બ્રહ્મવૈવર્ત પુરાણ · અધ્યાય 4.27

શ્રીનારાયણ ઉવાચ ॥
શૃણુ નારદ વક્ષ્યામિ શ્રીકૃષ્ણચરિતં પુનઃ ॥
ગોપીનાં વસ્ત્રહરણં વરદાનં મનીષિતમ્

હેમન્તે પ્રથમે માસિ ગોપિકાઃ કામમોહિતાઃ ॥
કૃત્વા હવિષ્યં ભક્ત્યા ચ યાવન્માસં સુસંયુતાઃ

સ્નાત્વા સૂર્યસુતાતીરે પાર્વતીં વાલુકામયીમ્ ॥
કૃત્વાઽવાહ્ય ચ મન્ત્રેણ પૂજાં કુર્વન્તિ નિત્યશઃ

ચન્દનાગુરુકસ્તૂરીકુઙ્કુમૈશ્ચ મનોહરૈઃ ॥
નાનાપ્રકારપુષ્પૈશ્ચ માલ્યૈર્બહુવિધૈરપિ

ધૂપૈર્દીપૈશ્ચ નૈવેદ્યૈર્વસ્ત્રૈર્નાનાફલૈર્મુને ॥
મણિમુક્તાપ્રવાલૈશ્ચ વાદ્યૈર્નાનાવિધૈરપિ

હે દેવિ જગતાં માતઃ સૃષ્ટિસ્થિત્યન્તકારિણિ ॥
નન્દગોપસુતં કાન્તમસ્મભ્યં દેહિ સુવ્રતે

મન્ત્રેણાનેન દેવેશીં પરિહારં વિધાય ચ ॥
તતઃ કૃત્વા તુ સંકલ્પં પૂજયન્ મૂલમન્ત્રતઃ

મન્ત્રસ્તુ સામવેદોક્તોઽયાતયામઃ સબીજકઃ ॥
ૐ શ્રીદુર્ગાયૈ સર્વવિઘ્નવિનાશિન્યૈ નમ ઇતિ

પુષ્પં માલ્યં ચ નૈવેદ્યં ધૂપં દીપં તથા શુભમ્ ॥
મન્ત્રેણાનેન તદ્ભક્ત્યા દદુઃ સર્વા મુદાન્વિતાઃ

પ્રવાલમાલયા ભક્ત્યા ચેમં મન્ત્રં સહસ્રધા ॥
જપં કૃત્વા ચ સ્તુત્વા ચ પ્રણેમુઃ શિરસા ભુવિ

સર્વમઙ્ગલમાઙ્ગલ્યે સર્વકામપ્રદે શિવે ॥
દેહિ મે વાઞ્છિતં દેવિ નમસ્તે શંકરપ્રિયે

ઇત્યુક્ત્વા ચ નમસ્કારં કૃત્વા દત્ત્વા ચ દક્ષિણામ્॥
નૈવેદ્યાનિ ચ સર્વાણિ બ્રાહ્મણેભ્યો યયુર્ગૃહમ્

શ્રીનારાયણ ઉવાચ ॥
સ્તવરાજં શૃણુ મુને તુષ્ટુવુર્યેન પાર્વતીમ્ ॥
ભક્ત્યા ગોપાઙ્ગનાઃ સર્વાઃ સર્વાભીષ્ટફલપ્રદામ્

જગત્યેકાર્ણવે ઘોરે રુદ્રસૂર્યવિવર્જિતે ॥
અઞ્જનાકારતોયેન સંપ્લુતે ચ ચરાચરે

દત્તં પુરા બ્રહ્મણે ચ હરિણા જલશાયિના ॥
તસ્મૈ દત્ત્વા સર્વમિદં નિદ્રાં ભેજે જગત્પતિઃ

નાભિપદ્મે જગત્સ્રષ્ટા મધુના કૈટભેન ચ ॥
પીડિતઃ પરિતુષ્ટાવ મૂલપ્રકૃતિમીશ્વરીમ્

બ્રહ્મોવાચ ॥
દુર્ગે શિવેઽભયે માયે નારાયણિ સનાતનિ ॥
જયે મે મઙ્ગલં દેહિ નમસ્તે સર્વમઙ્ગલે

દૈત્યનાશાર્થવચનો દકારઃ પરિકીર્તિતઃ ॥
ઉકારો વિઘ્નનાશાર્થં વાચકો વેદસંમતઃ

રેફો રોગઘ્નવચનો ગશ્ચ પાપઘ્નવાચકઃ ॥
ભયશત્રુઘ્નવચનશ્ચાકારઃ પરિકીર્તિતઃ

સ્મૃત્યુક્તિ સ્મરણાદ્યસ્યા એતે નશ્યન્તિ નિશ્ચિતમ્ ॥
અતો દુર્ગા હરેઃ શક્તિર્હરિણા પરિકીર્તિતા

વિપત્તિવાચકો દુર્ગશ્ચાકારો નાશવાચકઃ ॥
દુર્ગં નશ્યતિ યા નિત્યં સા દુર્ગા પરિકીર્તિતા।

દુર્ગો દૈત્યેન્દ્રવચનોઽપ્યાકારો નાશવાચકઃ ॥
તં નનાશ પુરા તેન બુધૈર્દુર્ગા પ્રકીર્તિતા

શશ્ચ કલ્યાણવચન ઇકારોત્કૃષ્ટવાચકઃ ॥
સમૂહવાચકશ્ચૈવ વાકારો દાતૃવાચકઃ

શ્રેયઃસઙ્ઘોત્કૃષ્ટદાત્રી શિવા તેન પ્રકીર્તિતા ॥
શિવરાશિર્મૂર્ત્તિમતી શિવા તેન પ્રકીર્તિતા

શિવો હિ મોક્ષવચનશ્ચાકારો દાતૃવાચકઃ ॥
સ્વયં નિર્વાણદાત્રી યા સા શિવા પરિકીર્તિતા

અભયો ભયનાશોક્તશ્ચાકારો દાતૃવાચકઃ ॥
પ્રદદાત્યભયં સદ્યઃ સાઽભયા પરિકીર્તિતા

રાજ્યશ્રીવચનો માશ્ચ યાશ્ચ પ્રાપણવાચકઃ ॥
તાં પ્રાપયતિ યા સદ્યઃ સા માયા પરિકીર્તિતા

માશ્ચ મોક્ષાર્થવચનો યાશ્ચ પ્રાપણવાચકઃ ॥
તં પ્રાપયતિ યા નિત્યં સા માયા પરિકીર્તિતા

નારાયણાર્ધાઙ્ગભૂતા તેન તુલ્યા ચ તેજસા॥
સદા તસ્ય શરીરસ્થા તેન નારાયણી સ્મૃતા

નિર્ગુણસ્ય ચ નિત્યસ્ય વાચકશ્ચ સનાતનઃ ॥
સદા નિત્યા નિર્ગુણા યા કીર્તિતા સા સનાતની

જયઃ કલ્યાણવચનો યાકારો દાતૃવાચકઃ ॥
જયં દદાતિ યા નિત્યં સા જયા પરિકીર્તિતા

સર્વ મઙ્ગલશબ્દશ્ચ સંપૂણૈશ્વર્યવાચકઃ ॥
આકારો દાતૃવચનસ્તદ્દાત્રી સર્વમઙ્ગલા

નામાષ્ટકમિદં સારં નામાર્થસહસંયુતમ્ ॥
નારાયણેન યદ્દત્તં બ્રહ્મણે નાભિપઙ્કજે

તસ્મૈ દત્ત્વા નિદ્રિતશ્ચ બભૂવ જગતાં પતિઃ ॥
મધુકૈટભૌ દુર્ગાં તૌ બ્રહ્માણં હન્તુમુદ્યતૌ

સ્તોત્રેણાનેન સ બ્રહ્મા સ્તુતિં નત્વા ચકાર હ ॥
સાક્ષાત્સ્તુતા તદા દુર્ગા બ્રહ્મણે કવચં દદૌ

શ્રીકૃષ્ણકવચં દિવ્યં સર્વરક્ષણનામકમ્ ॥
દત્ત્વા તસ્મૈ મહામાયા સાઽન્તર્ધાનં ચકાર હ

સ્તોત્રં કુર્વન્તિ નિદ્રાં ચ સંરક્ષ્ય કવચેન વૈ ॥
નિદ્રાનુગ્રહતઃ સદ્યઃ સ્તોત્રસ્યૈવ પ્રભાવતઃ

તત્રાજગામ ભગવાન્વૃષરૂપી જનાર્દનઃ ॥
શક્ત્યા ચ દુર્ગયા સાર્ધં શંકરસ્ય જયાય ચ

સરથં શંકરં મૂર્ધ્નિ કૃત્વા ચ નિર્ભયં દદૌ॥
અત્યૂર્ધ્વં પ્રાપયામાસ જયા તસ્મૈ જયં દદૌ

સ્તોત્રસ્યૈવ પ્રભાવેણ સંપ્રાપ્ય કવચં વિધિઃ ॥
વરં ચ કવચં પ્રાપ્ય નિર્ભયં પ્રાપ નિશ્ચિતમ્

બ્રહ્મા દદૌ મહેશાય સ્તોત્રં ચ કવચં વરમ્॥
ત્રિપુરસ્ય ચ સંગ્રામે સરથે પતિતે હરૌ

બ્રહ્માસ્ત્રં ચ ગૃહીત્વા સ સનિદ્રં શ્રીહરિં સ્મરન્ ॥
સ્તોત્રં ચ કવચં પ્રાપ્ય જઘાન ત્રિપુરં હરઃ

સ્તોત્રેણાનેન તાં દુર્ગાં કૃત્વા ગોપાલિકા સ્તુતિમ્॥
લેભિરે શ્રીહરિં કાન્તં સ્તોત્રસ્યાસ્ય પ્રભાવતઃ

ગોપકન્યા કૃતં સ્તોત્રં સર્વમઙ્ગલનામકમ્ ॥
વાંછિતાર્થપ્રદં સદ્યઃ સર્વવિઘ્નવિનાશનમ્

ત્રિસન્ધ્યં યઃ પઠેન્નિત્યં ભક્તિયુક્તશ્ચ માનવઃ॥
શૈવો વા વૈષ્ણવો વાઽપિ શાક્તો દુર્ગાત્પ્રમુચ્યતે

રાજદ્વારે શ્મશાને ચ દાવાગ્નૌ પ્રાણસંકટે ॥
હિંસ્રજન્તુભયગ્રસ્તો મગ્નઃ પોતે મહાર્ણવે

શત્રુગ્રસ્તે ચ સંગ્રામે કારાગારે વિપદ્ગતે ॥
ગુરુશાપે બ્રહ્મશાપે બન્ધુભેદે ચ દુસ્તરે

સ્થાનભ્રષ્ટે ધનભ્રષ્ટે જાતિભ્રષ્ટે શુચાઽન્વિતે ॥
પતિભેદે પુત્રભેદે ખલસર્પવિષાન્વિતે

સ્તોત્રસ્મરણમાત્રેણ સદ્યો મુચ્યેત નિર્ભયઃ ॥
વાંછિતં લભતે સદ્યઃ સર્વૈશ્વર્યમનુત્તમમ્

ઇહ લોકે હરેર્ભક્તિં દૃઢાં ચ સતતં સ્મૃતિમ્ ॥
અન્તે દાસ્યં ચ લભતે પાર્વત્યાશ્ચ પ્રસાદતઃ

ઇતિ શ્રીબ્રહ્મવૈવર્તે ગોપકન્યાકૃતં સર્વમંગલાસ્તોત્રમ્ ॥
અનેન સ્તવરાજેન તુષ્ટુવુર્નિત્યમીશ્વરીમ્ ॥
પ્રણેમુઃ પરયા ભક્ત્યા યાવન્માસં વ્રજાઙ્ગનાઃ

એવં પૂર્ણે ચ માસે ચ સમાપ્તિદિવસે તથા ॥
સ્નાતું પ્રજગ્મુર્ગોપ્યશ્ચ વસ્ત્રાણ્યાધાય તત્તટે

નાનાવિધાનિ દ્રવ્યાણિ રત્નમૂલ્યાનિ નારદ ॥
પીતલોહિતશુક્લાનિ ચારૂણિ મિશ્રિતાનિ ચ

તીરાવૃતાન્યસંખ્યાનિ તૈશ્ચ તીરં સુશોભનમ્ ॥
ચન્દનાગુરુકસ્તૂરી વાયુના સુરભીકૃતમ્

નૈવેદ્યૈશ્ચ બહુવિધૈઃ કાલદેશોદ્ભવૈઃ ફલૈઃ ॥
ધૂપૈઃ પ્રદીપૈઃ સિન્દૂરૈઃ કુઙ્કુમૈશ્ચ વિરાજિતમ્

જલે ક્રીડોન્મુખા ગોપ્યો બભૂવુઃ કૌતુકેન ચ ॥
નગ્નાઃ ક્રીડાભિરાસક્તાઃ શ્રીકૃષ્ણાર્પિતમાનસાઃ

દૃષ્ટ્વા કૃષ્ણશ્ચ વસ્ત્રાણિ દ્રવ્યાણિ વિવિધાનિ ચ ॥
વાસાંસ્યાદાય વસ્તૂનિ ચખાદ શિશુભિઃ સહ

ગત્વા દૂરં ચ ગોપાલાસ્તસ્થુઃ સર્વે મુદાઽન્વિતાઃ॥
વસ્ત્રાણિ પુંજીકૃત્યાદાવૂચુઃ સ્કન્ધેઽતિલોલુપાઃ

શ્રીદામા ચ સુદામા ચ વસુદામા તથૈવ ચ ॥
સુબલશ્ચ સુપાર્શ્વશ્ચ શુભાઙ્ગઃ સુન્દરસ્તથા

ચન્દ્રભાનો વીરભાનઃ સૂર્યભાનસ્તથૈવ ચ ॥
વસુભાનો રત્નભાનો ગોપાલા દ્વાદશ સ્મૃતાઃ

શ્રીકૃષ્ણો બલદેવશ્ચ પ્રધાનાશ્ચ ચતુર્દશ ॥
ગોપા હરેર્વયસ્યાશ્ચ કોટિશઃ કોટિશો મુને

વસ્ત્રાણ્યાદાય તે સર્વે તસ્થુરેકત્ર દૂરતઃ ॥
શતશઃ પુઞ્જિકાસ્તત્ર સ્થાપયામાસુરુન્મુખાઃ

કિંચિદ્વસ્ત્રં સમાદાય કૃત્વા ચ પુઞ્જિકાં મુદા ॥
સમારુહ્ય કદમ્બાગ્રમુવાચ ગોપિકા હરિઃ

શ્રીકૃષ્ણ ઉવાચ ॥
ભોભો ગોપાલિકાઃ સર્વા વિનષ્ટા વ્રતકર્મણિ ॥
કૃત્વા વિધાનં મદ્વાક્યં શ્રુત્વા ક્રીડત મન્મથાત્

સંકલ્પિતે વ્રતાર્હે ચ માસે મઙ્ગલકર્મણિ ॥
યૂયં નગ્નાઃ કથં તોયે વ્રતાઙ્ગહાનિકારિકાઃ

પરિધેયાનિ વાસાંસિ પુષ્પમાલ્યાનિ યાનિ ચ ॥
વ્રતાર્હાણિ ચ વસ્તૂનિ કેન નીતાનિ વોઽધુના

વ્રતે તુ નગ્ના યા સ્નાતિ તાં રુષ્ટો વરુણઃ સ્વયમ્॥
વરુણાનુચરાશ્ચક્રુર્વાસોવસ્તૂપનિર્હૃતિમ્

કથં યાસ્યથ નગ્નાશ્ચ ન વ્રતસ્યા ભવિષ્યતિ॥
વ્રતારાધ્યા કથં સા ચ વસ્તૂનિ કિં ન રક્ષતિ

ચિન્તાં કુરુત તાં પૂજ્યાં તુષ્ટાવ બલિરીશ્વરીમ્ ॥
યુષ્માકમીદૃશી દેવી ન શક્તા વસ્તુરક્ષણે

કથં વ્રતફલં સા વા દાતું શક્તા સુરેશ્વરી ॥
ફલં પ્રદાતું યા શક્તા સા શક્તા સર્વકર્મણિ

શ્રીકૃષ્ણસ્ય વચઃ શ્રુત્વા ચિન્તામાપુર્વ્રજસ્ત્રિયઃ ॥
દદૃશુર્યમુનાતીરં વસ્ત્રવસ્તુવિહીનકમ્

ચક્રુર્વિષાદં તોયે ચ નગ્નાસ્તા રુરુદુર્ભૃશમ્ ॥
ક્વ ગતાનિ ચ વસ્ત્રાણિ વસ્તૂનીત્યૂચુરત્ર નઃ

કૃત્વા વિષાદં તત્રૈવ તમૂચુર્ગોપકન્યકાઃ ॥
પુટાઞ્જલિયુતાઃ સર્વા ભક્ત્યા વિનયપૂર્વકમ્

ગોપાલિકા ઊચુઃ ॥
પરિધેયાનિ વસ્ત્રાણિ કિંકરીણાં સદીશ્વર ॥
નિબોધયાત્માનમેવ સ્પર્શં કર્તું ત્વમર્હસિ

વ્રતાર્હાણિ ચ વસ્તૂનિ દેવસ્વાનિ ચ સામ્પ્રતમ્ ॥
અદત્તાનિ મોચિતાનિ ગ્રહીતું વેદવિદ્વદ

દેહિ ધૌતાનિ ધૃત્વા ચ કરિષ્યામો વ્રતં વયમ્॥
વસ્તુનાઽન્યેન ગોવિન્દ વસ્તૂનાં ભક્ષણં કુરુ

એતસ્મિન્નન્તરે તત્ર શ્રીદામા વસ્ત્રપુઞ્જિકામ્ ॥
દર્શયિત્વા ચ તાઃ સર્વા દૂરં દુદ્રાવ તત્પુરઃ

દૃષ્ટ્વા સવસ્ત્રં ગોપાલં સર્વાસામીશ્વરી પરા ॥
સર્વા વયસ્યાશ્ચાવવાચ કોપયુક્તા જલપ્લુતા

શ્રીરાધિકોવાચ ॥
હે સુશીલે શશિકલે હે ચન્દ્રમુખિ માધવિ ॥
કદમ્બમાલે હે કુન્તિ યમુને સર્વમઙ્ગલે

હે પદ્મમુખિ સાવિત્રિ પારિજાતે ચ જાહ્નવિ॥
સુધામુખિ શુભે પદ્મે હે ગૌરિ હે સ્વયંપ્રભે

કાલિકે કમલે દુર્ગે હે સરસ્વતિ ભારતિ ॥
અપૂર્ણે રતિ હે ગંગે ચામ્બિકે સતિ સુન્દરિ

કૃષ્ણપ્રિયે મધુમતિ ચમ્પે ચન્દનનન્દિનિ ॥
યૂયં સર્વાઃ સમુત્થાય બદ્ધ્વાઽઽનયત બલ્લવમ્

સર્વા રાધાજ્ઞયા તૂર્ણં સમુત્થાય જલાત્ક્રુધા ॥
પ્રજગ્મુર્ગોપિકા નગ્ના યોનિમાચ્છાદ્ય પાણિના

એતાસાં સહચારિણ્યો ગોપ્યસ્તૂર્ણં સહસ્રશઃ ॥
પ્રજગ્મુસ્તેન રૂપેણ કોપાદારક્તલોચનાઃ

વેગેન દુદ્રુવુઃ સર્વાઃ શ્રીદામાનં ચ બાલિકાઃ ॥
વેગેન ચ પ્રધાવન્તં બિભ્રતં વસ્ત્રપુંજિકામ્

જગામ શીઘ્રં શ્રીદામા યત્ર ગોપાઃ સહાંશુકાઃ ॥
જવેન દુદ્રુવુર્ગોપ્યસ્તત્પશ્ચાદ્બલસંયુતાઃ

વસ્ત્રચોરાંશ્ચ ગોપાંશ્ચ વેષ્ટયામાસુરાશુ તાઃ ॥
ભિયા પ્રદુદ્રુવુર્બાલા યત્ર કૃષ્ણઃ સહાંશુકઃ

શ્રીકૃષ્ણસહિતાન્બાલાન્વરયામાસુરાશુ ચ ॥
ગોપિકાનાં ભિયા ગોપા દદુર્વસ્ત્રાણિ માધવમ્

માધવઃ સ્થાપયામાસ સ્કન્ધે સ્કન્ધે તરોસ્તથા॥
કદમ્બવૃક્ષઃ શુશુભે વસ્ત્રૈર્નાનાવિધૈરપિ

વસ્ત્રાણાં પુંજિકાઃ સર્વાઃ સ્કન્ધેષુ વિનિધાય ચ ॥
ઉવાચ ગોપિકાઃ કૃષ્ણઃ પરિહાસપરં વચઃ

શ્રીકૃષ્ણ ઉવાચ ॥
ભો ભો ગોપાલિકા નગ્ના ઇદાનીં કિં કરિષ્યથ ॥
વસ્ત્રયાઞ્ચાં પ્રકર્તું ચ કુરુતાશુ પુટાઞ્જલિમ્

ગત્વા વદત યુષ્માકમીશ્વરીમથ રાધિકામ્ ॥
કરોતુ શીઘ્રં વસ્ત્રાણાં યાઞ્ચાં કૃત્વા પુટાઞ્જલિમ્

અન્યથાઽહં ન દાસ્યામિ યુષ્મભ્યમંશુકાનિ ચ ॥
યુષ્માકમીશ્વરી રાધા કિં કરિષ્યતિ મેઽધુના

વ્રતારાધ્યા ચ યા દેવી સા વા મે કિં કરિષ્યતિ॥
ઇત્યેવં કથિતં સર્વં બ્રૂત યૂયં ચ રાધિકામ્

શ્રીકૃષ્ણવચનં શ્રુત્વા તાઃ સર્વા ગોપકન્યકાઃ ॥
વીક્ષ્ય લોચનકોણેન પ્રજગ્મૂ રાધિકાન્તિકમ્

ચક્રુર્નિવેદનં ગત્વા યદુવાચ હરિઃ સ્વયમ્ ॥
શ્રુત્વા જહાસ સા રાધા બભૂવ કામપીડિતા

શ્રુત્વા તાસાં ચ વચનં પુલકાઞ્ચિતવિગ્રહા ॥
ન જગામ હરેઃ સ્થાનં વ્રીડયા સસ્મિતા સતી

જલે યોગાસનં કૃત્વા દધ્યૌ કૃષ્ણપદામ્બુજમ્ ॥
બ્રહ્મેશાનન્તધર્માણાં વન્દ્યમીપ્સિતદં પરમ્

સ્મારંસ્મારં પદામ્ભોજં સાઽશ્રુસંપૂર્ણલોચના ॥
ભાવાતિરેકાત્પ્રાણેશં તુષ્ટાવ નિર્ગુણં પરમ્

॥ રાધિકોવાચ ॥ ॥
ગોલોકનાથ ગોપીશ મદીશ પ્રાણવલ્લભ ॥
હે દીનબન્ધો દીનેશ સર્વેશ્વર નમોઽસ્તુ તે

ગોપેશ ગોસમૂહેશ યશોદાનન્દવર્ધન ॥
નન્દાત્મજ સદાનન્દ નિત્યાનન્દ નમોઽસ્તુ તે

શતમન્યોર્મન્યુભગ્ન બ્રહ્મદર્પવિનાશક॥
કાલીયદમન પ્રાણનાથ કૃષ્ણ નમોઽસ્તુ તે

શિવાનન્તેશ બ્રહ્મેશ બ્રાહ્મણેશ પરાત્પર ॥
બ્રહ્મસ્વરૂપ બ્રહ્મજ્ઞ બ્રહ્મબીજ નમોઽસ્તુ તે

ચરાચરતરોર્બીજ ગુણાતીત ગુણાત્મક ॥
ગુણબીજ ગુણાધાર ગુણેશ્વર નમોઽસ્તુ તે

અણિમાદિકસિદ્ધીશ સિદ્ધેઃ સિદ્ધિસ્વરૂપક ॥
તપસ્તપસ્વિંસ્તપસા બીજરૂપ નમોઽસ્તુ તે

યદનિર્વચનીયં ચ વસ્તુ નિર્વચનીયકમ્ ॥
તત્સ્વરૂપ તયોર્બીજં સર્વબીજ નમોઽસ્તુ તે

અહં સરસ્વતી લક્ષ્મીર્દુર્ગા ગઙ્ગા શ્રુતિપ્રસૂઃ ॥
યસ્ય પાદાર્ચનાન્નિત્યં પૂજ્યા તસ્મૈ નમોનમઃ ॥

સ્પર્શને યસ્ય ભૃત્યાનાં ધ્યાનેન ચ દિવાનિશમ્ ॥
પવિત્રાણિ ચ તીર્થાનિ તસ્મૈ ભગવતે નમઃ

ઇત્યેવમુક્ત્વા સા દેવી જલે સંન્યસ્ય વિગ્રહમ્ ॥
મનઃ પ્રાણાંશ્ચ શ્રીકૃષ્ણે તસ્થૌ સ્થાણુસમા સતી

રાધાકૃતં હરેઃ સ્તોત્રં ત્રિસન્ધ્યં યઃ પઠેન્નરઃ ॥
હરિભક્તિં ચ દાસ્યં ચ લભેદ્રાધાગતિં ધ્રુવમ્

વિપત્તૌ યઃ પઠેદ્ભક્ત્યા સદ્યઃ સંપત્તિમાપ્નુયાત્ ॥
ચિરકાલગતં દ્રવ્યં હૃતં નષ્ટં ચ લભ્યતે

વસ્તુવૃદ્ધિર્ભવેત્તસ્ય પ્રસન્નં માનસં પરમ્ ॥
ચિન્તાગ્રસ્તઃ પઠેદ્ભક્ત્યા પરાં નિર્વૃતિમાપ્નુયાત્

પતિભેદે પુત્રભેદે મિત્રભેદે ચ સંકટે ॥
માસં ભક્ત્યા યદિ પઠેત્સદ્યઃ સંદર્શનં લભેત્

ભક્ત્યા કુમારી સ્તોત્રં ચ શૃણુયાદ્વત્સરં યદિ ॥
શ્રીકૃષ્ણસદૃશં કાન્તં ગુણવન્તં લભેદ્ધ્રુવમ્

ઇતિ શ્રીબ્રહ્મવૈવર્તે શ્રીકૃષ્ણજન્મખણ્ડે રાધાકૃતં શ્રીકૃષ્ણ સ્તોત્રમ્ ॥
જલસ્થા રાધિકા ધ્યાત્વા શ્રીકૃષ્ણચરણામ્બુજમ્ ॥
સ્તુત્વૈવં ચક્ષુરુન્મીલ્ય દૃષ્ટ્વા કૃષ્ણમયં જગત્

દદર્શ યમુનાતીરં વસ્ત્રદ્રવ્યમયં મુને ॥
દૃષ્ટ્વા તન્દ્રાઽથવા સ્વપ્નમિતિ મેને ચ રાધિકા

યત્ર સ્થાને યદાધારે યદ્દ્રવ્યં સંસ્થિતં પુરા ॥
વસ્ત્રૈશ્ચ સહિતં સર્વં તત્પ્રાપુર્ગોપકન્યકાઃ

જલાદુત્થાય તાઃ સર્વા વ્રતં કૃત્વા મનીષિતમ્ ॥
સંપ્રાપ્ય ચ વરં દેવ્યસ્તા સર્વાઃ સ્વાલયં યયુઃ

નારદ ઉવાચ ॥
વ્રતસ્ય કિં વિધાનં ચ કિં નામ કિં ફલં પ્રભો ॥
કાનિ દ્રવ્યાણિ દેયાનિ કા દેયા તત્ર દક્ષિણા

વ્રતાન્તે કિં રહસ્યં ચ બભૂવ સુમનોહરમ્ ॥
વ્યાસં કૃત્વા મહાભાગ વદ નારાયણીં કથામ્ ॥

સૂત ઉવાચ ॥
નારદસ્ય વચઃ શ્રુત્વા પ્રહસ્ય મુનિપુંગવઃ ॥
કથાં કથિતુમારેભે કવીન્દ્રાણાં ગુરોર્ગુરુઃ

નારાયણ ઉવાચ ॥
સર્વં વ્રતવિધાનં ચ મત્તો વત્સ નિશામય ॥
ખ્યાતં ગૌરીવ્રતં નામ માર્ગે માસિ કૃતં સ્ત્રિયા ॥

પુંસાં ચ ધર્મકામાર્થમોક્ષદં કૃષ્ણભક્તિદમ્॥
દેશભેદે પ્રસિદ્ધં ચ વ્રતં પૌર્વાપરં સ્મૃતમ્

કામદં કામુકાનાં ચ ફલં કાન્તનિમિત્તકમ્ ॥
ઉપોષ્ય પૂર્વદિવસે વસ્ત્રં પ્રક્ષાલ્ય સંયતા

પ્રાતશ્ચ માર્ગસંક્રાન્ત્યાં ભક્ત્યા ગત્વા સરિત્તટમ્ ॥
ધૃત્વા ધૌતે ચ સ્નાત્વા ચ નાનાદ્રવ્યેણ કન્યકા

દેવષટ્કં ચ સંપૂજ્ય કૃત્વા ચાવાહનં ઘટે ॥
ગણેશં ચ દિનેશં ચ વહ્નિં નારાયણં શિવમ્

દુર્ગાં પંચોપચારૈશ્ચ સંપૂજ્ય વ્રતમારભેત્ ॥
ઘટાધઃ પિણ્ડિકાં કૃત્વા ચતુરસ્રાં સુવિસ્તૃતામ્ ॥
ચન્દનાગુરુકસ્તૂરીકુઙ્કુમૈશ્ચ સુસંસ્કૃતામ્

નિર્માય બાલુકાનાં ચ દુર્ગાં દશભુજાં પરામ્ ॥
ધૃત્વા કપાલે સિન્દૂરં તદધશ્ચન્દનેન્દુકમ્

તાં ધ્યાત્વાઽઽવાહયેદ્દેવીં તતો ભૂત્વા પુટાઞ્જલિઃ ॥
ઇમં મન્ત્રં પઠિત્વાઽઽદૌ તતઃ પૂજાં સમારભેત્

હે ગૌરિ શંકરાર્ધાઙ્ગિ યથા ત્વં શંકરપ્રિયા ॥
તથા માં કુરુ કલ્યાણિ કાન્તકાન્તાં સુદુર્લભામ્

ઇમં મન્ત્રં પઠિત્વા તુ ધ્યાયેદ્દેવીં જગત્પ્રસૂમ્ ॥
ધ્યાનં તત્સામવેદોક્તં નિગૂઢં સર્વકામદમ્

શૃણુ નારદ વક્ષ્યામિ મુનીન્દ્રાણાં ચ દુર્લભમ્ ॥
ધ્યાયન્ત્યનેન સિદ્ધાશ્ચ દુર્ગાં દુર્ગતિનાશિનીમ્

શિવાં શિવપ્રિયાં શૈવાં શિવવક્ષઃસ્થલસ્થિતામ્ ॥
ઈષદ્ધાસ્યપ્રસન્નાસ્યાં સુપ્રતિષ્ઠાં સુલોચનામ્

નવયૌવનસંપન્નાં રત્નાભરણભૂષિતામ્ ॥
રત્નકઙ્કણકેયૂરરત્નનૂપુરભૂષિતામ્।આ૧૩૪॥
રત્નકુણ્ડલયુગ્મેન ગણ્ડસ્થલવિરાજિતામ્॥
માલતી માલ્યસંસક્તકબરભ્રમરાન્વિતામ્

સિન્દૂરતિલકં ચારુકસ્તૂરીબિન્દુના સહ ॥
વહ્નિશુદ્ધાંશુકાં રત્નકિરીટાં સુમનોહરામ્ ॥

મણીન્દ્રસારસંસક્તરત્નમાલાસમુજ્જ્વલામ્ ॥
પારિજાતપ્રસૂનાનાં માલાજાલાનુલમ્બિતામ્

સુપીનકઠિનશ્રોણીં બિભ્રતીં ચ સ્તનાનતામ્ ॥
નવયૌવનભારૌઘાદીષન્નમ્રાં મનોહરામ્

બ્રહ્માદિભિઃ સ્તૂયમાનાં સૂર્યકોટિસમપ્રભામ્ ॥
પક્વબિમ્બાધરોષ્ઠીં ચ ચારુચમ્પકસન્નિભામ્

મુક્તાપઙ્ક્તિવિનિન્દ્યૈકદન્તરાજિવિરાજિતામ્ ॥
મુક્તિકામપ્રદાં દેવીં શરચ્ચન્દ્રમુખીં ભજે॥

ધ્યાત્વૈવં મસ્તકે પુષ્પં વિન્યસ્ય ચ વ્રતી મુદા ॥
પુષ્પં ગૃહીત્વા ભક્ત્યા ચ પુનર્ધ્યાત્વા ચ પૂજયેત્

દત્ત્વા ષોડશોપચારાન્પ્રહૃષ્ટં તત્ર નિત્યશઃ ॥
પૂર્વોક્તેનૈવ મન્ત્રેણ મુદા ભક્ત્યા વ્રતે વ્રતી

પૂર્વોક્તેનૈવ સ્તોત્રેણ સ્તુત્વા ચ પ્રણમેત્તદા ॥
કૃત્વા પ્રણામં ભક્ત્યા ચ સંયતઃ શૃણુયાત્કથામ્

નારદ ઉવાચ ॥
વ્રતં વ્રતવિધાનં ચ ફલં ચ સ્તોત્રમદ્ભુતમ્ ॥
અધુના શ્રોતુમિચ્છામિ ગૌરીવ્રતકથાં શુભામ્

વ્રતં કેન કૃતં પૂર્વં ભૂમૌ કેન પ્રકાશિતમ્ ॥
એતત્સર્વં સુવિસ્તાર્ય વદ સંદેહભઞ્જન ॥

શ્રીનારાયણ ઉવાચ ॥
કુશધ્વજસ્ય હિ સુતા નામ્ના વેદવતી સતી ॥
તયા કૃતં વ્રતમિદં મહાતીર્થે ચ પુષ્કરે

સમાપ્તિદિવસે સાક્ષાદ્બભૂવ જગદમ્બિકા ॥
યોગિનીલક્ષસંયુક્તા સૂર્યકોટિસમપ્રભા

શાતકુમ્ભવિનિર્માણરથસ્થા પરમેશ્વરી ॥
ઈષદ્ધાસ્યપ્રસન્નાસ્યા તામુવાચ સુસંયુતામ્

પાર્વત્યુવાચ ॥
હે વેદવતિ ભદ્રં તે વરં વૃણુ યથેપ્સિતમ્ ॥
તવ વ્રતેન તુષ્ટાઽહં તુભ્યં દાસ્યામિ વાઞ્છિતમ્

પાર્વતીવચનં શ્રુત્વા દૃષ્ટ્વા તાં હૃષ્ટમાનસામ્ ॥
પુટાઞ્જલિયુતા સાધ્વી પ્રણમ્યોવાચ નારદ

વેદવત્યુવાચ ॥
દેવિ નારાયણં કાન્તં મહ્યં દેહિ મનીષિતમ્ ॥
વરેઽન્યસ્મિન્સ્પૃહા નાસ્તિ દૃઢાં ભક્તિં ચ તત્પદે

શ્રુત્વા વેદવતીવાક્યં પ્રહસ્ય જગદમ્બિકા ॥
અવરુહ્ય રથાત્તૂર્ણં તામુવાચ હરિપ્રિયામ્

પાર્વત્યુવાચ ॥
જ્ઞાતં સર્વં જગન્માતસ્ત્વં ચ લક્ષ્મીઃ સ્વયં સતી ॥
ભારતં પાદરજસા પૂતં કર્તું સમાગતા ॥
ત્વત્પાદરજસા સાધ્વિ સદ્યઃ પૂતા વસુંધરા

નિખિલાનિ ચ તીર્થાનિ પૂતાનિ પરમેશ્વરી ॥
વ્રતં તે લોકશિક્ષાર્થં તપશ્ચર તપસ્વિનિ

નારાયણસ્ય કાન્તા ત્વં પ્રિયા જન્મનિ જન્મનિ ॥
ભારાવતરણે વિષ્ણુર્વસુધામાગમિષ્યતિ

રામો દાશરથિઃ પૂર્ણઃ કર્તું દસ્યુવિનિગ્રહમ્ ॥
બ્રહ્મશાપાચ્ચ ચ્યુતયોર્મોક્ષણાય ચ ભક્તયોઃ

અયોધ્યાયાં ચ ત્રેતાયામાવિર્ભાવો હરેરપિ ॥
ત્વમેવ મિથિલાં ગચ્છ વિધાય શિશુવિગ્રહમ્

ત્વામિમાં પ્રાપ્ય જનકોઽપ્યયોનિસંભવાં સુતામ્ ॥
પાલયિષ્યતિ યત્નેન સીતા ત્વં ચ ભવિષ્યસિ

ગત્વા રામોઽપિ મિથિલાં ત્વદ્વિવાહં કરિષ્યતિ ॥
નારાયણસ્ય કાન્તા ત્વં કલ્પે કલ્પે ભવિષ્યસિ

ઇત્યુક્ત્વા તાં સમાલિઙ્ગ્ય પાર્વતી સ્વાલયં યયૌ॥
ગત્વા સા મિથિલાં સાધ્વી શિશુરૂપં વિધાય ચ

લાઙ્ગલસ્ય ચ રેખાયાં સુખાત્તસ્થૌ ચ માયયા ॥
વિલોક્ય જનકસ્તાં ચ નગ્નાં મુદ્રિતલોચનામ્

તપ્તકાઞ્ચનવર્ણાં ચ રુદન્તીં તેજસાઽન્વિતામ્ ॥
દૃષ્ટ્વા તાં ચ ગૃહીત્વા ચ કૃત્વા વક્ષસિ નારદ

ગચ્છન્તં પ્રતિ તત્રૈવ વાગ્બભૂવાશરીરિણી ॥
અયોનિસંભવાં કન્યાં કમલાં ગ્રહણં કુરુ

નારાયણસ્તે જામાતા ભવિતેત્યેવ મે વચઃ ॥
શ્રુત્વા તદા દેવવાણીં ગૃહીત્વા કન્યકામૃષિઃ

ગત્વા દદૌ સ્વકાન્તાયૈ પાલનાય મુદાઽન્વિતઃ ॥
સા લબ્ધયૌવના પ્રાપ રામં દાશરથિં સતી

વ્રતસ્યાસ્ય પ્રભાવેણ કાન્તં ત્રિજગતાં પતિમ્ ॥
પ્રકાશિતં વશિષ્ઠેન પૃથિવ્યાં ભક્તિભાવતઃ

રાધા કૃત્વા વ્રતમિદં શ્રીકૃષ્ણં પ્રાણવલ્લભમ્ ॥
ગોપાઙ્ગનાશ્ચ તં પ્રાપુર્વ્રતસ્યાસ્ય પ્રભાવતઃ

ઇત્યેવં કથિતા વિપ્ર કથા ગૌરીવ્રતસ્ય ચ ॥
ભારતે ચ વ્રતમિદં યા કરોતિ કુમારિકા ॥
સ્વામિનં કૃષ્ણતુલ્યં ચ સા પ્રાપ્નોતિ ન સંશયઃ

શ્રીનારાયણ ઉવાચ ॥
એવં વ્રતં ચ ચક્રુસ્તા યાવન્માસં ચ ગોપિકાઃ ॥
પૂર્વસ્તોત્રેણ તાં દેવીં તુષ્ટુવુશ્ચ દિનેદિને

સમાપ્તિદિવસે ગોપ્યો વ્રતં કૃત્વા મુદાઽન્વિતાઃ ॥
કણ્વશાખોક્તસ્તોત્રેણ તુષ્ટુવુઃ પરમેશ્વરીમ્

યેન સ્તોત્રેણ તાં સ્તુત્વા સીતા સત્યપરાયણા ॥
સદ્યઃ સંપ્રાપ કાન્તં ચ રામં રાજીવલોચનમ્

જાનક્યુવાચ ॥
શક્તિસ્વરૂપે સર્વેષાં સર્વાધારે ગુણાશ્રયે ॥
સદા શંકરયુક્તે ચ પતિં દેહિ નમોઽસ્તુ તે

સૃષ્ટિસ્થિત્યંતરૂપેણ સૃષ્ટિસ્થિત્યન્તરૂપિણી ॥
સૃષ્ટિસ્થિત્યન્તબીજાનાં બીજરૂપે નમોઽસ્તુ તે

હે ગૌરિ પતિમર્મજ્ઞે પતિવ્રતપરાયણે ॥
પતિવ્રતે પતિરતે પતિં દેહિ નમોસ્તુ તે

સર્વમંગલમાઙ્ગલ્યે સર્વમંગલસંયુતે ॥
સર્વમંગલબીજે ચ નમસ્તે સર્વમંગલે

સર્વપ્રિયે સર્વબીજે સર્વાશુભવિનાશિનિ ॥
સર્વેશે સર્વજનકે નમસ્તે શંકરપ્રિયે

પરમાત્મસ્વરૂપે ચ નિત્યરૂપે સનાતનિ ॥
સાકારે ચ નિરાકારે સર્વરૂપે નમોઽસ્તુ તે

ક્ષુત્તૃષ્ણેચ્છા દયા શ્રદ્ધા નિદ્રા તન્દ્રા સ્મૃતિઃ ક્ષમા ॥
એતાસ્તવ કલાઃ સર્વા નારાયણિ નમોઽસ્તુ તે

લજ્જા મેધા તુષ્ટિપુષ્ટી શાન્તિસંપત્તિવૃદ્ધયઃ ॥
એતાસ્તવ કલાઃ સર્વાઃ સર્વરૂપે નમોઽસ્તુ તે

દૃષ્ટાદૃષ્ટસ્વરૂપે ચ તયોર્બીજફલપ્રદે ॥
સર્વાનિર્વચનીયે ચ મહામાયે નમોઽસ્તુ તે

શિવે શંકરસૌભાગ્યયુક્તે સૌભાગ્યદાયિનિ ॥
હરિં કાન્તં ચ સૌભાગ્યં દેહિ દેવિ નમોઽસ્તુ તે

સ્તોત્રેણાનેન યાઃ સ્તુત્વા સમાપ્તિદિવસે શિવામ્ ॥
નમન્તિ પરયા ભક્ત્યા તા લભન્તે હરિં પતિમ્

ઇહ કાન્તસુખં ભુક્ત્વા પતિં પ્રાપ્ય પરાત્પરમ્॥
દિવ્યં સ્યન્દનમારુહ્ય યાત્યન્તે કૃષ્ણસન્નિધિમ્

ઇતિ શ્રીબ્રહ્મવૈવર્તે સીતાકૃતં પાર્વતીસ્તોત્રમ્ ॥
સમાપ્તિદિવસે રાધા ગોપીભિઃ સહ સંયુતા ॥
દેવીં પ્રણમ્ય સ્તુત્વા ચ વ્રતં પૂર્ણં ચકાર હ

ગોસહસ્રં બ્રાહ્મણેભ્યઃ સુવર્ણશતકં મુદા ॥
વિપ્રાય દક્ષિણાં દત્ત્વા સ્વગૃહં ગન્તુમુદ્યતા

બ્રાહ્મણાનાં સહસ્રં ચ ભોજયામાસ સાદરમ્ ॥
વાદ્યાનિ વાદયામાસ ભિક્ષુકાય ધનં દદૌ

એતસ્મિન્નન્તરે તત્ર દુર્ગા દુર્ગાર્તિનાશિની ॥
આવિર્બભૂવ ગગનાજ્જ્વલન્તી બ્રહ્મતેજસા

ઈષદ્ધાસ્યપ્રસનાસ્યા યોગિનીશતસંયુતા ॥
સિંહસ્થા ચ દશભુજા રત્નાલંકારભૂષિતા

શાતકુમ્ભમયાદ્દિવ્યાદ્રત્નસારપરિચ્છદાત્ ॥
અવરુહ્ય રથાત્તૂર્ણમાલિઙ્ગ્યોરસિ રાધિકામ્

દૃષ્ટ્વા ગોપાઙ્ગના દેવીં પ્રણેમુશ્ચ મુદાઽન્વિતાઃ ॥
આશિષં યુયુજે દુર્ગા વાઞ્છાસિદ્ધિર્ભવિષ્યતિ

ગોપિકાભ્યો વરં દત્ત્વા તાઃ સંભાષ્ય ચ સાદરમ્ ॥
ઉવાચ રાધિકાં દુર્ગા સ્મેરાનનસરોરુહા

પાર્વત્યુવાચ ॥
રાધે સર્વેશ્વરપ્રાણાદધિકે જગદમ્બિકે ॥
વ્રતં તે લોકશિક્ષાર્થં માયામાનુષરૂપિણિ

ગોલોકનાથં ગોલોકં શ્રીશૈલં ગિરિજાતટમ્ ॥
શ્રીરાસમણ્ડલં દિવ્યં વૃન્દાવનમનોહરમ્

ચરિતં રતિચોરસ્ય સ્ત્રીણાં માનસહારકમ્ ॥
વિદુષઃ કામશાસ્ત્રાણાં કિંસ્વિત્સ્મરસિ સુન્દરિ

શ્રીકૃષ્ણાર્ધાઙ્ગસંભૂતા કૃષ્ણતુલ્યા ચ તેજસા ॥
તવાંશકલયા દેવ્યઃ કથં ત્વં માનુષી સતી

ભવતી ચ હરેઃ પ્રાણા ભવત્યાશ્ચ હરિઃ સ્વયમ્ ॥
વેદે નાસ્તિ દ્વયોર્ભેદઃ કથં ત્વં માનુષી સતી

ષષ્ટિવર્ષસહસ્રાણિ બ્રહ્મા તપ્ત્વા તપઃ પુરા ॥
ન તે દદર્શ પાદાબ્જં કથં ત્વં માનુષી સતી

કૃષ્ણાજ્ઞયા ચ ત્વં દેવિ ગોપીરૂપં વિધાય ચ ॥
આગતાઽસિ મહીં શાન્તે કથં ત્વં માનુષી સતી

સુયજ્ઞો હિ નૃપશ્રેષ્ઠો મનુવંશસમુદ્ભવઃ ॥
ત્વત્તો જગામ ગોલોકં કથં ત્વં માનુષી સતી

ત્રિઃસપ્તકૃત્વો નિર્ભૂપાં ચકાર પૃથિવીં ભૃગુઃ ॥
તવ મન્ત્રેણ કવચાત્કથં ત્વં માનુષી સતી

શંકરાત્પ્રાપ્ય ત્વન્મન્ત્રં સિદ્ધં કૃત્વા ચ પુષ્કરે ॥
જઘાન કાર્તવીર્યં ચ કથં ત્વં માનુષી સતી

બભઞ્જ દર્પાદ્દન્તં ચ ગણેશસ્ય મહાત્મનઃ ॥
ત્વત્તો નામ ભયં ચક્રે કથં ત્વં માનુષી સતી

મય્યુદ્ધતાયાં કોપેન ભસ્મસાત્કર્તુમીશ્વરઃ ॥
રરક્ષાગત્ય મત્પ્રીત્યા કથં ત્વં માનુષી સતી

કલ્પે કલ્પે તવ પતિઃ કૃષ્ણો જન્મનિ જન્મનિ ॥
વ્રતં લોકહિતાર્થાય જગન્માતસ્ત્વયા કૃતમ્ ॥ ૨૦૪ ।
અહો શ્રીદામશાપેન ભારાવતરણેન ચ ॥
ભૂમૌ તવાધિષ્ઠાનં ચ કથં ત્વં માનુષી સતી

અયોનિસંભવા ત્વં ચ જન્મમૃત્યુજરાપહા ॥
કલાવતીસુતા પુણ્યા કથં ત્વં માનુષી સતી

ત્રિષુ માસેષ્વતીતેષુ મધુમાસે મનોહરે ॥
નિર્જને નિર્મલે રાત્રૌ સુયોગ્યે રાસમણ્ડલે

સર્વાભિર્ગોપિકાભિશ્ચ સાર્ધં વૃન્દાવને વને ॥
હર્ષેણ હરિણા સાર્ધં ક્રીડા તે ભવિતા સતિ

વિધાત્રા લિખિતા ક્રીડા કલ્પે કલ્પે મહીતલે ॥
તવ શ્રીહરિણા સાર્ધં કેન રાધે નિવાર્યતે

યથા સૌભાગ્યયુક્તાઽહં હરસ્ય શ્રીહરિપ્રિયે ॥
તથા સૌભાગ્યયુક્તા ત્વં ભવ કૃષ્ણસ્ય સુન્દરિ

યથા ક્ષીરેષુ ધાવલ્યં યથા વહ્નૌ ચ દાહિકા ॥
ભુવિ ગન્ધો જલે શૈત્યં તથા કૃષ્ણે સ્થિતિસ્તવ

દેવી વા માનુષી વાઽપિ ગાન્ધર્વી રાક્ષસી તથા ॥
ત્વત્તઃ પરા ચ સૌભાગ્યા ન ભૂતા ન ભવિષ્યતિ

પરાત્પરો ગુણાતીતો બ્રહ્માદીનાં ચ વન્દિતઃ ॥
સ્વયં કૃષ્ણસ્તવાધીનો મદ્વરેણ ભવિષ્યતિ

બ્રહ્માનન્તશિવારાધ્યો ભવિતા ત્વદ્વશઃ સતિ ॥
ધ્યાનાસાધ્યો દુરારાધ્યઃ સર્વેષામપિ યોગિનામ્

ત્વં ચ ભાગ્યવતી રાધે સ્ત્રીજાતિષુ ન તે પરા ॥
કૃષ્ણેન સાર્ધં પશ્ચાત્ત્વં ગોલોકં ચ ગમિષ્યસિ

ઇત્યુક્ત્વા પાર્વતી સદ્યસ્તત્રૈવાન્તર્દધે મુને ॥
સાર્ધં ગોપાલિકાભિશ્ચ રાધિકા ગન્તુમુદ્યતા

એતસ્મિન્નન્તરે કૃષ્ણો જગામ રાધિકાપુરઃ॥
રાધા દદર્શ શ્રીકૃષ્ણં કિશોરં શ્યામસુન્દરમ્

પીતવસ્ત્રપરીધાનં નાનાલંકારભૂષિતમ્ ॥
આજાનુમાલતીમાલાવનમાલાવિભૂષિતમ્

ઈષદ્ધાસ્યપ્રસન્નાસ્યં ભક્તાનુગ્રહકાતરમ્॥
ચન્દનોક્ષિતસર્વાઙ્ગં શરત્પઙ્કજલોચનમ્

શરત્પાર્વણચન્દ્રાસ્યં સદ્રત્નમુકુટોજ્જ્વલમ્ ॥
પક્વદાડિમબીજાભદશનં સુમનોહરમ્

વિનોદમુરલીહસ્તન્યસ્તલીલાસરોરુહમ્ ॥
કોટિકન્દર્પલાવણ્યં લીલાધામમનોહરમ્

ગુણાતીતં સ્તૂયમાનં બ્રહ્માનન્તશિવાદિભિઃ॥
બ્રહ્મસ્વરૂપં બ્રહ્મણ્યં શ્રુતિભિશ્ચાનિરૂપિતમ્

અવ્યક્તમક્ષરાવ્યક્તં જ્યોતીરૂપં સનાતનમ્ ॥
માઙ્ગલ્યં મઙ્ગલાધારં મઙ્ગલં મઙ્ગલપ્રદમ્

દૃષ્ટ્વા તદદ્ભુતં રૂપં સંભ્રમાત્પ્રણનામ તમ્ ॥
તં દૃષ્ટ્વા મૂર્ચ્છિતા રાધા કામબાણપ્રપીડિતા

દર્શંદર્શં મુખામ્ભોજં સસ્મિતા વક્રલોચના ॥
મુખસ્યાચ્છાદનં ચક્રે વ્રીડયા ચ પુનઃ પુનઃ

દૃષ્ટ્વા હરિસ્તામુવાચ પ્રસન્નવદનેક્ષણઃ ॥
ગોપાલિકાસમૂહાનાં સર્વેષાં પુરતઃ સ્થિતઃ

શ્રીકૃષ્ણ ઉવાચ ॥ ॥
પ્રાણાધિકે રાધિકે ત્વં વરં વૃણુ મનીષિતમ્ ॥
ભો ભો ગોપાલિકા સર્વા વરં વૃણુત વાઞ્છિતમ્

કૃષ્ણસ્ય વચનં શ્રુત્વા વરં વવ્રે ચ રાધિકા ॥
ગોપાલિકાઃ પ્રહૃષ્ટાશ્ચ સર્વસંકલ્પપાદપાત્

રાધિકોવાચ ॥
ત્વત્પાદાબ્જે મન્મનોલિઃ સતતં ભ્રમતુ પ્રભો ॥
પાતું ભક્તિરસં પદ્મે મધુપશ્ચ યથા મધુ

મદીય પ્રાણનાથસ્ત્વં ભવ જન્મનિ જન્મનિ ॥
ત્વદીયચરણામ્ભોજે દેહિ ભક્તિં સુદુર્લભામ્

તવ સ્મૃતૌ ગુણે ચિત્તં સ્વપ્ને જ્ઞાને દિવાનિશમ્ ॥
ભવેન્નિમગ્નં સતતમેતન્મમ મનીષિતમ્

ગોપાલિકા ઊચુઃ ॥
યથા રાધાં તથા નશ્ચ પ્રાણબન્ધો દિવાનિશમ્ ॥
ભવિષ્યસિ પ્રાણનાથઃ પાસ્યસિ પ્રતિજન્મનિ

આસાં ચ વચનં શ્રુત્વા તથાઽસ્ત્વેવમુવાચ હ ॥
પ્રસન્નવદનઃ શ્રીમાન્યશોદાનન્દવર્ધનઃ

ક્રીડાપદ્મં રાધિકાયૈ સહસ્રદલસંયુતમ્ ॥
લલિતાં માલતીમાલાં દદૌ પ્રીત્યા જગત્પતિઃ

માલાસમૂહં પુષ્પાણિ ગોપીભ્યો ગોપિકાપતિઃ ॥
પ્રહસ્ય પરમપ્રીત્યા પ્રદદાવિત્યુવાચ હ

શ્રીકૃષ્ણ ઉવાચ ॥
ત્રિષુ માસેષ્વતીતેષુ યૂયં ક્રીડાં મયા સહ ॥
રાસમણ્ડલરમ્યે ચ વૃન્દારણ્યે કરિષ્યથ

યથાઽહં ચ તથા યૂયં નાહં ભેદઃ શ્રુતૌ શ્રુતઃ ॥
પ્રાણોઽહં ચૈવ યુષ્માકં યૂયં પ્રાણા મમ પ્રભોઃ

વ્રતં વો લોકરક્ષાર્થં ન હિ સ્વાર્થમિદં પ્રિયાઃ ॥
સહાગતાશ્ચ ગોલોકાદ્ગમનં ચ મયા સહ

ગચ્છત સ્વાલયં શીઘ્રં વોઽહં જન્મનિ જન્મનિ ॥
પ્રાણેભ્યોઽપિ ગરીયસ્યો યૂયં મે નાત્ર સંશયઃ

ઇત્યુક્ત્વા શ્રીહરિસ્તત્ર તસ્થૌ સૂર્યસુતાતટે ॥
તસ્થુર્ગોપાલિકાઃ સર્વા વીક્ષ્ય કૃષ્ણં પુનઃપુનઃ

સર્વાઃ પ્રહૃષ્ટવદનાઃ સસ્મિતા વક્રલોચનાઃ ॥
પ્રીત્યા ચક્ષુશ્ચકોરાભ્યાં મુખચન્દ્રં પપુર્હરેઃ

તાઃ શીઘ્રં પ્રયયુર્ગેહં જયં દત્ત્વા પુનઃપુનઃ ॥
હરિશ્ચ શિશુભિઃ સાર્દ્ધં પ્રસન્નઃ સ્વાલયં યયૌ

ઇત્યેવં કથિતં સર્વં હરેશ્ચરિતમઙ્ગલમ્ ॥
ગોપીનાં વસ્ત્રહરણં સર્વલોકસુખાવહમ્

ઇતિ શ્રીબ્રહ્મવૈવર્તે મહાપુરાણે શ્રીકૃષ્ણજન્મખણ્ડે નારાયણનારદસંવાદે ગોપિકાવસ્ત્રહરણપ્રસ્તાવો નામ સપ્તવિંશોઽધ્યાયઃ