Brihat Parashara Hora Shastra · Chapter 87

atha kṛṣṇacaturdaśījanma śāntyadhyāyaḥ

kṛṣṇapakṣacaturdaśyāḥ ṣaḍbhāgeṣu phalaṃ kramāt /
janma cet prathame bhāge tadā jñeyaṃ śubhaṃ dvija

dvitīye pitaraṃ hanti mātaraṃ ca tṛtīyake /
caturthe mātulaṃ caiva pañcame vaṃśanāśanam

ṣaṣṭhe tu dhananāśaḥ syādātmano nāśa eva vā /
taddoṣaparihārārthaṃ śāntiṃ kuryād prayatnataḥ

śivasya pratimāṃ kuryāt sauvarṇīṃ karṣasammitām /
tadardhārdhamitāṃ vā'pi yathāvittaṃ manoharām

bālacandrakirīṭāñca śvetamālyāmbarānvitām /
trinetrāṃ ca vṛṣāsīnāṃ varābhayakarāmatha

trayambakaṃ ceti mantreṇa pūjāṃ kuryādatandritaḥ /
āvāhya vāruṇairmantrairācāryo mantratattvavit

imaṃ me varuṇe tyevaṃ tattvā yāmī tyṛcā punaḥ /
ttvanna agne ityanayā satvaṃ no ityṛcāpi ca

āgneyaṃ kumbhamārabhya pūjayed bhaktitaḥ kramāt /
ā nobhadreti sūktaṃ ca bhadrā agneśca sūktakam

japtvā puruṣasūktaṃ ca kandrudreti tathā japet /
śaṅkarasyā'bhiṣekaṃ ca grahapūjāṃ ca kārayet

samidājyacarūṃścaiva tilamāṣāṃśca sarpapān /
aśvasthalpakṣapālāsakhādirāḥ samidhaḥ śubhāḥ

aṣṭottaraśataṃ vahnau juhuyād vidhipūrvakam /
aṣṭaviṃśatisaṃkhyā vā homaṃ kuryāt pṛthak pṛthak

mantreṇa tryambakenātha tilān vyāhṛtibhistathā /
grahahomaṃ ca vidhivat kuryād kṣemaṃ tato bhavet

abhiṣekaṃ ca jātasya tatpitroścāpi mantravit /
kuryāt tato yathāśakti brāhmaṇān bhojayet sudhīḥ