Brahmavaivarta Purana · Chapter 4.15

śrīnārāyaṇa uvāca //
ekadā kṛṣṇasahito nando vṛndāvanaṃ yayau//
tatropavanabhāṇḍīre cārayāmāsa godhanam

saraḥ susvādutoyaṃ ca pāyayāmāsa tatpapau //
uvāsa vṛkṣamūle ca bālaṃ kṛtvā svavakṣasi

etasminnantare kṛṣṇo māyāmānuṣavigrahaḥ //
cakāra māyayā'kasmānmeghācchannaṃ nabho mune

meghāvṛtaṃ nabho dṛṣṭvā śyāmalaṃ kānanāntaram//
jhaṃjhāvātaṃ mahāśabdaṃ vajraśabdaṃ ca dāruṇam

vṛṣṭidhārāmatisthūlāṃ kampamānāṃśca pādapān//
dṛṣṭvaivaṃ patitaskandhānnando bhayamavāpa ha

kathaṃ yāsyāmi govatsānvihāya svāśramaṃ bata//
gṛhaṃ yadi na yāsyāmi bhavitā bālakasya kim

evaṃ nande pravadati ruroda śrīharistadā//
payobhiyā hariścaiva pituḥ kaṇṭhaṃ dadhāra saḥ

etasminnantare rādhā''jagāma kṛṣṇa sannidhim //
gamanaṃ kuvanī rājahaṃsakhañjanagañjanam

śaratpārvaṇacandrābhāmuṣṭavaktramanoharā //
śaranmadhyāhnapadmānāṃ śobhāmocanalocanā

paritastārakāpakṣmavicitrakajjalojjvalā //
khagendracañcucāruśrīśaṃsānāśakanāsikā

tanmadhyasthalaśobhārha sthūlamuktāphalojjvalā//
kabarīveṣasaṃyuktā mālatīmālyaveṣṭitā

grīṣmamadhyāhnamārtaṇḍaprabhāmuṣṭakakuṇḍalā //
pakvabimbaphalānāṃ ca śrīmuṣṭādharayugmakā

muktāpaṅktiprabhātaikadantapaṅktisamujjvalā //
īṣatpraphullakundānāṃ suprabhānāśakasmitā

kastūrībindusaṃyukta sindūrabindubhūṣitā//
kapālaṃ mallikāyuktaṃ bibhratī śrīyutaṃ satī

sucāruvartulākārakapolapulakānvitā //
maṇiratnendrasārāṇāṃ hāroraḥsthalabhūṣitā

sucāruśrīphalayugakaṭhinastanasaṃgatā //
patrāvalīśriyā yuktā dīptā sadratnatejasā

sucāruvartulākāramudaraṃ sumanoharam //
vicitratrivalīyuktaṃ nimnanābhiṃ ca bibhratī

sadratnasāraracitamekhalājālabhūṣitā //
kāmāstrasārabhrūbhaṅgayogīndracittamohinī

kaṭhinaśroṇiyugalaṃ dharaṇīdharaninditam //
sthalapadmaprabhāmuṣṭacaraṇaṃ dadhatī mudā //

ratnabhūṣaṇasaṃyuktaṃ yāvakadravasaṃyutam //
maṇīndraśobhāsaṃmuṣṭasālaktakapunarbhavam

sadratnasāraracitakvaṇanmañjīra rañjitam //
ratnakaṅkaṇakeyūracāruśaṅkhavibhūṣitā

ratnāṅgulīyanikaravahniśuddhāṃśukojvalā //
cārucampakapuṣpāṇāṃ prabhā muṣṭakalevarā

sahasradalasaṃyuktakrīḍākamalamujjvalam //
śrīmukhaśrīdarśanārthaṃ bibhratī ratnadarpaṇam

dṛṣṭvā tāṃ nirjane nando vismayaṃ paramaṃ yayau //
candrakoṭiprabhāmuṣṭāṃ bhāsayantīṃ diśo daśa

nanāma tāṃ sāśrunetro bhaktinamrātmakandharaḥ //
jānāmi tvāṃ gargamukhātpadmādhikapriyāṃ hareḥ

jānāmīmaṃ mahāviṣṇoḥ paraṃ nirguṇamacyutam //
tathāpi mohito'haṃ ca mānavo viṣṇumāyayā

gṛhāṇa prāṇanāthaṃ ca gaccha bhadre yathāsukham //
paścāddāsyasi matputraṃ kṛtvā pūrṇamanoratham

ityuktvā pradadau tasyai rudantaṃ bālakaṃ bhiyā //
jagrāha bālakaṃ rādhā jahāsa madhuraṃ sukhāt

uvāca nandaṃ sā yatnānna prakāśyaṃ rahasyakam //
ahaṃ dṛṣṭā tvayā nanda katijanmaphalodayāt

prājñastvaṃ gargavacanātsarvaṃ jānāsi kāraṇam //
akathyamāvayorgopyaṃ caritaṃ gokule vraja

varaṃ vṛṇu vrajeśa tvaṃ yatte manasi vāñchitam //
dadāmi līlayā tubhyaṃ devānāmapi durlabham

rādhikāvacanaṃ śrutvā tāmuvāca vrajeśvaraḥ //
yuvayoścaraṇe bhaktiṃ dehi nānyatra me spṛhā

yuvayoḥ sannidhau vāsaṃ dāsyasi tvaṃ sudurlabham //
āvābhyāṃ dehi jagatāmambike parameśvari

śrutvā nandasya vacanamuvāca parameśvarī //
dāsyāmi dāsyamatulamidānīṃ bhaktirastu te

āvayoścaraṇāmbhoje yuvayośca divāniśam //
praphullahṛdaye śaśvatsmṛtirastu sudurlabhā

māyā yuvāṃ ca pracchannau na kariṣyati madvarāt //
goloke yāsyathānte ca vihāya mānavīṃ tanum

evamuktvā tu sānandaṃ kṛtvā kṛṣṇaṃ svavakṣasi //
dūraṃ nināya śrīkṛṣṇaṃ bāhubhyāṃ ca yathepsitam

kṛtvā vakṣasi taṃ kāmācchleṣaṃśleṣaṃ cucumba ca //
pulakāṅkitasarvāṅgo sasmāra rāsamaṇḍalam

etasminnantare rādhā māyāsadratnamaṇḍapam //
dadarśa ratnakalaśaśatena ca samanvitam

nānāvicitracitrāḍhyaṃ citrakānanaśobhitam //
sindūrākāramaṇibhiḥ stambhasaṃghairvirājitam

candanāgurukastṛrīkuṅkumadravayuktayā //
saṃyuktaṃ mālatīmālāsamūhapuṣpaśayyayā

nānābhogasamāyuktaṃ divyadarpaṇasaṃyutam //
maṇīndramuktāmāṇikyamālājālairvibhūṣitam

maṇīndrasāraracitakapāṭena samanvitam //
bhūṣitaṃ bhūṣitairvastraiḥ patākānikarairvaraiḥ //
kuṅkumākāramaṇibhiḥ saptasopānasaṃyutam

yuktaṃ ṣaṭpadasaṃyuktaiḥ puṣpodyānaṃ ca puṣpitaiḥ //
sā devī maṇḍapaṃ dṛṣṭvā jagāmābhyantaraṃ mudā

dadarśa tatra tāmbūlaṃ karpūrādisamanvitam //
jalaṃ ca ratnakumbhasthaṃ svacchaṃ śītaṃ manoharam

sudhāmadhubhyāṃ pūrṇāni ratnakumbhāni nārada //
puruṣaṃ kamanīyaṃ ca kiśora śyāmasundaram

koṭikandarpalīlābhaṃ candanena vibhūṣitam //
śayānaṃ puṣpaśayyāyāṃ sasmitaṃ sumanoharam

pītavastraparīdhānaṃ prasannavadanekṣaṇam //
maṇīndrasāranirmāṇaṃ kvaṇanmañjīrarañjitam

sadratnasāranirmāṇakeyūravalayānvitam //
maṇīndrakuṇḍalābhyāṃ ca gaṇḍasthalavirājitam

kaustubhena maṇīndreṇa vakṣaḥsthalasamujjvalam // śaratpārvaṇacaṃdrāsyaprabhāmuṣṭamukhojjvalam

śaratpraphullakamalaprabhāmocanalocanam //
mālatīmālyasaṃśliṣṭaśikhipicchasuśobhitam

trivaṃkacūḍāṃ bibhrantaṃ paśyantaṃ ratnamandiram //
kroḍaṃ bālakaśūnyaṃ ca dṛṣṭvā taṃ navayauvanam

sarvasmṛtisvarūpā sā tathāpi vismayaṃ yayau //
rūpaṃ rāseśvarī dṛṣṭvā mumoha sumanoharam

kāmāccakṣuścakorābhyāṃ mukhacandraṃ papau mudā //
nimeṣarahitā rādhā navasaṃgamalālasā

pulakāṅkitasarvāṅgī sasmitā madanāturā //
tāmuvāca haristatra smerānanasaroruhām //
navasaṃgamayogyāṃ ca paśyantīṃ vakracakṣuṣā

śrīkṛṣṇa uvāca //
rādhe smarasi golokavṛttāntaṃ surasaṃsadi

adya pūrṇaṃ kariṣyāmi svīkṛtaṃ yatpurā priye //
tvaṃ me prāṇādhikā rādhe preyasī ca varānane

yathā tvaṃ ca tathā'haṃ ca bhedo hi nāvayordhruvam //
yathā kṣīre ca dhāvalyaṃ yathā'gnau dāhikā sati

yathā pṛthivyāṃ gandhaśca tathā'haṃ tvayi saṃtatam //
vinā mṛdā ghaṭaṃ kartuṃ vinā svarṇena kuṇḍalam

kulālaḥ svarṇakāraśca nahi śaktaḥ kadācana //
tathā tvayā vinā sṛṣṭimahaṃ kartuṃ na ca kṣamaḥ

sṛṣṭerādhārabhūtā tvaṃ bījarūpo'hamacyutaḥ //
āgaccha śayane sādhvi kuru vakṣaḥsthale hi mām

tvaṃ me śobhā svarūpā'si dehasya bhūṣaṇaṃ yathā //
kṛṣṇaṃ vadānta māṃ lokāstvayaiva rahitaṃ yadā

śrīkṛṣṇaṃ ca tadā te'pi tvayaiva sahitaṃ param //
tvaṃ ca śrīstvaṃ ca saṃpattistvamādhārasvarūpiṇī

sarvaśaktisvarūpāsi sarvarūpo'hamakṣaraḥ //
yadā tejaḥsvarūpo'haṃ tejorūpā'si tvaṃ tadā

na śarīrī yadāhaṃ ca tadā tvamaśarīriṇī //
sarvabījasvarūpo'haṃ sadā yogena sundari

tvaṃ ca śaktisvarūpā ca sarvastrīrūpadhāriṇī //
mamāṅgāṃśasvarūpā tvaṃ mūlaprakṛtirīśvarī

śaktyā buddhyā ca jñānena mayā tulyā varānane //
āvayorbhedabuddhiṃ ca yaḥ karoti narādhamaḥ

tasya vāsaḥ kālasūtre yāvaccandradivākarau //
pūrvānsapta parānsapta puruṣānpātayatyadhaḥ

koṭijanmārjitaṃ puṇyaṃ tasya naśyati niścitam //
ajñānādāvayornindāṃ ye kurvanti narādhamāḥ

pacyante narake ghore yāvaccandradivākarau //
rāśabdaṃ kurvatastrasto dadāmi bhaktimuttamām

dhāśabdaṃ kurvataḥ paścādyāmi śravaṇalobhataḥ //
ye sevante ca dattvā māmupacārāṃśca ṣoḍaśa //
yāvajīvanaparyantaṃ yā prītirjāyate mama

sā prītirmama jāyeta rādhāśabdāttato'dhikā //
priyā na me tathā rādhe rādhāvaktā tato'dhikaḥ

brahmānantaḥ śivo dharmo naranārāyaṇāvṛṣī //
kapilaśca gaṇeśaśca kārttikeyaśca matpriyaḥ

lakṣmīḥ sarasvatī durgā sāvitrī prakṛtistathā//
mama priyāśca devāśca tāstathāpi na tatsamāḥ

te sarve prāṇatulyā me tvaṃ me prāṇādhikā satī //
bhinnasthānasthitāste ca tvaṃ ca vakṣaḥsthale sthitā

yā me caturbhujā mūrtirbibhartti vakṣasi priyām //
so'haṃ kṛṣṇasvarūpastvāṃ vivahāmi svayaṃ sadā

ityevamuktvā śrīkṛṣṇastasthau talpe manorame //
uvāca rādhikā nāthaṃ bhaktinamrātmakandharā

rādhikovāca //
smarāmi sarvaṃ jānāmi vismarāmi kathaṃ vibho //
yattvaṃ vadasi sarvāhaṃ tvatpādābjaprasādataḥ

īśvarasyāpriyāḥ kecitpriyāśca kutra kecana //
ye yathā māṃ na smaranti tathā teṣu tavākṛpā

tṛṇaṃ ca parvataṃ kartu samarthaḥ parvataṃ tṛṇam //
tathāpi yogyāyogye ca saṃpattau ca samā kṛpā

tiṣṭhatyahaṃ śayānastvaṃ kathābhiryatkṣaṇaṃ gatam //
tatkṣaṇaṃ ca yugasamaṃ nāhaṃ prāpayituṃ kṣamā

vakṣaḥsthale ca śirasi dehi te caraṇāmbujam //
dunoti manmanaḥ sadyastvadīyavirahānalāt

puraḥ papāta me dṛṣṭistvadīyacaraṇāmbuje //
nītā mayā nahi kleśāddraṣṭumanyatkalevaram

pratyekamaṅgaṃ dṛṣṭvaiva dattā śānte mukhāmbuje//
dṛṣṭvā mukhāravindaṃ ca nānyaṃ gantuṃ ca sā kṣamā

rādhikāvacanaṃ śrutvā jahāsa puruṣottamaḥ //
tāmuvāca hitaṃ tathyaṃ śrutismṛtinirūpitam

śrīkṛṣṇa uvāca //
na khaṇḍanīyaṃ tattatra mayā pūrvaṃ nirūpitam //
tiṣṭha bhadre kṣaṇaṃ bhadraṃ kariṣyāmi tava priye

tvanmanorathapūrṇasya svayaṃ kālaḥ samāgataḥ //
yasya yallikhitaṃ pūrvaṃ yatra kāle nirūpitam

tadeva khaṇḍituṃ rādhe kṣamo nāhaṃ ca ko vidhiḥ //
vidhātuśca vidhātā'haṃ yeṣāṃ yallekhanaṃ kṛtam

brahmādīnāṃ ca kṣudrāṇāṃ na tatkhaṇḍyaṃ kadācana //
etasminnantare brahmā''jagāma purato hareḥ

mālākamaṇḍalukara īṣatsmeracaturmukhaḥ //
gatvā nanāma taṃ kṛṣṇaṃ pratuṣṭāva yathāgamam

sāśrunetrapulakito bhaktinamrātmakandharaḥ//
stutvā natvā jagaddhātā jagāma harisannidhim

punarnatvā prabhuṃ bhaktyā jagāma rādhikāntikam //
mūrdhnā nanāma bhaktyā ca mātustaccaraṇāmbuje

cakāra saṃbhrameṇaiva jaṭājālena veṣṭitam//
kamaṇḍalujalenaiva śīghraṃ prakṣālitaṃ mudā

yathāgamaṃ pratuṣṭāva puṭāñjaliyutaḥ punaḥ //
//brahmovāca // //
he mātastvatpadāmbhojaṃ dṛṣṭaṃ kṛṣṇaprasādataḥ

sudurlabhaṃ ca sarveṣāṃ bhārate ca viśeṣataḥ //
ṣaṣṭivarṣasahasrāṇi tapastaptaṃ purā mayā

bhāskare puṣkare tīrthe kṛṣṇasya paramātmanaḥ //
ājagāma varaṃ dātuṃ varadātā hariḥ svayam

varaṃ vṛṇīṣvetyukte ca svābhīṣṭaṃ ca vṛtaṃ mudā //
rādhikācaraṇāmbhojaṃ sarveṣāmapi durlabham

he guṇātīta me śīghramadhunaiva pradarśaya //
mayetyukto harirayamuvāca māṃ tapasvinam

darśayiṣyāmi kāle ca vatsedānīṃ kṣameti ca //
nahīśvarājñā viphalā tena dṛṣṭaṃ padāmbujam

sarveṣāṃ vāñchitaṃ mātargoloke bhārate'dhunā //
sarvā devyaḥ prakṛtyaṃśā janyāḥ prākṛtikā dhruvam

tvaṃ kṛṣṇāṅgārdhasaṃbhūtā tulyā kṛṣṇena sarvataḥ //
śrīkṛṣṇastvamayaṃ rādhā tvaṃ rādhā vā hariḥ svayam

nahi vedeṣu me dṛṣṭa iti kena nirūpitam //
brahmāṇḍādbahirūrdhvaṃ ca goloko'sti yathāmbike

vaikuṇṭhaścāpyajanyaśca tvamajanyā tathāmbike //
yathā samastabrahmāṇḍe śrīkṛṣṇāṃśāṃśajīvinaḥ

tathā śaktisvarūpā tvaṃ teṣu sarveṣu saṃsthitā//
puruṣāśca hareraṃśāstvadaṃśā nikhilāḥ striyaḥ

ātmanā deharūpā tvamasyādhārastvameva hi//
asyānu prāṇaistvaṃ mātastvatprāṇairayamīśvaraḥ

kimaho nirmitaḥ kena hetunā śilpakāriṇā //
nityo'yaṃ ca tathā kṛṣṇastvaṃ ca nityā tathā'mbike

asyāṃśā tvaṃ tvadaṃśo vā'pyayaṃ kena nirūpitaḥ //
ahaṃ vidhātā jagatāṃ devānāṃ janakaḥ svayam

taṃ paṭhitvā gurumukhādbhavantyeva budhā janāḥ //
guṇānāṃ vāstavānāṃ te śatāṃśaṃ vaktumakṣamaḥ

vedo vā paṇḍito vā'nyaḥ ko vā tvāṃ stotumīśvaraḥ //
stavānāṃ janakaṃ jñānaṃ buddhirjñānāmbikā sadā

tvaṃ buddherjananī mātaḥ ko vā tvāṃ stotumīśvaraḥ //
yadvastu dṛṣṭaṃ sarveṣāṃ taddhi vaktuṃ budhaḥ kṣamaḥ

yadadṛṣṭāśrute vastu tannirvaktuṃ ca kaḥ kṣamaḥ //
ahaṃ maheśo'naṃtaśca stotuṃ tvāṃ ko'pi na kṣamaḥ

sarasvatī ca vedāśca kṣamaḥ kaḥ stotumīśvaraḥ //
yathāgamaṃ yathoktaṃ ca na māṃ ninditumarhasi

īśvarāṇāmīśvarasya yogyāyogye samā kṛpā//
janasya pratipālyasya kṣaṇe doṣaḥ kṣaṇe guṇaḥ

jananī janako yo vā sarvaṃ kṣamati snehataḥ //
ityuktvā jagatāṃ dhātā tasthau ca puratastayoḥ

praṇamya caraṇāmbhoje sarveṣāṃ vandyamīpsitam //
brahmaṇā ca kṛtaṃ stotraṃ trisaṃdhyaṃ yaḥ paṭhennaraḥ

rādhāmādhavayoḥ pāde bhaktirdāsyaṃ labheddhruvam //
karmanirmūlanaṃ kṛtvā mṛtyuṃ jitvā sudurjayam //
vilaṅghya sarvalokāṃśca yāti golokamuttamam

śrīnārāyaṇa uvāca//
brahmaṇaḥ stavanaṃ śrutvā tamuvāca ha rādhikā

varaṃ vṛṇu vidhātastvaṃ yatte manasi vartate //
rādhikāvacanaṃ śrutvā tāmuvāca jagadvidhiḥ

varaṃ ca yuvayoḥ pādapadmabhaktiṃ ca dehi me //
ityukte vidhinā rādhā tūrṇamomityuvāca ha

punarnanāma tāṃ bhaktyā vidhātā jagatāṃ patiḥ //
tadā brahmā tayormadhye prajvālya ca hutāśanam

hariṃ saṃsmṛtya havanaṃ cakāra vidhinā vidhiḥ//
utthāya śayanātkṛṣṇa uvāsa vahnisannidhau

brahmaṇoktena vidhinā cakāra havanaṃ svayam //
praṇamayya punaḥ kṛṣṇaṃ rādhāṃ tāṃ janakaḥ svayam

kautukaṃ kārayāmāsa saptadhā ca pradakṣiṇām //
punaḥ pradakṣiṇāṃ rādhāṃ kārayitvā hutāśanam

praṇamayya tataḥ kṛṣṇaṃ vāsayāmāsa taṃ vidhiḥ //
tasyā hastaṃ ca śrīkṛṣṇaṃ grāhayāmāsa taṃ vidhiḥ

vedoktasaptamantrāṃśca pāṭhayāmāsa mādhavam //
saṃsthāpya rādhikāhastaṃ harervakṣasi vedavit

śrīkṛṣṇahastaṃ rādhāyāḥ pṛṣṭhadeśe prajāpatiḥ //
sthāpayāmāsa mantrāṃstrīnpāṭhayāmāsa rādhikām

pārijātaprasūnānāṃ mālāṃ jānuvilambitām //
śrīkṛṣṇasya gale brahmā rādhādvārā dadau mudā

praṇamayya punaḥ kṛṣṇaṃ rādhāṃ ca kamalodbhavaḥ //
rādhāgale haridvārā dadau mālāṃ manoharām//
punaśca vāsayāmāsa śrīkṛṣṇaṃ kamalodbhavaḥ

tadvāmapārśve rādhāṃ ca sasmitāṃ kṛṣṇacetasam //
puṭāñjaliṃ kārayitvā mādhavaṃ rādhikāṃ vidhiḥ //

pāṭhayāmāsa vedoktānpañca mantrāṃśca nārada //
praṇamayya punaḥ kṛṣṇaṃ samarpya rādhikāṃ vidhiḥ

kanyakāṃ ca yathā tāto bhaktyā tasthau hareḥ puraḥ //
etasminnantare devāḥ sānandapulakodgamāḥ

dundubhiṃ vādayāmāsuścānakaṃ murajādikam//
pārijātaprasūnānāṃ puṣpavṛṣṭirbabhūva ha

jagurgandharvapravarā nanṛtuścāpsarogaṇāḥ //
tuṣṭāva śrīhariṃ brahmā tamuvāca ha sasmitaḥ

yuvayoścaraṇāmbhoje bhaktiṃ me dehi dakṣiṇām//
brahmaṇo vacanaṃ śrutvā tamuvāca hariḥ svayam

madīyacaraṇāmbhoje sudṛḍhā bhaktirastu te //
svasthānaṃ gaccha bhadraṃ te bhavitā nātra saṃśayaḥ

mayā niyojitaṃ karma kuru vatsa mamājñayā //
śrīkṛṣṇasya vacaḥ śrutvā vidhātā jagatāṃ mune

praṇamya rādhāṃ kṛṣṇaṃ ca jagāma svālayaṃ mudā //
gate brahmaṇi sā devī sasmitā vakracakṣuṣā //

sā dadarśa harervaktraṃ cacchāda vrīḍayā mukham //
pulakāṅkitasarvāṃgī kāmabāṇaprapīḍitā

praṇamya śrīhariṃ bhaktyā jagāma śayanaṃ hareḥ //
candanāgurupaṅkaṃ ca kastūrīkuṅkumānvitam

lalāṭe tilakaṃ kṛtvā dadau kṛṣṇasya vakṣasi //
sudhāpūrṇaṃ ratnapātraṃ madhupūrṇaṃ manoharam

pradadau haraye bhaktyā bubhuje jagatīpatiḥ //
tāmbūlaṃ ca varaṃ ramyaṃ karpūrādisuvāsitam

dadau kṛṣṇāya sā rādhā sādaraṃ bubhuje hariḥ //
cakhāda sasmitā rādhā haridattaṃ sudhārasam

tāmbūlaṃ tena dattaṃ ca bubhuje purato hareḥ //
kṛṣṇaścarvitatāmbūlaṃ rādhikāyai mudā dadau

cakhāda parayā bhaktyā papau tanmukhapaṅkajam //
rādhācarvitatāmbūlaṃ yayāce madhusūdanaḥ

jahāsa na dadau rādhā kṣametyuktaṃ tayā mudā//
candanāgurukastūrīkuṅkumadravamuttamam //
rādhikāyāśca sarvāṃge pradadau mādhavaḥ svayam

yaḥ kāmo dhyāyate nityaṃ yasyaikacaraṇāmbujam //
babhūva tasya sa vaśo rādhāsaṃtoṣakāraṇāt

yadbhṛtyabhṛtyairmadano jitaḥ sarvakṣaṇaṃ mune //
svecchāmayo hi bhagavāñjitastena kutūhalāt

kare dhṛtvā ca tāṃ kṛṣṇaḥ sthāpayāmāsa vakṣasi //
cakāra śithilaṃ vastraṃ cumbanaṃ ca caturvidham

babhūva ratiyuddhena vicchinnā kṣudraghaṇṭikā //
cumbanenauṣṭharāgaśca hyāśleṣeṇa ca patrakam

śṛṃgāreṇaiva kabarī sindūratilakaṃ mune //
jagāmālaktakāṅkaśca viparītādikena ca

pulakāṅkitasarvāṃṅgī babhūva navasaṃgamāt //
mūrcchāmavāpa sā rādhā bubudhe na divāniśam

pratyaṅgenaiva pratyaṅgamaṅgenāṅgaṃ samāśliṣat //
śṛṅgārāṣṭavidhaṃ kṛṣṇaścakāra kāmaśāstravit

punastāṃ ca samāśliṣya sasmitāṃ vakralocanām //
kṣatavikṣatasarvāṅgīṃ nakhadantaiścakāra ha

kaṅkaṇānāṃ kiṅkiṇīnāṃ mañjīrāṇāṃ manoharaḥ //
babhūva śabdastatraiva śṛṅgārasamarodbhavaḥ

punastāṃ ca samākṛṣya śayyāyāṃ ca niveśya ca //
cakāra rahitāṃ rādhāṃ kabarībandhavāsasā

nirjane kautukātkṛṣṇaḥ kāmaśāstraviśāradaḥ //
cūḍāveṣāṃśukairhīnaṃ cakāra taṃ ca rādhikā

na kasya kasmāddhāniśca tau dvau kāryaviśāradau //
jagrāha rādhāhastāttu mādhavo ratnadarpaṇam

muralīṃ mādhavakarājjagrāha rādhikā balāt //
cittāpahāraṃ rādhāyāścakāra mādhavo balāt

jahāra rādhikā rāsānmādhavasyāpi mānasam //
nivṛtte kāmayuddhe ca sasmitā vakralocanā

pradadau muralīṃ prītyā śrīkṛṣṇāya mahātmane//
pradadau darpaṇaṃ kṛṣṇaḥ krīḍākamalamujjvalam

cakāra kabarīṃ ramyāṃ sindūratilakaṃ dadau//
vicitrapatrakaṃ veṣaṃ cakāraivaṃvidhaṃ hariḥ//

viśvakarmā na jānāti sakhīnāmapi kā kathā //
veṣaṃ vidhātuṃ kṛṣṇasya yadā rādhā samudyatā

babhūva śiśurūpaṃ ca kaiśoraṃ ca vihāya ca //
dadarśa bālarūpaṃ taṃ rudantaṃ pīḍitaṃ kṣudhā

yādṛśaṃ pradadau nando bhītaṃ tādṛśamacyutam //
viniśvasya ca sā rādhā hṛdayena vidūyatā

itastatastaṃ paśyantī śokārtā virahāturā //
uvāca kṛṣṇamuddiśya kākūktimiti kātarā

māyāṃ karoṣi māyeśa kiṃkarīṃ kathamīdṛśīm //
ityevamuktvā sā rādhā papāta ca ruroda ca //

ruroda kṛṣṇastatraiva vāgbabhūvāśarīriṇī //
kathaṃ rodiṣi rādhe tvaṃ smara kṛṣṇapadāmbujam

ārāsamaṇḍalaṃ yāvannaktamatrāgamiṣyati //
kariṣyasi ratiṃ nityaṃ hariṇā sārddhamīpsitām

chāyāṃ vidhāya svagṛhe svayamāgatya mā ruda //
kṛtvā kroḍe ca prāṇeśaṃ māyeśaṃ bālarūpiṇam

tyaja śokaṃ gṛhaṃ gaccha sundarītthaṃ prabodhitā //
śrutvaivaṃ vacanaṃ rādhā kṛtvā kroḍe ca bālakam //

dadarśa puṣpodyānaṃ ca vanaṃ sadratnamaṇḍapam //
tūrṇaṃ vṛndāvanādrādhā jagāma nandamandiram

sā manoyāyinī devī nimiṣārdhena nārada //
saṃsiktasnigdhamadhurarasanā raktalocanā

yaśodāyai śiśuṃ dātumudyatā satyuvāca ha //
gṛhītvaivaṃ śiśuṃ sthūlaṃ rudantaṃ ca kṣudhāturam

goṣṭhe tvatsvāminā dattaṃ prāpnomi yātanāṃ pathi //
saṃsiktaṃ vasanaṃ vatse meghācchanne'tidurdine

picchile kardamodreke yaśodā voḍhumakṣamā //
gṛhāṇa bālakaṃ bhadre stanaṃ dattvā prabodhaya

gṛhaṃ ciraṃ parityaktaṃ yāmi tiṣṭha sukhaṃ sati //
ityuktvā bālakaṃ dattvā jagāma svagṛhaṃ prati

yaśodā bālakaṃ nītvā cucumba ca stanaṃ dadau //
bahirniviṣṭā sā rādhā svagṛhe gṛhakarmaṇi

nityaṃ naktaṃ ratiṃ tatra cakāra hariṇā saha //
ityevaṃ kathitaṃ vatsa śrīkṛṣṇacaritaṃ śubham //
sukhadaṃ mokṣadaṃ puṇyamaparaṃ kathayāmi te

iti śrībrahmavaivarte mahāpurāṇe śrīkṛṣṇajanmakhaṇḍe nārāyaṇanāradasaṃvāde rādhākṛṣṇavivāhanavasaṃgamaprastāvo nāma pañcadaśo'dhyāyaḥ