Brihat Parashara Hora Shastra · Chapter 83

atha pūrvajanmaśāpadyotanādhyāyaḥ

maharṣe bhavatā proktaṃ phalaṃ strīṇāṃ nṛṇāṃ pṛthak /
adhunā śrotumicchāmi tvatto vedavidāṃvara

aputrasya gatirnāsti śāstreṣu śrūyate mune /
aputraḥ kena pāpena bhavatīti vada prabho

janmalagnācca tajjñānaṃ kathaṃ daivavidāṃ bhavet /
aputrasya sutaprāpterupāyaṃ kṛpayocyatām

sādhu pṛṣṭaṃ tvayā vipra kathyate hi tathā mayā /
yathomayā hi pṛṣṭena śivena kathitaṃ purā

kena yogena pāpena jñāyate'patyanāśanam /
teṣāṃ ca rakṣaṇopāyaṃ kṛpayā nātha me vada

sādhu pṛṣṭaṃ tvayā devi kathayāmi tavā'dhunā /
santānahāniyogāṃśca tadrakṣopāyasaṃyutān

gurulagneśa dāreśaputrasthānādhipeṣu ca /
sarveṣu balahīneṣu vaktavyā tvanapatyatā

ravyārarāhuśanayaḥ sabalāḥ putrabhāvagāḥ /
tadā'napatyatā cet syurabalāḥ putrakārakāḥ

putrasthānagate rāhau kujena ca nirīkṣite /
kujakṣetragate vā'pi sarpaśāpāt sutakṣayaḥ

putraśe rāhusaṃyukte putrasthe bhānunandane /
candreṇa saṃyute dṛṣṭe sarpaśāpāt sutakṣayaḥ

kārake rāhusaṃyukte putreśe balavarjite /
lagneśe kujasaṃyukte sarpaśāpāt sutakṣayaḥ

kārake bhaumasaṃyukte lagne ca rāhusaṃyute /
putrasthānādhipe duḥsthe sarpaśāpāt sutakṣayaḥ

bhaumāṃśe bhaumasaṃyukte putreśe somanandane /
rāhumāndiyute lagne sarpaśāpāt sutakṣayaḥ

putrabhāve kujakṣetre putreśe rāhusaṃyute /
saumyadṛṣṭe yute vā'pi sarpaśāpāt sutakṣayaḥ

putrasthā bhānumandārāḥ svabhānuḥ śaśijo'ṅgirāḥ /
nirbalau putralagneśau sarpaśāpāt sutakṣayaḥ

lagneśe rāhusaṃyukte putreśe bhomasaṃyute /
kārake rāhuyukte vā sarpaśāpāt sutakṣayaḥ

grahayogavaśenaivaṃ nṛṇāṃ jñātvā'napatyatā /
taddoṣaparihārārthaṃ nāgapūjāṃ samārabhet

svagṛhyoktavidhānena pratiṣṭhāṃ kārayet sudhīḥ /
nāgamūrti suvarṇena kṛtvā pūjāṃ samācaret

gobhūtilahiraṇyādi dadyād vittānusārataḥ /
evaṃ kṛte tu nāgendraprasādāt vardhate kulam

putrasthānaṃ gate bhānau nīce mandāṃśakasthite /
pārśvayoḥ krūrasambandhe pitṛśāpāt sutakṣayaḥ

putrasthānādhipe bhānau trikoṇe pāpasaṃyute /
krūrāntare pāpadṛṣṭe pitṛśāpāt sutakṣayaḥ

bhānurāśisthite jīve putreśe bhānusaṃyute /
putre lagne ca pāpāḍhye pitṛśāpāt sutakṣayaḥ

lagneśe durbale putre putreśe bhānusaṃyute /
putre lagne pāpayute pitṛśāpāt sutakṣayaḥ

pitṛsthānādhipe putre putreśe vāpi karmage /
putre lagne ca pāpāḍhye pitṛśāpāt sutakṣayaḥ

pitṛsthānādhipe bhaumaḥ putreśena samanvitaḥ /
lagne putre pitṛsthāne pāpe santatināśanam

pitṛsthānādhipe duḥsthe kārake pāparāśige /
sapāpau putralagneśau pitṛśāpāt sutakṣayaḥ

lagnapañcamabhāvasthā bhānubhaumaśanaiścarāḥ /
randhre riṣphe rāhujīvau pitṛśāpāt sutakṣayaḥ

lagnādaṣṭamage bhānau putrasthe bhānunandane /
putreśe rāhusaṃyukte lagne pāpe sutakṣayaḥ

vyayeśe lagnabhāvasthe randhreśe putrarāśige /
pitṛsthānādhipe randhre pitṛśāpāt sutakṣayaḥ

rogeśe putrabhāvasthe pitṛsthānādhipe ripau /
kārake rāhusaṃyukte pitṛśāpāt sutakṣayaḥ

taddoṣaparihārārthaṃ gayāśrāddhaṃ ca kārayet /
brāhmaṇān bhojayedatra ayutaṃ vā sahasrakam

athavā kanyakādānaṃ godānaṃ ca samācaret /
evaṃ kṛte pituḥ śāpānmucyate nā'tra saṃśayaḥ

vardhate ca kulaṃ tasya putrapautradibhiḥ sadā /
grahayogavaśādevaṃ phalaṃ brūyāt vicakṣaṇaḥ

putrasthānādhipe candre nīce vā pāpamadhyage /
hibuke pañcame pāpe mātṛśāpāt sutakṣayaḥ

lābhe mandasamāyukte mātṛsthāne śubhetare /
nīce pañcamage candre mātṛśāpāt sutakṣayaḥ

putrasthānādhipe duḥsthe lagneśe nīcarāśige /
candre ca pāpasaṃyukte mātṛśāpāt sutakṣayaḥ

putreśe'ṣṭāririṣphesthe candre pāpāṃśasaṃgate /
lagne putre ca pāpāḍhye mātṛśāpāt sutakṣayaḥ

putrasthānādhipe candre mandarāhvārasaṃyute /
bhāgye vā putrabhāve vā mātṛśāpāt sutakṣayaḥ

mātṛsthānādhipe bhaume śanirāhusamanvite /
candrabhānuyute putre lagne vā santatikṣayaḥ

lagnātmajeśau śatrusthau randhre mātradhipaḥ sthitaḥ /
pitṛnāśādhipau lagne mātṛśāpāt sutakṣayaḥ

ṣaṣṭhāṣṭameśau lagnasthau vyaye mātradhipaḥ sute /
candrajīvau pāpayuktau mātṛśāpāt sutakṣayaḥ

pāpamadhyagate lagne kṣīṇe candre ca saptama /
mātṛputre rāhumandau mātṛśāpāt sutakṣayaḥ

nāśasthānādhipe putre putreśe nāśarāśige /
candramātṛpatau duḥsthe mātṛśāpāt sutakṣayaḥ

candrakṣetre yadā lagne kujarāhusamanvite /
candramandau putrasaṃsthau mātṛśāpāt sutakṣayaḥ

lagne putre mṛtau riṣphe kujo rāhū raviḥ śaniḥ /
mātṛlagnādhipau duḥsthau mātṛśāpāt sutakṣayaḥ

nāśasthānaṃ gate jīve kujarāhusamanvite /
putrasthānau mandacandrau mātṛśāpāt sutakṣayaḥ

evaṃ yogaṃ budhaidṛṣṭvā vijñeyā tvanapatyatā /
tataḥ santānarakṣārthaṃ karttavyā śāntiruttamā

setusnānaṃ prakartavyaṃ gāyatrīlakṣasaṃkhyakā /
raupyamātraṃ payaḥ pītvā grahadānaṃ prayatnataḥ

brāhmaṇān bhojayettadvadaśvatthasya pradakṣiṇam /
kartavyaṃ bhaktiyuktena cāṣṭottarasahasrakam

evaṃ kṛte mahādevi śāpānmokṣo bhaviṣyati /
suputraṃ labhate paścāt kulavṛddhiśca jāyate

atho yogān pravakṣyāmi bhrātṛśāpasamudbhavān /
yajjñātvā'patyarakṣārthaṃ yatnaṃ kuryād vicakṣaṇaḥ

bhrātṛsthānādhipe putre kujarāhusamanvite /
putralagneśvarau randhre bhrātṛśāpāt sutakṣayaḥ

lagne sute kuje mande bhrātṛpe bhāgyarāśige /
kārake nāśabhāvasthe bhrātṛśāpāt sutakṣayaḥ

bhrātṛsthāne gururnīce mandaḥ pañcamagate yadi /
nāśasthāne tu candrārau bhrātṛśāpāt sutakṣayaḥ

tanusthānādhipe riṣphe bhaumaḥ pañcamago yadi /
randhre sapāpaputreśe bhrātṛśāpāt sutakṣayaḥ

pāpamadhyagate lagne pāpamadhye sute'pi ca /
lagneśaputrapau duḥsthau bhrātṛśāpāt sutakṣayaḥ

karmeśe bhrātṛbhāvasthe pāpayukte tathā śubhe /
putrage kujasaṃyukte bhrātṛśāpāt sutakṣayaḥ

putrasthāne budhakṣetre śamirāhusamanvite /
riṣphe vidārau vijñeyo bhrātṛśāpāt sutakṣayaḥ

lagneśe bhrātṛbhāvasthe bhrātṛsthānādhipe sute /
lagnabhrātṛsute pāpe bhrātṛśāpāt sutakṣayaḥ

bhrātrīśe mṛtyubhāvasthe putrasthe kārake tathā /
rāhumandeyute dṛṣṭe bhrātṛśāpāt sutakṣayaḥ

nāśasthānādhipe putre bhrātṛnāthena saṃyute /
randhre ārārkisaṃyukte bhrātṛśāpāt sutakṣayaḥ

bhrātṛśāpavimokṣārthaṃ vaṃśasya śravaṇaṃ hareḥ /
cāndrāyaṇsaṃ caret paścāt kāveryyā viṣṇusannidhau

aśvatthasthāpanaṃ kuryād daśadhenūśca dāpayet /
patnīhastena putrecchurbhūmiṃ dadyāt phalānvitām

evaṃ yaḥ kurute bhaktyā dharmapatnyā samanvitaḥ /
dhruvaṃ tasya bhavet putraḥ kulavṛddhiśca jāyate

putrasthāne budhe jīve kujarāhusamanvite /
lagne mande sutabhāvo jñeyo mātulaśāpataḥ

lagneputreśvarau putre budhabhaumārkisaṃyutau /
jñeyaṃ mātulaśāpatvājjanasya santatikṣayaḥ

lupte putrādhipe lagne saptame bhānunandane /
lagneśe budhasaṃyukte tasyāpi santatikṣayaḥ

jñātisthānādhipe lagne vyayeśena samanvite /
śaśisaumyakuje putre vijñeyaḥ santatikṣayaḥ

taddoṣaparihārārthaṃ viṣṇusthāparamācaret /
vāpīkūpataḍāgādikhananaṃ sutabandhunam

putravṛddhirbhavettasya saṃpadvṛddhiḥ prajāyate /
iti yogavaśādevaṃ śāntiṃ kuryād vicakṣaṇaḥ

balagarvva yo martyo brāhmaṇānavamanyate /
taddoṣād brahmaśāpācca tasya syāt santatikṣayaḥ

gurukṣetre yadā rāhuḥ putre jīvārabhānujāḥ /
dharmasthānādhipe nāśe brahmaśāpāt sutakṣayaḥ

dharmeśe putrabhāvasthe putreśe nāśarāśige /
jīvārarāhubhiryukte brahmaśāpāt sutakṣayaḥ

dharmabhāvādhipe nīce vyayeśe putrabhāvage /
rāhuyutekṣite vāpi brahmaśāpāt sutakṣayaḥ

jīve nīcagate rāhau lagne vā putrarāśige /
putrasthānādhipe duḥsthe brahmaśāpāt sutakṣayaḥ

putrabhāvādhipe jīve randhre pāpasamanvite /
putreśe sārkacandre vā brahmaśāpāt sutakṣayaḥ

mandāṃśe mandasaṃyukte jīve bhaumasamanvite /
putreśe vyayarāśisthe brahmaśāpāt sutakṣayaḥ

lagne guruyute mande bhāgye rāhusamanvite /
vyaya vā gurusaṃyukte brahmaśāpāt sutakṣayaḥ

tasya doṣasya śāntyarthaṃ kuryāccāndrāyaṇaṃ naraḥ /
brahmakṛcchratryaṃ kṛtvā dhanuṃ dadyāt sadakṣiṇām

pañcaratnāni deyāni suvarṇasahitāni ca /
brāhmaṇān bhojayet paścādyathāśakti dvijottama

evaṃ kṛte tu satputraṃ labhate nā'tra saṃśayaḥ /
muktaśāpo viśuddhātmā sa naraḥ sukhamedhate

dāreśe putrabhāvasthe dāreśasyāṃśape śanau /
putreśe nāśarāśisthe patnīśāpāt sutakṣayaḥ

nāśasaṃsthe kalatreśe putreśe nāśarāśige /
kārake pāpasaṃyukte patnīśāpāt sutakṣayaḥ

putrasthānagate śukre kāmape randhramāśrite /
kārake pāpasaṃyukte patnīśāpāt sutakṣayaḥ

kuṭumbe pāpasaṃyukte kāmape nāśarāśige /
putre pāpagrahairyukte patnīśāpāt sutakṣayaḥ

bhāgyasthānagate śukre dāreśe nāśarāśige /
lagne sute ca pāpaḍhye patnīśāpāt sutakṣayaḥ

bhāgyasthānādhipe śukre putreśe śatrurāśige /
gurulagneśadāreśā duḥsthāścet santatikṣayaḥ

putrasthāne bhṛgukṣetre rāhucandrasamanvite /
vyaye lagne dhane pāpe patnīśāpāt sutakṣayaḥ

saptame mandaśukrau ca randhreśe putrabhe ravau /
lagne rāhusamāyukte patnīśāpāt sutakṣayaḥ

dhane kuje vyaye jīve putrasthe bhṛgunandane /
śanirāhuyute dṛṣṭe patnīśāpāt sutakṣayaḥ

nāśasthau vittadāreśau putre lagne kuje śanau /
kārake pāpasaṃyukte patnīśāpāt sutakṣayaḥ

lagnapañcamabhāgyasthā rāhumandakujāḥ kramāt /
randhrasthau putradāreśau patnīśāpāt sutakṣayaḥ

śāpamuktyai ca kanyāyāṃ satyāṃ taddānamācaret /
kanyābhāve ca śrīviṣṇormūrti lakṣmīsamanvitām

dadyāt svarṇamayīṃ vipra daśadenusamanvitām /
śayyāṃ ca bhūṣaṇaṃ vastraṃ dampatibhyāṃ dvijanmanām

dhruvaṃ tasya bhavet putro bhāgyavṛddhiśca jāyate /
karmalope pitṛṇāṃ ca pretatvaṃ tasya jāyate

tasya pretasya śāpācca putrābhāvaḥ prajāyate /
ato'tra tādṛśān yogāt janmalagnāt pravacmyaham

putrasthānau mandasūryau kṣīṇacandraśca saptame /
lagne vyaye rāhujīvau pretaśāpāt sutakṣayaḥ

putrasthānādhipe mande nāśasthe lagnage kuje /
kārake nāśabhāve ca pretaśāpāt sutakṣayaḥ

lagne pāpe vyaye bhānau sute cārārkisomajāḥ /
putreśe randhrabhāvasthe pretaśāpāt sutakṣayaḥ

lagne svarbhānunā yukte putrasthe bhānunandane /
gurau ca nāśarāśisthe pretaśāpāt sutakṣayaḥ

lagne rāhau saśukrejye candre mandayute tathā /
lagneśe mṛtyurāśisthe pretaśāpāt sutakṣayaḥ

putrasthānādhipe nīce kārake nīcarāśige /
nīcasthagrahadṛṣṭe ca pretaśāpāt sutakṣayaḥ

lagne mande sute rāhau randhre bhānusamanvite /
vyaye bhaumena saṃyukte pretaśāpāt sutakṣayaḥ

kāmasthānādhipe duḥsthe putre candrasamanvite /
mandamāndiyute lagne pretaśāpāt sutakṣayaḥ

vadhasthānādhipe putre śaniśukrasamanvite /
kārake nāśarāśisthe pretaśāpāt sutakṣayaḥ

asya doṣasya śāntyarthaṃ gayāśrāddhaṃ samācaret /
kuryāṃdrudrābhiṣekañca brahmamūrti pradāpayet

dhenuṃ rajatapātraṃ ca tathā nīlamaṇiṃ dvija /
brāhmaṇān bhojayet paścāt tebhyaśca dakṣiṇāṃ diśet

evaṃ kṛte manuṣyasya śāpamokṣā prajāyate /
putrotpattirbhavettasya kulavṛddhiśca jāyate

tathā jñaśukraje doṣe putrāptiḥ śambhupūjanāt /
jīvacandrakṛte vipra mantrayantrauṣadhāditaḥ

rāhuje kanyakādānāt sūryaje harikīrtanāt /
godānāt ketuje doṣe rudrajāpāt kujā'rkije

sarvadoṣavināśāya śubhasantānalabdhaye /
harivaṃśakathā bhaktyā śrotavyā vidhinā dvija