Brihat Parashara Hora Shastra · Chapter 95

atha trītarajanmaśāntyadhyāyaḥ

athā'nyat saṃpravakṣyāmi janmadoṣapradaṃ dvija /
sutatrye sutājanma tattraye sutajanma cet

tadā'riṣṭabhayaṃ jñeyaṃ pitṛmātṛkuladvaye /
tatra śāntividhiṃ kuryād vittaśāṭhyavivarjitaḥ

sūtakānte'tha vā śuddhe samaye ca śubhe dine /
ācāryamṛtvijo vṛtvā grahayajñapurassaram

brahmaviṣṇu maheśendrapratimāḥ svarṇajāḥ śubhāḥ /
pūjayed dhānyarāśisthakalaśopari bhaktitaḥ

catvāri rudrasūktāni śāntisūktāni sarvaśaḥ /
vipra eko japed homakāle ca sucisaṃyataḥ

ācāryo juhuyāttatra samidājyatilāṃścarum /
aṣṭottaraṃ sahasraṃ vā śataṃ vā'ṣṭau ca viṃśatim

brahmādisarvadevebhyaḥ svasvagṛhyoktamantrataḥ /
tataḥ sviṣṭakṛtaṃ hutvā baliṃ pūrṇāhutiṃ punaḥ

abhiṣekaṃ ca jātasya sakuṭumbasya kārayet /
ṛtvigbhyo dakṣiṇāṃ dadyād brāhmaṇāṃścāpi bhojayet

kāṃsyājyavīkṣaṇaṃ kṛtvā dīnānāthāṃśca tarpayet /
evaṃ śāntyā ca maitreya sarvāriṣṭaṃ vilīyate