Devi Bhagavata Purana · Chapter 3.18

śaśikalayā mātaraṃ prati saṃdeśapreṣaṇam
vyāsa uvāca
śrutvā tadvacanaṃ śyāmā premayuktā babhūva ha /
pratasthe brāhmaṇastasmātsthānāduktvā samāhitaḥ

sā tu pūrvānurāgādvai magnā premṇā'ticañcalā /
kāmabāṇahatevāsa gate tasmindvijottame

atha kāmārditā prāha sakhīṃ chando'nuvartinīm /
vikāraś‍ca samutpanno dehe yacchravaṇādanu

ajñātarasavijñānaṃ kumāraṃ kulasambhavam /
dunoti madanaḥ pāpaḥ kiṃ karomi kva yāmi ca

svapneṣu vā mayā dṛṣṭaḥ pañcabāṇa ivāparaḥ /
tapate me mano'tyarthaṃ virahākulitaṃ mṛdu

candanaṃ dehalagnaṃ me viṣavad‌bhāti bhāmini /
sragiyaṃ sarpavaccaiva candrapādāś‍ca vahnivat

na ca harmye vane śaṃ me dīrghikāyāṃ na parvate /
na divā na niśāyāṃ vā na sukhaṃ sukhasādhanaiḥ

na śayyā na ca tāmbūlaṃ na gītaṃ na ca vādanam /
prīṇayanti mano me'dya na tṛpte mama locane

prayāmyadya vane tatra yatrāsau vartate śaṭhaḥ /
bhītāsmi kulalajjāyāḥ paratantrā pitustathā

svayaṃvaraṃ pitā me'dya na karoti karomi kim /
dāsyāmi rājaputrāya kāmaṃ sudarśanāya vai

santyanye pṛthivīpālāḥ śataśaḥ sambhṛtarddhayaḥ /
ramaṇīyā na me te'dya rājyahīno'pyasau mataḥ

vyāsa uvāca
ekākī nirdhanaś‍caiva balahīnaḥ sudarśanaḥ /
vanavāsī phalāhārastasyāś‍citte susaṃsthitā

vāgbījasya japātsiddhistasyā eṣāpyupasthitā /
sopi dhyānaparo'tyantaṃ jajāpa mantramuttamam

svapne paśyatyasau devīṃ viṣṇumāyāmakhaṇḍitām /
viś‍vamātaramavyaktāṃ sarvasampatkarāmbikām

śṛṅgaverapurādhyakṣo niṣādaḥ samupetya tam /
dadau rathavaraṃ tasmai sarvopaskarasaṃyutam

caturbhisturagairyuktaṃ patākāvaramaṇḍitam /
jaitraṃ rājasutaṃ jñātvā dadau copāyanaṃ tadā

so'pi jagrāha taṃ prītyā mitratvena susaṃsthitam /
vanyairmūlaphalaiḥ samyagarcayāmāsa śambaram

kṛtātithye gate tasminniṣādādhipatau tadā /
munayaḥ prītiyuktāste tamūcustāpasā mithaḥ

rājaputra dhruvaṃ rājyaṃ prāpsyasi tvaṃ ca sarvathā /
svalpairahobhiravyagraḥ pratāpānnātra saṃśayaḥ

prasannā te'mbikā devī varadā viś‍vamohinī /
sahāyastu susampanno na cintāṃ kuru suvrata

manoramāṃ tathocuste munayaḥ saṃśitavratāḥ /
putraste'dya dharādhīśo bhaviṣyati śucismite

sā tānuvāca tanvaṅgī vacanaṃ vo'stu satphalam /
dāso'yaṃ bhavatāṃ viprāḥ kiṃ citraṃ sadupāsanāt

na sainyaṃ sacivāḥ kośo na sahāyaś‍ca kaś‍cana /
kena yogena putro me rājyaṃ prāptumihārhati

āśīrvādaiś‍ca vo nūnaṃ putro'yaṃ me mahīpatiḥ /
bhaviṣyati na sandeho bhavanto mantravittamāḥ

vyāsa uvāca
rathārūḍhaḥ sa medhāvī yatra yāti sudarśanaḥ /
akṣauhiṇīsamāvṛtta ivābhāti sa tejasā

pratāpo mantrabījasya nānyaḥ kaś‍cana bhūpate /
evaṃ vai japatastasya prītiyuktasya sarvathā

samprāpya sad‌gurorbījaṃ kāmarājākhyamad‌bhutam /
japedyastu śuciḥ śāntaḥ sarvānkāmānavāpnuyāt

na tadasti pṛthivyāṃ vā divi vāpi sudurlabham /
prasannāyāḥ śivāyāś‍ca yadaprāpyaṃ nṛpottama

te mandāste'tidurbhāgyā rogaiste samabhidrutāḥ /
yeṣāṃ citte na viś‍vāso bhavedambārcanādiṣu

yā mātā sarvadevānāṃ yugādau parikīrtitā /
ādimāteti vikhyātā nāmnā tena kurūdvaha

buddhiḥ kīrtirdhṛtirlakṣmīḥ śaktiḥ śraddhā matiḥ smṛtiḥ /
sarveṣāṃ prāṇināṃ sā vai pratyakṣaṃ vai vibhāsate

na jānanti narā ye vai mohitā māyayā kila /
na bhajanti kutarkajñā devīṃ viś‍veś‍varīṃ śivām

brahmā viṣṇustathā śambhurvāsavo varuṇo yamaḥ /
vāyuragniḥ kuberaśca tvaṣṭā pūṣāśvinau bhagaḥ

ādityā vasavo rudrā viś‍vedevā marud‌gaṇāḥ /
sarve dhyāyanti tāṃ devīṃ sṛṣṭisthityantakāriṇīm

ko na seveta vidvānvai tāṃ śaktiṃ paramātmikām /
sudarśanena sā jñātā devī sarvārthadā śivā

brahmaiva sā'tiduṣprāpyā vidyāvidyāsvarūpiṇī /
yogagamyā parā śaktirmumukṣūṇāṃ ca vallabhā

paramātmasvarūpaṃ ko vettumarhati tāṃ vinā /
yā sṛṣṭiṃ trividhāṃ kṛtvā darśayatyakhilātmane

sudarśanastu tāṃ devīṃ manasā paricintayan /
rājyalābhātparaṃ prāpya sukhaṃ vai kānane sthitaḥ

sāpi candrakalātyarthaṃ kāmabāṇaprapīḍitā /
nānopacārairaniśaṃ dadhāra duḥkhitaṃ vapuḥ

tāvattasyāḥ pitā jñātvā kanyāṃ putravarārthinīm /
subāhuḥ kārayāmāsa svayaṃvaramatandritaḥ

svayaṃvarastu trividho vidvad‌bhiḥ parikīrtitaḥ /
rājñāṃ vivāhayogyau vai nānyeṣāṃ kathitaḥ kila

icchāsvayaṃvaraś‍caiko dvitīyaś‍ca paṇābhidhaḥ /
yathā rāmeṇa bhagnaṃ vai tryambakasya śarāsanam

tṛtīyaḥ śauryaśulkaś‍ca śūrāṇāṃ parikīrtitaḥ /
icchāsvayaṃvaraṃ tatra cakāra nṛpasattamaḥ

śilpibhiḥ kāritā mañcāḥ śubhairāstaraṇairyutāḥ /
tataśca vividhākārāḥ suklṛptāḥ sabhyamaṇḍapāḥ

evaṃ kṛte'tisambhāre vivāhārthaṃ suvistare /
sakhīṃ śaśikalā prāha duḥkhitā cārulocanā

idaṃ me mātaraṃ brūhi tvamekānte vaco mama /
mayā vṛtaḥ patiścitte dhruvasandhisutaḥ śubhaḥ

nānyaṃ varaṃ variṣyāmi tamṛte vai sudarśanam /
sa me bhartā nṛpasuto bhagavatyā pratiṣṭhitaḥ

vyāsa uvāca
ityuktā sā sakhī gatvā mātaraṃ prāha satvarā /
vaidarbhīṃ vijane vākyaṃ madhuraṃ mañjubhāṣiṇī

putrī te duḥkhitā prāha sādhvī tvāṃ manmukhena yat /
śṛṇu tvaṃ kuru kalyāṇi taddhitaṃ tvaritā'dhunā

bhāradvājāśrame puṇye dhruvasandhisuto'sti yaḥ /
sa me bhartā vṛtaś‍citte nānyaṃ bhūpaṃ vṛṇomyaham

vyāsa uvāca
rājñī tadvacanaṃ śrutvā svapatau gṛhamāgate /
nivedayāmāsa tadā putrīvākyaṃ yathātatham

tacchrutvā vacanaṃ rājā vismitaḥ prahasanmuhuḥ /
bhāryāmuvāca vaidarbhīṃ subāhustu ṛtaṃ vacaḥ

subhru jānāsi bālo'sau rājyānniṣkāsito vane /
ekākī saha mātrā vai vasate nirjane vane

tatkṛte nihato rājā vīraseno yudhājitā /
sa kathaṃ nirdhano bhartā yogyaḥ syāccārulocane

brūhi putrīṃ tato vākyaṃ kadācidapi vipriyam /
āgamiṣyanti rājānaḥ sthitimantaḥ svayaṃvare

iti śrīmaddevībhāgavate mahāpurāṇe'ṣṭādaśasāhasryāṃ saṃhitāyāṃ tṛtīyaskandhe
śaśikalayā mātaraṃ prati saṃdeśapreṣaṇaṃ nāmāṣṭādaśo'dhyāyaḥ