Brihat Parashara Hora Shastra · Chapter 30

athopapadādhyāyaḥ

athopapadamāśritya kathayāmi phalaṃ dvija/
yucchubhatve bhavennṛṇāṃ putradārādijaṃ sukham‌

tanubhāvapadaṃ vipra pradhānaṃ padamucyate/
tanoranucarādyat‌ syādupārūḍhaṃ taducyate

tadevopapadaṃ nāma tathā gauṇapadaṃ smṛtam‌/
śubhakheṭagṛhe tasmin‌ śubhagrahayutekṣite

putradārasukhaṃ pūrṇaṃ jāyate dvijasattama/
pāpagrahayute tatra pāpabhe pāpavīkṣite

pravrājako bhavejjato dārahīno'tha vā naraḥ/
śubhadṛg‌yogato naiva yogo'yaṃ dāranāśakaḥ

ravirnaivātra pāpaḥ syāt‌ svoccamitrasvabhasthitaḥ/
nīcaśatrugṛhasthaścettadā'sau pāpa eva hi

śubhagrahāṇāṃ dṛṣṭiścedupārūḍhād‌ dvitīyake/
śubharkṣe śubhayukte ca pūrvoktaṃ hi phalaṃ smṛtam‌

upārūḍhād‌ dvitīyaṃ ca nīcāṃśe nīcakheṭayuk‌/
krūragrahasamāyuktaṃ jātako dārahā bhavet‌

svoccāṃśe svoccasaṃsthe vā tuṅgadṛṣṭivaśāt‌ tathā/
bhavanti bahavo dārā rūpalakṣaṇasaṃyutāḥ

upārūḍhe dvitīye vā mithune saṃsthite sati/
tatra jātanaro vipra bahudārayuto bhavet‌

upārūḍhe dvitīye'pi svasvāmigrahasaṃyute/
svarkṣage tatpatau vāpi yatra kutrāpi bhūsura

yasya janmani yogo'yaṃ sa naro dvijasattama/
uttarāyuṣi nirdāro bhavatyeva na saṃśayaḥ

svarāśau saṃsthite'pyevaṃ nityākhye dārakārake/
uttarāyuṣi nirdāro bhavatyeva na saṃśayaḥ

upārūḍhapatiḥ svocce sthirastrīkārako'tha vā/
sukulād‌ dāralābhaḥ syānnīcasthe tu viparyayāt‌

upārūḍhe dvitīye vā śubhasambadhato dvija/
jātasya sundarī bhāryā bhavyā rūpaguṇānvitā

upārūḍhād‌ dvitīye ca śanirāhū sthitau yadi/
upavādāt‌ striyastyāgo nāśo vā jāyate dvija

upārūḍhe dvitīye vā śikhiśukrau yadā sthitau/
raktapradararogārtā jāyate tasya bhāminī

budhaketū sthitau tatra tadā'sthisrāvasaṃyutā/
tatrasthāḥ śanirāhvarkāstadā'sthijvarasaṃyutā

sthūlāṅgī budharāhūbhyāṃ tatrasthābhyāṃ dvijottama/
budhakṣetre kujārkī cennasikārogasaṃyutā

kujakṣetre'pyevameva phalaṃ jñeyaṃ dvijottama/
bṛhaspatiśanī tatra karṇanetrarujānvitā

tatrānyagehagau vipra buddhabhaumau sthitau yadā/
yadā svarbhānudevejyau bhāryā dantarujānvitā

śanirāhū śanikṣetre paṅgurvātarujānvitā/
śubhadṛgyogato neti phalaṃ jñeyaṃ vipaścitā

lagnāt‌ padādupārūḍhād‌ yo rāśiḥ saptamo dvija/
tasmāt‌ tatsvāminaḥ kheṭāt‌ tadaṃśācca dvijottama

evameva phalaṃ jñeyamityāhurnāradādayaḥ/
uktebhyo navame vipra śanicandrabudhā yadi

aputratā tathā'rkejyarāhubhirbahuputratā/
candreṇaikasutastatra miśraiḥ putro vilambataḥ

ravīyjarāhuyogena putro vīryapratāpavān‌/
pracaṇḍavijayī vipra ripunigrahakārakaḥ

uktasthāne kujārkibhyāṃ putrahīnaḥ prajāyate/
datta putrayuto vāpi sahotthasutavān‌ bhavet‌

tatrasthe viṣame rāśau bahuputryuto naraḥ/
svalpāpatyaḥ same rāśau jāyate dvijasattama १

siṃhe copapade vipra niśānāthayutekṣite/
alpaprajo'tha kanyāyāṃ jātaḥ kanyāprajo bhavet‌

sutabhāvanavāṃśācca sthirasantatikārakāt‌/
evaṃ triśāṃśakuṇḍalyāmapi yogaṃ vicintayet‌

śanirāhū trilābhasthau padād‌ bhrāturvināśakau/
jyeṣṭhasyaikādaśe tatra kaniṣṭhasya tṛtīyake

daitejye tatra garbhasya nāśo vyavahitasya ca/
lagne vāpi pade randhre daityācāryayutekṣite

tathaiva phalamityāhurnirviśaṃkaṃ munīścarāḥ/
tṛtīyalābhayorvipra candrejyabudhamaṅgalāḥ

bahavo bhrātarastasya balavantaḥ pratāpinaḥ/
śanyārasaṃyute dṛṣṭe tṛtīyaikādaśe dvija

kaniṣṭhajyeṣṭhayornāśo divajñeyo dvijasattama/
śanireko yadā vipra lābhago vā tṛtīyagaḥ

tadā svamātraśeṣaḥ syādanye naśyanti sodarāḥ/
tṛtīye lābhage ketau bahulaṃ bhaginīsukham‌

ārūḍhāt‌ ṣaṣṭhabhāvasthe pāpākhye śubhavarjite/
śubhasambandharahite cauro bhavati jātakaḥ

saptame dvādaśe sthāne saihikeyayutekṣite/
jñānavāṃśca bhaved‌ bālo bahubhāgyayuto dvija

ārūḍhe saṃsthite saumye sarvadeśādhipo bhavet‌/
sarvajñastatra devejye kavirvādī ca bhārgave

upārūḍhāt‌ padād‌ vāpi dhanasthe śubhakhecare/
sarvadravyādhipo dhīmāñjāyate dvijasattama

upārūḍhād‌dhanādhīśe dvitiyabhavanasthite/
pāpakhecarasaṃyukte cauro bhavati niścitam‌

tatsaptamagṛhādhīśād‌ rāhau dhanagate dvija/
daṃṣṭrāvān‌ jāyate bālaḥ stabdhavāk‌ ketukhecare

śanaiścare kurūpaḥ syātsaptameśād‌ dvitīyage/
miśragrahasamāyukte phalaṃ miśraṃ samādiśet