Devi Bhagavata Purana · Chapter 11.1

manukṛtaṃ devīstavanam
nārada uvāca
bhagavan bhūtabhavyeśa nārāyaṇa sanātana /
ākhyātaṃ paramāścaryaṃ devīcāritramuttamam

prādurbhāvaḥ paro mātuḥ kāryārthamasuradruhām /
adhikārāptiruktātra devīpūrṇakṛpāvaśāt

adhunā śrotumicchāmi yena prīṇāti sarvadā /
svabhaktānparipuṣṇāti tamācāraṃ vada prabho

śrīnārāyaṇa uvāca
śṛṇu nārada tattvajña sadācāravidhikramam /
yadanuṣṭhānamātreṇa devī prīṇāti sarvadā

prātarutthāya kartavyaṃ yad‌ dvijena dine dine /
tadahaṃ sampravakṣyāmi dvijānāmupakārakam

udayāstamayaṃ yāvad‌ dvijaḥ satkarmakṛd‍bhavet /
nityanaimittikairyuktaḥ kāmyaiścānyairagarhitaiḥ

ātmanaśca sahāyārthaṃ pitā mātā na tiṣṭhati /
na putradārā na jñātirdharmastiṣṭhati kevalam

tasmāddharmaṃ sahāyārthaṃ nityaṃ sañcinu sādhanaiḥ /
dharmeṇaiva sahāyāttu tamastarati dustaram

ācāraḥ prathamo dharmaḥ śrutyuktaḥ smārta eva ca /
tasmādasminsamāyukto nityaṃ syādātmano dvijaḥ

ācārāllabhate cāyurācārāllabhate prajāḥ /
ācārādannamakṣayyamācāro hanti pātakam

ācāraḥ paramo dharmo nṛṇāṃ kalyāṇakārakaḥ /
iha loke sukhī bhūtvā paratra labhate sukham

ajñānāndhajanānāṃ tu mohitairbhrāmitātmanām /
dharmarūpo mahādīpo muktimārgapradarśakaḥ

ācārātprāpyate śraiṣṭhyamācārātkarma labhyate /
karmaṇo jāyate jñānamiti vākyaṃ manoḥ smṛtam

sarvadharmavariṣṭho'yamācāraḥ paramaṃ tapaḥ /
tadeva jñānamuddiṣṭaṃ tena sarvaṃ prasādhyate

yastvācāravihīno'tra vartate dvijasattamaḥ /
sa śūdravad‌ bahiṣkāryo yathā śūdrastathaiva saḥ

ācāro dvividhaḥ proktaḥ śāstrīyo laukikastathā /
ubhāvapi prakartavyau na tyājyau śubhamicchatā

grāmadharmā jātidharmā deśadharmāḥ kulod‍bhavāḥ /
parigrāhyā nṛbhiḥ sarvairnaiva tām̐llaṅ‌ghayenmune

durācāro hi puruṣo loke bhavati ninditaḥ /
duḥkhabhāgī ca satataṃ vyādhinā vyāpta eva ca

parityajedarthakāmau yau syātāṃ dharmavarjitau /
dharmamapyasukhodarkaṃ lokavidviṣṭameva ca

nārada uvāca
bahutvādiha śāstrāṇāṃ niścayaḥ syātkathaṃ mune /
kiyatpramāṇaṃ tad‌ brūhi dharmamārgavinirṇaye

śrīnārāyaṇa uvāca
śrutismṛtī ubhe netre purāṇaṃ hṛdayaṃ smṛtam /
etattrayokta eva syāddharmo nānyatra kutracit

virodho yatra tu bhavettrayāṇāṃ ca parasparam /
śrutistatra pramāṇaṃ syād‌ dvayordvaidhe smṛtirvarā

śrutidvaidhaṃ bhavedyatra tatra dharmāvubhau smṛtau /
smṛtidvaidhaṃ tu yatra syādviṣayaḥ kalpyatāṃ pṛthak

purāṇeṣu kvaciccaiva tantradṛṣṭaṃ yathātatham /
dharmaṃ vadanti taṃ dharmaṃ gṛhṇīyānna kathañcana

vedāvirodhi cettantraṃ tatpramāṇaṃ na saṃśayaḥ /
pratyakṣaśrutiruddhaṃ yattatpramāṇaṃ bhavenna ca

sarvathā veda evāsau dharmamārgapramāṇakaḥ /
tenāviruddhaṃ yatkiñcittatpramāṇaṃ na cānyathā

yo vedadharmamujjhitya vartate'nyapramāṇataḥ /
kuṇḍāni tasya śikṣārthaṃ yamaloke vasanti hi

tasmātsarvaprayat‍nena vedoktaṃ dharmamāśrayet /
smṛtiḥ purāṇamanyadvā tantraṃ vā śāstrameva ca

tanmūlatve pramāṇaṃ syānnānyathā tu kadācana /
ye kuśāstrābhiyogena vartayantīha mānavān

adhomukhordhvapādāste yāsyanti narakārṇavam /
kāmācārāḥ pāśupatāstathā vai liṅ‌gadhāriṇaḥ

taptamudrāṅ‌kitā ye ca vaikhānasamatānugāḥ /
te sarve nirayaṃ yānti vedamārgabahiṣkṛtāḥ

vedoktameva saddharmaṃ tasmātkuryānnaraḥ sadā /
utthāyotthāya boddhavyaṃ kiṃ mayādya kṛtaṃ kṛtam

dattaṃ vā dāpitaṃ vāpi vākyenāpi ca bhāṣitam /
upapāpeṣu sarveṣu pātakeṣu mahatsvapi

avāpya rajanīyāmaṃ brahmadhyānaṃ samācaret /
ūrusthottānacaraṇaḥ savye corau tathottaram

uttānaṃ kiñciduttānaṃ mukhamavaṣṭabhya corasā /
nimīlitākṣaḥ sattvastho dantairdantānna saṃspṛśet

tālusthācalajihvaśca saṃvṛtāsyaḥ suniścalaḥ /
sanniruddhendriyagrāmo nātinimnasthitāsanaḥ

dviguṇaṃ triguṇaṃ vāpi prāṇāyāmamupakramet /
tato dhyeyaḥ sthito yo'sau hṛdaye dīpavatprabhuḥ

dhārayettatra cātmānaṃ dhāraṇāṃ dhārayed‌budhaḥ /
sadhūmaśca vidhūmaśca sagarbhaścāpyagarbhakaḥ

salakṣyaścāpyalakṣyaśca prāṇāyāmastu ṣaḍ‌vidhaḥ /
prāṇāyāmasamo yogaḥ prāṇāyāma itīritaḥ

prāṇāyāma iti prokto recapūrakakumbhakaiḥ /
varṇatrayātmakā hyete recapūrakakumbhakāḥ

sa eva praṇavaḥ proktaḥ prāṇāyāmaśca tanmayaḥ /
iḍayā vāyumāropya pūrayitvodare sthitam

śanaiḥ ṣoḍaśamātrābhiranyayā taṃ virecayet /
evaṃ sadhūmaḥ prāṇānāmāyāmaḥ kathito mune

ādhāreliṅ‌ganābhiprakaṭitahṛdaye tālumūle lalāṭe
dve patre ṣoḍaśāre dvidaśadaśadaladvādaśārdhe catuṣke /
vāsānte bālamadhye ḍaphakatasahite kaṇṭhadeśe svarāṇāṃ
haṃkṣaṃtattvārthayuktaṃ sakaladalagataṃ varṇarūpaṃ namāmi

aruṇakamalasaṃsthā tad‌rajaḥpuñjavarṇā
haraniyamitacihnā padmatantusvarūpā /
ravihutavaharākānāyakāsyastanāḍhyā
sakṛdapi yadi citte saṃvasetsyātsa bhuktaḥ

sthitiḥ saiva gatiryātrā matiścintā stutirvacaḥ /
ahaṃ sarvātmako devaḥ stutiḥ sarvaṃ tvadarcanam

ahaṃ devī na cānyo'smi brahmaivāhaṃ na śokabhāk /
saccidānandarūpo'haṃ svātmānamiti cintayet

prakāśamānāṃ prathame prayāṇe
pratiprayāṇe'pyamṛtāyamānām /
antaḥpadavyāmanusañcarantī-
mānandarūpāmabalāṃ prapadye

tato nijabrahmarandhre dhyāyettaṃ gurumīśvaram /
upacārairmānasaiśca pūjayettu yathāvidhi

stuvītānena mantreṇa sādhako niyatātmavān /
gururbrahmā gururviṣṇurgururdevo maheśvaraḥ /
gurureva paraṃ brahma tasmai śrīgurave namaḥ

iti śrīmaddevībhāgavate mahāpurāṇe'ṣṭādaśasāhasryāṃ saṃhitāyāṃ
ekādaśaskandhe manukṛtaṃ devīstavanaṃ nāma prathamo'dhyāyaḥ //