Brihat Parashara Hora Shastra · Chapter 44

atha mārakabhedādhyāyaḥ

bahudhā''yurbhavā yogāḥ kathitā bhavatā'dhunā |
nṛṇāṃ mārakabhedāśca kathyantāṃ kṛpayā mune

tṛtīyamaṣṭamasthānamāyuḥsthānāṃ dvayaṃ dvija |
mārakaṃ tadvyayasthānaṃ dvitīyaṃ saptamaṃ tathā

tatrāpi saptamasthānād dvitīyaṃ balavattaram |
tayorīśau tatra gatāḥ pāpinastena saṃyutāḥ

ye kheṭāḥ pāpinaste ca sarve mārakasaṃjñakāḥ |
teṣāṃ daśāvipākeṣu sambhave nidhanaṃ nṛṇām

alpamadhyamapūrṇāyuḥ pramāṇamiha yogajam |
vijñāya prathamaṃ puṃsāṃ mārakaṃ paricintayet

alābhe punareteṣāṃ sambandhena vyayeśituḥ |
kvacicchubhānāṃ ca daśasvaṣṭameśadaśāsu ca

kevalānāṃ ca pāpānāṃ daśāsu nidhanaṃ kvacit |
alpanīyaṃ budhairnṛṇāṃ mārakāṇāmadarśane

satyapi svena sambandhe na hanti śubhabhuktiṣu |
hanti satyapyasambandhe mārakaḥ pāpabhuktiṣu

mārakagrahasambandhānnihantā pāpakṛcchaniḥ |
atikramyetarān sarvān bhavatyatra na saṃśayaḥ

athā'nyadapi vakṣyāmi dvija mārakalakṣaṇaṃ |
trividhāścāyuṣo yogāḥ svalpāyurmadhyamottamāḥ

dvāviṃśāt pūrvamalpāyurmadhyamāyustataḥ param |
catuṣṣaṣṭyāḥ purastāt tu tato dīrghamudāhṛtam

uttamāyuḥ śatādūrdhvaṃ jñātavyaṃ dvijasattama |
janairviṃśativarṣāntyamāyurjñātaṃ na śakyate

japahomacikitsādyairbālarakṣāṃ hi kārayet |
mriyante pitṛdoṣaiśca kecinmātṛgrahairapi

kecit svāriṣṭyogācca trividhā bālamṛtyavaḥ |
tataḥ paraṃ nṛṇāmāyurgaṇayed dvijasattama

athā'nyadapi vakṣyāmi nṛṇāṃ mārakalakṣaṇam |
alpāyuryogajātasya vipbhe ca mṛtirbhavet

madhyāyuryogajasyaivaṃ pratyarau ca mṛtirbhavet |
dīrghāyuryogajātasya vadhabhe tu mṛtirbhavet

dvāviṃśatryaṃśapaścaiva tathā vaināśikādhipaḥ |
vipattārāpratyarīśā vadhabheśaṃstathaiva ca

ādyāntapau ca vijñeyau candrākrāntagṛhād dvija |
mārakau pāpakheṭau tau śubhau cedrogadau smṛtau

ṣaṣṭhādhipadaśāyāṃ ca nṛṇāṃ nidhanasambhavaḥ |
ṣaṣṭhāṣṭariṣphanāthānāmapahāre mṛtirbhavet

mārakā bahavaḥ kheṭā yadi vīryasamanvitāḥ |
tattaddaśāntare vipra rogakaṣṭādisaṃbhavaḥ

uktā ye mārakāsteṣu prabalo mukhyamārakaḥ |
tadavasthānusāreṇa mṛtiṃ vā kaṣṭamādiśet

rahuścedathavā keturlagne kāme'ṣṭame vyaye |
mārakeśānmade vā'pi mārakeśena saṃyutaḥ

mārakaḥ sa ca vijñeyaḥ svadaśāntardaśāsvapi |
makare vṛścike janma rāhustasya mṛtipradaḥ

ṣaṣṭhā'ṣṭariṣphago rāhustaddaye kaṣṭado bhavet |
śubhagrahayuto dṛṣṭo na tadā kaṣṭakṛnmataḥ

lagnāt tṛtīyabhāve tu balinā raviṇā yute |
rājahetuśca maraṇaṃ tasya jñeyaṃ dvijottama

tritīye cendunā yukte dṛṣṭe vā yakṣmaṇā mṛtiḥ |
kujena vraṇaśastrāgnidāhādyairmaraṇaṃ bhavet

tṛtīye śanirāhubhyāṃ yukte dṛṣṭe'pi vā dvija |
viṣārtito mṛtirvācyā jalādvā vahnipīḍanāt

gartāduccāt prapatanād bandhanād vā mṛtirbhavet |
tṛtīye candramāndibhyāṃ yukte vā vīkṣite dvija

kṛmikuṣṭhādinā tasya maraṇaṃ bhavati dhruvam |
tṛtīye budhasaṃyukte vīkṣite vāpi tena ca

jvareṇa maraṇaṃ tasya vijñeyaṃ dvijasattama |
tṛtīye guruṇā yukte dṛṣṭe śophādinā mṛtiḥ

tṛtīye bhṛguyugdṛṣṭe meharogeṇa tanmṛtiḥ |
bahukheṭayute tasmin bahurogabhavā mṛtiḥ

tṛtīye ca śubhairyukte śubhadeśe mṛtirbhavet |
pāpaiśca kīkaṭe deśe miśrairmiśrasthale mṛtiḥ

tṛtīye guruśukrābhyāṃ yukte jñānana vai mṛtiḥ |
ajñānenā'nyakheṭaiśca mṛtirjñeyā dvijottama

cararāśau tṛtīyasthe paradeśe mṛtirbhavet |
sthirarāśau svagehe ca dvisvabhāve pathi dvija

lagnādaṣṭamabhāvācca nimittaṃ kathitaṃ budhaiḥ |
sūrye'ṣṭame'gnito mṛtyuścandre mṛtyurjalena ca

śāstrād bhaume jvarāj jñe ca gurau rogāt kṣudhā bhṛgau |
pipāsayā śanau mṛtyurvijñeyo dvijasattama

aṣṭame śubhadṛgyukte dharmape ca śubhairyute |
tīrthe mṛtistadā jñeyā pāpākhyairanyathā mṛtiḥ

agnyambumiśratryaṃśairjñeyo mṛtyurgṛhāśritaiḥ |
pariṇāmaḥ śavasyā'tra bhasmasaṃkledaśoṣakaiḥ

vyālavargadṛkāṇaistu viḍambo bhavati dhruvam |
śavasya śvaśṛgālādyairgṛdhrakākādipakṣibhiḥ

karkaṭe madhyamo'ntyaśca vṛścikādyadvitīyakau |
mīne'ntimastribhāgaśca vyālavargāḥ prakīrtitāḥ

raviścandrabalākrāntatryaṃśanāthe gurau janaḥ |
devalokāt samāyāto vijñeyo dvijasattama

śukrendvoḥ pitṛlokāttu martyācca ravibhaumayoḥ |
budhā''rkyornarakādevaṃ janmakālād vadet sudhiḥ

guruścandrasitau sūryabhaumau jñārkī yathākramam |
devendubhūmyadholokān nayantyastārirandhragāḥ

atha tatra grahabhāve randhrāritryaṃśanāthayoḥ |
yo balī sa nijaṃ lokaṃ nayatyante dvijottama

tasya svoccādi saṃsthityā varamadhyā'dhamāḥ kramāt |
tattalloke'pi sañjātā vijñeyā dvijasattama

anyān mārakabhedāṃśca rāśigrahakṛtān dvija |
daśādhyāyaprasaṃgeṣu kathayiṣyāmi suvrata