Devi Bhagavata Purana · Chapter 3.23

subāhukṛtadevīstutivarṇanam
vyāsa uvāca
tasmai gauravabhojyāni vidhāya vidhivattadā /
vāsarāṇi ca ṣaḍrājā bhojayāmāsa bhaktitaḥ

evaṃ vivāhakāryāṇi kṛtvā sarvāṇi pārthivaḥ /
pāribarhaṃ pradatvā'tha mantrayansacivaiḥ saha

dūtaistu kathitaṃ śrutvā mārgasaṃrodhanaṃ kṛtam /
babhūva vimanā rājā subāhuramitadyutiḥ

sudarśanastadovāca śvaśuraṃ saṃśitavrataḥ /
asmānvisarjayāśu tvaṃ gamiṣyāmo hyaśaṅ‌kitāḥ

bhāradvājāśramaṃ puṇyaṃ gatvā tatra samāhitāḥ /
nivāsāya vicāro vai kartavyaḥ sarvathā nṛpa

nṛpebhyaśca na kartavyaṃ bhayaṃ kiñcittvayā'nagha /
jaganmātā bhavānī me sāhāyyaṃ vai kariṣyati

vyāsa uvāca
tasyeti matamājñāya jāmāturnupasattamaḥ /
visasarja dhanaṃ datvā pratasthe so'pi satvaraḥ

balena mahatā''viṣṭo yayāvanu nṛpottamaḥ /
sudarśano vṛtastatra cacāla pathi nirbhayaḥ

rathaiḥ parivṛtaḥ śūraḥ sadāro rathasaṃsthitaḥ /
gacchandadarśa sainyāni nṛpāṇāṃ raghunandanaḥ

subāhurapi tānvīkṣya cintāviṣṭo babhūva ha /
vidhivatsa śivāṃ citte jagāma śaraṇaṃ mudā

jajāpaikākṣaraṃ mantraṃ kāmarājamanuttamam /
nirbhayo vītaśokaśca pat‍nyā saha navoḍhayā

tataḥ sarve mahīpālāḥ kṛtvā kolāhalaṃ tadā /
utthitāḥ sainyasaṃyuktā hantukāmāstu kanyakām

kāśirājastu tāndṛṣṭvā hantukāmo babhūva ha /
nivāritastadā'tyarthaṃ rāghaveṇa jigīṣatā

tatrāpi neduḥ śaṃkhāśca bheryaścānakadundubhiḥ /
subāhośca nṛpāṇāñca parasparajighāṃsatām

śatrujittu susaṃvṛttaḥ sthitastatra jighāṃsayā /
yudhājittatsahāyārthaṃ sannaddhaḥ prababhūva ha

kecicca prekṣakāstasya sahānīkaiḥ sthitāstadā /
yudhājidagrato gatvā sudarśanamupasthitaḥ

śatrujittena sahito hantuṃ bhrātaramānujaḥ /
parasparaṃ te bāṇaughaistatakṣuḥ krodhamūrchitāḥ

sammardaḥ sumahāṃstatra sampravṛttaḥ sumārgaṇaiḥ /
kāśīpatistadā tūrṇaṃ sainyena bahunā vṛtaḥ

sāhāyyārthaṃ jagāmāśu jāmātaramaninditam /
evaṃ pravṛtte saṅgrāme dāruṇe lomaharṣaṇe

prādurbabhūva sahasā devī siṃhopari sthitā /
nānāyudhadharā ramyā varābhūṣaṇabhūṣitā

divyāmbaraparīdhānā mandārasraksusaṃyutā /
tāṃ dṛṣṭvā te'tha bhūpālā vismayaṃ paramaṃ gatāḥ

keyaṃ siṃhasamārūḍhā kuto veti samutthitā /
sudarśanastu tāṃ vīkṣya subāhumiti cābravīt

paśya rājanmahādevīmāgatāṃ divyadarśanām /
anugrahāya me nūnaṃ prādurbhūtā dayānvitā

nirbhayo'haṃ mahārāja jāto'smi nirbhayādapi /
sudarśanaḥ subāhuśca tāmālokya varānanām

praṇāmaṃ cakratustasyā muditau darśanena ca /
nanāda ca tadā siṃho gajāstrastāścakampire

vavurvātā mahāghorā diśaścāsansudāruṇāḥ /
sudarśanastadā prāha nijaṃ senāpatiṃ prati

mārge vraja tvaṃ tarasā bhūpālā yatra saṃsthitāḥ /
kiṃ kariṣyanti rājānaḥ kupitā duṣṭacetasaḥ

śaraṇārthañca samprāptā devī bhagavatī hi naḥ /
nirātaṅkaiśca gantavyaṃ mārge'sminbhūpasaṅkule

smṛtā mayā mahādevī rakṣaṇārthamupāgatā /
tacchrutvā vacanaṃ senāpatistena pathā'vrajat

yudhājittu susaṅkruddhastānuvāca mahīpatīn /
kiṃ sthitā bhayasantrastā nighnantu kanyakānvitam

avamanya ca naḥ sarvānbalahīno balādhikān /
kanyāṃ gṛhītvā saṃyāti nirbhayastarasā śiśuḥ

kiṃ bhītāḥ kāminīṃ vīkṣya siṃhopari susaṃsthitām /
nopekṣyo hi mahābhāgā hantavyo'tra samāhitaiḥ

hatvainaṃ saṅgrahīṣyāmaḥ kanyāṃ cāruvibhūṣaṇām /
nāyaṃ kesariṇādattāṃ chettumarhati jambukaḥ

ityuktvā sainyasaṃyuktaḥ śatrujitsahitastadā /
yoddhukāmaḥ susamprāpto yudhājitkrodhasaṃvṛtaḥ

mumoca viśikhāṃstūrṇaṃ samapuṃkhāñchilāśitān /
dhanurākṛṣya karṇāntaṃ karmāraparimārjitān

hantukāmaḥ sudurmedhāḥ sudarśanamathopari /
sudarśanastu tānbāṇaiścicchedāpatataḥ kṣaṇāt

evaṃ yuddhe pravṛtte'tha cukopa caṇḍikā bhṛśam /
durgādevī mumocātha bāṇān yudhājitaṃ prati

nānārūpā tadā jātā nānāśasradharā śivā /
samprāptā tumulaṃ tatra cakāra jagadambikā

śatrujinnihatastatra yudhājidapi pārthivaḥ /
patitau tau rathābhyāṃ tu jayaśabdastadā'bhavat

vismayaṃ paramaṃ prāptā bhūpāḥ sarve vilokya tām /
nidhanaṃ mātulasyāpi bhāgineyasya saṃyuge

subāhurapi tad‌dṛṣṭvā nidhanaṃ saṃyuge tayoḥ /
tuṣṭāva paramaprīto durgāṃ durgārtināśinīm

subāhuruvāca
namau devyai jagaddhātryai śivāyai satataṃ namaḥ /
durgāyai bhagavatyai te kāmadāyai namo namaḥ

namaḥ śivāyai śāntyai te vidyāyai mokṣade namaḥ /
viśvavyāptyai jaganmātarjagaddhātryai namaḥ śive

nāhaṃ gatiṃ tava dhiyā paricintayan vai
jānāmi devi saguṇaḥ kila nirguṇāyāḥ /
kiṃ stau‌mi viśvajananīṃ prakaṭaprabhāvāṃ
bhaktārtināśanaparāṃ paramāñca śaktim

vāgdevatā tvamasi sarvagataiva buddhi-
rvidyā matiśca gatirapyasi sarvajantoḥ /
tvāṃ stau‌mi kiṃ tvamasi sarvamanoniyantrī
kiṃ stūyate hi satataṃ khalu cātmarūpam

brahmā haraśca harirapyaniśaṃ stuvanto
nāntaṃ gatāḥ suravarāḥ kila te guṇānām /
kvāhaṃ vibhedamatiramba guṇairvṛto vai
vaktuṃ kṣamastava caritramaho'prasiddhaḥ

satsaṅgatiḥ kathamaho na karoti kāmaṃ
prāsaṅ‌gikāpi vihitā khalu cittaśuddhiḥ /
jāmāturasya vihitena samāgamena
prāptaṃ mayā'd‌bhutamidaṃ tava darśanaṃ vai

brahmā'pi vāñchati sadaiva haro hariśca
sendrāḥ surāśca munayo viditārthatattvāḥ /
yaddarśanaṃ janani te'dya mayā durāpaṃ
prāptaṃ vinā damaśamādisamādhibhiśca

kvāhaṃ sumandamatirāśu tavāvalokaṃ
kvedaṃ bhavāni bhavabheṣajamadvitīyam /
jñātā'si devi satataṃ kila bhāvayuktā
bhaktānukampanaparāmaravargapūjyā

kiṃ varṇayāmi tava devi caritrametad‌
yad‌rakṣito'sti viṣame'tra sudarśano'yam /
śatrū hatau subalinau tarasā tvayādya
bhaktānukampi caritaṃ paramaṃ pavitram

nāścaryametaditi devi vicārite'rthe
tvaṃ pāsi sarvamakhilaṃ sthirajaṅgamaṃ vai /
trātastvayā ca vinihatya ripurdayātaḥ
saṃrakṣito'yamadhunā dhruvasandhisūnuḥ

bhaktasya sevanaparasya svayaśo'tidīptaṃ
kartuṃ bhavāni racitaṃ caritaṃ tvayaitat /
nocetkathaṃ suparigṛhya sutāṃ madīyāṃ
yuddhe bhavetkuśalavānanavadyaśīlaḥ

śaktā'si janmamaraṇādibhayānvihantuṃ
kiṃ citramatra kila bhaktajanasya kāmam /
tvaṃ gīyase janani bhaktajanairapārā
tvaṃ pāpapuṇyarahitā saguṇā'guṇā ca

tvaddarśanādahamaho sukṛtī kṛtārtho
jāto'smi devi bhuvaneśvari dhanyajanmā /
bījaṃ na te na bhajanaṃ kila vedmi māta-
rjñātastavādya mahimā prakaṭaprabhāvaḥ

vyāsa uvāca
evaṃ stutā tadā devī prasannavadanā śivā /
uvāca ca nṛpaṃ devī varaṃ varaya suvrata

iti śrīdevībhāgavate mahāpurāṇe'ṣṭādaśasāhasryāṃ saṃhitāyāṃ tṛtīyaskandhe
subāhukṛtadevīstutivarṇanaṃ nāma trayoviṃśo'dhyāyaḥ