthaṃ pravrajāmi vai

prāpya mantrānmahādevādāgamiṣyāmi sāmpratam /
yuṣmabhyaṃ tānpradāsyāmi yathārthaṃ dānavottamāḥ

daityā ūcuḥ
parājitāḥ kathaṃ sthātuṃ pṛthivyāṃ munisattama /
śaktā bhavāmo'pyabalāstāvatkālaṃ pratīkṣitum

nihatā balinaḥ sarve kecicchiṣṭāśca dānavāḥ /
nādya yuktāśca saṃgrāme sthātumevaṃ sukhāvahāḥ

śukra uvāca
yāvadahaṃ mantravidyāmānayiṣyāmi śaṅkarāt /
tāvad‌bhavad‌bhiḥ sthātavyaṃ tapoyuktaiḥ śamānvitaiḥ

sāmadānādayaḥ proktā vidvad‌bhiḥ samayocitāḥ /
deśaṃ kālaṃ balaṃ vīrairjñātvā śaktiṃ balaṃ budhaiḥ

sevātha samaye kāryā śatrūṇāṃ śubhakāmyayā /
svaśaktyupacaye kāle hantavyāste manīṣibhiḥ

tadadya vinayaṃ kṛtvā sāmapūrvaṃ chalena vai /
tiṣṭhadhvaṃ svaniketeṣu madāgamanakāṅkṣayā

prāpya mantrānmahādevādāgamiṣyāmi dānavāḥ /
yudhyāmahe punardevānmāntramāsthāya vai balam

ityuktvātha bhṛgustebhyo jagāma kṛtaniścayaḥ /
mahādevaṃ mahārāja mantrārthaṃ munisattamaḥ

dānavāḥ preṣayāmāsuḥ prahlādaṃ surasannidhau /
satyavādinamavyagraṃ surāṇāṃ pratyayapradam

prahlādastu surānprāha praśrayāvanato nṛpaḥ /
asuraiḥ sahitastatra vacanaṃ namratāyutam

nyastaśastrā vayaṃ sarve niḥsannāhāstathaiva ca /
devāstapaścariṣyāmaḥ saṃvṛtā valkalairyutāḥ

prahlādasya vacaḥ śrutvā satyābhivyāhṛtaṃ tu tat /
tato devā nyavartanta vijvarā muditāśca te

nyastaśastreṣu daityeṣu vinivṛttāstadā surāḥ /
viśrabdhāḥ svagṛhāngatvā krīḍāsaktāḥ susaṃsthitāḥ

daityā dambhaṃ samālambya tāpasāstapisaṃyutāḥ /
kaśyapasyāśrame vāsaṃ cakruḥ kāvyāgamecchayā

kāvyo gatvātha kailāsaṃ mahādevaṃ praṇamya ca /
uvāca vibhunā pṛṣṭaḥ kiṃ te kāryamiti prabhuḥ

mantrānicchāmyahaṃ deva ye na santi bṛhaspatau /
parājayāya devānāmasurāṇāṃ jayāya ca

vyāsa uvāca
tacchrutvā vacanaṃ tasya sarvajñaḥ śaṅkaraḥ śivaḥ /
cintayāmāsa manasā kiṃ kartavyamataḥ param

sureṣu drohabuddhyāsau mantrārthamiha sāmpratam /
prāptaḥ kāvyo gurusteṣāṃ daityānāṃ vijayāya ca

rakṣaṇīyā mayā devā iti sañcintya śaṅkaraḥ /
duṣkaraṃ vratamatyugraṃ tamuvāca maheśvaraḥ

pūrṇaṃ varṣasahasraṃ tu kaṇadhūmamavākchirāḥ /
yadi pāsyasi bhadraṃ te tato mantrānavāpsyasi

ityukto'sau praṇamyeśaṃ bāḍhamityabravīdvacaḥ /
vrataṃ carāmyahaṃ deva tvayājñaptaḥ sureśvara

vyāsa uvāca
ityuktvā śaṅkaraṃ kāvyaścakāra vratamuttamam /
dhūmapānarataḥ śānto mantrārthaṃ kṛtaniścayaḥ

tato devāḥ parijñāya kāvyaṃ vratarataṃ tadā /
daityāndambharatāṃścaiva babhūvurmantratatparāḥ

vicārya manasā sarve saṃgrāmāyodyatā nṛpa /
yayurdhṛtāyudhāstatra yatra te dānavottamāḥ

tānāgatānsamīkṣyātha sāyudhāndaṃśitāṃstathā /
āsaṃste bhayasaṃvignā daityā devānsamantataḥ

utpetuḥ sahasā te vai sannaddhānbhayakarśitāḥ /
abruvanvacanaṃ tathyaṃ te devānvaladarpitān

nyastaśastre bhayavati ācārye vratamāsthite /
dattvābhayaṃ purā devāḥ samprāptā no jighāṃsayā

satyaṃ vaḥ kva gataṃ devā dharmaśca śrutinoditaḥ /
nyastaśastrā na hantavyā bhītāśca śaraṇaṃ gatāḥ

devā ūcuḥ
bhavad‌bhiḥ preṣitaḥ kāvyo mantrārthaṃ kuhakena ca /
tapo jñātaṃ hi yuṣmākaṃ tena yudhyāma eva hi

sajjā bhavantu yuddhāya saṃrabdhāḥ śastrapāṇayaḥ /
śatruśchidreṇa hantavya eṣa dharmaḥ sanātanaḥ

vyāsa uvāca
tacchrutvā vacanaṃ daityā vicārya ca parasparam /
palāyanaparāḥ sarve nirgatā bhayavihvalāḥ

śaraṇaṃ dānavā jagmurbhītāste kāvyamātaram /
dṛṣṭvā tānatisantaptānabhayaṃ ca dadāvatha

kāvyamātovāca
na bhetavyaṃ na bhetavyaṃ bhayaṃ tyajata dānavāḥ /
matsannidhau vartamānānna bhīrbhavitumarhati

tacchrutvā vacanaṃ daityāḥ sthitāstatra gatavyathāḥ /
nirāyudhā hyasaṃbhrāntāstatrāśramavare'surāḥ

devāstānvidrutānvīkṣya dānavāste padānugāḥ /
abhijagmuḥ prasahyaitānavicārya balābalam

tatrāgatāḥ surāḥ sarve hantuṃ daityānsamudyatāḥ /
vāritāḥ kāvyamātrāpi jaghnustānāśramasthitān

hanyamānānsurairdṛṣṭvā kāvyamātātivepitā /
uvāca sarvānsanidrāṃstapasā vai karomyaham

ityuktvā preritā nidrā tānāgatya papāta ca /
sendrā nidrāvaśaṃ yātā devā mūkavadāsthitāḥ

indraṃ nidrājitaṃ dṛṣṭvā dīnaṃ viṣṇurabhāṣata /
māṃ tvaṃ praviśa bhadraṃ te naye tvāṃ ca surottama

evamuktastato viṣṇuṃ praviveśa purandaraḥ /
nirbhayo gatanidraśca babhūva harirakṣitaḥ

rakṣitaṃ hariṇā dṛṣṭvā śakraṃ tatra gatavyatham /
kāvyamātā tataḥ kruddhā vacanaṃ cedamabravīt

maghavaṃstvāṃ bhakṣayāmi saviṣṇuṃ vai tapobalāt /
paśyatāṃ sarvadevānāmīdṛśaṃ me tapobalam

vyāsa uvāca
ityuktau tu tayā devau viṣṇvindrau yogavidyayā /
abhibhūtau mahātmānau stabdhau tau sambabhūvatuḥ

vismitāstu tadā devā dṛṣṭvā tāvatibādhitau /
cakruḥ kilakilāśabdaṃ tataste dīnamānasāḥ

krośamānānsurāndṛṣṭvā viṣṇuṃ prāha śacīpatiḥ /
viśeṣeṇābhibhūto'smi tvatto'haṃ madhusūdana

jahyenāṃ tarasā viṣṇo yāvannau na dahetprabho /
tapasā darpitāṃ duṣṭāṃ mā vicāraya mādhava

ityukto bhagavānviṣṇuḥ śakreṇa prathitena ca /
cakraṃ sasmāra tarasā ghṛṇāṃ tyaktvātha mādhavaḥ

smṛtamātraṃ tu samprāptaṃ cakraṃ viṣṇuvaśānugam /
dadhāra ca kare kruddho vadhārthaṃ śakranoditaḥ

gṛhītvā tatkare cakraṃ śiraściccheda raṃhasā /
hatāṃ dṛṣṭvā tu tāṃ śakro muditaścābhavattadā

devāścātīva santuṣṭā hariṃ jaya jayeti ca /
tuṣṭuvurmuditāḥ sarve sañjātā vigatajvarāḥ

indraviṣṇū tu sañjātau tatkṣaṇāddhṛdayavyathau /
strīvadhācchaṃkamānau tu bhṛgoḥ śāpaṃ duratyayam

iti śrīmaddevībhāgavate mahāpurāṇe'ṣṭādaśasāhasryāṃ saṃhitāyāṃ
caturthaskandhe śukramāturvadhavarṇanaṃ nāmekādaśo'dhyāyaḥ