Brahmavaivarta Purana · Chapter 2.54

rājovāca //
kutrādhāro mahāviṣṇoḥ sarvādhārasya tasya ca //
kālabhītasya kati ca kālamāyā munīśvara

kṣudrasya katicitkālaṃ brahmaṇaḥ prakṛtestathā //
manorindrasya candrasya sūryyasyāyustathaiva ca

anyeṣāṃ vai janānāṃ ca prākṛtānāṃ paraṃ vayaḥ //
vedoktaṃ suvicāryyaṃ ca vada vedavidāṃ vara

viśvānāmūrdhvabhāge ca kassyādvā loka eva saḥ //
kathayasva mahābhāga sandehacchedanaṃ kuru

muniruvāca //
goloko nṛpa viśvānāṃ vistṛtaśca nabhassamaḥ //
tathā nityaṃ ḍimbarūpaśśrīkṛṣṇecchāsamudbhavaḥ

jalena paripūrṇaśca kṛṣṇasya mukhabindunā //
sṛṣṭyunmukhasyādisarge pariśrāntasya khelataḥ

prakṛtyā saha yuktasya kalayā nijayā nṛpa //
tatrādhāro mahāviṣṇorviśvādhārasya vistṛtaḥ

prakṛtirgarbhasaṃryuktaḍimbodbhūtasya bhūmipa //
suvistṛte jalādhāre śayānaśca mahāvirāṭ

rādheśvarasya kṛṣṇasya ṣoḍaśāṃśaḥ prakīrtitaḥ //
dūrvādalaśyāmarūpaḥ sasmitaśca caturbhujaḥ

vanamālādharaḥ śrīmāñchobhitaḥ pītavāsasā //
ūrdhvaṃ nabhasi tadviṣṇornityavaikuṇṭha eva ca

ātmā''kāśasamo nityo vistṛtaścandrabimbavat //
īśvarecchāsamudbhūto nirlakṣyaśca nirāśrayaḥ

ākāśavatsuvistāro ratnaughaiśca vinirmitaḥ //
tatra nārāyaṇaḥ śrīmānvanamālī caturbhujaḥ

lakṣmīsarasvatīgaṅgātulasīpatirīśvaraḥ //
sunandanandakumudapārṣadādibhirāvṛtaḥ

sarveśaḥ sarvasiddheśo bhaktānugrahavigrahaḥ //
śrīkṛṣṇaśca dvidhābhūto dvibhujaśca caturbhujaḥ

caturbhujaśca vaikuṇṭhe goloke dvibhujaḥ svayam //
ūrdhvaṃ vaikuṇṭhalokācca pañcāśatkoṭiyojanāta

goloko varttulākāro variṣṭhassarvalokataḥ //
amūlyaratnakhacitairmandiraiśca vibhūṣitaḥ

ratnendrasārakhacitaiḥ stambhasopānacitritaiḥ //
maṇīndradarpaṇāsaktaiḥ kapāṭaiḥ kalaśojjvalaiḥ

nānācitravicitraiśca śibiraiśca virājitaḥ //
koṭiyojanavistīrṇo dairghye śataguṇastathā //
virajāsaridākīrṇaiśśataśṛṃgaissuveṣṭitaḥ

saridardhapramāṇena dairghyeṇa ca tatena ca //
śailārddhaparimāṇena yukto vṛndāvanena ca //

tadarddhamānavilasadrāsamaṇḍalamaṇḍitaḥ //
saricchailavanādīnāṃ madhye goloka eva ca

yathā paṃkajamadhye ca karṇikā sumanoharā //
tatra gogopagopībhirgopīśo rāsamaṇḍale

rāseśvaryyā rādhikayā saṃyuktaḥ santataṃ nṛpa //
dvibhujo muralīhastaḥ śiśurgopālarūpadhṛk

vahniśuddhāṃśukādhāno ratnabhūṣaṇabhūṣitaḥ //
candanokṣitasarvāṃgo ratnamālāvirājitaḥ

ratnasiṃhāsanasthaśca ratnacchatreṇa śobhitaḥ //
tathā sa priyagopālaiḥ sevitaḥ śvetacāmaraiḥ

bhūṣitābhiśca gopībhirmālācandanacarcitaḥ//
sasmitaḥ sakaṭākṣābhiḥ suveṣābhiśca vīkṣitaḥ

kathito lokavistāro yathāśakti yathāgamam//
yathāśrutaṃ śambhuvaktrātkālamānaṃ niśāmaya

pātraṃ ṣaṭpalasaṃbhūtaṃ gabhīraṃ caturaṅgulam

svarṇamāṣakṛtacchidraṃ daṇḍaiśca caturaṃgulaiḥ //
yāvajjalaplutaṃ pātraṃ tatkālaṃ daṇḍameva ca

daṇḍadvayaṃ muhūrtaṃ ca yāmastasya catuṣṭayam //
vāsaraścāṣṭabhiryāmaiḥ pakṣastairdaśapañcabhiḥ

māso dvābhyāṃ ca pakṣābhyāṃ varṣaṃ dvādaśamāsakaiḥ //
māsena vai narāṇāṃ ca pitṝṇāṃ tadaharniśam

kṛṣṇapakṣe dinaṃ proktaṃ śukle rātriḥ prakīrttitā //
vatsareṇa narāṇāṃ ca devānāṃ ca divāniśam

ayanaṃ hyuttaramaho rātrirvai dakṣiṇāyanam //
yugakarmānurūpaṃ ca narādīnāṃ vayo nṛpa

prakṛteḥ prākṛtānāṃ ca brahmādīnāṃ niśāmaya //
kṛtaṃ tretā dvāparaṃ ca kaliśceti caturyugam

divyairdvādaśasāhasraiḥ sāvadhānaṃ niśāmaya //
catvāri trīṇi ca dvayekaṃ sahasrāṇi kṛtādikam

teṣāṃ ca sandhyāsandhyāṃśau dve sahasre prakīrtite //
tricatvāriṃśakairlakṣaissaviṃśatisahasrakaiḥ

caturyugaṃ parimitaṃ naramānakrameṇa ca //
lakṣaiśca saptadaśabhissāṣṭaviṃśasahasrakaiḥ

kṛtaṃ yugaṃ nṛmānena saṃkhyāvidbhiḥ prakīrttitam //
sahasraiṣṣaṇṇavatibhirlakṣairdvādaśabhissaha

tretāyugaṃ parimitaṃ kālavidbhiḥ prakīrttitam //
aṣṭalakṣaissaha mitaṃ catuṣṣaṣṭisahasrakam

parimāṇaṃ dvāparasya saṃkhyāvidbhiritīritam//
sadvātriṃśatsahasraiśca caturlakṣaiśca vatsaraiḥ//
nṛmānādvai kaliyugaṃ viduḥ kālavido bughāḥ

tatra sapta ca vārā vai tithayaḥ ṣoḍaśa smṛtāḥ//
divārātryaśca pakṣau dvau māso varṣaṃ ca nirmitam

tathā bhramati taccakramevamevaṃ caturyugam//
tathā yugāni rājendra tathā manvantarāṇi ca

/
manvantaraṃ tu divyānāṃ yugānāmekasaptatiḥ//
evaṃ kramādbhramantyeva manavaśca caturdaśa

pañcaviṃśatisāhasraṃ ṣaṣṭyantaśatapañcakam //
naramānayugaṃ caiva paraṃ manvantaraṃ smṛtam

ākhyānaṃ ca manūnāṃ ca dharmiṣṭhānāṃ narādhipa//
yacchrutaṃ śivavaktreṇa tattvaṃ matto niśāmaya

ādyo manurbrahmaputraḥ śatarūpā pativratā //
dharmiṣṭhānāṃ variṣṭhaśca gariṣṭho manuṣu prabhuḥ

svāyambhuvaḥ śambhuśiṣyo viṣṇuvrataparāyaṇaḥ //
jīvanmukto mahājñānī bhavataḥ prapitāmahaḥ

rājasūyasahasraṃ ca cakre vai narmadātaṭe//
trilakṣamaśvamedhaṃ ca trilakṣaṃ naramedhakam

gomedhaṃ ca caturlakṣaṃ vidhivanmahadadbhutam //
brāhmaṇānāṃ trikoṭīśca bhojayāmāsa nityaśaḥ

pañcalakṣagavāṃ māṃsaiḥ supakvairghṛtasaṃskṛtaiḥ //
carvyaiṃścoṣyairlehyapeyairmiṣṭadravyaiḥ sudurlabhaiḥ

amūlyaratnalakṣaṃ ca daśakoṭisuvarṇakam //
svarṇaśṛṅgayutaṃ divyaṃ gavāṃ lakṣaṃ supūjitam //

vahniśuddhāni vastrāṇi munīndrāṇāṃ ca lakṣakam //
bhūmiṃ ca sarvasasyāḍhyāṃ gajendrāṇāṃ ca lakṣakam//
trilakṣamaśvaratnaṃ ca śātakuṃbhavibhūṣitam

sahasraṃ ratharatnaṃ ca śibikālakṣameva ca//
trikoṭisvarṇapātrāṇi sānnaṃ sajalamīpsitam//
trikoṭisvarṇabhūṣāśca karpūrādisuvāsitam

tāmbūlaṃ suvicitraṃ ca trikoṭisvarṇatalpakam//
ratnendrakhacitairmañcaiḥ racitairviśvakarmaṇā

vahniśuddhāṃśukaiścitrai rājitaṃ mālyajālakaiḥ//
nityaṃ dadau brāhmaṇebhyo viṣṇuprītyā śivājñayā

saṃprāpya śaṃkarājjñānaṃ kṛṣṇamaṃtraṃ sudurlabham//
saṃprāpya kṛṣṇadāsyaṃ ca golokaṃ vai jagāma saḥ

dṛṣṭvā muktaṃ svaputraṃ ca prahaṣṭo'bhūtprajāpatiḥ//
tuṣṭāva śaṃkaraṃ tuṣṭaḥ sasṛje'nyaṃ manuṃ vidhiḥ

yataḥ svayambhuputro'yamataḥ svāyambhuvo manuḥ//
svārociṣo manuścaiva dvitīyo vahninandanaḥ

rājā vadānyo dharmiṣṭhaḥ svāyambhuvasamo mahān //
priyavratasutāvanyau dvau manū dharmiṇāṃ varau

tau tṛtīyau caturthau ca vaiṣṇavau tāpasottamau //
tau ca śaṅkaraśiṣyau ca kṛṣṇabhaktiparāyaṇau

dharmiṣṭhānāṃ variṣṭhaśca raivataḥ pañcamo manuḥ //
ṣaṣṭhaśca cākṣuṣo jñeyo viṣṇubhaktiparāyaṇaḥ

śrāddhadevaḥ sūryasuto vaiṣṇavaḥ saptamo manuḥ //
sāvarṇiḥ sūryatanayo vaiṣṇavo manuraṣṭamaḥ

navamo dakṣasāvarṇirviṣṇuvrataparāyaṇaḥ //
daśamo brahmasāvarṇirbrahmajñānaviśāradaḥ

tataśca dharmasāvarṇirmanurekādaśaḥ smṛtaḥ //
dharmiṣṭhaśca variṣṭhaśca vaiṣṇavavratatatparaḥ //

jñānī ca rudrasāvarṇirmanuśca dvādaśaḥ smṛtaḥ //
dharmātmā devasāvarṇirmanurevaṃ trayodaśaḥ

caturdaśo mahājñānī candrasāvarṇireva ca //
yāvadāyurmanūnāṃ syādindrāṇāṃ tāvadeva hi

caturdaśendrāvacchinnaṃ brahmaṇo dinamucyate //
tāvatī brahmaṇo rātriḥ sā ca brāhmī niśā nṛpa

kālarātriśca sā jñeyā vedeṣu parikīrttitā //
brahmaṇo vāsare rājankṣudrakalpaḥ prakīrttitaḥ//

saptakalpe ciraṃjīvī mārkaṇḍeyo mahātapāḥ //
brahmalokādadhaḥ sarve lokā dagdhāśca tatra vai

utthitenaiva sahasā saṅkarṣaṇamukhāgninā //
candrārkabrahmaputrāśca brahmalokaṃ gatā dhruvam

brahmarātrivyatīte tu punaśca sasṛje vidhiḥ //
tasyāṃ brahmaniśāyāṃ ca kṣudraḥ pralaya ucyate

devāśca manavaścaiva tatra dagdhā narādayaḥ //
evaṃ triṃśaddivārātrairbrahmaṇo māsa eva ca

varṣaṃ dvādaśamāsaiśca brahmasambandhi caiva hi //
evaṃ pañcadaśābde tu gate ca brahmaṇo nṛpa //
dainaṃdinastu pralayo vedeṣu parikīrttitaḥ //

moharātriśca sā proktā vedavidbhiḥ purātanaiḥ //
tatra sarve praṇaṣṭāssyuścandrārkādidigīśvarāḥ

ādityā vasavo rudrā manavo mānavādayaḥ //
ṛṣayo munayaścaiva gandharvā rākṣasādayaḥ

mārkaṇḍeyo lomaśaśca pecakaścirajīvinaḥ //
indradyumnaśca nṛpatiścākūpāraśca kacchapaḥ

nāḍījaṃgho bakaścaiva sarve naṣṭāśca tatra vai //
brahmalokādadhaḥ sarve lokā nāgālayāstathā //

brahmalokaṃ yayuḥ sarve brahmaputrādayastathā //
gate dainaṃdine brahmā lokāṃśca sasṛje punaḥ

evaṃ śatābdaparyyantaṃ paramāyuḥ prajāpateḥ //
brahmaṇaśca nipāte syānmahākalpo bhavennṛpa

prakīrtitā mahārātriḥ saiva ceha purātanaiḥ //
brahmaṇaśca nipāte ca brahmāṇḍaugho jalaplutaḥ

devamātā ca sāvitrī vedā dharmmādayastathā //
sarve praṇaṣṭā mṛtyuśca prakṛtiṃ ca śivaṃ vinā

nārāyaṇe pralīnāśca viśvasthā vaiṣṇavāstathā //
kālāgnirudraḥ saṃharttā sarvarudragaṇaiḥ saha

mṛtyuñjaye mahādeve pralīnaḥ sa tamo guṇaḥ //
brahmaṇaśca nipātena nimeṣaḥ prakṛterbhavet

nārāyaṇasya śambhośca mahāviṣṇośca niścitam //
nimeṣānte punaḥ sṛṣṭirbhavetkṛṣṇecchayā nṛpa

kṛṣṇo nimeṣarahito nirguṇaḥ prakṛte paraḥ //
saguṇānāṃ nimeṣaśca kālasaṃkhyāvayomitaḥ //

nirguṇasya ca nityasya cādyantarahitasya ca //
nimeṣāṇāṃ sahasreṇa prakṛterdaṇḍa ucyate

ṣaṣṭidaṇḍātmikāstasyā vāsaraśca prakīrttitaḥ //
triṃśadrātriṃ dinairmāso varṣaṃ dvādaśamāsakaiḥ

evaṃ gate śatābde ca śrīkṛṣṇe prakṛterlayaḥ //
prakṛtyāṃ ca pralīnāyāṃ śrīkṛṣṇe prākṛto layaḥ

sarvānsaṃhṛtya sā caikā mahāviṣṇoḥ prasūśca yā //
kṛṣṇavakṣasi līnā ca mūlaprakṛtirīśvarī

santo vadanti tāṃ durgāṃ viṣṇumāyāṃ sanātanīm //
sarvaśaktisvarūpāṃ ca parāṃ nārāyaṇīṃ satīm

buddhyadhiṣṭhātṛdevī ca śrīkṛṣṇasyaiva nirguṇām //
yanmāyāmohitāścaiva brahmaviṣṇuśivādayaḥ

vaiṣṇavāstāṃ mahālakṣmīṃ parāṃ rādhāṃ vadanti te //
arddhāṅgāṃ ca mahālakṣmīḥ priyā nārāyaṇasya ca

prāṇādhiṣṭhātṛdevīṃ ca premṇā prāṇādhikāṃ varām //
sthirapremamayīṃ śaktīṃ nirguṇāṃ nirguṇasya ca

nārāyaṇaśca śambhuśca saṃhṛtya svagaṇānbahūn //
śuddhasattvasvarūpī śrīkṛṣṇe līnaśca nirguṇe//

gopā gopyaśca gāvaśca savatsāśca narādhipa //
sarve līnāḥ prakṛtyāṃ ca prakṛtiḥ parameśvare///
mahāviṣṇau vilīnāśca te sarve kṣudraviṣṇavaḥ //
mahāviṣṇuḥ prakṛtyāṃ ca sā caivaṃ paramātmani

prakṛtiryoganidrā ca śrīkṛṣṇanayanadvaye //
adhiṣṭhānaṃ cakāraivaṃ māyayā ceśvarecchayā

prakṛtervāsaro yāvanmitaḥ kālaḥ prakīrttitaḥ //
tāvadvṛndāvane nidrā kṛṣṇasya paramātmanaḥ

amūlya ratnatalpe ca vahniśuddhāṃśukārcite //
gandhacandanamālyaughavāyvādisurabhīkṛte

punaḥ prajāgare tasya sarvasṛṣṭirbhavetpunaḥ //
evaṃ sarve prākṛtāśca śrīkṛṣṇaṃ nirguṇaṃ vinā

tadvandanaṃ tatsmaraṇaṃ tasya dhyānaṃ tadarcanam //
kīrttanaṃ tadguṇānāṃ ca mahāpātakanāśanam

etatte kathitaṃ sarvaṃ yadyanmṛtyuñjayācchrutam //
yathāgamaṃ mahārāja kiṃ bhūyaḥ śrotumicchasi

suyajña uvāca//
kālāgnirudro viśvānāṃ saṃharttā ca tamoguṇaḥ //
brahmaṇo'nte vilīnaśca sattvaṃ mṛtyuñjaye śive

śivo līno nirguṇe ca śrīkṛṣṇe prākṛte laye //
kathaṃ tava gurornāma mṛtyuñjaya iti śrutam

kathaṃ prasūrmahāviṣṇormūlaprakṛtirīśvarī//
asaṃkhyāni ca viśvāni santi vai yasya lomasu

sutapā uvāca //
brahmaṇo'nte mṛtyukanyā praṇaṣṭā jalabimbavat //
saṃhartrī sarvalokānāṃ brahmādīnāṃ narādhipa

katidhā mṛtyukanyānāṃ brahmaṇāṃ koṭiśo laye //
kālena līnaḥ śambhuśca sattvarūpe ca nirguṇe / १०६ //
mṛtyukanyā jitā śaśvacchivena guruṇā mama //
na mṛtyunā jitaḥ śambhuḥ kalpe kalpe śrutau śrutam

śambhurnārāyaṇasyaiva prakṛteśca narādhipa //
nityānāṃ līnatā nitye tanmāyā na tu vāstavī

svayaṃ pumānnirguṇaśca kālena saguṇaḥ svayam //
svayaṃ nārāyaṇaḥ śambhurmāyayā prakṛtiḥ svayam

tadaṃśastatsamaḥ śaśvadyathā vahneḥ sphuliṅgavat //
ye ye ca brahmaṇā sṛṣṭā rudrādityādayastathā

kalpe kalpe jitāste te naśvarā mṛtyukanyayā //
na śivo brahmaṇā sṛṣṭaḥ satyo nityaḥ sanātanaḥ

katidhā brahmaṇāṃ pāto yannimeṣaṇa bhūmipa //
athādisarge śrīkṛṣṇaḥ prakṛtyāṃ ca jagadguruḥ

cakāra vīryādhānaṃ ca puṇye vṛndāvane vane //
tadvāmāṃśasamudbhūtā rāse rāseśvarī parā

garbhaṃ dadhāra sā rādhā yāvadvai brahmaṇo vayaḥ//
tataḥ suṣāva sā ḍimbhaṃ goloke rāsamaṇḍale

cukopa ḍimbhaṃ sā dṛṣṭvā hṛdayena vidūyatā //
taḍḍimbhaṃ prerayāmāsa tadadho viśva golake

tyaktvā'patya mahādevī ruroda ca muhurmuhuḥ //
kṛṣṇastāṃ bodhayāmāsa mahāyogena yogavit

babhūva tasmāḍimbhācca sarvādhāro mahāvirāṭ

suyajña uvāca //
adya me saphalaṃ janma jīvanaṃ sārthakaṃ mama //
śāpo me vararūpaścāpyabhavadbhaktikāraṇam

sudurlabhā harerbhaktiḥ sarvamaṅgalamaṅgalā //
na tasyāśca samaṃ vipra vedoktaṃ bhaktipañcakam

yathā bhaktirmama bhavecchrīkṛṣṇe paramātmani //
sudurlabhā ca sarveṣāṃ tatkuruṣva mahāmune

nahyammayāni tīrthāni na devā mṛcchilāmayāḥ //
te punantyurukālena kṛṣṇabhaktāśca darśanāt

sarveṣāmāśramāṇāṃ ca dvijāterjātiruttamā //
svadharmaniratāścaiva teṣu śreṣṭhaśca bhārate

kṛṣṇamantropāsakaśca kṛṣṇabhaktiparāyaṇaḥ //
nityaṃ naivedyebhojī ca tataḥ śreṣṭho mahāñchuciḥ

tvāṃ vaiṣṇavaṃ dvijaśreṣṭhaṃ mahājñānārṇavaṃ param //
saṃprāpya śivaśiṣyaṃ ca kaṃ yāmi śaraṇaṃ mune

adhunā'haṃ galatkuṣṭhī tava śāpānmahāmune //
kathaṃ tapasyāmaśucirnādhikārī karomi ca

sutapā uvāca //
haribhaktipradātrī sā viṣṇumāyā sanātanī //
sā ca yānanugṛhṇāti tebhyo bhaktiṃ dadāti ca

yāṃśca māyā mohayati tebhyastāṃ na dadāti ca //
karoti vañcanāṃ teṣāṃ naśvareṇa dhanena ca

kṛṣṇapremamayīṃ śaktiṃ prāṇādhiṣṭhātṛdevatām //
bhaja rādhāṃ nirguṇāṃ tāṃ pradātrīṃ sarvasampadām

śīghraṃ yāsyāsi golokaṃ tadanugrahasevayā //
sā sevitā śrīkṛṣṇena sarvārādhyena pūjitā

dhyānasādhyaṃ durārādhyaṃ bhaktāḥ saṃsevya nirguṇam //
sucireṇa ca golokaṃ prayānti bahujanmataḥ

kṛpāmayīṃ ca saṃsevya bhaktā yāntyacireṇa vai //
sā prasūśca mahāviṣṇoḥ sarvasampatsvarūpiṇī

sahasravarṣaparyyantaṃ viprapādodakaṃ piba //
kāmadevasvarūpaśca rogahīno bhaviṣyasi

viprapādodakaklinnā yāvattiṣṭhati medinī //
tāvatpuṣkarapatreṣu pibanti pitaro jalam

pṛthivyāṃ yāni tīrthāni tāni tīrthāni sāgare //
sāgare yāni tīrthāni viprapādeṣu tāni ca

viprapādodakaṃ caiva pāpavyādhivināśanam //
sarvatīrthodakasamaṃ bhuktimuktipradaṃ śubham

vipro mānavarūpī ca devadevo janārdanaḥ //
vipreṇa dattaṃ dravyaṃ ca bhuñjate sarvadevatāḥ

ityevamuktvā vipraśca gṛhītvā tasya pūjanam //
jagāma gṛhamityuktvā tvāyāsye vatsarāntare

bhaktyā ca bubhuje rājā viprapādodakaṃ śive //
viprāṃśca pūjayāmāsa bhojayāmāsa vatsaram

saṃvatsare vyatīte tu nirmukto vyādhito nṛpaḥ //
ājagāma muniśreṣṭhaḥ sutapāḥ kaśyapāgraṇīḥ

rādhāpūjāvidhānaṃ ca stotraṃ ca kavacaṃ manum //
dhyānaṃ ca sāmavedoktaṃ dadau tasmai nṛpāya saḥ

rājannirgamyatāṃ śīghramityuktvā tapase muniḥ //
jagāma svālayāddurgaṃ nirjagāma tvarannṛpaḥ

rurudurbāndhavāḥ sarve trirātraṃ śokamūrcchitāḥ //
bhāryyāśca tatyajuḥ prāṇānputro rājā babhūva ha

suyajñaḥ puṣkaraṃ gatvā cakre vai duṣkaraṃ tapaḥ //
divyaṃ varṣaśataṃ rājā jajāpa paramaṃ manum

tadā dadarśa gagane rathasthāṃ parameśvarīm //
sa taddarśanamātreṇa niṣpāpaśca babhūva ha

tatyāja mānuṣaṃ dehaṃ divyāṃ mūrttiṃ dadhāra ha //
sā devī tena yānena ratnendrairnirmitena ca

nṛpaṃ nītvā ca golokaṃ tatra caiṣā yayau tadā //
rājā dadarśa golokaṃ nadyā virajayā vṛtam

veṣṭitaṃ parvatenaiva śataśṛṅgeṇa cāruṇā//
śrīvṛndāvanasaṃyuktaṃ rāsamaṇḍalamaṇḍitam

gogopagopīnikaraiḥ śobhitaṃ parisevataiḥ//
ratnendrasārakhacitairmandiraiḥ sumanoharaiḥ

nānācitravicitraiśca rājitaṃ pariśobhitam//
saptatriṃśadbhirākrīḍaiḥ kalpavṛkṣasamanvitaiḥ

pārijātadrumākīrṇairveṣṭitaṃ kāmadhenubhiḥ //
ākāśavatsuvistīrṇaṃ vartulaṃ candrabimbavat

atyūrdhvamapi vaikuṇṭhātpañcāśatkoṭiyojanam //
śūnye sthitaṃ nirādhāraṃ dhuvameveśvarecchayā

ātmākāśasamaṃ nityamasmākaṃ ca sudurlabham //
ahaṃ nārāyaṇo'nanto brahmā viṣṇurmahānvirāṭ

dharmakṣudravirāṭsaṃgho gaṅgā lakṣmīḥ sarasvatī //
tvaṃ viṣṇumāyā sāvitrī tulasī ca gaṇeśvaraḥ

sanatkumāraḥ skandaśca naranārāyaṇāvṛṣī //
kapilo dakṣiṇā yajño brahmaputrāśca yoginaḥ

pavano varuṇaścandraḥ sūryyo rudro hutāśanaḥ //
kṛṣṇamantropāsakaśca bhāratasthāśca vaiṣṇavāḥ

ebhirdṛṣṭaśca goloko nānyairdṛṣṭaḥ kadācana//
nirāmaye ca tatraiva ratnasiṃhāsane sthitam

ratnamālākirīṭaiśca bhūṣitaṃ ratnabhūṣaṇaiḥ//
sunirmalaiḥ pītavastraiḥ vahniśuddhairvirājitam

candanokṣitasarvāṅgaṃ kiśoraṃ goparūpiṇam //
navīnanīradaśyāmaśvetapaṅkajalocanam

śaratpārvaṇacandrāsyamīṣaddhāsyaṃ manoharam //
dvibhujaṃ muralīhastaṃ bhaktānugrahavigraham

svecchāmayaṃ paraṃ brahma nirguṇaṃ prakṛteḥ param//
dhyānasādhyaṃ durārādhyamasmākaṃ ca sudurlabham

priyairdvādaśagopālaiḥ sevitaṃ śvetacāmaraiḥ//
vīkṣitaṃ gopikāvṛndaiḥ sasmitaiḥ sumanoharaiḥ

pīḍitaiḥ kāmabāṇaiśca śaśvatsusthirayauvanaiḥ//
vahniśuddhāṃśukādhānai ratnabhūṣaṇabhūṣitaiḥ

rāsamaṇḍalamadhyasthaṃ śrīkṛṣṇaṃ ca parātparam //
dadarśa rājā tatraiva rādhayā darśitaṃ tadā

stutaṃ caturbhivedaiśca mūrtimadbhirmanoharaiḥ //
rāgiṇīnāṃ ca rāgāṇāmatīva sumanoharam

śrutavantaṃ ca saṅgītaṃ yantravaktrotthitaṃ śive //
nityayā ca sanātanyā prakṛtyā ca saha tvayā

śaśvatpūjitapādābjamakhaṇḍatulasīdalaiḥ //
kastūrīkuṃkumāktaiśca gandhacandanacarcitaiḥ

dūrvābhirakṣatābhiśca pārijātaprasūnakaiḥ //
nirmalairvirajātoyairdattārghyairatiśobhitam

suprasannaṃ svatantraṃ ca sarvakāraṇakāraṇam //
sarveṣāṃ cāntarātmānaṃ sarveśaṃ sarvajīvanam

sarvādhāraṃ paraṃ pūjyaṃ brahma jyotiḥ sanātanam //
sarvasampatsvarūpaṃ ca dātāraṃ sarvasampadām

sarvamaṅgalarūpaṃ ca sarvamaṅgalakāraṇam //
sarvamaṃgaladaṃ sarvamaṃgalanāṃ ca maṃgalam

taṃ dṛṣṭvā nṛpatistrasto hyavaruhya rathāttvaran //
sāśrunetraḥ pulakito mūrdhnā sa praṇanāma ca

paramātmā dadau tasmai svadāsyaṃ ca śubhāśiṣam //
svabhaktiṃ niścalāṃ satyāmasmākaṃ ca sudurlabhām

rādhā'varuhya svarathātkṛṣṇavakṣasyuvāsa sā //
gopībhiḥ supriyābhiśca sevitā śvetacāmaraiḥ //

sambhāṣitā śrīkṛṣṇena sasmitena ca pūjitā //
samutthitena sahasā bhaktyā vai sambhrameṇa ca

ādau rādhāṃ samuccāryya paścātkṛṣṇaṃ ca mādhavam //
pravadanti ca vedeṣu vedavidbhiḥ purātanaiḥ

viparyyayaṃ ye vadanti ye nindanti jagatprasūm //
kṛṣṇaprāṇādhikāṃ premamayīṃ śaktiṃ ca rādhikām

te pacyante kālasūtre yāvaccandradivākaram //
bhavanti strīputrahīnā rogiṇaḥ śatajanmasu ///१७७/
ityevaṃ kathitaṃ durge rādhikākhyānamuttamam //
sā tvaṃ satī bhagavatī vaiṣṇavī ca sanātanī

nārāyaṇī viṣṇumāyā mūlaprakṛtirīśvarī //
māyayā māṃ pṛcchasi tvaṃ sarvajñā sarvarūpiṇī//१७९/
strījātiṣvadhidevī ca parā jātismarā varā //
kathitaṃ rādhikākhyānaṃ kiṃ bhūyaḥ śrotumicchasi

iti śrībrahmavaivartte mahāpurāṇe dvitīye prakṛtikhaṇḍe nāradanārāyaṇasaṃ vādāntargataharagaurīsaṃvāde rādhākhyāne suyajñākhyāne sutapaḥsuyajñasaṃvāde suyajñasya golokaprāptirnāma catuṣpañcāśattamo'dhyāyaḥ