Brihat Parashara Hora Shastra · Chapter 73

atha raśmiphalādhyāyaḥ

atha raśmīn pravakṣyāmi grahāṇāṃ dvijasattama /
din naveṣviṣusaptāṣṭaśarāḥ svocce karo raveḥ

nīca khaṃ cāntare proktā raśmayaścānupāttaḥ /
nīconaṃ tu grahaṃ bhārdhādhikaṃ cakrādviśodhayet

svīyaraśmihataṃ ṣaḍbhirbhajet syū raśmayaḥ svakāḥ /
aparairatra saṃskāraviśeṣaḥ kathito yathā

svoccabhe te triguṇitāḥ svatrikoṇe dvisaṃguṇāḥ /
svame trighnā dvisaṃbhaktā adhimitragṛhe tathā

vedaghnā rāmasaṃbhaktā mitrame ṣaḍguṇāstataḥ /
pañcabhaktāstathā śatrugṛhe ced dalitāḥ karāḥ

adhiśatrugṛhe dvighnāḥ pañcabhaktāḥ same samāḥ /
śaniśukrau vinā tārāgrahā aste gatā yadi

viraśmayo bhavantyevaṃ jñeyāḥ spaṣṭakarā dvija /
raśmiyogavaśādevaṃ phalaṃ vācyaṃ vicakṣaṇaiḥ

ekādi pañcaparyantaṃ raśmisaṃkhyā bhavedyadi /
daridrā duḥkhasaṃtaptā api jātāḥ kulottame

parato daśakaṃ yāvat nirdhanā bhāravāsakāḥ /
strīputragṛhahīnāśca jāyante manujā bhuvi

akādaśasvalpaputrāḥ svalpavittāśca mānavāḥ /
dvādaśasvalpavittāśca dhūrtā mūrkhāśca nirbalāḥ

cauryakarmaratā nityaṃ cet trayodaśa raśmayaḥ /
caturdaśasu dharmātmā kuṭumbānāṃ ca poṣakāḥ

kulocitakriyāsakto dhanavidyāsamanvitaḥ /
raśmibhiḥ pañcadaśabhiḥ sarvavidyāguṇānvitaḥ

svavaṃśamukhyo dhanavānityāha bhagavān vidhiḥ /
parataśca kuleśānā bahubhṛtyā kuṭumbinaḥ

kīrtimanto janaiḥ pūrṇāḥ sarve ca sukhinaḥ kramāt /
pañcāśajjanapālaścedekaviṃśatiraśmayaḥ

dānaśīlaḥ kṛpāyukto dvāviṃśatisuraśmiṣu /
sukhayuk saumyaśīlaścet trayoviṃśatiraśmayaḥ

ātriṃśat parataḥ śrīmān sarvasattvasamanvitaḥ /
rājapriyaśca tejasvī janaiśca bahubhirvṛtaḥ

ata ūrdhvaṃ tu sāmantaścatvāriṃśat karāvadhi /
janānāṃ śatamārabya sahasrāvadhipoṣakaḥ

ata ūrdhvantu bhūpālaḥ paṃcāśat kariṇāvadhi /
tata ūrdhvakarairvipra cakravartī nṛpo bhavet

evaṃ prasūtikālotthanabhogakarasambhavam /
kulakramanusāreṇa jātakasya phalaṃ vadet

kṣatriyaścakravartī vaiśyo rājā prajāyate /
śūdraśca sadhano vipro yajñakarmakriyārataḥ

uccābhimukhakheṭasya karāḥ puṣṭaphalapradāḥ /
nīcābhimukhakheṭasya tato nyūnaphalaprdāḥ

sarveṣāmeva kheṭānāmevaṃ raśmivaśāddvija /
śubhaṃ vā'pyaśubhaṃ cāpi phalaṃ bhavati dehinām

raśmijñānaṃ vinā samyak na phalaṃ jñātumarhati /
tasmādraśmīn prasādhyaiva phalaṃ vācyaṃ vicakṣaṇaiḥ