Devi Bhagavata Purana · Chapter 3.16

yudhājid‌bhāradvājayoḥ saṃvādavarṇanam
vyāsa uvāca
yudhājittvatha saṅgrāmād‌gatvā'yodhyāṃ mahābalaḥ /
manoramāṃ ca papraccha sudarśanajighāṃsayā

sevakān preṣayāmāsa kva gateti muhurvadan /
śubhe dine'tha dauhitraṃ sthāpayāmāsa cāsane

mantribhiś‍ca vasiṣṭhena mantrairātharvaṇaiḥ śubhaiḥ /
abhiṣiktaś‍ca sampūrṇaiḥ kalaśairjalapūritaiḥ

bherīśaṅkhaninādaiś‍ca tūryāṇāṃ cātha niḥsvanaiḥ /
utsavastu nagaryā vai sambabhūva kurūdvaha

viprāṇāṃ vedapāṭhaiś‍ca bandināṃ stutibhistathā /
ayodhyā muditevāsījjayaśabdaiḥ sumaṅgalaiḥ

hṛṣṭapuṣṭajanākīrṇā stutivāditraniḥsvanā /
nave tasminmahīpāle pūrbabhau nūtaneva sā

kecitsādhujanā ye vai cakruḥ śokaṃ gṛhe sthitāḥ /
sudarśanaṃ vicintyādya kva gato'sau nṛpātmajaḥ

manoramātisādhvī sā kva gatā sutasaṃyutā /
pitā'syā nihataḥ saṃkhye rājyalobhena vairiṇā

ityevaṃ cintyamānāste sādhavaḥ samabuddhayaḥ /
atiṣṭhanduḥkhitāstatra śatrujidvaśavartinaḥ

yudhājidapi dauhitraṃ sthāpayitvā vidhānataḥ /
rājyañca mantrisātkṛtvā calitaḥ svāṃ purīṃ prati

śrutvā sudarśanaṃ tatra munīnāmāśrame sthitam /
hantukāmo jagāmāśu citrakūṭaṃ sa parvatam

niṣādādhipatiṃ śūraṃ puraskṛtya balābhidham /
durdarśākhyamagādāśu śṛṅgaverapurādhipam

śrutvā manoramā tatra babhūvātisuduḥkhitā /
āgacchantaṃ bālaputrā bhayārtā sainyasaṃyutam

tamuvācātiśokārtā muniṃ sāśruvilocanā /
kiṃ karomi kva gacchāmi yudhājitsamupasthitaḥ

pitā me nihato'nena dauhitro bhūpatiḥ kṛtaḥ /
sutaṃ me hantukāmo'tra samāyāti balānvitaḥ

purā śrutaṃ mayā svāminpāṇḍavā vai vane sthitāḥ /
munīnāmāśrame puṇye pāñcālyā sahitāstadā

gatāste mṛgayāṃ pārthā bhrātaraḥ pañca eva te /
draupadī saṃsthitā tatra munīnāmāśrame śubhe

dhau‍myo'trirgālavaḥ pailo jāvālirgautamo bhṛguḥ /
cyavanaś‍cātrigotraś‍ca kaṇvaś‍caiva jatuḥ kratuḥ

vītihotraḥ sumantuś‍ca yajñadatto'tha vatsalaḥ /
rāśāsanaḥ kahoḍaś‍ca yavakrīryajñakṛtkratuḥ

ete cānye ca munayo bhāradvājādayaḥ śubhāḥ /
vedapāṭhayutāḥ sarve saṃsthitāś‍cāśrame sthitāḥ

dāsībhiḥ sahitā tatra yājñasenī sthitā mune /
āśrame cārusarvāṅ‌gī nirbhayā munisaṃvṛte

pārthā mṛgānugāstāvatprayātāś‍ca vanādvanam /
dhanurbāṇadharā vīrāḥ pañca vai śatrutāpanāḥ

tāvatsindhupatiḥ śrīmānmārgastho balasaṃyutaḥ /
āgataś‍cāśramābhyāśe śrutvā tu nigamandhvanim

śrutvā vedadhvaniṃ rājā munīnāṃ bhāvitātmanām /
uttatāra rathāttūrṇaṃ darśanākāṅkṣayā nṛpaḥ

yadā niragamattatra bhṛtyadvayasamanvitaḥ /
vedapāṭhayutānvīkṣya munīnudyamasaṃsthitaḥ

kṛtāñjalipuṭaḥ svāminsaṃsthito'tha jayadrathaḥ /
āśrame munibhirjuṣṭe bhūpatiḥ saṃviveśa ha

tatropaviṣṭaṃ rājānaṃ draṣṭukāmāḥ striyastadā /
āyayurmunibhāryāś‍ca ko'yamityabruvannṛpam

tāsāṃ madhye varārohā yājñasenī samāgatā /
jayadrathena dṛṣṭā sā rūpeṇa śrīrivāparā

tāṃ vilokyāsitāpāṅgīṃ devakanyāmivāparām /
papraccha nṛpatirdhaumyaṃ keyaṃ śyāmā varānanā

bhāryā kasya sutā kasya nāmnā kā varavarṇinī /
rūpalāvaṇyasaṃyuktā śacīva vasudhāṅgatā

barbūlavanamadhyasthā lavaṅgalatikā yathā /
rākṣasīvṛndagā nūnaṃ rambhevābhāti bhāminī

satyaṃ vada mahābhāga kasyeyaṃ vallabhābalā /
rājapat‍nīva cābhāti naiṣā munivadhūrdvija

dhau‍mya uvāca
pāṇḍavānāṃ priyā bhāryā draupadī śubhalakṣaṇā /
pāñcālī sindhurājendra vasatyatra varāśrame

jayadratha uvāca
kva gatāḥ pāṇḍavāḥ pañca śūrāḥ samprati viśrutāḥ /
vasantyatra vane vīrā vītaśokā mahābalāḥ

dhau‍mya uvāca
mṛgayārthaṃ gatāḥ pañca pāṇḍavā rathasaṃsthitāḥ /
āgamiṣyanti madhyānhe mṛgānādāya pārthivāḥ

tacchrutvā vacanaṃ tasya udatiṣṭhadasau nṛpaḥ /
draupadīsannidhau gatvā pragamyedamuvāca ha

kuśalaṃ te varārohe kva gatāḥ patayaś‍ca te /
ekādaśa gatānyadya varṣāṇi ca vane kila

draupadī tu tadovāca svasti te'stu nṛpātmaja /
viśramasvāśramābhyāśe kṣaṇādāyānti pāṇḍavāḥ

evaṃ bruvantyāṃ tasyāṃ tu lobhāviṣṭaḥ sa bhūpatiḥ /
jahāra draupadīṃ vīro'nādṛtya munisattamān

kasyacinnaiva viśvāsaḥ kartavyaḥ sarvathā budhaiḥ /
kurvanduḥkhamavāpnoti dṛṣṭāntastvatra vai baliḥ

vairocanasutaḥ śrīmāndharmiṣṭhaḥ satyasaṅgaraḥ /
yajñakartā ca dātā ca śaraṇyaḥ sādhusaṃmataḥ

nādharme nirataḥ kvāpi pralhādasya ca pautrakaḥ /
ekonaśatayajñānvai sa cakāra sadakṣiṇān

sattvamūrttiḥ sadā viṣṇuḥ sevyaḥ sa yogināmapi /
nirvikāro'pi bhagavāndevakāryārthasiddhaye

kaśyapācca samud‌bhūto viṣṇuḥ kapaṭavāmanaḥ /
rājyaṃ chalena hṛtavānmahīṃ caiva sasāgarām

so'bhavatsatyavāg‌rājā balirvairocanistadā /
kapaṭaṃ kṛtavānviṣṇurindrārthe tu mayā śrutam

anyaḥ kiṃ na karotyevaṃ kṛtaṃ vai sattvamūrtinā /
vāmanaṃ rūpamāsthāya yajñapātaṃ cikīrṣatā

na ca viś‍vasitavyaṃ vai kadācitkenacittathā /
lobhaś‍cetasi cetsvāminkīdṛkpāpakṛtaṃ bhayam

lobhāhatāḥ prakurvanti pāpāni prāṇinaḥ kila /
paralokād‌bhayaṃ nāsti kasyacitkarhicinmune

manasā karmaṇā vācā parasvādānahetutaḥ /
prapatanti narāḥ samyaglobhopahatacetasaḥ

devānārādhya satataṃ vāñchanti ca dhanaṃ narāḥ /
na devāstatkare kṛtvā samarthā dātumañjasā

anyasyānīyate vittaṃ prayacchanti manīṣitam /
vāṇijyenātha dānena cauryeṇāpi balena vā

vikrayārthaṃ gṛhītvā ca dhānyavastrādikaṃ bahu /
devānarcayate vaiśyo maharddhirme bhavediti

nātra kiṃ paravittecchā vāṇijyena parantapa /
grahaṇakāle tu samprāpte maharghañcāpi kāṅkṣati

evaṃ hi prāṇinaḥ sarve parasvādānatatparāḥ /
vartante satataṃ brahman viś‍vāsaḥ kīdṛśaḥ punaḥ

vṛthā tīrthaṃ vṛthā dānaṃ vṛthā'dhyayanameva ca /
lobhamohāvṛtānāṃ vai kṛtaṃ tadakṛtaṃ bhavet

tasmādenaṃ mahābhāga visarjaya gṛhaṃ prati /
saputrā'haṃ vasiṣyāmi jānakīvad‌dvijottama

ityukto'sau munistāvad‌gatvā yudhājitaṃ nṛpam /
uvāca vacanaṃ rājñe bhāradvājaḥ pratāpavān

gaccha rājan yathākāmaṃ svapuraṃ nṛpasattama /
neyaṃ manoramābhyeti bālaputrā suduḥkhitā

yudhājiduvāca
mune muñca haṭhaṃ sau‌mya visarjaya manoramām /
na ca yāsyāmyahaṃ muktvā neṣyāmyadya balātpunaḥ

ṛṣiruvāca
nayasva yadi śaktiste balenādya mamāśramāt /
viś‍vāmitro yathā dhenuṃ vasiṣṭhasya muneḥ purā

iti śrīdevībhāgavate mahāpurāṇe'ṣṭādaśasāhasryāṃ saṃhitāyāṃ tṛtīyaskandhe
yudhājid‌bhāradvājayoḥ saṃvādavarṇanaṃ nāma ṣoḍaśo'dhyāyaḥ