Devi Bhagavata Purana · Chapter 1.13

purūravasa urvaśyāśca caritravarṇanam
sūta uvāca
sudyune tu divaṃ yāte rājyaṃ cakre purūravāḥ /
saguṇaśca surūpaśca prajārañjanatatparaḥ

pratiṣṭhāne pure ramye rājyaṃ sarvanamaskṛtam /
cakāra sarvadharmajñaḥ prajārakṣaṇatatparaḥ

mantraḥ suguptastasyāsītparatrābhijñatā tathā /
sadaivotsāhaśaktiśca prabhuśaktistathottamā

sāmadānādayaḥ sarve vaśagāstasya bhūpateḥ /
varṇāśramānsvadharmasthānkurvan rājyaṃ śaśāsa ha

yajñāṃśca vividhāṃścakre sa rājā bahudakṣiṇān /
dānāni ca pavitrāṇi dadāvatha narādhipaḥ

tasya rūpaguṇaudāryaśīladraviṇavikramān /
śrutvorvaśī vaśībhūtā cakame taṃ narādhipam

brahmaśāpābhitaptā sā mānuṣaṃ lokamāsthitā /
guṇinaṃ taṃ nṛpaṃ matvā varayāmāsa māninī

samayaṃ cedṛśaṃ kṛtvā sthitā tatra varāṅganā /
etāvuraṇakau rājannyastau rakṣasva mānada

ghṛtaṃ me bhakṣaṇaṃ nityaṃ nānyatkiñcinnṛpāśanam /
nekṣe tvāṃ ca mahārāja nagnamanyatra maithunāt

bhāṣābandhastvayaṃ rājan yadi bhagno bhaviṣyati /
tadā tyaktvā gamiṣyāmi satyametad‌bravīmyaham

aṅgīkṛtaṃ ca tad‌rājñā kāminyā bhāṣitaṃ tu yat /
sthitā bhāṣaṇabandhena śāpānugahakāmyayā

reme tadā sa bhūpālo līno varṣagaṇānbahūn /
dharmakarmādikaṃ tyaktvā corvaśyā madamohitaḥ

ekacittastu sañjātastanmanasko mahīpatiḥ /
na śaśāka tayā hīnaḥ kṣaṇamapyatimohitaḥ

evaṃ varṣagaṇānte tu svargasthaḥ pākaśāsanaḥ /
urvaśīṃ nāgatāṃ dṛṣṭvā gandharvānāha devarāṭ

urvaśīmānayadhvaṃ bho gandharvāḥ sarva eva hi /
hṛtvoraṇau gṛhāttasya bhūpateḥ samaye kila

urvaśīrahitaṃ sthānaṃ madīyaṃ nātiśobhate /
yena kenāpyupāyena tāmānayata kāminīm

ityuktāste'tha gandharvā viśvāvasupurogamāḥ /
tato gatvā mahāgāḍhe tamasi pratyupasthite

jahrustāvuraṇau devā ramamāṇaṃ vilokya tam /
cakrandatustadā tau tu hriyamāṇau vihāyasā

urvaśī tadupākarṇya kranditaṃ sutayoriva /
kupitovāca rājānaṃ samayo'yaṃ kṛto mayā

naṣṭāhaṃ tava viśvāsāddhṛtau corairmamoraṇau /
rājanputrasamāvetau tvaṃ kiṃ śeṣe striyā samaḥ

hatāsmyahaṃ kunāthena napuṃsā vīramāninā /
uraṇau me gatau cādya sadā prāṇapriyau mama

evaṃ vilapyamānāṃ tāṃ dṛṣṭvā rājā vimohitaḥ /
nagna eva yayau tūrṇaṃ pṛṣṭhataḥ pṛthivīpatiḥ

vidyutprakāśitā tatra gandharvairnṛpaveśmani /
nagnabhūtastayā dṛṣṭo bhūpatirgantukāmayā

tyaktvoraṇau gatāḥ sarve gandharvāḥ pathi pārthivaḥ /
nagno jagrāha tau śrānto jagāma svagṛhaṃ prati

tadorvaśīṃ gatāṃ dṛṣṭvā vilalāpātiduḥkhitaḥ /
nagnaṃ vīkṣya patiṃ nārī gatā sā varavarṇinī

krandansa deśadeśeṣu babhrāma nṛpatiḥ svayam /
taccitto vihvalaḥ śocanvivaśaḥ kāmamohitaḥ

bhramanvai sakalāṃ pṛthvīṃ kurukṣetre dadarśa tām /
dṛṣṭvā saṃhṛṣṭavadanaḥ prāha sūktaṃ nṛpottamaḥ

aye jāye tiṣṭha tiṣṭha ghore na tyaktumarhasi /
māṃ tvaṃ tvanmanasaṃ kāntaṃ vaśagaṃ cāpyanāgasam

sa deho'yaṃ patatyatra devi dūraṃ hṛtastvayā /
khādantyenaṃ vṛkāḥ kākāstvayā tyaktaṃ varoru yat

evaṃ vilapamānaṃ taṃ rājānaṃ prāha corvaśī /
duḥkhitaṃ kṛpaṇaṃ śrāntaṃ kāmārtaṃ vivaśaṃ bhṛśam

urvaśyuvāca
mūrkho'si nṛpaśārdūla jñānaṃ kutra gataṃ tava /
kvāpi sakhyaṃ na ca strīṇāṃ vṛkāṇāmiva pārthiva

na viśvāso hi kartavyaḥ strīṣu caureṣu pārthivaiḥ /
gṛhaṃ gaccha sukhaṃ bhuṃkṣva mā viṣāde manaḥ kṛthāḥ

ityevaṃ bodhito rājā na vivedātimohitaḥ /
duḥkhaṃ ca paramaṃ prāptaḥ svairiṇīsnehayantritaḥ

sūta uvāca
iti sarvaṃ samākhyātamurvaśīcaritaṃ mahat /
vede vistaritaṃ caitatsaṃkṣepātkathitaṃ mayā

iti śrīmaddevībhāgavate mahāpurāṇe'ṣṭādaśasāhasryāṃ sahitāyāṃ prathamaskandhe
purūravasa urvaśyāśca caritravarṇanaṃ nāma trayodaśo'dhyāyaḥ