બૃહત્પારાશરહોરાશાસ્ત્રમ્ · અધ્યાય 94

અથ જ્યેષ્ઠાદિ ગણ્ડશાન્ત્યધ્યાયઃ

જ્યેષ્ઠાગણ્ડાન્તજાતસ્તુ પિતુઃ સ્વસ્ય ચ નાશકઃ ।
તસ્ય શાન્તિવિધિં વક્ષ્યે સર્વવિઘ્નોપશાન્તયે

મૂલશાન્તિસમં સર્વમાત્રાપિ મણ્ડપાદિકમ્ ।
ઇન્દ્રોઽત્ર દેવતા તદ્વદધિદેવોઽનલસ્તથા

વિજ્ઞેયં ચ તથા વિપ્ર રક્ષઃ પ્રત્યધિદૈવતમ્ ।
યથાશક્તિ સુવર્ણેન કુર્યાદિન્દ્રસ્વરૂપકમ્

વજ્રાઙ્કુશધરં દિવ્યં ગજરાજોપરિસ્થિતમ્ ।
શાલિતણ્ડુલસંયુક્તકુમ્ભસ્યોપરિ પૂજયેત્

સ્વસ્વગૃહ્યોક્તમન્ત્રેણ ગન્ધપુષ્પાક્ષતાદિભિઃ ।
અભિષેકં ચ હોમં ચ કુર્યાદ્ બ્રાહ્મણભોજનમ્

ઇન્દ્રસૂક્તં જપેદ્ ભક્ત્યા મન્ત્રં મૃત્યુઞ્જયં તથા ।
પ્રાર્થયેદિન્દ્રદેવં ચ તતઃ શાન્તિમવાપ્નુયાત્

અથ વા શક્ત્યભાવે તુ કુર્યાદ્ ગોદાનમેવ હિ ।
યતઃ સમસ્તભૂદાનાદ્ ગોદાનમતિરિચ્યતે

મૂલેન્દ્રાહિમઘાગણ્ડજાતે દદ્યાદ્ ગવાં ત્રયમ્ ।
ગોયુગ્મં પૌષ્ણદાસ્રોત્થે ગણ્ડાન્તે ચ દ્વિજન્મને

અન્યગણ્ડે ચ દુર્યોગે ગામેકાં હિ પ્રદાપયેત્ ।
ગોરભાવે ચ વિપ્રાય દદ્યાત્ તન્મૂલ્યમેવ હિ

જ્યેષ્ઠનક્ષત્રજા કન્યા વિનિહન્તિ ધવાગ્રજમ્ ।
વિશાખાન્ત્યપદોત્પન્ના કન્યા દેવરઘાતિની

તસ્યાઃ પ્રદાનકાલેઽતો ગોદાનમપિ કારયેત્ ।
આશ્લેષાન્ત્યત્રિપાદોત્થૌ મૂલાદ્યત્રિપદોદ્ભવૌ

કન્યાસુતૌ હતઃ શ્વશ્રૂં શ્વશુરઞ્ચ યથાક્રમમ્ ।
તયોર્વિવાહકાલેઽતઃ શાન્તિં કુર્યાદ્ વિચક્ષણઃ

તત્તદોષવિનાશાય યથાવિત્તાનુસારતઃ ।
ધવાગ્રજદ્યભાવે તુ ન દોષાય પ્રજાયતે