Brihat Parashara Hora Shastra · Chapter 84

atha grahaśāntyadhyāyaḥ

grahāṇāṃ doṣaśāntyarthaṃ teṣāṃ pūjāvidhiṃ vada /
mānavānāṃ hitārthāya saṃkṣepāt kṛpayā mune

grahā sūryādayaḥ pūrvaṃ mayā proktā dvijottama /
jagatyāṃ sarvajantūnāṃ tadadhīnaṃ sukhā'sukham

tasmāt suśāntikāmo vā śrīkāmo vā sucetasā /
vṛṣṭāyāyuḥ puṣṭikāmo vā teṣāṃ yajñaṃ samācaret

tābhrācca sphaṭikādraktacandanāt svarṇakādubhau /
rajatādayasaḥ sīsāt kāṃsyāt kāryāḥ krāmad grahāḥ

pūrvoktaiḥ svasvavarṇairvā paṭe lekhyā dvijottamaiḥ /
svasvoktadigvibhāgeṣu gandyādyairmaṇḍaneṣu vā

padmāsanaḥ padmahastaḥ padmapatrasamadyutiḥ /
saptāśvarathasaṃsthaśca dvibhujaśca divākaraḥ

śvetaḥ śvetāmbaro devo daśāśvaḥ śvetabhūṣaṇaḥ /
gadāhasto dvibāhuśca vidhātavyo vidhurdvija

raktamālyāmbaradharo śaktiśūlagadādharaḥ /
varadastu caturbāhurmaṅgalo meṣavāhanaḥ

pītamālyāmbaradharaḥ karṇikārasamadyutiḥ /
khaḍgacarmagadāpāṇiḥ siṃhastho varado budhaḥ

guruśukrau kramāt pītaśvetavarṇau caturbhujau /
daṇḍinau varadau kāryau sākṣasūtrakamaṇḍalū

indranīladyutiḥ śūlī varado gṛdhravāhanaḥ /
vāṇavāṇāsanadharo vijñeyo'rkasuto dvija

karālavadanaḥ khaḍgacarmaśūlī varapradaḥ /
siṃhastho nīlavarṇaśca rāhurevaṃ prakalpyate

dhūmrā dvibāhavaḥ sarve gadino vikṛtānanāḥ /
gṛdhrāsanā nityaṃ ketavaḥ syurvarapradā

sarve kirīṭinaḥ kāryā grahā lokahitapradāḥ /
svāṃgulenocchritā vijñaiḥ śatamaṣṭottaraṃ sadā

yathāvarṇaṃ pradeyāni sudṣpāṇi vasanāni ca /
gandho dīpo baliścaiva dhūpo deyaśca gugguluḥ

yasya grahasya yaddravyamannaṃ yasya ca yat priyam /
tacca tasyai pradātavyaṃ bhaktiyuktena cetasā

ākṛṣṇena imaṃ devā agnirmūrdhā divaḥ kakut /
udbudhyasveti mantrāṃśca japedatha bṛhaspate

annāt pariśrutaśceti śanno devīrabhīṣṭaye /
kayā naścitra ityevaṃ ketu kṛṇvannimāṃstathā

sapta rudrā diśo nandā navacandrā nṛpāstathā /
tripakṣā aṣṭacandrāśca saptacandrāstathaiva ca

imāḥ saṃkhyāḥ sahasraghnā japasaṃkhyāḥ prakīrtitāḥ /
kramādarkādikheṭānāṃ prītyarthaṃ dvijapuṅgava

arkaḥ palāśaḥ khadirastvapāmārgastu pippalaḥ /
udumbaraḥ śamī durvā kuśāśca samidhaḥ kramāt

hotavyā madhusarpibhyāṃ dadhnā kṣīreṇa vā yutāḥ /
ekaikasya tvaṣṭa śatamaṣṭāviṃśatireva vā

guḍaidanaṃ pāyasaṃ ca haviṣyaṃ kṣīraṣāṣṭikam /
dadhyodanaṃ haviścūrṇaṃ māṃsaṃ citrānnameva ca

dadyād grahakramādevaṃ viprebhyo bhojanaṃ dvija /
śaktito vā yathālābhaṃ deyaṃ satkārapūrvakam

dhenuḥ śaṅkhastathā'naḍvān hema vāso hayaḥ kramāt /
kṛṣṇā gaurāyasaṃ chāga etā ravyādidakṣiṇāḥ

yasya yaśca yadā duḥsthaḥ sa taṃ yatnena pūjayet /
eṣāṃ dhātrā varo dattaḥ pūjitāḥ pūjayiṣyatha

mānavānāṃ grahādhīnā uñchrāyāḥ patanāni ca /
bhāvā'bhāvau ca jagatāṃ tasmāt pūjyatamā grahāḥ