Brihat Parashara Hora Shastra · Chapter 72

atha samudāyāṣṭakavargādhyāyaḥ

dvādaśāraṃ likheccakaṃ janmalagnādibhairyutam /
sarvāṣṭakaphalānyatra saṃyojya pratibhaṃ nyaset

samudāyābhidhāno'yamaṣṭavargaḥ prakathyate /
ataḥ phalāni jātānāṃ vijñeyāni dvijottama

triṃśādhikaphalā ye syū rāśayaste śubhapradāḥ /
pañcaviṃśāditriṃśāntaphalā madhyaphalā smṛtāḥ

ataḥ kṣīṇaphalā ye te rāśayaḥ kaṣṭaduḥkhadā /
śubhe śreṣṭhaphalān rāśīn yojayenmatimānnaraḥ

kaṣṭarāśīn sukāryeṣu varjayed dvijasattama /
śreṣṭharāśigataḥ kheṭaḥ śubho'nyatrā'śubhapradaḥ

tanvādivyayaparyantaṃ dṛṣṭvā bhāvphalāni vai /
adhike śobhanaṃ jñeyaṃ hīne hāniṃ vinirdiśet

madhye madhyaphalaṃ brūyād tattadbhāvasamudbhavam /
madhyāt phalādhike lābho lābhāt kṣīṇagatovyayaḥ

lagnaṃ phalādhikaṃ yasya bhogavānarthavān hi saḥ /
viparītena dāridryaṃ bhavatyeva na saṃśayaḥ

daśāvadiha bhāvānāṃ kṛtvā khaṃḍatrayaṃ budhaḥ /
paśyet pāpasamārūḍhaṃ khaṃḍe kaṣṭakaraṃ vadet

saumyairyuktaṃ śubhaṃ brūyānmiśrairmiśraphalaṃ yathā /
kramād bālyādyavasthāsu khaṃḍatrayaphalaṃ vadet

rekhābhiḥ saptabhiryukte māsemṛtyubhayaṃ nṛṇām /
suvarṇaṃ viṃśatipalaṃ dadyāt dvau tilaparvatau

rekhābhiraṣṭabhiryukte māse mṛtyubaśo naraḥ /
asatphalavināśāya dadyāt karpūrajāṃ tulām

rekhābhirmavabhiyukte māse sarpabhayaṃ vadet /
aśvaiścaturbhiḥ saṃyuktaṃ rathaṃ dadyācchubhāptaye

rekhābhirdaśabhiryukte māse śastrabhayaṃ tathā /
dadyācchubhaphalāvāptyai kavacaṃ vajrasaṃyutam

abhiśāpabhayaṃ yatra rekhā rudrasamā dvija /
dikpalasvarṇaghaṭitāṃ pradadyāt pratimāṃ vidhoḥ

yukte dvādaśarekhābhirjale mṛtyubhayaṃ vadet /
saśasyabhūmiḥ viprāya datvā śubhaphalaṃ bhavet

viśvapramitarekhābhirvyāghrānmṛtyubhayaṃ tathā /
viṣṇorhiraṇyagarbhasya dānaṃ kuryāccubhāptaye

śatrapramitarekhābhiryukte māse mṛterbhayam /
varāhapratimāṃ dadyāt kanakena vinirmitām

tithitiśca nṛpād bhītirdadyāt tatra gajaṃ dvija /
riṣṭaṃ ṣoḍaśabhirdadyāt mūrtiṃ kalpatarostathā

saptendubhirvyādhibhayaṃ dadyāt dhenuṃ guḍaṃ tathā /
kalaho'ṣṭendubhirdadyād ratnagobhūriraṇyakam

aṅkendubhiḥ pravāsaḥ syācchāntiṃ kuryād vidhānataḥ /
viṃśatyā buddhināśaḥ syād gaṇeśaṃ tatra pūjayet

rogapīḍaikaviṃśatyā dadyād dhānyasya parvatam /
yamāśvibhirbandhupīḍā dadyādādarśakaṃ dvija

trayoviṃśatrisaṃyukte māse kleśamavāpnuyāt /
sauvarṇīṃ pratimāṃ dadyādraveḥ saptapalairbudhaḥ

vedāśvibhirbandhuhīno dadyād gidaśakaṃ nṛpaḥ /
sarvarogavināśārthaṃ japahomādikaṃ caret

dhīhāniḥ pañcaviṃśatyā pūjyā vāgīśvarī tadā /
ṣaḍviṃśatyā'rthahāniḥ syāt svarṇaṃ dadyādvicakṣaṇaḥ

tathā ca saptaviṃśatyā śrīsuktaṃ tatra saṃjapet /
aṣṭaviṃśatisaṃyukte māse māse hāniśca sarvathā

sūryahomaśca vidhinā karttavyaḥ śubhakāṃkṣibhiḥ /
ekonatriṃśatā cāpi cintavyākulito bhavet

ghṛtavastrasuvarṇāni tatra dadyāt vicakṣaṇaḥ /
triṃśatā pūrṇadhānyāptiriti jātakanirṇayaḥ

triṃśādhikāmī rekhābhirdhanaputrasukhāptayaḥ /
catvāriṃśādhikābhiśca puṇyaśrīrupacīyate

aṣṭavargeṇa ye śuddhāste śuddhāḥ sarvakarmasu /
ato'ṣṭavargasaṃśuddhiraneṣyā sarvakarmasu

tāvadgocaramanveṣyaṃ yāvanna prāpyate'ṣṭakam /
aṣṭavarge tu samprāpte gocaraṃ viphalaṃ bhavet