Devi Bhagavata Purana · Chapter 3.14

yudhājid‌vīrasenayoryuddhārthaṃ sajjībhavanam
janamejaya uvāca
śruto vai hariṇā klṛpto yajño vistarato dvija /
mahimānaṃ tathāmbāyā vada vistarato mama

śrutvā devyāś‍caritraṃ vai kurve makhamanuttamam /
prasādāttava viprendra bhaviṣyāmi ca pāvanaḥ

vyāsa uvāca
śṛṇu rājanpravakṣyāmi devyāś‍caritamuttamam /
itihāsaṃ purāṇañca kathayāmi suvistaram

kosaleṣu nṛpaśreṣṭhaḥ sūryavaṃśasamud‌bhavaḥ /
puṣyaputro mahātejā dhruvasandhiriti smṛtaḥ

dharmātmā satyasandhaś‍ca varṇāśramahite rataḥ /
ayodhyāyāṃ samṛddhāyāṃ rājyaṃ cakre śucivrataḥ

brāhmaṇāḥ kṣatriyā vaiśyāḥ śūdrāś‍cānye tathā dvijāḥ /
svāṃ svāṃ vṛttiṃ samāsthāya tad‌rājye dharmato'bhavan

na caurāḥ piśunā dhūrtāstasya rājye ca kutracit /
dambhāḥ kṛtaghnā mūrkhāś‍ca vasanti kila mānavāḥ

evaṃ vai vartamānasya nṛpasya kurusattama /
dve pat‍nyau rūpasampanne hyāsatuḥ kāmabhogade

manoramā dharmapat‍nī surūpā'tivicakṣaṇā /
līlāvatī dvitīyā ca sā'pi rūpaguṇānvitā

vijahāra sapat‍nībhyāṃ gṛheṣūpavaneṣu ca /
krīḍāgirau dīrghikāsu saudheṣu vividheṣu ca

manoramā śubhe kāle suṣuve putramuttamam /
sudarśanābhidhaṃ putraṃ rājalakṣaṇasaṃyutam

līlāvatyapi tatpat‍nī māsenaikena bhāminī /
suṣuve sundaraṃ putraṃ śubhe pakṣe dine tathā

cakāra nṛpatistatra jātakarmādikaṃ dvayoḥ /
dadau dānāni viprebhyaḥ putrajanmapramoditaḥ

prītiṃ tayoḥ samāṃ rājā cakāra sutayornṛpa /
nṛpaś‍cakāra sauhārdeṣvantaraṃ na kadācana

cūḍākarma tayoś‍cakre vidhinā nṛpasattamaḥ /
yathāvibhavamevāsau prītiyuktaḥ parantapaḥ

kṛtacūḍau sutau kāmaṃ jahraturnṛpatermanaḥ /
krīḍamānāvubhau kāntau lokānāmanurañjakau

tayoḥ sudarśano jyeṣṭho līlāvatyāḥ sutaḥ śubhaḥ /
śatrujitsaṃjñakaḥ kāmaṃ cāṭuvākyo babhūva ha

nṛpateḥ prītijanako mañjuvākcārudarśanaḥ /
prajānāṃ vallabhaḥ so'bhūttathā mantrijanasya vai

tathā tasminnṛpaḥ prītiñcakāra guṇayogataḥ /
mandabhāgyānmandabhāvo na tathā vai sudarśane

evaṃ gacchati kāle tu dhruvasandhirnṛpottamaḥ /
jagāma vanamadhye'sau mṛgayābhirataḥ sadā

nighnanmṛgān rurūnkambūnsūkarāngavayāñchaśān /
mahiṣāñcharabhānkhaḍ‌gāṃś‍cikrīḍa nṛpatirvane

krīḍamāne nṛpe tatra vane ghore'tidāruṇe /
udatiṣṭhannikuñjāttu siṃhaḥ paramakopanaḥ

rājñā śilīmukhenādau viddhaḥ krodhavaśaṃ gataḥ /
dṛṣṭvāgre nṛpatiṃ siṃho nanāda meghaniḥsvanaḥ

kṛtvā cordhvaṃ sa lāṅgūlaṃ prasāritabṛhatsaṭaḥ /
hantuṃ nṛpatimākāśādutpapātātikopanaḥ

nṛpatistarasā vīkṣya dadhārāsiṃ kare tadā /
vāme carma samādāya sthitaḥ siṃha ivāparaḥ

sevakāstasya ye sarve te'pi bāṇānpṛthak‌pṛthak /
amuñcankupitāḥ kāmaṃ siṃhopari ruṣānvitāḥ

hāhākāro mahānāsītsamprahāraś‍ca dāruṇaḥ /
utpapāta tataḥ siṃho nṛpasyopari dāruṇaḥ

taṃ patantaṃ samālokya khaḍ‍genābhyahanannṛpaḥ /
so'pi krūrairnakhāgraiś‍ca tatrāgatya vidāritaḥ

sa nakhairāhato rājā papāta ca mamāra vai /
cukruśuḥ sainikāste tu nirjaghnurviśikhaistadā

mṛtaḥ siṃho'pi tatraiva bhūpatiś‍ca tathā mṛtaḥ /
sainikairmantrimukhyāśca tatrāgatya niveditāḥ

paralokagataṃ bhūpaṃ śrutvā te mantrisattamāḥ /
saṃskāraṃ kārayāmāsurgatvā tatra vanāntike

paralokakriyāṃ sarvāṃ vasiṣṭho vidhipūrvakam /
kārayāmāsa tatraiva paralokasukhāvaham

prajāḥ prakṛtayaś‍caiva vasiṣṭhaś‍ca mahāmuniḥ /
sudarśanaṃ nṛpaṃ kartuṃ mantraṃ cakruḥ parasparam

dharmapat‍nīsutaḥ śāntaḥ puruṣaś‍ca sulakṣaṇaḥ /
ayaṃ nṛpāsanārhaś‍ca hyabruvanmantrisattamāḥ

vasiṣṭho'pi tathaivāha yogyo'yaṃ nṛpateḥ sutaḥ /
bālo'pi dharmavān rājā nṛpāsanamihārhati

kṛte mantre mantrivṛddhairyudhājinnāma pārthivaḥ /
tatrājagāma tarasā śrutvā tūjjayinīpatiḥ

mṛtaṃ jāmātaraṃ śrutvā līlāvatyāḥ pitā tadā /
tatrājagāma tvarito dauhitrapriyakāmyayā

vīrasenastathā''yātaḥ sudarśanahitecchayā /
kaliṅgādhipatiś‍caiva manoramāpitā nṛpaḥ

ubhau tau sainyasaṃyuktau nṛpau sādhvasasaṃsthitau /
cakraturmantrimukhyaistairmantraṃ rājyasya kāraṇāt

yudhājittu tadā'pṛcchajjyeṣṭhaḥ kaḥ sutatordvayoḥ /
rājyaṃ prāpnoti jyeṣṭho vai na kanīyānkadācana

vīraseno'pi tatrāha dharmapat‍nīsutaḥ kila /
rājyārhaḥ sa yathā rājan śāstrajñebhyo mayā śrutam

yudhājitpunarāhedaṃ jyeṣṭho'yaṃ ca yathā guṇaiḥ /
rājalakṣaṇasaṃyukto na tathāyaṃ sudarśanaḥ

vivādo'tra susampanno nṛpayostatra lubdhayoḥ /
kaḥ sandehamapākartuṃ kṣamaḥ syādatisaṅkaṭe

yudhājinmantriṇaḥ prāha yūyaṃ svārthaparāḥ kila /
sudarśanaṃ nṛpaṃ kṛtvā dhanaṃ bhoktuṃ kilecchatha

yuṣmākaṃ tu vicāro'yaṃ mayā jñātastatheṅ‌gitaiḥ /
śatrujitsabalastasmātsammato vo nṛpāsane

mayi jīvati kaḥ kuryātkanīyāṃsaṃ nṛpaṃ kila /
tyaktvā jyeṣṭhaṃ guṇārhañca senayā ca samanvitam

nūnaṃ yuddhaṃ kariṣyāmi tasminkhaḍ‍gasya medinī /
dhārayā ca dvidhā bhūyādyuṣmākaṃ tatra kā kathā

vīrasenastu tacchrutvā yudhājitamabhāṣata /
bālau dvau sadṛśaprajñau ko bhedo'tra vicakṣaṇa

evaṃ vivadamānau tau saṃsthitau nṛpatī tadā /
prajāś‍ca ṛṣayaś‍caiva babhūvurvyagramānasāḥ

samājagmuś‍ca sāmantāḥ sasainyāḥ kleśatatparāḥ /
vigrahañcābhikāṅkṣantaḥ parasparamatandritāḥ

niṣādā hyāyayustatra śṛṅgaverapurāśrayāḥ /
rājadravyamapāhartuṃ mṛtaṃ śrutvā mahīpatim

putrau ca bālakau śrutvā vigrahaṃ ca parasparam /
caurāstatra samājagmurdeśadeśāntarādapi

sammardastatra sañjātaḥ kalahe samupasthite /
yudhājidvīrasenaś‍ca yuddhakāmau babhūvatuḥ

iti śrīdevībhāgavate mahāpurāṇe'ṣṭādaśasāhasryāṃ saṃhitāyāṃ tṛtīyaskandhe
yudhājid‌vīrasenayoryuddhārthaṃ sajjībhavanaṃ nāma caturdaśo'dhyāyaḥ