બૃહત્પારાશરહોરાશાસ્ત્રમ્ · અધ્યાય 83

અથ પૂર્વજન્મશાપદ્યોતનાધ્યાયઃ

મહર્ષે ભવતા પ્રોક્તં ફલં સ્ત્રીણાં નૃણાં પૃથક્ ।
અધુના શ્રોતુમિચ્છામિ ત્વત્તો વેદવિદાંવર

અપુત્રસ્ય ગતિર્નાસ્તિ શાસ્ત્રેષુ શ્રૂયતે મુને ।
અપુત્રઃ કેન પાપેન ભવતીતિ વદ પ્રભો

જન્મલગ્નાચ્ચ તજ્જ્ઞાનં કથં દૈવવિદાં ભવેત્ ।
અપુત્રસ્ય સુતપ્રાપ્તેરુપાયં કૃપયોચ્યતામ્

સાધુ પૃષ્ટં ત્વયા વિપ્ર કથ્યતે હિ તથા મયા ।
યથોમયા હિ પૃષ્ટેન શિવેન કથિતં પુરા

કેન યોગેન પાપેન જ્ઞાયતેઽપત્યનાશનમ્ ।
તેષાં ચ રક્ષણોપાયં કૃપયા નાથ મે વદ

સાધુ પૃષ્ટં ત્વયા દેવિ કથયામિ તવાઽધુના ।
સન્તાનહાનિયોગાંશ્ચ તદ્રક્ષોપાયસંયુતાન્

ગુરુલગ્નેશ દારેશપુત્રસ્થાનાધિપેષુ ચ ।
સર્વેષુ બલહીનેષુ વક્તવ્યા ત્વનપત્યતા

રવ્યારરાહુશનયઃ સબલાઃ પુત્રભાવગાઃ ।
તદાઽનપત્યતા ચેત્ સ્યુરબલાઃ પુત્રકારકાઃ

પુત્રસ્થાનગતે રાહૌ કુજેન ચ નિરીક્ષિતે ।
કુજક્ષેત્રગતે વાઽપિ સર્પશાપાત્ સુતક્ષયઃ

પુત્રશે રાહુસંયુક્તે પુત્રસ્થે ભાનુનન્દને ।
ચન્દ્રેણ સંયુતે દૃષ્ટે સર્પશાપાત્ સુતક્ષયઃ

કારકે રાહુસંયુક્તે પુત્રેશે બલવર્જિતે ।
લગ્નેશે કુજસંયુક્તે સર્પશાપાત્ સુતક્ષયઃ

કારકે ભૌમસંયુક્તે લગ્ને ચ રાહુસંયુતે ।
પુત્રસ્થાનાધિપે દુઃસ્થે સર્પશાપાત્ સુતક્ષયઃ

ભૌમાંશે ભૌમસંયુક્તે પુત્રેશે સોમનન્દને ।
રાહુમાન્દિયુતે લગ્ને સર્પશાપાત્ સુતક્ષયઃ

પુત્રભાવે કુજક્ષેત્રે પુત્રેશે રાહુસંયુતે ।
સૌમ્યદૃષ્ટે યુતે વાઽપિ સર્પશાપાત્ સુતક્ષયઃ

પુત્રસ્થા ભાનુમન્દારાઃ સ્વભાનુઃ શશિજોઽઙ્ગિરાઃ ।
નિર્બલૌ પુત્રલગ્નેશૌ સર્પશાપાત્ સુતક્ષયઃ

લગ્નેશે રાહુસંયુક્તે પુત્રેશે ભોમસંયુતે ।
કારકે રાહુયુક્તે વા સર્પશાપાત્ સુતક્ષયઃ

ગ્રહયોગવશેનૈવં નૃણાં જ્ઞાત્વાઽનપત્યતા ।
તદ્દોષપરિહારાર્થં નાગપૂજાં સમારભેત્

સ્વગૃહ્યોક્તવિધાનેન પ્રતિષ્ઠાં કારયેત્ સુધીઃ ।
નાગમૂર્તિ સુવર્ણેન કૃત્વા પૂજાં સમાચરેત્

ગોભૂતિલહિરણ્યાદિ દદ્યાદ્ વિત્તાનુસારતઃ ।
એવં કૃતે તુ નાગેન્દ્રપ્રસાદાત્ વર્ધતે કુલમ્

પુત્રસ્થાનં ગતે ભાનૌ નીચે મન્દાંશકસ્થિતે ।
પાર્શ્વયોઃ ક્રૂરસમ્બન્ધે પિતૃશાપાત્ સુતક્ષયઃ

પુત્રસ્થાનાધિપે ભાનૌ ત્રિકોણે પાપસંયુતે ।
ક્રૂરાન્તરે પાપદૃષ્ટે પિતૃશાપાત્ સુતક્ષયઃ

ભાનુરાશિસ્થિતે જીવે પુત્રેશે ભાનુસંયુતે ।
પુત્રે લગ્ને ચ પાપાઢ્યે પિતૃશાપાત્ સુતક્ષયઃ

લગ્નેશે દુર્બલે પુત્રે પુત્રેશે ભાનુસંયુતે ।
પુત્રે લગ્ને પાપયુતે પિતૃશાપાત્ સુતક્ષયઃ

પિતૃસ્થાનાધિપે પુત્રે પુત્રેશે વાપિ કર્મગે ।
પુત્રે લગ્ને ચ પાપાઢ્યે પિતૃશાપાત્ સુતક્ષયઃ

પિતૃસ્થાનાધિપે ભૌમઃ પુત્રેશેન સમન્વિતઃ ।
લગ્ને પુત્રે પિતૃસ્થાને પાપે સન્તતિનાશનમ્

પિતૃસ્થાનાધિપે દુઃસ્થે કારકે પાપરાશિગે ।
સપાપૌ પુત્રલગ્નેશૌ પિતૃશાપાત્ સુતક્ષયઃ

લગ્નપઞ્ચમભાવસ્થા ભાનુભૌમશનૈશ્ચરાઃ ।
રન્ધ્રે રિષ્ફે રાહુજીવૌ પિતૃશાપાત્ સુતક્ષયઃ

લગ્નાદષ્ટમગે ભાનૌ પુત્રસ્થે ભાનુનન્દને ।
પુત્રેશે રાહુસંયુક્તે લગ્ને પાપે સુતક્ષયઃ

વ્યયેશે લગ્નભાવસ્થે રન્ધ્રેશે પુત્રરાશિગે ।
પિતૃસ્થાનાધિપે રન્ધ્રે પિતૃશાપાત્ સુતક્ષયઃ

રોગેશે પુત્રભાવસ્થે પિતૃસ્થાનાધિપે રિપૌ ।
કારકે રાહુસંયુક્તે પિતૃશાપાત્ સુતક્ષયઃ

તદ્દોષપરિહારાર્થં ગયાશ્રાદ્ધં ચ કારયેત્ ।
બ્રાહ્મણાન્ ભોજયેદત્ર અયુતં વા સહસ્રકમ્

અથવા કન્યકાદાનં ગોદાનં ચ સમાચરેત્ ।
એવં કૃતે પિતુઃ શાપાન્મુચ્યતે નાઽત્ર સંશયઃ

વર્ધતે ચ કુલં તસ્ય પુત્રપૌત્રદિભિઃ સદા ।
ગ્રહયોગવશાદેવં ફલં બ્રૂયાત્ વિચક્ષણઃ

પુત્રસ્થાનાધિપે ચન્દ્રે નીચે વા પાપમધ્યગે ।
હિબુકે પઞ્ચમે પાપે માતૃશાપાત્ સુતક્ષયઃ

લાભે મન્દસમાયુક્તે માતૃસ્થાને શુભેતરે ।
નીચે પઞ્ચમગે ચન્દ્રે માતૃશાપાત્ સુતક્ષયઃ

પુત્રસ્થાનાધિપે દુઃસ્થે લગ્નેશે નીચરાશિગે ।
ચન્દ્રે ચ પાપસંયુક્તે માતૃશાપાત્ સુતક્ષયઃ

પુત્રેશેઽષ્ટારિરિષ્ફેસ્થે ચન્દ્રે પાપાંશસંગતે ।
લગ્ને પુત્રે ચ પાપાઢ્યે માતૃશાપાત્ સુતક્ષયઃ

પુત્રસ્થાનાધિપે ચન્દ્રે મન્દરાહ્વારસંયુતે ।
ભાગ્યે વા પુત્રભાવે વા માતૃશાપાત્ સુતક્ષયઃ

માતૃસ્થાનાધિપે ભૌમે શનિરાહુસમન્વિતે ।
ચન્દ્રભાનુયુતે પુત્રે લગ્ને વા સન્તતિક્ષયઃ

લગ્નાત્મજેશૌ શત્રુસ્થૌ રન્ધ્રે માત્રધિપઃ સ્થિતઃ ।
પિતૃનાશાધિપૌ લગ્ને માતૃશાપાત્ સુતક્ષયઃ

ષષ્ઠાષ્ટમેશૌ લગ્નસ્થૌ વ્યયે માત્રધિપઃ સુતે ।
ચન્દ્રજીવૌ પાપયુક્તૌ માતૃશાપાત્ સુતક્ષયઃ

પાપમધ્યગતે લગ્ને ક્ષીણે ચન્દ્રે ચ સપ્તમ ।
માતૃપુત્રે રાહુમન્દૌ માતૃશાપાત્ સુતક્ષયઃ

નાશસ્થાનાધિપે પુત્રે પુત્રેશે નાશરાશિગે ।
ચન્દ્રમાતૃપતૌ દુઃસ્થે માતૃશાપાત્ સુતક્ષયઃ

ચન્દ્રક્ષેત્રે યદા લગ્ને કુજરાહુસમન્વિતે ।
ચન્દ્રમન્દૌ પુત્રસંસ્થૌ માતૃશાપાત્ સુતક્ષયઃ

લગ્ને પુત્રે મૃતૌ રિષ્ફે કુજો રાહૂ રવિઃ શનિઃ ।
માતૃલગ્નાધિપૌ દુઃસ્થૌ માતૃશાપાત્ સુતક્ષયઃ

નાશસ્થાનં ગતે જીવે કુજરાહુસમન્વિતે ।
પુત્રસ્થાનૌ મન્દચન્દ્રૌ માતૃશાપાત્ સુતક્ષયઃ

એવં યોગં બુધૈદૃષ્ટ્વા વિજ્ઞેયા ત્વનપત્યતા ।
તતઃ સન્તાનરક્ષાર્થં કર્ત્તવ્યા શાન્તિરુત્તમા

સેતુસ્નાનં પ્રકર્તવ્યં ગાયત્રીલક્ષસંખ્યકા ।
રૌપ્યમાત્રં પયઃ પીત્વા ગ્રહદાનં પ્રયત્નતઃ

બ્રાહ્મણાન્ ભોજયેત્તદ્વદશ્વત્થસ્ય પ્રદક્ષિણમ્ ।
કર્તવ્યં ભક્તિયુક્તેન ચાષ્ટોત્તરસહસ્રકમ્

એવં કૃતે મહાદેવિ શાપાન્મોક્ષો ભવિષ્યતિ ।
સુપુત્રં લભતે પશ્ચાત્ કુલવૃદ્ધિશ્ચ જાયતે

અથો યોગાન્ પ્રવક્ષ્યામિ ભ્રાતૃશાપસમુદ્ભવાન્ ।
યજ્જ્ઞાત્વાઽપત્યરક્ષાર્થં યત્નં કુર્યાદ્ વિચક્ષણઃ

ભ્રાતૃસ્થાનાધિપે પુત્રે કુજરાહુસમન્વિતે ।
પુત્રલગ્નેશ્વરૌ રન્ધ્રે ભ્રાતૃશાપાત્ સુતક્ષયઃ

લગ્ને સુતે કુજે મન્દે ભ્રાતૃપે ભાગ્યરાશિગે ।
કારકે નાશભાવસ્થે ભ્રાતૃશાપાત્ સુતક્ષયઃ

ભ્રાતૃસ્થાને ગુરુર્નીચે મન્દઃ પઞ્ચમગતે યદિ ।
નાશસ્થાને તુ ચન્દ્રારૌ ભ્રાતૃશાપાત્ સુતક્ષયઃ

તનુસ્થાનાધિપે રિષ્ફે ભૌમઃ પઞ્ચમગો યદિ ।
રન્ધ્રે સપાપપુત્રેશે ભ્રાતૃશાપાત્ સુતક્ષયઃ

પાપમધ્યગતે લગ્ને પાપમધ્યે સુતેઽપિ ચ ।
લગ્નેશપુત્રપૌ દુઃસ્થૌ ભ્રાતૃશાપાત્ સુતક્ષયઃ

કર્મેશે ભ્રાતૃભાવસ્થે પાપયુક્તે તથા શુભે ।
પુત્રગે કુજસંયુક્તે ભ્રાતૃશાપાત્ સુતક્ષયઃ

પુત્રસ્થાને બુધક્ષેત્રે શમિરાહુસમન્વિતે ।
રિષ્ફે વિદારૌ વિજ્ઞેયો ભ્રાતૃશાપાત્ સુતક્ષયઃ

લગ્નેશે ભ્રાતૃભાવસ્થે ભ્રાતૃસ્થાનાધિપે સુતે ।
લગ્નભ્રાતૃસુતે પાપે ભ્રાતૃશાપાત્ સુતક્ષયઃ

ભ્રાત્રીશે મૃત્યુભાવસ્થે પુત્રસ્થે કારકે તથા ।
રાહુમન્દેયુતે દૃષ્ટે ભ્રાતૃશાપાત્ સુતક્ષયઃ

નાશસ્થાનાધિપે પુત્રે ભ્રાતૃનાથેન સંયુતે ।
રન્ધ્રે આરાર્કિસંયુક્તે ભ્રાતૃશાપાત્ સુતક્ષયઃ

ભ્રાતૃશાપવિમોક્ષાર્થં વંશસ્ય શ્રવણં હરેઃ ।
ચાન્દ્રાયણ્સં ચરેત્ પશ્ચાત્ કાવેર્ય્યા વિષ્ણુસન્નિધૌ

અશ્વત્થસ્થાપનં કુર્યાદ્ દશધેનૂશ્ચ દાપયેત્ ।
પત્નીહસ્તેન પુત્રેચ્છુર્ભૂમિં દદ્યાત્ ફલાન્વિતામ્

એવં યઃ કુરુતે ભક્ત્યા ધર્મપત્ન્યા સમન્વિતઃ ।
ધ્રુવં તસ્ય ભવેત્ પુત્રઃ કુલવૃદ્ધિશ્ચ જાયતે

પુત્રસ્થાને બુધે જીવે કુજરાહુસમન્વિતે ।
લગ્ને મન્દે સુતભાવો જ્ઞેયો માતુલશાપતઃ

લગ્નેપુત્રેશ્વરૌ પુત્રે બુધભૌમાર્કિસંયુતૌ ।
જ્ઞેયં માતુલશાપત્વાજ્જનસ્ય સન્તતિક્ષયઃ

લુપ્તે પુત્રાધિપે લગ્ને સપ્તમે ભાનુનન્દને ।
લગ્નેશે બુધસંયુક્તે તસ્યાપિ સન્તતિક્ષયઃ

જ્ઞાતિસ્થાનાધિપે લગ્ને વ્યયેશેન સમન્વિતે ।
શશિસૌમ્યકુજે પુત્રે વિજ્ઞેયઃ સન્તતિક્ષયઃ

તદ્દોષપરિહારાર્થં વિષ્ણુસ્થાપરમાચરેત્ ।
વાપીકૂપતડાગાદિખનનં સુતબન્ધુનમ્

પુત્રવૃદ્ધિર્ભવેત્તસ્ય સંપદ્વૃદ્ધિઃ પ્રજાયતે ।
ઇતિ યોગવશાદેવં શાન્તિં કુર્યાદ્ વિચક્ષણઃ

બલગર્વ્વ યો મર્ત્યો બ્રાહ્મણાનવમન્યતે ।
તદ્દોષાદ્ બ્રહ્મશાપાચ્ચ તસ્ય સ્યાત્ સન્તતિક્ષયઃ

ગુરુક્ષેત્રે યદા રાહુઃ પુત્રે જીવારભાનુજાઃ ।
ધર્મસ્થાનાધિપે નાશે બ્રહ્મશાપાત્ સુતક્ષયઃ

ધર્મેશે પુત્રભાવસ્થે પુત્રેશે નાશરાશિગે ।
જીવારરાહુભિર્યુક્તે બ્રહ્મશાપાત્ સુતક્ષયઃ

ધર્મભાવાધિપે નીચે વ્યયેશે પુત્રભાવગે ।
રાહુયુતેક્ષિતે વાપિ બ્રહ્મશાપાત્ સુતક્ષયઃ

જીવે નીચગતે રાહૌ લગ્ને વા પુત્રરાશિગે ।
પુત્રસ્થાનાધિપે દુઃસ્થે બ્રહ્મશાપાત્ સુતક્ષયઃ

પુત્રભાવાધિપે જીવે રન્ધ્રે પાપસમન્વિતે ।
પુત્રેશે સાર્કચન્દ્રે વા બ્રહ્મશાપાત્ સુતક્ષયઃ

મન્દાંશે મન્દસંયુક્તે જીવે ભૌમસમન્વિતે ।
પુત્રેશે વ્યયરાશિસ્થે બ્રહ્મશાપાત્ સુતક્ષયઃ

લગ્ને ગુરુયુતે મન્દે ભાગ્યે રાહુસમન્વિતે ।
વ્યય વા ગુરુસંયુક્તે બ્રહ્મશાપાત્ સુતક્ષયઃ

તસ્ય દોષસ્ય શાન્ત્યર્થં કુર્યાચ્ચાન્દ્રાયણં નરઃ ।
બ્રહ્મકૃચ્છ્રત્ર્યં કૃત્વા ધનું દદ્યાત્ સદક્ષિણામ્

પઞ્ચરત્નાનિ દેયાનિ સુવર્ણસહિતાનિ ચ ।
બ્રાહ્મણાન્ ભોજયેત્ પશ્ચાદ્યથાશક્તિ દ્વિજોત્તમ

એવં કૃતે તુ સત્પુત્રં લભતે નાઽત્ર સંશયઃ ।
મુક્તશાપો વિશુદ્ધાત્મા સ નરઃ સુખમેધતે

દારેશે પુત્રભાવસ્થે દારેશસ્યાંશપે શનૌ ।
પુત્રેશે નાશરાશિસ્થે પત્નીશાપાત્ સુતક્ષયઃ

નાશસંસ્થે કલત્રેશે પુત્રેશે નાશરાશિગે ।
કારકે પાપસંયુક્તે પત્નીશાપાત્ સુતક્ષયઃ

પુત્રસ્થાનગતે શુક્રે કામપે રન્ધ્રમાશ્રિતે ।
કારકે પાપસંયુક્તે પત્નીશાપાત્ સુતક્ષયઃ

કુટુમ્બે પાપસંયુક્તે કામપે નાશરાશિગે ।
પુત્રે પાપગ્રહૈર્યુક્તે પત્નીશાપાત્ સુતક્ષયઃ

ભાગ્યસ્થાનગતે શુક્રે દારેશે નાશરાશિગે ।
લગ્ને સુતે ચ પાપઢ્યે પત્નીશાપાત્ સુતક્ષયઃ

ભાગ્યસ્થાનાધિપે શુક્રે પુત્રેશે શત્રુરાશિગે ।
ગુરુલગ્નેશદારેશા દુઃસ્થાશ્ચેત્ સન્તતિક્ષયઃ

પુત્રસ્થાને ભૃગુક્ષેત્રે રાહુચન્દ્રસમન્વિતે ।
વ્યયે લગ્ને ધને પાપે પત્નીશાપાત્ સુતક્ષયઃ

સપ્તમે મન્દશુક્રૌ ચ રન્ધ્રેશે પુત્રભે રવૌ ।
લગ્ને રાહુસમાયુક્તે પત્નીશાપાત્ સુતક્ષયઃ

ધને કુજે વ્યયે જીવે પુત્રસ્થે ભૃગુનન્દને ।
શનિરાહુયુતે દૃષ્ટે પત્નીશાપાત્ સુતક્ષયઃ

નાશસ્થૌ વિત્તદારેશૌ પુત્રે લગ્ને કુજે શનૌ ।
કારકે પાપસંયુક્તે પત્નીશાપાત્ સુતક્ષયઃ

લગ્નપઞ્ચમભાગ્યસ્થા રાહુમન્દકુજાઃ ક્રમાત્ ।
રન્ધ્રસ્થૌ પુત્રદારેશૌ પત્નીશાપાત્ સુતક્ષયઃ

શાપમુક્ત્યૈ ચ કન્યાયાં સત્યાં તદ્દાનમાચરેત્ ।
કન્યાભાવે ચ શ્રીવિષ્ણોર્મૂર્તિ લક્ષ્મીસમન્વિતામ્

દદ્યાત્ સ્વર્ણમયીં વિપ્ર દશદેનુસમન્વિતામ્ ।
શય્યાં ચ ભૂષણં વસ્ત્રં દમ્પતિભ્યાં દ્વિજન્મનામ્

ધ્રુવં તસ્ય ભવેત્ પુત્રો ભાગ્યવૃદ્ધિશ્ચ જાયતે ।
કર્મલોપે પિતૃણાં ચ પ્રેતત્વં તસ્ય જાયતે

તસ્ય પ્રેતસ્ય શાપાચ્ચ પુત્રાભાવઃ પ્રજાયતે ।
અતોઽત્ર તાદૃશાન્ યોગાત્ જન્મલગ્નાત્ પ્રવચ્મ્યહમ્

પુત્રસ્થાનૌ મન્દસૂર્યૌ ક્ષીણચન્દ્રશ્ચ સપ્તમે ।
લગ્ને વ્યયે રાહુજીવૌ પ્રેતશાપાત્ સુતક્ષયઃ

પુત્રસ્થાનાધિપે મન્દે નાશસ્થે લગ્નગે કુજે ।
કારકે નાશભાવે ચ પ્રેતશાપાત્ સુતક્ષયઃ

લગ્ને પાપે વ્યયે ભાનૌ સુતે ચારાર્કિસોમજાઃ ।
પુત્રેશે રન્ધ્રભાવસ્થે પ્રેતશાપાત્ સુતક્ષયઃ

લગ્ને સ્વર્ભાનુના યુક્તે પુત્રસ્થે ભાનુનન્દને ।
ગુરૌ ચ નાશરાશિસ્થે પ્રેતશાપાત્ સુતક્ષયઃ

લગ્ને રાહૌ સશુક્રેજ્યે ચન્દ્રે મન્દયુતે તથા ।
લગ્નેશે મૃત્યુરાશિસ્થે પ્રેતશાપાત્ સુતક્ષયઃ

પુત્રસ્થાનાધિપે નીચે કારકે નીચરાશિગે ।
નીચસ્થગ્રહદૃષ્ટે ચ પ્રેતશાપાત્ સુતક્ષયઃ

લગ્ને મન્દે સુતે રાહૌ રન્ધ્રે ભાનુસમન્વિતે ।
વ્યયે ભૌમેન સંયુક્તે પ્રેતશાપાત્ સુતક્ષયઃ

કામસ્થાનાધિપે દુઃસ્થે પુત્રે ચન્દ્રસમન્વિતે ।
મન્દમાન્દિયુતે લગ્ને પ્રેતશાપાત્ સુતક્ષયઃ

વધસ્થાનાધિપે પુત્રે શનિશુક્રસમન્વિતે ।
કારકે નાશરાશિસ્થે પ્રેતશાપાત્ સુતક્ષયઃ

અસ્ય દોષસ્ય શાન્ત્યર્થં ગયાશ્રાદ્ધં સમાચરેત્ ।
કુર્યાંદ્રુદ્રાભિષેકઞ્ચ બ્રહ્મમૂર્તિ પ્રદાપયેત્

ધેનું રજતપાત્રં ચ તથા નીલમણિં દ્વિજ ।
બ્રાહ્મણાન્ ભોજયેત્ પશ્ચાત્ તેભ્યશ્ચ દક્ષિણાં દિશેત્

એવં કૃતે મનુષ્યસ્ય શાપમોક્ષા પ્રજાયતે ।
પુત્રોત્પત્તિર્ભવેત્તસ્ય કુલવૃદ્ધિશ્ચ જાયતે

તથા જ્ઞશુક્રજે દોષે પુત્રાપ્તિઃ શમ્ભુપૂજનાત્ ।
જીવચન્દ્રકૃતે વિપ્ર મન્ત્રયન્ત્રૌષધાદિતઃ

રાહુજે કન્યકાદાનાત્ સૂર્યજે હરિકીર્તનાત્ ।
ગોદાનાત્ કેતુજે દોષે રુદ્રજાપાત્ કુજાઽર્કિજે

સર્વદોષવિનાશાય શુભસન્તાનલબ્ધયે ।
હરિવંશકથા ભક્ત્યા શ્રોતવ્યા વિધિના દ્વિજ