Devi Bhagavata Purana · Chapter 3.12

ambāyajñavidhivarṇanam
rājovāca
vada yajñavidhiṃ samyagdevyāstasyāḥ samantataḥ /
śrutvā karomyahaṃ svāminyathāśakti hyatandritaḥ

pūjāvidhiṃ ca mantrāṃś‍ca homadravyamasaṃśayam /
brāhmaṇāḥ katisaṃkhyāśca dakṣiṇāścatathā punaḥ

vyāsa uvāca
śṛṇu rājan pravakṣyāmi devyā yajñaṃ vidhānataḥ /
trividhaṃ tu sadā jñeyaṃ vidhidṛṣṭena karmaṇā

sāttvikaṃ rājasaṃ caiva tāmasaṃ ca tathāparam /
munīnāṃ sāttvikaṃ proktaṃ nṛpāṇāṃ rājasaṃ smṛtam

tāmasaṃ rākṣasānāṃ vai jñānināṃ tu guṇojjhitam /
vimuktānāṃ jñānamayaṃ vistarātprabravīmi te

deśaḥ kālastathā dravyaṃ mantrāś‍ca brāhmaṇāstathā /
śraddhā ca sātvakī yatra taṃ yajñaṃ sāttvikaṃ viduḥ

dravyaśuddhiḥ kriyāśuddhirmantraśuddhiś‍ca bhūmipa /
bhavedyadi tadā pūrṇaṃ phalaṃ bhavati nānyathā

anyāyopārjitenaiva kartavyaṃ sukṛtaṃ kṛtam /
na kīrtiriha loke ca paraloke na tatphalam

tasmānnyāyārjitenaiva kartavyaṃ sukṛtaṃ sadā /
yaśase paralokāya bhavatyeva sukhāya ca

pratyakṣaṃ tava rājendra pāṇḍavaistu makhaḥ kṛtaḥ /
rājasūyaḥ kratuvaraḥ samāptavaradakṣiṇaḥ

yatra sākṣāddhariḥ kṛṣṇo yādavendro mahāmanāḥ /
brāhmaṇāḥ pūrṇavidyāś‍ca bhāradvājādayastathā

kṛtvā yajñaṃ susampūrṇaṃ māsamātreṇa pāṇḍavaiḥ /
prāptaṃ mahattaraṃ kaṣṭaṃ vanavāsaś‍ca dāruṇaḥ

pīḍanañcaiva pāñcālyāstathā dyūte parājayaḥ /
vanavāso mahatkaṣṭaṃ kva gataṃ makhajaṃ phalam

dāsatvañca virāṭasya kṛtaṃ sarvamahātmabhiḥ /
kīcakena parikliṣṭā draupadī ca pramadvarā

āśīrvādā dvijātīnāṃ kva gatāḥ śuddhacetasām /
bhaktirvā vāsudevasya kva gatā tatra saṃkaṭe

na rakṣitā tadā bālā kenāpi drupadātmajā /
prāptakeśagrahā kāle sādhvī ca varavarṇinī

kimatra cintanīyaṃ vai dharmavaiguṇyakāraṇam /
keśave sati deveśe dharmaputre yudhiṣṭhire

bhavitavyamiti prokte niṣphalaḥ syāttadāgamaḥ /
vedamantrāstathānye ca vitathāḥ syurasaṃśayam

sādhanaṃ niṣphalaṃ sarvamupāyaśca nirarthakaḥ /
bhavitavyaṃ bhavatyeva vacane pratipādake

āgamo'pyarthavādaḥ syātkriyāḥ sarvā nirarthakāḥ /
svargārthañca tapo vyarthaṃ varṇadharmaś‍ca vai tathā

sarvaṃ pramāṇaṃ vyarthaṃ syād‌bhavitavye kṛte hṛdi /
ubhayañcāpi mantavyaṃ daivaṃ copāya eva ca

kṛte karmaṇi cetsiddhirviparitā yadā bhavet /
vaiguṇyaṃ kalpanīyaṃ syātprājñaiḥ paṇḍitamaulibhiḥ

tatkarma bahudhā proktaṃ vidvad‌bhiḥ karmakāribhiḥ /
kartṛbhedānmantrabhedād‌dravyabhedāttathā punaḥ

yathā maghavatā pūrvaṃ viśvarūpo vṛto guruḥ /
viparītaṃ kṛtaṃ tena karma mātṛhitāya vai

devebhyo dānavebhyastu svastītyuktvā punaḥ punaḥ /
asurā mātṛpakṣīyāḥ kṛtaṃ teṣāñca rakṣaṇam

daityān dṛṣṭvātisampuṣṭāṃś‍cukopa maghavā tadā /
śirāṃsi tasya vajreṇa cic‍cheda tarasā hariḥ

kriyāvaiguṇyamatraiva kartṛbhedādasaṃśayam /
nocetpañcālarājena roṣeṇāpi kṛtā kriyā

bhāradvājavināśāya putrasyotpādanāya ca /
dhṛṣṭadyumnaḥ samutpanno vedimadhyācca draupadī

purā daśarathenāpi putreṣṭistu kṛtā yadā /
aputrasya sutāstasya catvāraḥ samprajajñire

ataḥ kriyā kṛtā yuktyā siddhidā sarvathā bhavet /
ayuktyā viparitā syātsarvathā nṛpasattama

pāṇḍavānāṃ yathā yajñe kiñcidvaiguṇyayogataḥ /
viparītaṃ phalaṃ prāptaṃ nirjitāste durodare

satyavādī tathā rājan dharmaputro yudhiṣṭhiraḥ /
draupadī ca tathā sādhvī tathānyepyanujāḥ śubhāḥ

kudravyayogādvaiguṇyaṃ samutpannaṃ makhe'thavā /
sābhimānaiḥ kṛtādvāpi dūṣaṇaṃ samupasthitam

sāttvikastu mahārāja durlabho vai makhaḥ smṛtaḥ /
vaikhānasamunīnāṃ hi vihito'sau mahāmakhaḥ

sāttvikaṃ bhojanaṃ ye vai nityaṃ kurvanti tāpasāḥ /
nyāyārjitañca vanyañca tathā ṛṣyaṃ susaṃskṛtam

puroḍāśaparā nityaṃ viyūpā mantrapūrvakāḥ /
śraddhādhikā makhā rājan sāttvikāḥ paramāḥ smṛtāḥ

rājasā dravyabahulāḥ sayūpāś‍ca susaṃskṛtāḥ /
kṣatriyāṇāṃ viśāñcaiva sābhimānāś‍ca vai makhāḥ

tāmasā dānavānāṃ vai sakrodhā madavardhakāḥ /
sāmarṣāḥ saṃskṛtāḥ krūrā makhāḥ proktā mahātmabhiḥ

munīnāṃ mokṣakāmānāṃ viraktānāṃ mahātmanām /
mānasastu smṛto yāgaḥ sarvasādhanasaṃyutaḥ

anyeṣu sarvayajñeṣu kiñcinnyūnaṃ bhavedapi /
dravyeṇa śraddhayā vā'pi kriyayā brāhmaṇaistathā

deśakālapṛthagdravyasādhanaiḥ sakalaistathā /
nānyo bhavati pūrṇe vai tathā bhavati mānasaḥ

prathamaṃ tu manaḥ śodhyaṃ kartavyaṃ guṇavarjitam /
śuddhe manasi deho vai śuddha eva na saṃśayaḥ

indriyārthaparityaktaṃ yadā jātaṃ manaḥ śuci /
tadā tasya makhasyāsau prabhavedadhikāravān

tadā'sau maṇḍapaṃ kṛtvā bahuyojanavistṛtam /
stambhaiś‍ca vipulaiḥ ślakṣṇairyajñiyadrumasambhavaiḥ

vedīṃ ca viśadāṃ tatra manasā parikalpayet /
agnayo'pi tathā sthāpyā vidhivanmanasā kila

brāhmaṇānāñca varaṇaṃ tathaiva pratipādya ca /
brahmādhvaryustathā hotā prastotā vidhipūrvakam

ud‌gātā pratihartā ca sabhyāś‍cānye yathāvidhi /
pūjanīyāḥ prayat‍nena manasaiva dvijottamāḥ

prāṇo'pānastathā vyānaḥ samānodāna eva ca /
pāvakāḥ pañca evaite sthāpyā vedyāṃ vidhānataḥ

gārhapatyastadā prāṇo'pānaś‍cāhavanīyakaḥ /
dakṣiṇāgnistathā vyānaḥ samānaś‍cāvasathyakaḥ

sabhyodānaḥ smṛtā hyete pāvakāḥ paramotkaṭāḥ /
dravyañca manasā bhāvyaṃ nirguṇaṃ paramaṃ śuci

mana eva tadā hotā yajamānastathaiva tat /
yajñādhidevatā brahma nirguṇaṃ ca sanātanam

phaladā nirguṇā śaktiḥ sadā nirvedadā śivā /
brahmavidyākhilādhārā vyāpya sarvatra saṃsthitā

taduddeśena tad‌dravyaṃ hunetprāṇāgniṣu dvijaḥ /
paś‍cāccittaṃ nirālambaṃ kṛtvā prāṇānapi prabho

kuṇḍalīmukhamārgeṇa huned‌brahmaṇi śāś‍vate /
svānubhūtyā svayaṃ sākṣātsvātmabhūtāṃ maheśvarīm

samādhinaiva yogena dhyāyeccetasyanākulaḥ /
sarvabhūtasthamātmānaṃ sarvabhūtāni cātmani

yadā paśyati bhūtātmā tadā paśyati tāṃ śivām /
dṛṣṭvā tāṃ brahmavid‌bhūyātsaccidānandarūpiṇīm

tadā māyādikaṃ sarvaṃ dagdhaṃ bhavati bhūmipa /
prārabdhaṃ karmamātraṃ tu yāvaddehaṃ ca tiṣṭhati

jīvanmuktastadā jāto mṛto mokṣamavāpnuyāt /
kṛtakṛtyo bhavettāta yo bhajejjagadambikām

tasmātsarvaprayat‍nena dhyeyā śrībhuvaneś‍varī /
śrotavyā caiva mantavyā guruvākyānusārataḥ

rājannevaṃ kṛto yajño mokṣado nātra saṃśayaḥ /
anye yajñāḥ sakāmāstu prabhavanti kṣayonmukhāḥ

agniṣṭomena vidhivatsvargakāmo yajediti /
vedānuśāsanaṃ caitatpravadanti manīṣiṇaḥ

kṣīṇe puṇye mṛtyulokaṃ viśanti ca yathāmati /
tasmāttu mānasaḥ śreṣṭho yajño'pyakṣaya eva saḥ

na rājñā sādhituṃ yogyo makho'sau jayamicchatā /
tāmasastu kṛtaḥ pūrvaṃ sarpayajñastvayādhunā

vairaṃ nirvāhitaṃ rājaṃstakṣakasya durātmanaḥ /
yatkṛte nihatāḥ sarpāstvayā‍'gnau koṭiśaḥ pare

devīyajñaṃ kuruṣvādya vitataṃ vidhipūrvakam /
viṣṇunā yaḥ kṛtaḥ pūrvaṃ sṛṣṭyādau nṛpasattama

tathā tvaṃ kuru rājendra vidhiṃ te prabravīmyaham /
brāhmaṇāḥ santi rājendra vidhijñā vedavittamāḥ

devībījavidhānajñā mantramārgavicakṣaṇāḥ /
yājakāste bhaviṣyanti yajamānastvameva hi

kṛtvā yajñaṃ vidhānena dattvā puṇyaṃ makhārjitam /
samuddhara mahārāja pitaraṃ durgatiṅgatam

viprāvamānajaṃ pāpaṃ durghaṭaṃ narakapradam /
tathaiva śāpajo doṣaḥ prāptaḥ pitrā tavānagha

tathā durmaraṇaṃ prāptaṃ sarpadaṃśena bhūbhujā /
antarāle tathā mṛtyūrna bhūmau kuśasaṃstare

na saṅgrāme na gaṅgāyāṃ snānadānādivarjitam /
maraṇaṃ te pitustatra saudhe jātaṃ kurūdvaha

kṛpaṇāni ca sarvāṇi narakasya nṛpottama /
tatraikaṃ kāraṇaṃ tasya na jātaṃ cātidurlabham

yatra yatra sthitaḥprāṇo jñātvā kālaṃ samāgatam /
sādhanānāmabhāve'pi hyavaśaś‍cātisaṅkaṭe

yadā nirvedamāyāti manasā nirmalena vai /
pañcabhūtātmako deho mama kiñcātra duḥkhadam

patatvadya yathākāmaṃ mukto'haṃ nirguṇo'vyayaḥ /
nāśātmakāni tattvāni tatra kā paridevanā

brahmaivāhaṃ na saṃsārī sadā muktaḥ sanātanaḥ /
dehena mama sambandhaḥ karmaṇā pratipāditaḥ

tāni sarvāṇi muktāni śubhāni cetarāṇi ca /
manuṣyadehayogena sukhaduḥkhānusādhanāt

vimukto'tibhayād‌ghorādasmātsaṃsārasaṅkaṭāt /
ityevaṃ cintyamānastu snānadānavivarjitaḥ

maraṇaṃ cedavāpnoti sa muccyejjanmaduḥkhataḥ /
eṣā kāṣṭhā parā proktā yogināmapi durlabhā

pitā te nṛpaśārdūla śrutvā śāpaṃ dvijoditam /
dehe mamatvaṃ kṛtavānna nirvedamavāptavān

nīrogo mama deho'yaṃ rājyaṃ nihatakaṇṭakam /
kathaṃ jīvāmyahaṃ kāmaṃ mantrajñānānayantu vai

auṣadhaṃ maṇimantraṃ ca yantraṃ paramakaṃ tathā /
ārohaṇaṃ tathā saudhe kṛtavānnṛpatistadā

na snānaṃ na kṛtaṃ dānaṃ na devyāḥ smaraṇaṃ kṛtam /
na bhūmau śayanaṃ caiva daivaṃ matvā paraṃ tathā

magno mohārṇave ghore mṛtaḥ saudhe'hinā hataḥ /
kṛtvā pāpaṃ kaleryogāttāpasasyāvamānajam

avaśyameva narakaṃ etairācaraṇairbhavet /
tasmāttaṃ pitaraṃ pāpātsamuddhara nṛpottama

sūta uvāca
iti śrutvā vacastasya vyāsasyāmitatejasaḥ /
sāśrukaṇṭho'tiduḥkhārto babhūva janamejayaḥ

dhigidaṃ jīvitaṃ me'dya pitā me narake sthitaḥ /
tatkaromi yathaivādya svargaṃ yātyuttarāsutaḥ

iti śrīdevībhāgavate mahāpurāṇe'ṣṭādaśasāhasryāṃ saṃhitāyāṃ
tṛtīyaskandhe ambāyajñavidhivarṇanaṃ nāma dvādaśo'dhyāyaḥ