Devi Bhagavata Purana · Chapter 3.22

sudarśanaśaśikalayorvivāhavarṇanam
vyāsa uvāca
śrutvā sutāvākyamaninditātmā
nṛpāṃśca gatvā nṛpatirjagāda /
vrajantu kāmaṃ śivirāṇi bhūpāḥ
ś‍vo vā vivāhaṃ kila saṃvidhāsye

bhakṣyāṇi peyāni mayā'rpitāni
gṛhṇantu sarve mayi suprasannāḥ /
ś‍vo bhāvi kāryaṃ kila maṇḍape'tra
sametya sarvairiha saṃvidheyam

nāyāti putrī kila maṇḍape'dya
karomi kiṃ bhūpatayo'tra kāmam /
prātaḥ samāśvāsya sutāṃ nayiṣye
gacchantu tasmācchivirāṇi bhūpāḥ

na vigraho buddhimatāṃ nijāśrite
kṛpā vidheyā satataṃ hyapatye /
vidhāya tāṃ prātārihānayiṣye
sutāṃ tu gacchantu nṛpā yatheṣṭam

icchāpaṇaṃ vā paricintya citte
prātaḥ kariṣyāmyatha saṃvivāham /
sarvaiḥ sametyātra nṛpaiḥ sametaiḥ
svayaṃvaraḥ sarvamatena kāryaḥ

śrutvā nṛpāste'vitathaṃ viditvā
vaco yayuḥ svāni niketanāni /
vidhāya pārśve nagarasya rakṣāṃ
cakruḥ kriyā madhyadinoditāśca

subāhurapyāryajanaiḥ sameta-
ścakāra kāryāṇi vivāhakāle /
putrīṃ samāhūya gṛhe sugupte
purohitairvedavidāṃ variṣṭhaiḥ

snānādikaṃ karma varasya kṛtvā
vivāhabhūṣākaraṇaṃ tathaiva /
ānāyya vedīracite gṛhe vai
tasyārhaṇāṃ bhūmipatiścakāra

saviṣṭaraṃ cācamanīyamarghyaṃ
vastradvayaṃ gāmatha kuṇḍale dve /
samarpya tasmai vidhivannarendra
aicchatsutādānamahīnasattvaḥ

so'pyagrahītsarvamadīnacetāḥ
śaśāma cintā'tha manoramāyāḥ /
kanyāṃ sukeśīṃ nidhikanyakāsamāṃ
mene tadā''tmānamanuttamañca

supūjitaṃ bhūṣaṇavastradānai-
rvarottamaṃ taṃ sacivāstadānīm /
ninyuśca te kautukamaṇḍapānta-
rmudānvitā vītabhayāśca sarve

samāptabhūṣāṃ vidhivadvidhijñāḥ
striyaśca tāṃ rājasutāṃ suyāne /
āropya ninyurvarasannidhānaṇ
catuṣkayukte kila maṇḍape vai

agniṃ samādhāya purohitaḥ sa
hutvā yathāvacca tadantarāle /
āhvāyayattau kṛtakautukau tu
vadhūvarau premayutau nikāmam

lājāvisargaṃ vidhivadvidhāya
kṛtvā hutāśasya pradakṣiṇāñca /
tau cakratustatra yathocittaṃ tat
sarvaṃ vidhānaṃ kulagotrajātam

śatadvayaṃ cāścayujāṃ rathānāṃ
subhūṣitaṃ cāpi śaraughasaṃyutam /
dadau nṛpendrastu sudarśanāya
supūjitaṃ pāribarhaṃ vivāhe

madotkaṭānhemavibhūṣitāṃśca
gajāngireḥ śṛṅgasamānadehān /
śataṃ sapādaṃ nṛpasūnave'sau
dadāvatha premayuto nṛpendraḥ

dāsīśataṃ kāñcanabhūṣitaṃ ca
kareṇukānāṃ ca śataṃ sucāru /
samarpayāmāsa varāya rājā
vivāhakāle mudito'nuvelam

adātpunardāsasahasramekaṃ
sarvāyudhaiḥ sambhṛtabhūṣitañca /
rat‍nāni vāsāṃsi yathocitāni
divyāni citrāṇi tathāvikāni

dadau punarvāsagṛhāṇi tasmai
ramyāṇi dīrghāṇi vicitritāni /
sindhūd‌bhavānāṃ turagottamānā-
madātsahasradvitayaṃ suramyam

kramelakānāñca śatatrayaṃ vai
pratyādiśad‌bhārabhṛtāṃ sucāru /
śatadvayaṃ vai śakaṭottamānāṃ
tasmai dadau dhānyarasaiḥ prapūritam

manoramāṃ rājasutāṃ praṇamya
jagāda vākyaṃ vihitāñjaliḥ puraḥ /
dāso'smi te rājasute variṣṭhe
tad‍brūhi yatsyāttu manogataṃ te

taṃ cāruvākyaṃ nijagāda sāpi
svastyastu te bhūpa kulasya vṛddhiḥ /
sammānitā'haṃ mama sūnave tvayā
dattā yato rat‍navarā svakanyā

na bandiputrī nṛpa māgadhī vā
stau‍mīha kiṃ tvāṃ svajanaṃ mahattaram /
sumerutulyastu kṛtaḥ suto'dya me
sambandhinā bhūpatinottamena

aho'ticitraṃ nṛpateścaritraṃ
paraṃ pavitraṃ tava kiṃ vadāmi /
yad‌bhraṣṭarājyāya sutāya me'dya
dattā tvayā pūjyasutā variṣṭhā

vanādhivāsāya kilādhanāya
pitrā vihīnāya visainyakāya /
sarvānimānbhūmipatīnvihāya
phalāśanāyārthavivarjitāya

samānavitte'tha kule bale ca
dadāti putrīṃ nṛpatiśca bhūyaḥ /
na ko'pi me bhūpasute'rthahīne
guṇānvitāṃ rūpavatīñca dadyāt

vairaṃ tu sarvaiḥ saha saṃvidhāya
nṛpairvariṣṭhairbalasaṃyutaiśca /
sudarśanāyātha sutā'rpitā me
kiṃ varṇaye dhairyamidaṃ tvadīyam

niśamya vākyāni nṛpaḥ prahṛṣṭaḥ
kṛtāñjalirvākyamuvāca bhūyaḥ /
gṛhāṇa rājyaṃ mama suprasiddhaṃ
bhavāmi senāpatiradya cāham

nocettadardhaṃ pratigṛhya cātra
sutānvito rājyaphalāni bhuṅkṣva /
vihāya vārāṇasikānivāsaṃ
vane pure vāsamato na me'sti

nṛpāstu santyeva ruṣānvitā vai
gatvā kariṣye prathamaṃ tu sāntvanam /
tataḥ paraṃ dvāvaparāvupāyau
nocettato yuddhamahaṃ kariṣye

jayājayo daivavaśo tathāpi
dharme jayo naiva kṛte'pyadharme /
teṣāṃ kilādharmavatāṃ nṛpāṇāṃ
kathaṃ bhaviṣyatyanucintitaṃ vai

ākarṇya tad‌bhāṣitamarthavacca
jagāda vākyaṃ hitakārakaṃ tam /
manoramā mānamavāpya tasmāt
sarvātmanā modayutā prasannā

rājañchivaṃ te'stu kuruṣva rājyaṃ
tyaktvā bhayaṃ tvaṃ svasutaiḥ sametaḥ /
suto'pi me nūnamavāpya rājyaṃ
sāketapuryāṃ pracariṣyatīha

visarjayāsmānnijasadma gantuṃ
śivaṃ bhavānī tava saṃvidhāsyati /
na kā'pi cintā mama bhūpa vartate
sañcintayantyā paramāmbikāṃ vai

doṣā gatā vividhavākyapadai rasālai-
ranyonyabhāṣaṇapadairamṛtopamaiśca /
prātarnṛpāḥ samadhigamya kṛtaṃ vivāhaṃ
roṣānvitā nagarabāhyagatāstathocuḥ

adyaiva taṃ nṛpakalaṅkadharañca hatvā
bālaṃ tathaiva kila taṃ na vivāhayogyam /
gṛhṇīma tāṃ śaśikalāṃ nṛpateśca lakṣmīṃ
lajjāmavāpya nijasadma kathaṃ vrajema

śṛṇvantu tūryaninadānkila vādyamānā-
ñchaṅkhasvanānabhibhavanti mṛdaṅgaśabdāḥ /
gītadhvaniṃ ca vividhaṃ nigamasvanañca
manyāmahe nṛpatinā‍'tra kṛto vivāhaḥ

asmānpratārya vacanairvidhivaccakāra
vaivāhikena vidhinā karapīḍanaṃ vai /
kartavyamadya kimaho pravicintayantu
bhūpāḥ parasparamatiṃ ca samarthayantu

evaṃ vadatsu nṛpatiṣvatha kanyākāyāḥ
kṛtvā vivāhavidhimapratimaprabhāvaḥ /
bhūpānnimantrayitumāśu jagāma rājā
kāśīpatiḥ svasuhṛdaiḥ prathitaprabhāvaiḥ

āgacchantaṃ ca taṃ dṛṣṭvā nṛpāḥ kāśīpatiṃ tadā /
nocuḥ kiñcidapi krodhānmaunamādhāya saṃsthitāḥ

sa gatvā praṇipatyāha kṛtāñjalirabhāṣata /
āgantavyaṃ nṛpaiḥ sarvairbhojanārthaṃ gṛhe mama

kanyayā'sau vṛto bhūpaḥ kiṃ karomi hitāhitam /
bhavad‌bhistu śubhaḥ kāryo mahānto hi dayālavaḥ

tanniśamya vacastasya nṛpāḥ krodhapariplutāḥ /
pratyūcurbhuktamasmābhiḥ svagṛhaṃ nṛpate vraja

kuru kāryāṇyaśeṣāṇi yatheṣṭaṃ sukṛtaṃ kṛtam /
nṛpāḥ sarve prayāntvadya svāni svāni gṛhāṇi vai

subāhurapi tacchrutvā jagāma śaṅ‌kito gṛham /
kiṃ kariṣyanti saṃvignāḥ krodhayuktā nṛpottamāḥ

gate tasminmahīpālāścakruśca samayaṃ punaḥ /
rud‌dhvā mārgaṃ grahīṣyāmaḥ kanyāṃ hatvā sudarśanam

kecanocuḥ kimasmākaṃ hanta tena nṛpeṇa vai /
dṛṣṭvā tu kautukaṃ sarvaṃ gamiṣyāmo yathāgatam

ityuktvā te nṛpāḥ sarve mārgamākramya saṃsthitāḥ /
cakārottarakāryāṇi subāhuḥ svagṛhaṃ gataḥ

iti śrīmaddevībhāgavate mahāpurāṇe'ṣṭādaśasāhasryāṃ saṃhitāyāṃ tṛtīyaskandhe
sudarśanaśaśikalayorvivāhavarṇanaṃ nāma dvāviṃśo'dhyāyaḥ