Brahmavaivarta Purana · Chapter 4.27

śrīnārāyaṇa uvāca //
śṛṇu nārada vakṣyāmi śrīkṛṣṇacaritaṃ punaḥ //
gopīnāṃ vastraharaṇaṃ varadānaṃ manīṣitam

hemante prathame māsi gopikāḥ kāmamohitāḥ //
kṛtvā haviṣyaṃ bhaktyā ca yāvanmāsaṃ susaṃyutāḥ

snātvā sūryasutātīre pārvatīṃ vālukāmayīm //
kṛtvā'vāhya ca mantreṇa pūjāṃ kurvanti nityaśaḥ

candanāgurukastūrīkuṅkumaiśca manoharaiḥ //
nānāprakārapuṣpaiśca mālyairbahuvidhairapi

dhūpairdīpaiśca naivedyairvastrairnānāphalairmune //
maṇimuktāpravālaiśca vādyairnānāvidhairapi

he devi jagatāṃ mātaḥ sṛṣṭisthityantakāriṇi //
nandagopasutaṃ kāntamasmabhyaṃ dehi suvrate

mantreṇānena deveśīṃ parihāraṃ vidhāya ca //
tataḥ kṛtvā tu saṃkalpaṃ pūjayan mūlamantrataḥ

mantrastu sāmavedokto'yātayāmaḥ sabījakaḥ //
ॐ śrīdurgāyai sarvavighnavināśinyai nama iti

puṣpaṃ mālyaṃ ca naivedyaṃ dhūpaṃ dīpaṃ tathā śubham //
mantreṇānena tadbhaktyā daduḥ sarvā mudānvitāḥ

pravālamālayā bhaktyā cemaṃ mantraṃ sahasradhā //
japaṃ kṛtvā ca stutvā ca praṇemuḥ śirasā bhuvi

sarvamaṅgalamāṅgalye sarvakāmaprade śive //
dehi me vāñchitaṃ devi namaste śaṃkarapriye

ityuktvā ca namaskāraṃ kṛtvā dattvā ca dakṣiṇām//
naivedyāni ca sarvāṇi brāhmaṇebhyo yayurgṛham

śrīnārāyaṇa uvāca //
stavarājaṃ śṛṇu mune tuṣṭuvuryena pārvatīm //
bhaktyā gopāṅganāḥ sarvāḥ sarvābhīṣṭaphalapradām

jagatyekārṇave ghore rudrasūryavivarjite //
añjanākāratoyena saṃplute ca carācare

dattaṃ purā brahmaṇe ca hariṇā jalaśāyinā //
tasmai dattvā sarvamidaṃ nidrāṃ bheje jagatpatiḥ

nābhipadme jagatsraṣṭā madhunā kaiṭabhena ca //
pīḍitaḥ parituṣṭāva mūlaprakṛtimīśvarīm

brahmovāca //
durge śive'bhaye māye nārāyaṇi sanātani //
jaye me maṅgalaṃ dehi namaste sarvamaṅgale

daityanāśārthavacano dakāraḥ parikīrtitaḥ //
ukāro vighnanāśārthaṃ vācako vedasaṃmataḥ

repho rogaghnavacano gaśca pāpaghnavācakaḥ //
bhayaśatrughnavacanaścākāraḥ parikīrtitaḥ

smṛtyukti smaraṇādyasyā ete naśyanti niścitam //
ato durgā hareḥ śaktirhariṇā parikīrtitā

vipattivācako durgaścākāro nāśavācakaḥ //
durgaṃ naśyati yā nityaṃ sā durgā parikīrtitā/

durgo daityendravacano'pyākāro nāśavācakaḥ //
taṃ nanāśa purā tena budhairdurgā prakīrtitā

śaśca kalyāṇavacana ikārotkṛṣṭavācakaḥ //
samūhavācakaścaiva vākāro dātṛvācakaḥ

śreyaḥsaṅghotkṛṣṭadātrī śivā tena prakīrtitā //
śivarāśirmūrttimatī śivā tena prakīrtitā

śivo hi mokṣavacanaścākāro dātṛvācakaḥ //
svayaṃ nirvāṇadātrī yā sā śivā parikīrtitā

abhayo bhayanāśoktaścākāro dātṛvācakaḥ //
pradadātyabhayaṃ sadyaḥ sā'bhayā parikīrtitā

rājyaśrīvacano māśca yāśca prāpaṇavācakaḥ //
tāṃ prāpayati yā sadyaḥ sā māyā parikīrtitā

māśca mokṣārthavacano yāśca prāpaṇavācakaḥ //
taṃ prāpayati yā nityaṃ sā māyā parikīrtitā

nārāyaṇārdhāṅgabhūtā tena tulyā ca tejasā//
sadā tasya śarīrasthā tena nārāyaṇī smṛtā

nirguṇasya ca nityasya vācakaśca sanātanaḥ //
sadā nityā nirguṇā yā kīrtitā sā sanātanī

jayaḥ kalyāṇavacano yākāro dātṛvācakaḥ //
jayaṃ dadāti yā nityaṃ sā jayā parikīrtitā

sarva maṅgalaśabdaśca saṃpūṇaiśvaryavācakaḥ //
ākāro dātṛvacanastaddātrī sarvamaṅgalā

nāmāṣṭakamidaṃ sāraṃ nāmārthasahasaṃyutam //
nārāyaṇena yaddattaṃ brahmaṇe nābhipaṅkaje

tasmai dattvā nidritaśca babhūva jagatāṃ patiḥ //
madhukaiṭabhau durgāṃ tau brahmāṇaṃ hantumudyatau

stotreṇānena sa brahmā stutiṃ natvā cakāra ha //
sākṣātstutā tadā durgā brahmaṇe kavacaṃ dadau

śrīkṛṣṇakavacaṃ divyaṃ sarvarakṣaṇanāmakam //
dattvā tasmai mahāmāyā sā'ntardhānaṃ cakāra ha

stotraṃ kurvanti nidrāṃ ca saṃrakṣya kavacena vai //
nidrānugrahataḥ sadyaḥ stotrasyaiva prabhāvataḥ

tatrājagāma bhagavānvṛṣarūpī janārdanaḥ //
śaktyā ca durgayā sārdhaṃ śaṃkarasya jayāya ca

sarathaṃ śaṃkaraṃ mūrdhni kṛtvā ca nirbhayaṃ dadau//
atyūrdhvaṃ prāpayāmāsa jayā tasmai jayaṃ dadau

stotrasyaiva prabhāveṇa saṃprāpya kavacaṃ vidhiḥ //
varaṃ ca kavacaṃ prāpya nirbhayaṃ prāpa niścitam

brahmā dadau maheśāya stotraṃ ca kavacaṃ varam//
tripurasya ca saṃgrāme sarathe patite harau

brahmāstraṃ ca gṛhītvā sa sanidraṃ śrīhariṃ smaran //
stotraṃ ca kavacaṃ prāpya jaghāna tripuraṃ haraḥ

stotreṇānena tāṃ durgāṃ kṛtvā gopālikā stutim//
lebhire śrīhariṃ kāntaṃ stotrasyāsya prabhāvataḥ

gopakanyā kṛtaṃ stotraṃ sarvamaṅgalanāmakam //
vāṃchitārthapradaṃ sadyaḥ sarvavighnavināśanam

trisandhyaṃ yaḥ paṭhennityaṃ bhaktiyuktaśca mānavaḥ//
śaivo vā vaiṣṇavo vā'pi śākto durgātpramucyate

rājadvāre śmaśāne ca dāvāgnau prāṇasaṃkaṭe //
hiṃsrajantubhayagrasto magnaḥ pote mahārṇave

śatrugraste ca saṃgrāme kārāgāre vipadgate //
guruśāpe brahmaśāpe bandhubhede ca dustare

sthānabhraṣṭe dhanabhraṣṭe jātibhraṣṭe śucā'nvite //
patibhede putrabhede khalasarpaviṣānvite

stotrasmaraṇamātreṇa sadyo mucyeta nirbhayaḥ //
vāṃchitaṃ labhate sadyaḥ sarvaiśvaryamanuttamam

iha loke harerbhaktiṃ dṛḍhāṃ ca satataṃ smṛtim //
ante dāsyaṃ ca labhate pārvatyāśca prasādataḥ

iti śrībrahmavaivarte gopakanyākṛtaṃ sarvamaṃgalāstotram //
anena stavarājena tuṣṭuvurnityamīśvarīm //
praṇemuḥ parayā bhaktyā yāvanmāsaṃ vrajāṅganāḥ

evaṃ pūrṇe ca māse ca samāptidivase tathā //
snātuṃ prajagmurgopyaśca vastrāṇyādhāya tattaṭe

nānāvidhāni dravyāṇi ratnamūlyāni nārada //
pītalohitaśuklāni cārūṇi miśritāni ca

tīrāvṛtānyasaṃkhyāni taiśca tīraṃ suśobhanam //
candanāgurukastūrī vāyunā surabhīkṛtam

naivedyaiśca bahuvidhaiḥ kāladeśodbhavaiḥ phalaiḥ //
dhūpaiḥ pradīpaiḥ sindūraiḥ kuṅkumaiśca virājitam

jale krīḍonmukhā gopyo babhūvuḥ kautukena ca //
nagnāḥ krīḍābhirāsaktāḥ śrīkṛṣṇārpitamānasāḥ

dṛṣṭvā kṛṣṇaśca vastrāṇi dravyāṇi vividhāni ca //
vāsāṃsyādāya vastūni cakhāda śiśubhiḥ saha

gatvā dūraṃ ca gopālāstasthuḥ sarve mudā'nvitāḥ//
vastrāṇi puṃjīkṛtyādāvūcuḥ skandhe'tilolupāḥ

śrīdāmā ca sudāmā ca vasudāmā tathaiva ca //
subalaśca supārśvaśca śubhāṅgaḥ sundarastathā

candrabhāno vīrabhānaḥ sūryabhānastathaiva ca //
vasubhāno ratnabhāno gopālā dvādaśa smṛtāḥ

śrīkṛṣṇo baladevaśca pradhānāśca caturdaśa //
gopā harervayasyāśca koṭiśaḥ koṭiśo mune

vastrāṇyādāya te sarve tasthurekatra dūrataḥ //
śataśaḥ puñjikāstatra sthāpayāmāsurunmukhāḥ

kiṃcidvastraṃ samādāya kṛtvā ca puñjikāṃ mudā //
samāruhya kadambāgramuvāca gopikā hariḥ

śrīkṛṣṇa uvāca //
bhobho gopālikāḥ sarvā vinaṣṭā vratakarmaṇi //
kṛtvā vidhānaṃ madvākyaṃ śrutvā krīḍata manmathāt

saṃkalpite vratārhe ca māse maṅgalakarmaṇi //
yūyaṃ nagnāḥ kathaṃ toye vratāṅgahānikārikāḥ

paridheyāni vāsāṃsi puṣpamālyāni yāni ca //
vratārhāṇi ca vastūni kena nītāni vo'dhunā

vrate tu nagnā yā snāti tāṃ ruṣṭo varuṇaḥ svayam//
varuṇānucarāścakrurvāsovastūpanirhṛtim

kathaṃ yāsyatha nagnāśca na vratasyā bhaviṣyati//
vratārādhyā kathaṃ sā ca vastūni kiṃ na rakṣati

cintāṃ kuruta tāṃ pūjyāṃ tuṣṭāva balirīśvarīm //
yuṣmākamīdṛśī devī na śaktā vasturakṣaṇe

kathaṃ vrataphalaṃ sā vā dātuṃ śaktā sureśvarī //
phalaṃ pradātuṃ yā śaktā sā śaktā sarvakarmaṇi

śrīkṛṣṇasya vacaḥ śrutvā cintāmāpurvrajastriyaḥ //
dadṛśuryamunātīraṃ vastravastuvihīnakam

cakrurviṣādaṃ toye ca nagnāstā rurudurbhṛśam //
kva gatāni ca vastrāṇi vastūnītyūcuratra naḥ

kṛtvā viṣādaṃ tatraiva tamūcurgopakanyakāḥ //
puṭāñjaliyutāḥ sarvā bhaktyā vinayapūrvakam

gopālikā ūcuḥ //
paridheyāni vastrāṇi kiṃkarīṇāṃ sadīśvara //
nibodhayātmānameva sparśaṃ kartuṃ tvamarhasi

vratārhāṇi ca vastūni devasvāni ca sāmpratam //
adattāni mocitāni grahītuṃ vedavidvada

dehi dhautāni dhṛtvā ca kariṣyāmo vrataṃ vayam//
vastunā'nyena govinda vastūnāṃ bhakṣaṇaṃ kuru

etasminnantare tatra śrīdāmā vastrapuñjikām //
darśayitvā ca tāḥ sarvā dūraṃ dudrāva tatpuraḥ

dṛṣṭvā savastraṃ gopālaṃ sarvāsāmīśvarī parā //
sarvā vayasyāścāvavāca kopayuktā jalaplutā

śrīrādhikovāca //
he suśīle śaśikale he candramukhi mādhavi //
kadambamāle he kunti yamune sarvamaṅgale

he padmamukhi sāvitri pārijāte ca jāhnavi//
sudhāmukhi śubhe padme he gauri he svayaṃprabhe

kālike kamale durge he sarasvati bhārati //
apūrṇe rati he gaṃge cāmbike sati sundari

kṛṣṇapriye madhumati campe candananandini //
yūyaṃ sarvāḥ samutthāya baddhvā''nayata ballavam

sarvā rādhājñayā tūrṇaṃ samutthāya jalātkrudhā //
prajagmurgopikā nagnā yonimācchādya pāṇinā

etāsāṃ sahacāriṇyo gopyastūrṇaṃ sahasraśaḥ //
prajagmustena rūpeṇa kopādāraktalocanāḥ

vegena dudruvuḥ sarvāḥ śrīdāmānaṃ ca bālikāḥ //
vegena ca pradhāvantaṃ bibhrataṃ vastrapuṃjikām

jagāma śīghraṃ śrīdāmā yatra gopāḥ sahāṃśukāḥ //
javena dudruvurgopyastatpaścādbalasaṃyutāḥ

vastracorāṃśca gopāṃśca veṣṭayāmāsurāśu tāḥ //
bhiyā pradudruvurbālā yatra kṛṣṇaḥ sahāṃśukaḥ

śrīkṛṣṇasahitānbālānvarayāmāsurāśu ca //
gopikānāṃ bhiyā gopā dadurvastrāṇi mādhavam

mādhavaḥ sthāpayāmāsa skandhe skandhe tarostathā//
kadambavṛkṣaḥ śuśubhe vastrairnānāvidhairapi

vastrāṇāṃ puṃjikāḥ sarvāḥ skandheṣu vinidhāya ca //
uvāca gopikāḥ kṛṣṇaḥ parihāsaparaṃ vacaḥ

śrīkṛṣṇa uvāca //
bho bho gopālikā nagnā idānīṃ kiṃ kariṣyatha //
vastrayāñcāṃ prakartuṃ ca kurutāśu puṭāñjalim

gatvā vadata yuṣmākamīśvarīmatha rādhikām //
karotu śīghraṃ vastrāṇāṃ yāñcāṃ kṛtvā puṭāñjalim

anyathā'haṃ na dāsyāmi yuṣmabhyamaṃśukāni ca //
yuṣmākamīśvarī rādhā kiṃ kariṣyati me'dhunā

vratārādhyā ca yā devī sā vā me kiṃ kariṣyati//
ityevaṃ kathitaṃ sarvaṃ brūta yūyaṃ ca rādhikām

śrīkṛṣṇavacanaṃ śrutvā tāḥ sarvā gopakanyakāḥ //
vīkṣya locanakoṇena prajagmū rādhikāntikam

cakrurnivedanaṃ gatvā yaduvāca hariḥ svayam //
śrutvā jahāsa sā rādhā babhūva kāmapīḍitā

śrutvā tāsāṃ ca vacanaṃ pulakāñcitavigrahā //
na jagāma hareḥ sthānaṃ vrīḍayā sasmitā satī

jale yogāsanaṃ kṛtvā dadhyau kṛṣṇapadāmbujam //
brahmeśānantadharmāṇāṃ vandyamīpsitadaṃ param

smāraṃsmāraṃ padāmbhojaṃ sā'śrusaṃpūrṇalocanā //
bhāvātirekātprāṇeśaṃ tuṣṭāva nirguṇaṃ param

// rādhikovāca // //
golokanātha gopīśa madīśa prāṇavallabha //
he dīnabandho dīneśa sarveśvara namo'stu te

gopeśa gosamūheśa yaśodānandavardhana //
nandātmaja sadānanda nityānanda namo'stu te

śatamanyormanyubhagna brahmadarpavināśaka//
kālīyadamana prāṇanātha kṛṣṇa namo'stu te

śivānanteśa brahmeśa brāhmaṇeśa parātpara //
brahmasvarūpa brahmajña brahmabīja namo'stu te

carācaratarorbīja guṇātīta guṇātmaka //
guṇabīja guṇādhāra guṇeśvara namo'stu te

aṇimādikasiddhīśa siddheḥ siddhisvarūpaka //
tapastapasviṃstapasā bījarūpa namo'stu te

yadanirvacanīyaṃ ca vastu nirvacanīyakam //
tatsvarūpa tayorbījaṃ sarvabīja namo'stu te

ahaṃ sarasvatī lakṣmīrdurgā gaṅgā śrutiprasūḥ //
yasya pādārcanānnityaṃ pūjyā tasmai namonamaḥ //

sparśane yasya bhṛtyānāṃ dhyānena ca divāniśam //
pavitrāṇi ca tīrthāni tasmai bhagavate namaḥ

ityevamuktvā sā devī jale saṃnyasya vigraham //
manaḥ prāṇāṃśca śrīkṛṣṇe tasthau sthāṇusamā satī

rādhākṛtaṃ hareḥ stotraṃ trisandhyaṃ yaḥ paṭhennaraḥ //
haribhaktiṃ ca dāsyaṃ ca labhedrādhāgatiṃ dhruvam

vipattau yaḥ paṭhedbhaktyā sadyaḥ saṃpattimāpnuyāt //
cirakālagataṃ dravyaṃ hṛtaṃ naṣṭaṃ ca labhyate

vastuvṛddhirbhavettasya prasannaṃ mānasaṃ param //
cintāgrastaḥ paṭhedbhaktyā parāṃ nirvṛtimāpnuyāt

patibhede putrabhede mitrabhede ca saṃkaṭe //
māsaṃ bhaktyā yadi paṭhetsadyaḥ saṃdarśanaṃ labhet

bhaktyā kumārī stotraṃ ca śṛṇuyādvatsaraṃ yadi //
śrīkṛṣṇasadṛśaṃ kāntaṃ guṇavantaṃ labheddhruvam

iti śrībrahmavaivarte śrīkṛṣṇajanmakhaṇḍe rādhākṛtaṃ śrīkṛṣṇa stotram //
jalasthā rādhikā dhyātvā śrīkṛṣṇacaraṇāmbujam //
stutvaivaṃ cakṣurunmīlya dṛṣṭvā kṛṣṇamayaṃ jagat

dadarśa yamunātīraṃ vastradravyamayaṃ mune //
dṛṣṭvā tandrā'thavā svapnamiti mene ca rādhikā

yatra sthāne yadādhāre yaddravyaṃ saṃsthitaṃ purā //
vastraiśca sahitaṃ sarvaṃ tatprāpurgopakanyakāḥ

jalādutthāya tāḥ sarvā vrataṃ kṛtvā manīṣitam //
saṃprāpya ca varaṃ devyastā sarvāḥ svālayaṃ yayuḥ

nārada uvāca //
vratasya kiṃ vidhānaṃ ca kiṃ nāma kiṃ phalaṃ prabho //
kāni dravyāṇi deyāni kā deyā tatra dakṣiṇā

vratānte kiṃ rahasyaṃ ca babhūva sumanoharam //
vyāsaṃ kṛtvā mahābhāga vada nārāyaṇīṃ kathām //

sūta uvāca //
nāradasya vacaḥ śrutvā prahasya munipuṃgavaḥ //
kathāṃ kathitumārebhe kavīndrāṇāṃ gurorguruḥ

nārāyaṇa uvāca //
sarvaṃ vratavidhānaṃ ca matto vatsa niśāmaya //
khyātaṃ gaurīvrataṃ nāma mārge māsi kṛtaṃ striyā //

puṃsāṃ ca dharmakāmārthamokṣadaṃ kṛṣṇabhaktidam//
deśabhede prasiddhaṃ ca vrataṃ paurvāparaṃ smṛtam

kāmadaṃ kāmukānāṃ ca phalaṃ kāntanimittakam //
upoṣya pūrvadivase vastraṃ prakṣālya saṃyatā

prātaśca mārgasaṃkrāntyāṃ bhaktyā gatvā sarittaṭam //
dhṛtvā dhaute ca snātvā ca nānādravyeṇa kanyakā

devaṣaṭkaṃ ca saṃpūjya kṛtvā cāvāhanaṃ ghaṭe //
gaṇeśaṃ ca dineśaṃ ca vahniṃ nārāyaṇaṃ śivam

durgāṃ paṃcopacāraiśca saṃpūjya vratamārabhet //
ghaṭādhaḥ piṇḍikāṃ kṛtvā caturasrāṃ suvistṛtām //
candanāgurukastūrīkuṅkumaiśca susaṃskṛtām

nirmāya bālukānāṃ ca durgāṃ daśabhujāṃ parām //
dhṛtvā kapāle sindūraṃ tadadhaścandanendukam

tāṃ dhyātvā''vāhayeddevīṃ tato bhūtvā puṭāñjaliḥ //
imaṃ mantraṃ paṭhitvā''dau tataḥ pūjāṃ samārabhet

he gauri śaṃkarārdhāṅgi yathā tvaṃ śaṃkarapriyā //
tathā māṃ kuru kalyāṇi kāntakāntāṃ sudurlabhām

imaṃ mantraṃ paṭhitvā tu dhyāyeddevīṃ jagatprasūm //
dhyānaṃ tatsāmavedoktaṃ nigūḍhaṃ sarvakāmadam

śṛṇu nārada vakṣyāmi munīndrāṇāṃ ca durlabham //
dhyāyantyanena siddhāśca durgāṃ durgatināśinīm

śivāṃ śivapriyāṃ śaivāṃ śivavakṣaḥsthalasthitām //
īṣaddhāsyaprasannāsyāṃ supratiṣṭhāṃ sulocanām

navayauvanasaṃpannāṃ ratnābharaṇabhūṣitām //
ratnakaṅkaṇakeyūraratnanūpurabhūṣitām/ā१३४//
ratnakuṇḍalayugmena gaṇḍasthalavirājitām//
mālatī mālyasaṃsaktakabarabhramarānvitām

sindūratilakaṃ cārukastūrībindunā saha //
vahniśuddhāṃśukāṃ ratnakirīṭāṃ sumanoharām //

maṇīndrasārasaṃsaktaratnamālāsamujjvalām //
pārijātaprasūnānāṃ mālājālānulambitām

supīnakaṭhinaśroṇīṃ bibhratīṃ ca stanānatām //
navayauvanabhāraughādīṣannamrāṃ manoharām

brahmādibhiḥ stūyamānāṃ sūryakoṭisamaprabhām //
pakvabimbādharoṣṭhīṃ ca cārucampakasannibhām

muktāpaṅktivinindyaikadantarājivirājitām //
muktikāmapradāṃ devīṃ śaraccandramukhīṃ bhaje//

dhyātvaivaṃ mastake puṣpaṃ vinyasya ca vratī mudā //
puṣpaṃ gṛhītvā bhaktyā ca punardhyātvā ca pūjayet

dattvā ṣoḍaśopacārānprahṛṣṭaṃ tatra nityaśaḥ //
pūrvoktenaiva mantreṇa mudā bhaktyā vrate vratī

pūrvoktenaiva stotreṇa stutvā ca praṇamettadā //
kṛtvā praṇāmaṃ bhaktyā ca saṃyataḥ śṛṇuyātkathām

nārada uvāca //
vrataṃ vratavidhānaṃ ca phalaṃ ca stotramadbhutam //
adhunā śrotumicchāmi gaurīvratakathāṃ śubhām

vrataṃ kena kṛtaṃ pūrvaṃ bhūmau kena prakāśitam //
etatsarvaṃ suvistārya vada saṃdehabhañjana //

śrīnārāyaṇa uvāca //
kuśadhvajasya hi sutā nāmnā vedavatī satī //
tayā kṛtaṃ vratamidaṃ mahātīrthe ca puṣkare

samāptidivase sākṣādbabhūva jagadambikā //
yoginīlakṣasaṃyuktā sūryakoṭisamaprabhā

śātakumbhavinirmāṇarathasthā parameśvarī //
īṣaddhāsyaprasannāsyā tāmuvāca susaṃyutām

pārvatyuvāca //
he vedavati bhadraṃ te varaṃ vṛṇu yathepsitam //
tava vratena tuṣṭā'haṃ tubhyaṃ dāsyāmi vāñchitam

pārvatīvacanaṃ śrutvā dṛṣṭvā tāṃ hṛṣṭamānasām //
puṭāñjaliyutā sādhvī praṇamyovāca nārada

vedavatyuvāca //
devi nārāyaṇaṃ kāntaṃ mahyaṃ dehi manīṣitam //
vare'nyasminspṛhā nāsti dṛḍhāṃ bhaktiṃ ca tatpade

śrutvā vedavatīvākyaṃ prahasya jagadambikā //
avaruhya rathāttūrṇaṃ tāmuvāca haripriyām

pārvatyuvāca //
jñātaṃ sarvaṃ jaganmātastvaṃ ca lakṣmīḥ svayaṃ satī //
bhārataṃ pādarajasā pūtaṃ kartuṃ samāgatā //
tvatpādarajasā sādhvi sadyaḥ pūtā vasuṃdharā

nikhilāni ca tīrthāni pūtāni parameśvarī //
vrataṃ te lokaśikṣārthaṃ tapaścara tapasvini

nārāyaṇasya kāntā tvaṃ priyā janmani janmani //
bhārāvataraṇe viṣṇurvasudhāmāgamiṣyati

rāmo dāśarathiḥ pūrṇaḥ kartuṃ dasyuvinigraham //
brahmaśāpācca cyutayormokṣaṇāya ca bhaktayoḥ

ayodhyāyāṃ ca tretāyāmāvirbhāvo harerapi //
tvameva mithilāṃ gaccha vidhāya śiśuvigraham

tvāmimāṃ prāpya janako'pyayonisaṃbhavāṃ sutām //
pālayiṣyati yatnena sītā tvaṃ ca bhaviṣyasi

gatvā rāmo'pi mithilāṃ tvadvivāhaṃ kariṣyati //
nārāyaṇasya kāntā tvaṃ kalpe kalpe bhaviṣyasi

ityuktvā tāṃ samāliṅgya pārvatī svālayaṃ yayau//
gatvā sā mithilāṃ sādhvī śiśurūpaṃ vidhāya ca

lāṅgalasya ca rekhāyāṃ sukhāttasthau ca māyayā //
vilokya janakastāṃ ca nagnāṃ mudritalocanām

taptakāñcanavarṇāṃ ca rudantīṃ tejasā'nvitām //
dṛṣṭvā tāṃ ca gṛhītvā ca kṛtvā vakṣasi nārada

gacchantaṃ prati tatraiva vāgbabhūvāśarīriṇī //
ayonisaṃbhavāṃ kanyāṃ kamalāṃ grahaṇaṃ kuru

nārāyaṇaste jāmātā bhavitetyeva me vacaḥ //
śrutvā tadā devavāṇīṃ gṛhītvā kanyakāmṛṣiḥ

gatvā dadau svakāntāyai pālanāya mudā'nvitaḥ //
sā labdhayauvanā prāpa rāmaṃ dāśarathiṃ satī

vratasyāsya prabhāveṇa kāntaṃ trijagatāṃ patim //
prakāśitaṃ vaśiṣṭhena pṛthivyāṃ bhaktibhāvataḥ

rādhā kṛtvā vratamidaṃ śrīkṛṣṇaṃ prāṇavallabham //
gopāṅganāśca taṃ prāpurvratasyāsya prabhāvataḥ

ityevaṃ kathitā vipra kathā gaurīvratasya ca //
bhārate ca vratamidaṃ yā karoti kumārikā //
svāminaṃ kṛṣṇatulyaṃ ca sā prāpnoti na saṃśayaḥ

śrīnārāyaṇa uvāca //
evaṃ vrataṃ ca cakrustā yāvanmāsaṃ ca gopikāḥ //
pūrvastotreṇa tāṃ devīṃ tuṣṭuvuśca dinedine

samāptidivase gopyo vrataṃ kṛtvā mudā'nvitāḥ //
kaṇvaśākhoktastotreṇa tuṣṭuvuḥ parameśvarīm

yena stotreṇa tāṃ stutvā sītā satyaparāyaṇā //
sadyaḥ saṃprāpa kāntaṃ ca rāmaṃ rājīvalocanam

jānakyuvāca //
śaktisvarūpe sarveṣāṃ sarvādhāre guṇāśraye //
sadā śaṃkarayukte ca patiṃ dehi namo'stu te

sṛṣṭisthityaṃtarūpeṇa sṛṣṭisthityantarūpiṇī //
sṛṣṭisthityantabījānāṃ bījarūpe namo'stu te

he gauri patimarmajñe pativrataparāyaṇe //
pativrate patirate patiṃ dehi namostu te

sarvamaṃgalamāṅgalye sarvamaṃgalasaṃyute //
sarvamaṃgalabīje ca namaste sarvamaṃgale

sarvapriye sarvabīje sarvāśubhavināśini //
sarveśe sarvajanake namaste śaṃkarapriye

paramātmasvarūpe ca nityarūpe sanātani //
sākāre ca nirākāre sarvarūpe namo'stu te

kṣuttṛṣṇecchā dayā śraddhā nidrā tandrā smṛtiḥ kṣamā //
etāstava kalāḥ sarvā nārāyaṇi namo'stu te

lajjā medhā tuṣṭipuṣṭī śāntisaṃpattivṛddhayaḥ //
etāstava kalāḥ sarvāḥ sarvarūpe namo'stu te

dṛṣṭādṛṣṭasvarūpe ca tayorbījaphalaprade //
sarvānirvacanīye ca mahāmāye namo'stu te

śive śaṃkarasaubhāgyayukte saubhāgyadāyini //
hariṃ kāntaṃ ca saubhāgyaṃ dehi devi namo'stu te

stotreṇānena yāḥ stutvā samāptidivase śivām //
namanti parayā bhaktyā tā labhante hariṃ patim

iha kāntasukhaṃ bhuktvā patiṃ prāpya parātparam//
divyaṃ syandanamāruhya yātyante kṛṣṇasannidhim

iti śrībrahmavaivarte sītākṛtaṃ pārvatīstotram //
samāptidivase rādhā gopībhiḥ saha saṃyutā //
devīṃ praṇamya stutvā ca vrataṃ pūrṇaṃ cakāra ha

gosahasraṃ brāhmaṇebhyaḥ suvarṇaśatakaṃ mudā //
viprāya dakṣiṇāṃ dattvā svagṛhaṃ gantumudyatā

brāhmaṇānāṃ sahasraṃ ca bhojayāmāsa sādaram //
vādyāni vādayāmāsa bhikṣukāya dhanaṃ dadau

etasminnantare tatra durgā durgārtināśinī //
āvirbabhūva gaganājjvalantī brahmatejasā

īṣaddhāsyaprasanāsyā yoginīśatasaṃyutā //
siṃhasthā ca daśabhujā ratnālaṃkārabhūṣitā

śātakumbhamayāddivyādratnasāraparicchadāt //
avaruhya rathāttūrṇamāliṅgyorasi rādhikām

dṛṣṭvā gopāṅganā devīṃ praṇemuśca mudā'nvitāḥ //
āśiṣaṃ yuyuje durgā vāñchāsiddhirbhaviṣyati

gopikābhyo varaṃ dattvā tāḥ saṃbhāṣya ca sādaram //
uvāca rādhikāṃ durgā smerānanasaroruhā

pārvatyuvāca //
rādhe sarveśvaraprāṇādadhike jagadambike //
vrataṃ te lokaśikṣārthaṃ māyāmānuṣarūpiṇi

golokanāthaṃ golokaṃ śrīśailaṃ girijātaṭam //
śrīrāsamaṇḍalaṃ divyaṃ vṛndāvanamanoharam

caritaṃ raticorasya strīṇāṃ mānasahārakam //
viduṣaḥ kāmaśāstrāṇāṃ kiṃsvitsmarasi sundari

śrīkṛṣṇārdhāṅgasaṃbhūtā kṛṣṇatulyā ca tejasā //
tavāṃśakalayā devyaḥ kathaṃ tvaṃ mānuṣī satī

bhavatī ca hareḥ prāṇā bhavatyāśca hariḥ svayam //
vede nāsti dvayorbhedaḥ kathaṃ tvaṃ mānuṣī satī

ṣaṣṭivarṣasahasrāṇi brahmā taptvā tapaḥ purā //
na te dadarśa pādābjaṃ kathaṃ tvaṃ mānuṣī satī

kṛṣṇājñayā ca tvaṃ devi gopīrūpaṃ vidhāya ca //
āgatā'si mahīṃ śānte kathaṃ tvaṃ mānuṣī satī

suyajño hi nṛpaśreṣṭho manuvaṃśasamudbhavaḥ //
tvatto jagāma golokaṃ kathaṃ tvaṃ mānuṣī satī

triḥsaptakṛtvo nirbhūpāṃ cakāra pṛthivīṃ bhṛguḥ //
tava mantreṇa kavacātkathaṃ tvaṃ mānuṣī satī

śaṃkarātprāpya tvanmantraṃ siddhaṃ kṛtvā ca puṣkare //
jaghāna kārtavīryaṃ ca kathaṃ tvaṃ mānuṣī satī

babhañja darpāddantaṃ ca gaṇeśasya mahātmanaḥ //
tvatto nāma bhayaṃ cakre kathaṃ tvaṃ mānuṣī satī

mayyuddhatāyāṃ kopena bhasmasātkartumīśvaraḥ //
rarakṣāgatya matprītyā kathaṃ tvaṃ mānuṣī satī

kalpe kalpe tava patiḥ kṛṣṇo janmani janmani //
vrataṃ lokahitārthāya jaganmātastvayā kṛtam // २०४ /
aho śrīdāmaśāpena bhārāvataraṇena ca //
bhūmau tavādhiṣṭhānaṃ ca kathaṃ tvaṃ mānuṣī satī

ayonisaṃbhavā tvaṃ ca janmamṛtyujarāpahā //
kalāvatīsutā puṇyā kathaṃ tvaṃ mānuṣī satī

triṣu māseṣvatīteṣu madhumāse manohare //
nirjane nirmale rātrau suyogye rāsamaṇḍale

sarvābhirgopikābhiśca sārdhaṃ vṛndāvane vane //
harṣeṇa hariṇā sārdhaṃ krīḍā te bhavitā sati

vidhātrā likhitā krīḍā kalpe kalpe mahītale //
tava śrīhariṇā sārdhaṃ kena rādhe nivāryate

yathā saubhāgyayuktā'haṃ harasya śrīharipriye //
tathā saubhāgyayuktā tvaṃ bhava kṛṣṇasya sundari

yathā kṣīreṣu dhāvalyaṃ yathā vahnau ca dāhikā //
bhuvi gandho jale śaityaṃ tathā kṛṣṇe sthitistava

devī vā mānuṣī vā'pi gāndharvī rākṣasī tathā //
tvattaḥ parā ca saubhāgyā na bhūtā na bhaviṣyati

parātparo guṇātīto brahmādīnāṃ ca vanditaḥ //
svayaṃ kṛṣṇastavādhīno madvareṇa bhaviṣyati

brahmānantaśivārādhyo bhavitā tvadvaśaḥ sati //
dhyānāsādhyo durārādhyaḥ sarveṣāmapi yoginām

tvaṃ ca bhāgyavatī rādhe strījātiṣu na te parā //
kṛṣṇena sārdhaṃ paścāttvaṃ golokaṃ ca gamiṣyasi

ityuktvā pārvatī sadyastatraivāntardadhe mune //
sārdhaṃ gopālikābhiśca rādhikā gantumudyatā

etasminnantare kṛṣṇo jagāma rādhikāpuraḥ//
rādhā dadarśa śrīkṛṣṇaṃ kiśoraṃ śyāmasundaram

pītavastraparīdhānaṃ nānālaṃkārabhūṣitam //
ājānumālatīmālāvanamālāvibhūṣitam

īṣaddhāsyaprasannāsyaṃ bhaktānugrahakātaram//
candanokṣitasarvāṅgaṃ śaratpaṅkajalocanam

śaratpārvaṇacandrāsyaṃ sadratnamukuṭojjvalam //
pakvadāḍimabījābhadaśanaṃ sumanoharam

vinodamuralīhastanyastalīlāsaroruham //
koṭikandarpalāvaṇyaṃ līlādhāmamanoharam

guṇātītaṃ stūyamānaṃ brahmānantaśivādibhiḥ//
brahmasvarūpaṃ brahmaṇyaṃ śrutibhiścānirūpitam

avyaktamakṣarāvyaktaṃ jyotīrūpaṃ sanātanam //
māṅgalyaṃ maṅgalādhāraṃ maṅgalaṃ maṅgalapradam

dṛṣṭvā tadadbhutaṃ rūpaṃ saṃbhramātpraṇanāma tam //
taṃ dṛṣṭvā mūrcchitā rādhā kāmabāṇaprapīḍitā

darśaṃdarśaṃ mukhāmbhojaṃ sasmitā vakralocanā //
mukhasyācchādanaṃ cakre vrīḍayā ca punaḥ punaḥ

dṛṣṭvā haristāmuvāca prasannavadanekṣaṇaḥ //
gopālikāsamūhānāṃ sarveṣāṃ purataḥ sthitaḥ

śrīkṛṣṇa uvāca // //
prāṇādhike rādhike tvaṃ varaṃ vṛṇu manīṣitam //
bho bho gopālikā sarvā varaṃ vṛṇuta vāñchitam

kṛṣṇasya vacanaṃ śrutvā varaṃ vavre ca rādhikā //
gopālikāḥ prahṛṣṭāśca sarvasaṃkalpapādapāt

rādhikovāca //
tvatpādābje manmanoliḥ satataṃ bhramatu prabho //
pātuṃ bhaktirasaṃ padme madhupaśca yathā madhu

madīya prāṇanāthastvaṃ bhava janmani janmani //
tvadīyacaraṇāmbhoje dehi bhaktiṃ sudurlabhām

tava smṛtau guṇe cittaṃ svapne jñāne divāniśam //
bhavennimagnaṃ satatametanmama manīṣitam

gopālikā ūcuḥ //
yathā rādhāṃ tathā naśca prāṇabandho divāniśam //
bhaviṣyasi prāṇanāthaḥ pāsyasi pratijanmani

āsāṃ ca vacanaṃ śrutvā tathā'stvevamuvāca ha //
prasannavadanaḥ śrīmānyaśodānandavardhanaḥ

krīḍāpadmaṃ rādhikāyai sahasradalasaṃyutam //
lalitāṃ mālatīmālāṃ dadau prītyā jagatpatiḥ

mālāsamūhaṃ puṣpāṇi gopībhyo gopikāpatiḥ //
prahasya paramaprītyā pradadāvityuvāca ha

śrīkṛṣṇa uvāca //
triṣu māseṣvatīteṣu yūyaṃ krīḍāṃ mayā saha //
rāsamaṇḍalaramye ca vṛndāraṇye kariṣyatha

yathā'haṃ ca tathā yūyaṃ nāhaṃ bhedaḥ śrutau śrutaḥ //
prāṇo'haṃ caiva yuṣmākaṃ yūyaṃ prāṇā mama prabhoḥ

vrataṃ vo lokarakṣārthaṃ na hi svārthamidaṃ priyāḥ //
sahāgatāśca golokādgamanaṃ ca mayā saha

gacchata svālayaṃ śīghraṃ vo'haṃ janmani janmani //
prāṇebhyo'pi garīyasyo yūyaṃ me nātra saṃśayaḥ

ityuktvā śrīharistatra tasthau sūryasutātaṭe //
tasthurgopālikāḥ sarvā vīkṣya kṛṣṇaṃ punaḥpunaḥ

sarvāḥ prahṛṣṭavadanāḥ sasmitā vakralocanāḥ //
prītyā cakṣuścakorābhyāṃ mukhacandraṃ papurhareḥ

tāḥ śīghraṃ prayayurgehaṃ jayaṃ dattvā punaḥpunaḥ //
hariśca śiśubhiḥ sārddhaṃ prasannaḥ svālayaṃ yayau

ityevaṃ kathitaṃ sarvaṃ hareścaritamaṅgalam //
gopīnāṃ vastraharaṇaṃ sarvalokasukhāvaham

iti śrībrahmavaivarte mahāpurāṇe śrīkṛṣṇajanmakhaṇḍe nārāyaṇanāradasaṃvāde gopikāvastraharaṇaprastāvo nāma saptaviṃśo'dhyāyaḥ