બૃહત્પારાશરહોરાશાસ્ત્રમ્ · અધ્યાય 30

અથોપપદાધ્યાયઃ

અથોપપદમાશ્રિત્ય કથયામિ ફલં દ્વિજ।
યુચ્છુભત્વે ભવેન્નૃણાં પુત્રદારાદિજં સુખમ્‌

તનુભાવપદં વિપ્ર પ્રધાનં પદમુચ્યતે।
તનોરનુચરાદ્યત્‌ સ્યાદુપારૂઢં તદુચ્યતે

તદેવોપપદં નામ તથા ગૌણપદં સ્મૃતમ્‌।
શુભખેટગૃહે તસ્મિન્‌ શુભગ્રહયુતેક્ષિતે

પુત્રદારસુખં પૂર્ણં જાયતે દ્વિજસત્તમ।
પાપગ્રહયુતે તત્ર પાપભે પાપવીક્ષિતે

પ્રવ્રાજકો ભવેજ્જતો દારહીનોઽથ વા નરઃ।
શુભદૃગ્‌યોગતો નૈવ યોગોઽયં દારનાશકઃ

રવિર્નૈવાત્ર પાપઃ સ્યાત્‌ સ્વોચ્ચમિત્રસ્વભસ્થિતઃ।
નીચશત્રુગૃહસ્થશ્ચેત્તદાઽસૌ પાપ એવ હિ

શુભગ્રહાણાં દૃષ્ટિશ્ચેદુપારૂઢાદ્‌ દ્વિતીયકે।
શુભર્ક્ષે શુભયુક્તે ચ પૂર્વોક્તં હિ ફલં સ્મૃતમ્‌

ઉપારૂઢાદ્‌ દ્વિતીયં ચ નીચાંશે નીચખેટયુક્‌।
ક્રૂરગ્રહસમાયુક્તં જાતકો દારહા ભવેત્‌

સ્વોચ્ચાંશે સ્વોચ્ચસંસ્થે વા તુઙ્ગદૃષ્ટિવશાત્‌ તથા।
ભવન્તિ બહવો દારા રૂપલક્ષણસંયુતાઃ

ઉપારૂઢે દ્વિતીયે વા મિથુને સંસ્થિતે સતિ।
તત્ર જાતનરો વિપ્ર બહુદારયુતો ભવેત્‌

ઉપારૂઢે દ્વિતીયેઽપિ સ્વસ્વામિગ્રહસંયુતે।
સ્વર્ક્ષગે તત્પતૌ વાપિ યત્ર કુત્રાપિ ભૂસુર

યસ્ય જન્મનિ યોગોઽયં સ નરો દ્વિજસત્તમ।
ઉત્તરાયુષિ નિર્દારો ભવત્યેવ ન સંશયઃ

સ્વરાશૌ સંસ્થિતેઽપ્યેવં નિત્યાખ્યે દારકારકે।
ઉત્તરાયુષિ નિર્દારો ભવત્યેવ ન સંશયઃ

ઉપારૂઢપતિઃ સ્વોચ્ચે સ્થિરસ્ત્રીકારકોઽથ વા।
સુકુલાદ્‌ દારલાભઃ સ્યાન્નીચસ્થે તુ વિપર્યયાત્‌

ઉપારૂઢે દ્વિતીયે વા શુભસમ્બધતો દ્વિજ।
જાતસ્ય સુન્દરી ભાર્યા ભવ્યા રૂપગુણાન્વિતા

ઉપારૂઢાદ્‌ દ્વિતીયે ચ શનિરાહૂ સ્થિતૌ યદિ।
ઉપવાદાત્‌ સ્ત્રિયસ્ત્યાગો નાશો વા જાયતે દ્વિજ

ઉપારૂઢે દ્વિતીયે વા શિખિશુક્રૌ યદા સ્થિતૌ।
રક્તપ્રદરરોગાર્તા જાયતે તસ્ય ભામિની

બુધકેતૂ સ્થિતૌ તત્ર તદાઽસ્થિસ્રાવસંયુતા।
તત્રસ્થાઃ શનિરાહ્વર્કાસ્તદાઽસ્થિજ્વરસંયુતા

સ્થૂલાઙ્ગી બુધરાહૂભ્યાં તત્રસ્થાભ્યાં દ્વિજોત્તમ।
બુધક્ષેત્રે કુજાર્કી ચેન્નસિકારોગસંયુતા

કુજક્ષેત્રેઽપ્યેવમેવ ફલં જ્ઞેયં દ્વિજોત્તમ।
બૃહસ્પતિશની તત્ર કર્ણનેત્રરુજાન્વિતા

તત્રાન્યગેહગૌ વિપ્ર બુદ્ધભૌમૌ સ્થિતૌ યદા।
યદા સ્વર્ભાનુદેવેજ્યૌ ભાર્યા દન્તરુજાન્વિતા

શનિરાહૂ શનિક્ષેત્રે પઙ્ગુર્વાતરુજાન્વિતા।
શુભદૃગ્યોગતો નેતિ ફલં જ્ઞેયં વિપશ્ચિતા

લગ્નાત્‌ પદાદુપારૂઢાદ્‌ યો રાશિઃ સપ્તમો દ્વિજ।
તસ્માત્‌ તત્સ્વામિનઃ ખેટાત્‌ તદંશાચ્ચ દ્વિજોત્તમ

એવમેવ ફલં જ્ઞેયમિત્યાહુર્નારદાદયઃ।
ઉક્તેભ્યો નવમે વિપ્ર શનિચન્દ્રબુધા યદિ

અપુત્રતા તથાઽર્કેજ્યરાહુભિર્બહુપુત્રતા।
ચન્દ્રેણૈકસુતસ્તત્ર મિશ્રૈઃ પુત્રો વિલમ્બતઃ

રવીય્જરાહુયોગેન પુત્રો વીર્યપ્રતાપવાન્‌।
પ્રચણ્ડવિજયી વિપ્ર રિપુનિગ્રહકારકઃ

ઉક્તસ્થાને કુજાર્કિભ્યાં પુત્રહીનઃ પ્રજાયતે।
દત્ત પુત્રયુતો વાપિ સહોત્થસુતવાન્‌ ભવેત્‌

તત્રસ્થે વિષમે રાશૌ બહુપુત્ર્યુતો નરઃ।
સ્વલ્પાપત્યઃ સમે રાશૌ જાયતે દ્વિજસત્તમ ૧

સિંહે ચોપપદે વિપ્ર નિશાનાથયુતેક્ષિતે।
અલ્પપ્રજોઽથ કન્યાયાં જાતઃ કન્યાપ્રજો ભવેત્‌

સુતભાવનવાંશાચ્ચ સ્થિરસન્તતિકારકાત્‌।
એવં ત્રિશાંશકુણ્ડલ્યામપિ યોગં વિચિન્તયેત્‌

શનિરાહૂ ત્રિલાભસ્થૌ પદાદ્‌ ભ્રાતુર્વિનાશકૌ।
જ્યેષ્ઠસ્યૈકાદશે તત્ર કનિષ્ઠસ્ય તૃતીયકે

દૈતેજ્યે તત્ર ગર્ભસ્ય નાશો વ્યવહિતસ્ય ચ।
લગ્ને વાપિ પદે રન્ધ્રે દૈત્યાચાર્યયુતેક્ષિતે

તથૈવ ફલમિત્યાહુર્નિર્વિશંકં મુનીશ્ચરાઃ।
તૃતીયલાભયોર્વિપ્ર ચન્દ્રેજ્યબુધમઙ્ગલાઃ

બહવો ભ્રાતરસ્તસ્ય બલવન્તઃ પ્રતાપિનઃ।
શન્યારસંયુતે દૃષ્ટે તૃતીયૈકાદશે દ્વિજ

કનિષ્ઠજ્યેષ્ઠયોર્નાશો દિવજ્ઞેયો દ્વિજસત્તમ।
શનિરેકો યદા વિપ્ર લાભગો વા તૃતીયગઃ

તદા સ્વમાત્રશેષઃ સ્યાદન્યે નશ્યન્તિ સોદરાઃ।
તૃતીયે લાભગે કેતૌ બહુલં ભગિનીસુખમ્‌

આરૂઢાત્‌ ષષ્ઠભાવસ્થે પાપાખ્યે શુભવર્જિતે।
શુભસમ્બન્ધરહિતે ચૌરો ભવતિ જાતકઃ

સપ્તમે દ્વાદશે સ્થાને સૈહિકેયયુતેક્ષિતે।
જ્ઞાનવાંશ્ચ ભવેદ્‌ બાલો બહુભાગ્યયુતો દ્વિજ

આરૂઢે સંસ્થિતે સૌમ્યે સર્વદેશાધિપો ભવેત્‌।
સર્વજ્ઞસ્તત્ર દેવેજ્યે કવિર્વાદી ચ ભાર્ગવે

ઉપારૂઢાત્‌ પદાદ્‌ વાપિ ધનસ્થે શુભખેચરે।
સર્વદ્રવ્યાધિપો ધીમાઞ્જાયતે દ્વિજસત્તમ

ઉપારૂઢાદ્‌ધનાધીશે દ્વિતિયભવનસ્થિતે।
પાપખેચરસંયુક્તે ચૌરો ભવતિ નિશ્ચિતમ્‌

તત્સપ્તમગૃહાધીશાદ્‌ રાહૌ ધનગતે દ્વિજ।
દંષ્ટ્રાવાન્‌ જાયતે બાલઃ સ્તબ્ધવાક્‌ કેતુખેચરે

શનૈશ્ચરે કુરૂપઃ સ્યાત્સપ્તમેશાદ્‌ દ્વિતીયગે।
મિશ્રગ્રહસમાયુક્તે ફલં મિશ્રં સમાદિશેત્