Devi Bhagavata Purana · Chapter 1.15

śukavairāgyavarṇanam
nāhaṃ gṛhaṃ kariṣyāmi duḥkhadaṃ sarvadā pitaḥ /
vāgurāsadṛśaṃ nityaṃ bandhanaṃ sarvadehinām

dhanacintāturāṇāṃ hi kva sukhaṃ tāta dṛśyate /
svajanaiḥ khalu pīḍyante nirdhanā lolupā janāḥ

indro'pi na sukhī tādṛgyādṛśo bhikṣuniḥspṛhaḥ /
ko'nyaḥ syādiha saṃsāre trilokīvibhave sati

tapantaṃ tāpasaṃ dṛṣṭvā maghavā duḥkhito'bhavat /
vighnānbahuvidhānasya karoti ca divaspatiḥ

brahmāpi na sukhī viṣṇurlakṣmīṃ prāpya manoramām /
khedaṃ prāpnoti satataṃ saṃgrāmairasuraiḥ saha

karoti vipulānyat‍nāṃstapaścarati duścaram /
ramāpatirapi śrīmānkasyāsti vipulaṃ sukham

śaṅkaro'pi sadā duḥkhī bhavatyeva ca vedmyaham /
tapaścaryāṃ prakurvāṇo daityayuddhakaraḥ sadā

kadācinna sukhī śete dhanavānapi lolupaḥ /
nirdhanastu kathaṃ tāta sukhaṃ prāpnoti mānavaḥ

jānannapi mahābhāga putraṃ vā vīryasambhavam /
niyokṣyasi mahāghore saṃsāre duḥkhade sadā

janmaduḥkhaṃ jarāduḥkhaṃ duḥkhaṃ ca maraṇe tathā /
garbhavāse punarduḥkhaṃ viṣṭhāmūtramaye pitaḥ

tasmādatiśayaṃ duḥkhaṃ tṛṣṇālobhasamud‌bhavam /
yāñcāyāṃ paramaṃ duḥkhaṃ maraṇādapi mānada

pratigrahadhanā viprā na buddhibalajīvanāḥ /
parāśā paramaṃ duḥkhaṃ maraṇaṃ ca dine dine

paṭhitvā sakalān vedāñchāstrāṇi ca samantataḥ /
gatvā ca dhanināṃ kāryā stutiḥ sarvātmanā budhaiḥ

ekodarasya kā cintā patramūlaphalādibhiḥ /
yenakenāpyupāyena santuṣṭyā ca prapūryate

bhāryā putrāstathā pautrāḥ kuṭumbe vipule sati /
pūraṇārthaṃ mahadduḥkhaṃ kva sukhaṃ pitarad‌bhutam

yogaśāstraṃ vada mama jñānaśāstraṃ sukhākaram /
karmakāṇḍe'khile tāta na rame'haṃ kadācana

vada karmakṣayopāyaṃ prārabdhaṃ sañcitaṃ tathā /
vartamānaṃ yathā naśyet trividhaṃ karmamūlajam

jalūkeva sadā nārī rudhiraṃ pibatīti vai /
mūrkhastu na vijānāti mohito bhāvaceṣṭitaiḥ

bhogairvīryaṃ dhanaṃ pūrṇaṃ manaḥ kuṭilabhāṣaṇaiḥ /
kāntā harati sarvasvaṃ kaḥ stenastādṛśo'paraḥ

nidrāsukhavināśārthaṃ mūrkhastu dārasaṃgraham /
karoti vañcito dhātrā duḥkhāya na sukhāya ca

sūta uvāca
evaṃvidhāni vākyāni śrutvā vyāsaḥ śukasya ca /
samprāpa mahatīṃ cintāṃ kiṃ karomītyasaṃśayam

tasya susruvuraśrūṇi locanāduḥkhajāni ca /
vepathuśca śarīre'bhūd‌glāniṃ prāpa manastathā

śocantaṃ pitaraṃ dṛṣṭvā dīnaṃ śokapariplutam /
uvāca pitaraṃ vyāsaṃ vismayotphullalocanaḥ

aho māyābalaṃ cograṃ yanmohayati paṇḍitam /
vedāntasya ca kartāraṃ sarvajñaṃ vedasammitam

na jāne kā ca sā māyā kiṃsvitsātīva duṣkarā /
yā mohayati vidvāṃsaṃ vyāsaṃ satyavatīsutam

purāṇānāṃ ca vaktā ca nirmātā bhāratasya ca /
vibhāgakartā vedānāṃ so'pi mohamupāgataḥ

tāṃ yāmi śaraṇaṃ devīṃ yā mohayati vai jagat /
brahmaviṣṇuharādīṃśca kathānyeṣāṃ ca kīdṛśī

ko'pyasti triṣu lokeṣu yo na muhyati māyayā /
yanmohaṃ gamitāḥ pūrve brahmaviṣṇuharādayaḥ

aho balamaho vīryaṃ devyā khalu vinirmitam /
māyayaiva vaśaṃ nītaḥ sarvajña īśvaraḥ prabhuḥ

viṣṇvaṃśasambhavo vyāsa iti paurāṇikā jaguḥ /
so'pi mohārṇave magno bhagnapoto vaṇigyathā

aśrupātaṃ karotyadya vivaśaḥ prākṛto yathā /
aho māyābalaṃ caitaddustyajaṃ paṇḍitairapi

ko'yaṃ ko'haṃ kathaṃ ceha kīdṛśo'yaṃ bhramaḥ kila /
pañcabhūtātmake dehe pitāputreti vāsanā

baliṣṭhā khalu māyeyaṃ māyināmapi mohinī /
yayābhibhūtaḥ kṛṣṇo'pi karoti rodanaṃ dvijaḥ

sūta uvāca
tāṃ natvā manasā devīṃ sarvakāraṇakāraṇām /
jananīṃ sarvadevānāṃ brahmādīnāṃ tatheśvarīm

pitaraṃ prāha dīnaṃ taṃ śokārṇavapariplutam /
araṇīsambhavo vyāsaṃ hetumadvacanaṃ śubham

pārāśarya mahābhāga sarveṣāṃ bodhadaḥ svayam /
kiṃ śokaṃ kuruṣe svāminyathājñaḥ prākṛto naraḥ

adyāhaṃ tava putro'smi na jāne pūrvajanmani /
ko'haṃ kastvaṃ mahābhāga vibhramo'yaṃ mahātmani

kuru dhairyaṃ prabudhyasva mā viṣāde manaḥ kṛthāḥ /
mohajālamimaṃ matvā muñca śokaṃ mahāmate

kṣudhānivṛttirbhakṣyeṇa na putradarśanena ca /
pipāsā jalapānena yāti naivātmajekṣaṇāt

ghrāṇaṃ sukhaṃ sugandhena karṇajaṃ śravaṇena ca /
strīsukhaṃ tu striyā nūnaṃ putro'haṃ kiṃ karomi te

ajīgartena putro'pi hariścandrāya bhūbhuje /
paśukāmāya yajñārthe datto maulyena sarvathā

sukhānāṃ sādhanaṃ dravyaṃ dhanātsukhasamuccayaḥ /
dhanamarjaya lobhaścetputro'haṃ kiṃ karomyaham

māṃ prabodhaya buddhyā tvaṃ daivajño'si mahāmate /
yathā mucyeyamatyantaṃ garbhavāsabhayānmune

durlabhaṃ mānuṣaṃ janma karmabhūmāvihānagha /
tatrāpi brāhmaṇatvaṃ vai durlabhaṃ cottame kule

baddho'hamiti me buddhirnāpasarpati cittataḥ /
saṃsāravāsanājāle niviṣṭā vṛddhigāminī

sūta uvāca
ityuktastu tadā vyāsaḥ putreṇāmitabuddhinā /
pratyuvāca śukaṃ śāntaṃ caturthāśramamānasam

vyāsa uvāca
paṭha putra mahābhāga mayā bhāgavataṃ kṛtam /
śubhaṃ na cātivistīrṇaṃ purāṇaṃ brahmasammitam

skandhā dvādaśa tatraiva pañcalakṣaṇasaṃyutam /
sarveṣāṃ ca purāṇānāṃ bhūṣaṇaṃ mama sammatam

sadasajjñānavijñānaṃ śrutamātreṇa jāyate /
yena bhāgavateneha tatpaṭha tvaṃ mahāmate

vaṭapatraśayānāya viṣṇave bālarūpiṇe /
kenāsmi bālabhāvena nirmito'haṃ cidātmanā

kimarthaṃ kena dravyeṇa kathaṃ jānāmi cākhilam /
ityevaṃ cintyamānāya mukundāya mahātmane

ślokārdhena tayā proktaṃ bhagavatyākhilārthadam /
sarvaṃ khalvidamevāhaṃ nānyadasti sanātanam

tadvaco viṣṇunā pūrvaṃ saṃvijñātaṃ manasyapi /
kenoktā vāgiyaṃ satyā cintayāmāsa cetasā

kathaṃ vedmi pravaktāraṃ strīpuṃsau vā napuṃsakam /
iti cintāprapannena dhṛtaṃ bhāgavataṃ hṛdi

punaḥ punaḥ kṛtoccārastasminevāstacetasā /
vaṭapatre śayānaḥ sannabhūccintāsamanvitaḥ

tadā śāntā bhagavatī prādurāsa caturbhujā /
śaṅkhacakragadāpadmavarāyudhadharā śivā

divyāmbaradharā devī divyabhūṣaṇabhūṣitā /
saṃyutā sadṛśībhiśca sakhībhiḥ svavibhūtibhiḥ

prādurbabhūva tasyāgre viṣṇoramitatejasaḥ /
mandahāsyaṃ prayuñjānā mahālakṣmīḥ śubhānanā

sūta uvāca
tāṃ tathā saṃsthitāṃ dṛṣṭvā hṛdaye kamalekṣaṇaḥ /
vismitaḥ salile tasminnirādhārā manoramām

ratirbhūtistathā buddhirmatiḥ kīrtiḥ smṛtirdhṛtiḥ /
śraddhā medhā svadhā svāhā kṣudhā nidrā dayā gatiḥ

tuṣṭiḥ puṣṭiḥ kṣamā lajjā jṛmbhā tandrā ca śaktayaḥ /
saṃsthitāḥ sarvataḥ pārśve mahādevyāḥ pṛthakpṛthak

varāyudhadharāḥ sarvā nānābhūṣaṇabhūṣitāḥ /
mandāramālākulitā muktāhāravirājitāḥ

tāṃ dṛṣṭvā tāśca saṃvīkṣya tasminnekārṇave jale /
vismayāviṣṭahṛdayaḥ sambabhūva janārdanaḥ

cintayāmāsa sarvātmā dṛṣṭamāyo'tivismitaḥ /
kuto bhūtāḥ striyaḥ sarvāḥ kuto'haṃ vaṭatalpagaḥ

asminnekārṇave ghore nyagrodhaḥ kathamutthitaḥ /
kenāhaṃ sthāpito'smyatra śiśuṃ kṛtvā śubhākṛtim

mameyaṃ jananī no vā māyā vā kāpi durghaṭā /
darśanaṃ kenacittvadya dattaṃ vā kena hetunā

kiṃ mayā cātra vaktavyaṃ gantavyaṃ vā na vā kvacit /
maunamāsthāya tiṣṭheyaṃ bālabhāvādatandritaḥ

iti śrīmaddevībhāgavate mahāpurāṇe'ṣṭādaśasāhasryāṃ saṃhitāyāṃ
prathamaskandhe śukavairāgyavarṇanaṃ nāma pañcadaśo'dhyāyaḥ