બૃહત્પારાશરહોરાશાસ્ત્રમ્ · અધ્યાય 31

અથાઽર્ગલાધ્યાયઃ

ભગવાન્‌ યાઽર્ગલા પ્રોક્તા શુભદા ભવતાઽધુના।
તામહં સ્રોતુમિચ્છામિ સલક્ષણફલં મુને

મૈત્રેય સાર્ગલા નામ યયા ભાવફલં દૃઢમ્‌।
સ્થિરં ખેટફલં ચ સ્યાત્‌ સાઽધુના કથ્યતે મયા

ચતુર્થે ચ ધને લાભે ગ્રહે જ્ઞેયા તદર્ગલા।
તદ્‌બાધકાઃ ક્રમાત્‌ ખેટા વ્યોમરિષ્ફતૃતીયગાઃ

નિર્બલા ન્યૂનસંખ્યા વા બાધકા નૈવ સમ્મતાઃ।
તૃતીયે વ્યાધિકાઃ પાપા યત્ર મૈત્રેય બાધકાઃ

તત્રાપિ ચાર્ગલા જ્ઞેયા વિપરીતા દ્વિજોત્તમ।
તથાપિ ખેટભાવાનાં ફલમર્ગલિતં વિદુઃ

પઞ્ચમં ચાર્ગલાસ્થાનં નવમં તદ્વિરોધકૃત્‌।
તમોગ્રહભવા સા ચ વ્યત્યયાજ્‌ જ્ઞાયતે દ્વિજ

એકગ્રહા કનિષ્ઠા સા દ્વિગ્રહા મધ્યમા સ્મૃતા।
અર્ગલા દ્વ્યધિકોત્પન્ના મુનિભિઃ કથિતોત્તમા

રાશિતો ગ્રહતશ્ચાપિ વિજ્ઞેયા દ્વિવિધાઽર્ગલા।
નિર્બાધકા સુફલદા વિફલા ચ સબાધકા

યત્ર રાશૌ સ્થિતઃ ખેટસ્તસ્ય પાકાન્તરં યદા।
તસ્મિન્‌ કાલે ફલં જ્ઞેયં નિર્વિશંકં દ્વિજોત્તમ

અર્ગલાં પ્રતિબન્ધઞ્ચ કથમાંઘ્રિચતુર્થયોઃ।
દ્વિત્ર્યઙ્‌ઘ્રયોશ્ચ મિથો વિપ્ર ચિન્તયેદિતિ મે મતમ્‌

પદે લગ્ને મદે વાપિ નિરાભાસાર્ગલા યદા।
તદા જાતોઽતિવિખ્યાતો બહુભાગ્યયુતો ભવેત્‌

યસ્ય પાપઃ શુભો વાપિ ગ્રહસ્તિષ્ઠેત્‌ શુભાર્ગલે।
તેન દ્રષ્ટ્રેક્ષિતં લગ્નં પ્રાબલ્યાયોપકલ્પ્યતે

સાર્ગલે ચ ધને વિપ્ર ધનધાન્યસમન્વિતઃ।
તૃતીયે સોદરાદીનાં સુખમુક્તં મનીષિભિઃ

ચતુર્થે સાર્ગલે ગેહપશુબન્ધુકુલૈર્યુતઃ।
પઞ્ચમે પુત્રપૌત્રાદિસંયુતો બુદ્ધિમાન્નરઃ

ષષ્ઠે રિપુભયં કામે ધનદારસુખં બહુ।
અષ્ટમે જાયતે કષ્ટં ધર્મે ભાગ્યોદયો ભવેત્‌

દશમે રાજસમ્માનં લાભે લાભસમન્વિતઃ।
સાર્ગલે ચ વ્યયે વિપ્ર વ્યયાધિક્યં પ્રજાયતે

શુભગ્રહાર્ગલાયાં તુ સૌખ્યં બહુવિધં ભવેત્‌।
મધ્યં પાપાર્ગલાયાં ચ મિશ્રાયામપિ ચોત્તમમ્‌

લગ્નપઞ્ચમભાગ્યેષુ સાર્ગલેષુ દ્વિજોત્તમ।
જાતશ્ચ જાયતે રાજા ભાગ્યવાન્‌ નાત્ર સંશયઃ