Brihat Parashara Hora Shastra · Chapter 31

athā'rgalādhyāyaḥ

bhagavān‌ yā'rgalā proktā śubhadā bhavatā'dhunā/
tāmahaṃ srotumicchāmi salakṣaṇaphalaṃ mune

maitreya sārgalā nāma yayā bhāvaphalaṃ dṛḍham‌/
sthiraṃ kheṭaphalaṃ ca syāt‌ sā'dhunā kathyate mayā

caturthe ca dhane lābhe grahe jñeyā tadargalā/
tad‌bādhakāḥ kramāt‌ kheṭā vyomariṣphatṛtīyagāḥ

nirbalā nyūnasaṃkhyā vā bādhakā naiva sammatāḥ/
tṛtīye vyādhikāḥ pāpā yatra maitreya bādhakāḥ

tatrāpi cārgalā jñeyā viparītā dvijottama/
tathāpi kheṭabhāvānāṃ phalamargalitaṃ viduḥ

pañcamaṃ cārgalāsthānaṃ navamaṃ tadvirodhakṛt‌/
tamograhabhavā sā ca vyatyayāj‌ jñāyate dvija

ekagrahā kaniṣṭhā sā dvigrahā madhyamā smṛtā/
argalā dvyadhikotpannā munibhiḥ kathitottamā

rāśito grahataścāpi vijñeyā dvividhā'rgalā/
nirbādhakā suphaladā viphalā ca sabādhakā

yatra rāśau sthitaḥ kheṭastasya pākāntaraṃ yadā/
tasmin‌ kāle phalaṃ jñeyaṃ nirviśaṃkaṃ dvijottama

argalāṃ pratibandhañca kathamāṃghricaturthayoḥ/
dvitryaṅ‌ghrayośca mitho vipra cintayediti me matam‌

pade lagne made vāpi nirābhāsārgalā yadā/
tadā jāto'tivikhyāto bahubhāgyayuto bhavet‌

yasya pāpaḥ śubho vāpi grahastiṣṭhet‌ śubhārgale/
tena draṣṭrekṣitaṃ lagnaṃ prābalyāyopakalpyate

sārgale ca dhane vipra dhanadhānyasamanvitaḥ/
tṛtīye sodarādīnāṃ sukhamuktaṃ manīṣibhiḥ

caturthe sārgale gehapaśubandhukulairyutaḥ/
pañcame putrapautrādisaṃyuto buddhimānnaraḥ

ṣaṣṭhe ripubhayaṃ kāme dhanadārasukhaṃ bahu/
aṣṭame jāyate kaṣṭaṃ dharme bhāgyodayo bhavet‌

daśame rājasammānaṃ lābhe lābhasamanvitaḥ/
sārgale ca vyaye vipra vyayādhikyaṃ prajāyate

śubhagrahārgalāyāṃ tu saukhyaṃ bahuvidhaṃ bhavet‌/
madhyaṃ pāpārgalāyāṃ ca miśrāyāmapi cottamam‌

lagnapañcamabhāgyeṣu sārgaleṣu dvijottama/
jātaśca jāyate rājā bhāgyavān‌ nātra saṃśayaḥ