Brihat Parashara Hora Shastra · Chapter 41

atha viśeṣadhanayogā'dhyāyaḥ

athā'taḥ saṃpravakṣyāmi dhanayogaṃ viśeṣataḥ |
yasmin yoge samutpanno niścito dhanavān bhavet

paṇcame bhṛgujakṣetre tasmin śukreṇa saṃyute |
lābhe bhaumena saṃyukte bahudravyasya nāyakaḥ

paṃcame tu budhakṣetre tasmin budhayuto sati |
candre bhaume gurau lābhe bahudravyasya nāyakaḥ

paṇcame ca ravikṣetre tasmin raviyute sati |
lābhe śanīndujīvāḍhye bahudravyasya nāyakaḥ

paṃcame tu śanikṣetre tasmin śaniyute sati |
lābhe ravīndusaṃyukte bahudravyasya nāyakaḥ

paṃcame tu gurukṣetre tasmin guruyute sati |
lābhe candrasute jāto bahudravyasya nāyakaḥ

paṃcame tu kujakṣetre tasmin kujayute sati |
lābhasthe bhṛguputre tu bahudravyasya nāyakaḥ

paṃcame tu śaśikṣetre tasmin śaśiyute sati |
śanau lābhasthite jāto bahudravyasya nāyakaḥ

bhānukṣetragate lagne tasmin bhānuyute punaḥ |
bhaumena guruṇā yukte dṛṣṭe jāto yuto dhanaiḥ

candrakṣetragate lagne tasmin candrayute sati |
budhena guruṇā yukte dṛṣṭe jāto dhanī bhavet

bhaumakṣetre gate lagne tasmin bhaumena saṃyute |
saumyaśukrārkajairyukte dṛṣṭe śrīmānnaro bhavet

budhakṣetragate lagne tasmin budhayute sati |
śanijīvayute dṛṣṭe jāto dhanayuto bhavet

gurukṣetragate lagne tasmin guruyute sati |
budhabhaumayute dṛṣṭe jāyate dhanavānnaraḥ

bhṛgukṣetragate lagne tasmin bhṛguyute sati |
śanisaumyayute dṛṣṭe yo jātaḥ sa dhanī bhavet

śanikṣetragate lagne tasmin śaniyute sati |
bhaumena guruṇā yukte dṛṣṭe jāto dhanairyutaḥ

dhanadau dharmadhīnāthau ye vā tābhyāṃ yutā grahāḥ |
te'pi svasvadaśākāle dhanadā nā'tra saṃśayaḥ

grahāṇāmuktayogeṣu krūrasaumyavibhāgataḥ |
balābalavivekena phalamūhyaṃ vicakṣaṇaiḥ

kendreśaḥ pārijātasthastadā dātā bhavennaraḥ |
uttame hyuttamo dātā gopure puruṣatvayuk

siṃhāsane bhavenmānyaḥ śūraḥ pārāvatāṃśake |
sabhādhyakṣo devaloke brahmaloke munirmata |
airāvatāṃśake tṛṣṭo digyogo naiva jāyate

pārijāte sutādhīśe vidyā caiva kulocitā |
uttame cottamā jñeyā gopure bhuvanāṃkitā

siṃhāsane tathā vācyā sācivyena samanvitā |
pārāvate ca vijñeyā brahmavidyā dvijottama

suteśe devalokasthe karmayogaśca jāyate |
upāsanā brahmaloke bhaktistvarāvatāṃśake

dharmeśe pārijātasthe tīrthakṛttvatra janmani |
pūrvajanmanyapi jñeyastīrthakṛccottamāṃśake

gaupure makhakartā ca pare caivā'tra janmani |
siṃhāsane bhavedvīraḥ satyavādī jitendriyaḥ

sarvadharmān parityajya brahmaikapadamāśritaḥ |
pāravate ca paramo haṃaścaivātra janmani

laguḍī vā tridaṇḍī syāddevaloke na saṃśayaḥ |
brahmaloke śakratadaṃ yāti kṛtvā'śvamedhakam

airāvate tu dharmātmā svayaṃ dharmo bhaviṣyati |
śrīrāmaḥ kuntiputrādyo yathā jāto dvijottama

viṣṇusthānaṃ ca kendraṃ syāllakṣmīsthānaṃ trikoṇakam |
tadīśayośca sambandhādrājayogaḥ puroditaḥ

pārijāte sthitau tau cennṛpo lokānurakṣakaḥ |
uttame cottamo bhūpo gajavājirathādimān

gopure nṛpaśārdūlaḥ pūjitāṃdhrirnṛpairbhavet |
siṃhāsane cakravartī sarvabhūmiprapālakaḥ

asmin yoge hariścandro manuścaivottamastathā |
balirvaiśvānaro jātastathānye cakravartinaḥ

vartamānayuge jātastathā rājā yudhiṣṭhiraḥ |
bhavitā śālivāhādyastathaiva dvijasattama

pārāvatāṃśake'pyevaṃ jātā manvādayastathā |
viṣṇoḥ sarve'vatārāśca jāyante devalokake

brahmalokake tu brahmādyā jāyante viśvapālakāḥ |
airāvatāṃśake jātaḥ pūrva svāyaṃbhuvo manuḥ