Brihat Parashara Hora Shastra · Chapter 74

atha sudarśanacakraphalādhyāyaḥ

athocyate mayā vipra rahasyaṃ jñānamuttamam /
jagatāmupakārāya yat proktaṃ brahmaṇa svayam

cakraṃ sudarśanaṃ nāma yadvaśāt prasphuṭaṃ phalam /
nṛṇāṃ tanvādibhāvānāṃ jñātuṃ śaknoti daivavit

janmato mṛtyuparyantaṃ varṣamāsadinodbhavam /
śubhaṃ vā'pyaśubhaṃ sarvaṃ tacchṛṇuṣvaikamānasaḥ

ekakendrodbhavaṃ ramyaṃ likhed vṛttatrayaṃ dvija /
dvādaśāraṃ ca tat kuryād bhavedevaṃ sudarśanam

tatrādyavṛtte lagnādyā bhāvā lekhyāḥ sakhecarāḥ /
tadūrdhvavṛtte candrācca bhavāḥ kheṭasamanvitāḥ

tadūrdhvavṛtte sūryācca kramāt bhavā grahānvitāḥ /
evamekaikabhāve'tra bhavedbhānāṃ trayaṃ trayam

atra tu prathamo bhāvo lagnenduravibhiryutaḥ /
taṃ prakalpya tanuṃ tvagre jñeyā bhāvā dhanādayaḥ

tatra tatra grahasthityā jñeyaṃ tattatphalaṃ budhaiḥ /
tanubhāve śubhaḥ sūryo jñeyo'nyatrāśubhapradaḥ

pāpo'pi svoccarāśistho na bhavatyaśubhapradaḥ /
evaṃ śubhā'śubhaṃ dṛṣṭvā tattadbhāvaphalaṃ vadet

yo bhāvaḥ svāmisaumyābhyāṃ yukto dṛṣṭo'yamedhate /
pāpairdṛṣṭo yuto yo vā tasya hāniḥ prajāyate

jñeyaṃ sagrahabhāvasya grahayogasamaṃ phalam /
agrahasya tu bhāvasya grahadṛṣṭisamaṃ phalam

śubhaireva śubhaṃ pāpairśubhaṃ miśrakhecaraiḥ /
śubhādhike śubhaṃ jñeyamaśubhaṃ tvaśubhādhike

evaṃ bhāveṣu kheṭānāṃ yogaṃ dṛṣṭiṃ vilokya ca /
tāratamyena vācyāni phalāni dvijasattama

yatra naiva grahaḥ kaścinna dṛṣṭi kasyacid bhavet /
tadā tadbhāvajaṃ jñeyaṃ tatsvāmivaśataḥ phalam

śubho'pi śubhavargeṣu hyadhikeṣvaśubhapradaḥ /
pāpo'pi śubhavargeṣu hyadhikeṣu śubhapradaḥ

svabhoccasya śubhasyātra vargā jñeyāḥ śubhavāhāḥ /
śatroḥ krūrasya nīcasya ṣaḍvargā aśubhapradāḥ

evaṃ sarveṣu kheṭeṣu bhaveṣvapi dvijottama /
śubhāśubhatvaṃ sañcinyta tatastatphalamādiśet

yadā sudarśanādeva phalaṃ siddhyati dehanām /
tadā kiṃ munibhiḥ sarvairlagnādeva phalaṃ smṛtam

iti ma saṃśayo jātastaṃ chettumarhati /
pṛthagbhagau yadā'rkendū lagnādanyatra saṃsthitau

tadā sudarśanāccakrāt phalaṃ vācyaṃ vicakṣaṇaiḥ /
ekabhe dvau trayo vā cet tadā lagnāt phalaṃ vadet

atha vipra pravakṣye'haṃ prativarṣādijaṃ phalam /
asmāt sudarśanādeva daśāntaradaśāvaśāt

tanvādyairvarṣamāssārdhadvikadhasrān pravartayet /
bhaveśādidvādaśānāṃ daśā varṣeṣu kalpayet

tadādyantardaśāstadvanmāsādau tadbalaiḥ phalam /
taṃ taṃ bhāvaṃ prakalpyāṅkaṃ tattattanvādijaṃ dvija

tat tallagnāt kendrakoṇāṣṭame saumyāḥ śubhapradāḥ /
yatra bhāve saiṃhikeyo bhavet tadbhāvahānikṛt

pāpā vā yatra bahavastattadbhāvavināśanam /
viriṣphāriśubhaiḥ pāpaistriṣaḍāyasthitaiḥ śubham

evaṃ pratyabdamāsādau bhāvānāṃ phalacintanam /
dvādaśānāṃ daśā'vṛttyā daśāścāyuṣi cintayet

evaṃ sudarśanāccakrād varṣamāsādijaṃ phalam /
jñātvā tathāṣṭavargotthamubhābhyāṃ phalanirṇayaḥ

ubhayatra samatve hi sampūrṇaṃ tat phalaṃ vadet /
viṣamatve yadādhikyaṃ tatphalaṃ ca balakramāt