Brahmavaivarta Purana · Chapter 4.74

atha catuḥsaptatitamo'dhyāyaḥ
nārāyaṇa uvāca
śrīkṛṣṇaḥ paramānandaḥ paripūrṇatamaḥ prabhuḥ /
paramātmā ca paramo bhaktānugrahakārakaḥ

bhuvo bhārāvataraṇo nirguṇaḥ prakṛteḥ paraḥ /
parātpanastu bhagavānbrahmeśaśeṣavanditaḥ

tuṣṭo nandastavaṃ śrutvā tamuvāca jagatpatiḥ /
āgacchantaṃ gokulācca virahajvarakātaram

śrībhagavānuvāca
gaccha nandavrajaṃ nanda tyaja śokaṃ bhramaṃ bhuvi /
śṛṇu satyaṃ paraṃ jñānaṃ śokagranthinikṛntanam

vāyuśca bhūmirākāśo jalaṃ tejaśca pañcamam /
uktaḥ śrutigaṇairetaiḥ pañcabhūtaiśca nityaśaḥ

sarvaiṣāṃ dehināṃ tāta dehaśca pāñcabhautikaḥ /
mithyābhramaḥ kṛtrimaśca svapnavanmāyayā'nvitaḥ

dehaṃ gṛhṇanti sarvaiṣāṃ pañcabhūtāni nityaśaḥ /
māyāsaṃketarūpaṃ tadabhijñānaṃ bhramātmakam

ko vā kasya sunastāta kā strī kasya patistu vā /
karmaṇā bhramaṇaṃ śaśvatsarveṣāṃ bhūrijanmani

karmaṇā jāyante jantuḥ karmaṇaiva pralīyate /
sukhaṃ duḥkhaṃ bhayaṃ śokaṃ karmaṇā ca prapadyate

keṣāṃ vā janma svargeṣu keṣāṃ vā brahmaṇo gṛhe /
keṣāṃ vipreṣu kṣatreṣu keṣāṃ vā baiśyaśūdrayoḥ

atinīceṣu keṣāṃ vā keṣāṃ kṛmiṣu viṭsu ca /
paśupakṣiṣu keṣāṃ vā keṣāṃ vā kṣudrajantuṣu

punaḥ punarbhramantyeva sarve tāta svakarmaṇā /
karoti karma nirmūlaṃ madbhakto matpiyaḥ sadā

satyaṃ tretā dvāparaśca kaliśceti caturyugam /
pañcaviṃśatsahasrāṇāṃ yugānte nidhanaṃ manoḥ

manoḥ samaṃ mahendrasya paramāyurvinirmitam /
caturdaśendravicchittau brahmaṇo dinamucyate

evaṃ parimitā rātriḥ kālavidbharvinirmitā /
evaṃ parimitā māsā varṣaṃ ca pariniścitam

brahmaṇaśca varṣaśataṃ paramāyurvinirmitam /
nimeṣamātraṃ kālo'yaṃ brahmaṇo nidhane mama

brahmāditṛṇaparyantaṃ sarvaṃ viśve vinirmitam /
satyo'haṃ paramātmā ca bhaktānugrahavigrahaḥ

manmantropāsakaḥ satyo dehaṃ tyaktvā dharāsu ca /
yāsyatyeva hi golokaṃ chitvā karma purātanam

asaṃkhyabrahmaṇāṃ pāte na bhavettasya pātanam /
gṛhṇati nityaṃ svaṃ dehaṃ janmamṛtyujarāpaham

na nanda mama bhaktānāmaśubhaṃ vidyate kvacit /
nityaṃ sudarśanaṃ taṃ ca parirakṣati marvataḥ

matto hi balavānbhaktaścintito'haṃ na cintitaḥ /
ahaṃ svāmī ca tasyaiva na me svāmī pitā prasūḥ

putrabuddhiṃ parityajya bhaja māṃ brahmarūpiṇam /
chittavā ca brahmanigaḍaṃ golokaṃ tadvraja svayam

kathayasva yaśodāṃ ca gopīṃ gopagaṇāṃ vraja /
taiśca sarvairjanaiḥ śokaṃ tyaja svamandiraṃ vraja

ityevamuktvā bhagavānvirarāma ca saṃsadi /
papraccha punarevaṃ taṃ nandaścā''nandasaṃplutaḥ

nanda uvāca
vada sāṃsārikaṃ jñānaṃ yena yāsyāmi tvatpadam /
mūḍho'haṃ paramānanda śrutīnāṃ janako bhavān

nandasya vacanaṃ śrutvā sarvajño bhagavānsvayam /
āhnikaṃ kathayāyāsa śrutibhirna śrutaṃ hi yat

itio śrībrahmao mahāo śrīkṛṣṇajanmakhao uttao nārādanāo bhagavannandasaṃvāde
catuḥ saptatitamo'dhyāyaḥ