Brahmavaivarta Purana · Chapter 4.37

śrīrādhikovāca //
evaṃbhūtasya ca vibhoḥ sarveśasya mahātmanaḥ //
na śastaṃ kathamucchiṣṭaṃ brūhi saṃdehabhañjana

śrīkṛṣṇa uvāca //
śṛṇu devi pravakṣye'hamitihāsaṃ purātanam //
pāpendhanānāṃ dahane jvaladāgniśikhopamam

sanatkumāro vaikuṇṭhamekadā ca jagāma ha //
dadarśa bhuktavantaṃ ca nāthaṃ nārāyaṇaṃ dvijaḥ

tuṣṭāva gūḍhaiḥ stotraiśca praṇamya bhaktito mudā //
avaśeṣaṃ dadau tasmai saṃtuṣṭo bhaktavatsalaḥ

prāptamātreṇa tatraiva bhuktaṃ tenaiva kiṃcana//
kiṃcidrarakṣa baṃdhūnāṃ bhakṣaṇāya ca durlabham

siddhāśrame ca yaddattaṃ gurave śūlapāṇine //
bhaktyudrekācca tatsarvaṃ bhuktaṃ ca prāptimātrataḥ

bhuktvā sudurlabhaṃ vastu nanarta premavihvalaḥ //
pulakāṅkitasarvāṅgaḥ sāśrunetro mudā'nvitaḥ

gāyanmama guṇānbhaktyā sukaṇṭhaḥ paṃcavaktrataḥ //
rāgabhedaikatānena tālamānena suṃdaram

papāta ḍamarurhastācchṛṅgaṃ ca vyāghracarma ca //
svayaṃ nipatya paścācca rudanmūrcchāmavāpa ha

atīva kamanīyaṃ tadrūpaṃ dhyātvaikamānamaḥ //
sahasradalamadhyasthaṃ māṃ paśyanhṛtsaroruhe

etasminnantare devī durgā durgārtināśinī //
mudā''jagāma śīghraṃ tatprasannavadanekṣaṇā

rudantaṃ mūrcchitaṃ dṛṣṭvā nipatantaṃ ca bhaktitaḥ //
prahasya vārtāṃ papraccha kumāraṃ śūlapāṇinaḥ

sarvaṃ tāṃ kathayāmāsa kumāraḥ saṃpuṭāñjaliḥ //
śrutvā cukopa sā devī śivaṃ prasphuritādharā //

tāṃ śaptumudyatāṃ devīmutthāya ca trilocanaḥ //
bodhayāmāsa vividhaṃ tuṣṭāva saṃpuṭāñjaliḥ

śrutvā manoharaṃ stotraṃ na śaśāpa śivaṃ śivā //
duṣṭaṃ cakre taducchiṣṭamabhakṣyaṃ viduṣāmapi

na lokānāṃ prabhāvaśca tapaḥsaubhāgyatejasām //
brahmāṇḍe sarvasaṃhartā cakaṃpe pārvatībhaye

uvāca taṃ jaganmātā nītisāraṃ paraṃ vacaḥ //
gaṇaprasūḥ sakopā ca raktapaṅkajalocanā

aho tapaḥprabhāvaśca tejasaśca na jīvinām //
sa brahmāṇḍasya saṃhartā cakampe śailakanyakā

pārvatyuvāca//
tvaṃ poṣṭā jagatāṃ pātā mamaiva ca viśeṣataḥ //
vaktā caturṇāṃ vedānāṃ janakaśca svayaṃ vibhuḥ

muktipradātā bhaktānāṃ dātā ca sarvasaṃpadām //
tvaṃ cetkaroṣi durnītiṃ ko vā dharmaṃ ca pāti vai

sadā te paripālyā'haṃ poṣyā bhaktyā ca kiṃkarī //
vaṃcitā karmadoṣeṇa haranirmālyabhakṣaṇe

kiṃcicchuddhaṃ hiraṇyena kiṃcidvastu ca vāyunā //
kiṃcitprakṣālanenaiva sarvaṃ viṣṇornivedanāt

viṣṇorniveditānnena yaṣṭavyāḥ sarvadevatāḥ //
pitaro'tithayaścaivamiti vedeṣu niścitam

anivedyamabhakṣyaṃ ca naivedyamudare hareḥ //
tyaktvā karoti yo bhaktyā pārṣadapravaro bhavet

amṛtaṃ sarvavastūnāmiṣṭasāraṃ sudurlabham //
viṣṇorniveditānnasya kalāṃ nārhati ṣoḍaśīm

hantyakālikamṛtyuṃ tadamṛtaṃ mūḍharaṃjanam //
naivedyaṃ ca harereva haritulyaṃ karotyaho

yadṛcchayā taṃ naivedyaṃ yo bhuṅkte sādhusaṃgataḥ //
ṣaṣṭivarṣasahasrāṇāṃ prāpnoti tapasaḥ phalam

yo nivedya hariṃ bhuṅkte bhaktyā bhaktaśca nityaśaḥ//
kiṃ vā tapasyāṃ kartā ca sa harestejasā samaḥ

śrutaṃ purā tvanmukhataḥ puṣkare munisaṃsadi //
ahaṃ vedavidhātā na kimahaṃ vaktumīśvarī //

suciraṃ ca tapastaptvā mayā labdhastvamīśvaraḥ //
tvayā viṣṇoḥ prasādena vaṃcitā'haṃ kathaṃ prabho

yato na dattaṃ naivadyaṃ viṣṇormahyaṃ tvayā'dhunā//
ato matto gṛhāṇaitatphalameva maheśvara

adyaprabhṛti ye lokā naivedyaṃ bhuñjate tava //
te janmaikaṃ sārameyā bhaviṣyantyeva bhārate

ityuktvā pārvatī mātā ruroda purato vibhoḥ //
dṛṣṭiḥ papāta tatkaṇṭhe nīlakaṇṭho babhūva ha

tadā śivaḥ śivāṃ bhaktyā kṛtvā vakṣasi sādaram //
tanmānabhaṅgaṃ stotreṇa vinayena cakāra ha

kareṇa cakṣuṣornīraṃ saṃmṛjya ca punaḥpunaḥ //
bodhayāmāsa vividhairnītivākyairmanoharaiḥ

parituṣṭā ca sā devī bhartāraṃ samuvāca ha //
kalevaraṃ ca tyakṣyāmi naivedyena vinā hareḥ

bibharti dehaṃ satataṃ tava saubhāgyavarddhanam //
kathaṃ vahāmi saubhāgyarahitaṃ ca kalevaram

apūrvaṃ tava naivedyaṃ janmamṛtyujarāharam //
kṛtaṃ duṣṭaṃ ca yattasmātpaśya dehaṃ tyajāmi ca

liṅgopari ca yaddattaṃ tadevāgrāhyamīśvara //
supavitraṃ bhavettasya viṣṇornaivedyamiśritam

ityevamuktvā sā devī dehaṃ tyaktuṃ samudyatā //
trasto harastatpurataḥ stutvā ca svīcakāra ha

śaṃkara uvāca //
sthirā bhava mahādevi caṇḍike jagadaṃbike //
mamāparādhamakhilaṃ kṣantumarhasi sundari //

māṃ bhṛtyaṃ tapasā krītaṃ kṛpāṃ kuru mamopari //
brahmaviṣṇumaheśānāṃ bījabhūte sanātani

aho golokanāthastha guṇātītasya nirguṇe //
sarvaśaktisvarūpe ca sadaiva sahacāriṇi

sākāre ca nirākāre nitye svecchāmaye priye //
kṛpayā tadvibhoreva mama vakṣasi sāṃpratam

sarvabījasvarūpe ca mahāmāye manohare //
sarvasiddhiprade devi muktide kṛṣṇabhaktide // ४५
icchaiva śrīhareḥ sākṣānnāhaṃ dātumapi kṣamaḥ //
tadā dehaṃ parityajya nirguṇaṃ vraja nirguṇe

ityevamuktvā puratastasthau ca candraśekharaḥ //
babhūva suprasannā sā praṇanāma haraṃ param

ityevaṃ pārvatīstotraṃ śaṅkareṇa kṛtaṃ purā //
yaḥ paṭhedvipadā grastaḥ sa bhayādeva mucyate

mitrabhedo bhaved dūraṃ tatsaṃmprītirbhavetpurā //
pārvatī parituṣṭā ca na tyajettasya mandiram

// śrīkṛṣṇa uvāca //
śrutvā pratijñāṃ nāthasya parituṣṭā babhūva sā //
jagāma svarṇadīṃ tūrṇaṃ snānārthaṃ śaṃkarājñayā

snātvā saṃpūjya bhaktyā ca suramiṣṭaṃ ca nirguṇam //
cakāra prastutaṃ śīghraṃ miṣṭānnaṃ vyañjanāni ca

śivaḥ snātvā ca saṃpūjya brahmajyotiḥ sanātanam //
tuṣṭāva parayā bhaktyā māmeva hṛdayasthitam

gatvā sarvamahaṃ bhuktvā tasmai dattvā'bhivāñchitam //
naivedyaṃ pārvatī lebhe tava mūlaṃ samāgatā

bhuktvā'vaśeṣaṃ sā devī saha bhartrā mudā'nvitā //
tuṣṭāva śaṅkaraṃ bhaktyā praṇanāma muhurmuhuḥ

ityevaṃ kathitaṃ sarvaṃ tvayā pṛṣṭaṃ sureśvari //
abhiśaptaṃ śaṅkarasya nirmālyaṃ yena hetunā

iti śrībrahmavaivartte mahāpurāṇe śrīkṛṣṇajanmakhaṇḍe nārāyaṇanāradasaṃvāde haranirmālyaśāpaprasaṅgo nāma saptatriṃśo'dhyāyaḥ