Brahmavaivarta Purana · Chapter 2.48

nārada uvāca //
nārāyaṇa mahābhāga nārāyaṇaparāyaṇa //
nārāyaṇāṃśa bhagavanbrūhi nārāyaṇīṃ kathām

śrutaṃ surabhyupākhyānamatīva sumanoharam //
gopyaṃ sarvapurāṇeṣu purāvidbhiḥ praśaṃsitam

adhunā śrotumicchāmi rādhikākhyānamuttamam //
tadutpattiṃ ca taddhyānaṃ stotraṃ kavacamuttamam

śrīnārāyaṇa uvāca //
purā kailāsaśikhare bhagavantaṃ sanātanam //
siddheśaṃ siddhidaṃ sarvasvarūpaṃ śaṃkaraṃ param

praphullavadanaṃ prītaṃ sasmitaṃ munibhiḥ stutam //
kumārāya prarocantaṃ kṛṣṇasya paramātmanaḥ

rāsotsavarasākhyānaṃ rāsamaṇḍalavarṇanam //
tadākhyānāvasāne ca prastāvāvasare satī

papraccha pārvatī sphītā sasmitā prāṇavallabham //
stavanaṃ kurvatī bhītā prāṇeśena prasāditā /

provāca taṃ mahādevaṃ mahādevī sureśvarī //
apūrvaṃ rādhikākhyānaṃ purāṇeṣu sudurlabham

śrīpārvatyuvāca //
āgamaṃ nikhilaṃ nātha śrutaṃ sarvamanuttamam //
pāñcarātrādikaṃ nītiśāstrayogaṃ ca yoginām

siddhānāṃ siddhiśāstraṃ ca nānātantraṃ manoharam //
bhaktānāṃ bhaktiśāstraṃ ca kṛṣṇasya paramātmanaḥ

devīnāmapi sarvāsāṃ caritaṃ tvanmukhāmbujāt //
adhunā śrotumicchāmi rādhikākhyānamuttamam //१ १//
śrutau śrutaṃ praśastaṃ ca rādhāyāśca samāsataḥ //
tvanmukhātkāṇvaśākhāyā vyāsenoktāṃ vadādhunā

āgamākhyānakāle ca bhavatā svīkṛtaṃ purā //
nahīśvaravyāhṛtiśca mithyā bhavitumarhati

tadutpatiṃ ca taddhyānaṃ nāmno māhātmyamuttamam //
pūjāvidhānaṃ caritaṃ stotraṃ kavacamuttamam

ārādhanavidhānaṃ ca pūjāpaddhatimīpsitām//
sāmprataṃ brūhi bhagavanmāṃ bhaktāṃ bhaktavatsala

kathaṃ na kathitaṃ pūrvamāgamākhyānakālataḥ //
pārvatīvacanaṃ śrutvā namravaktro babhūva saḥ

pañcavaktraśca bhagavāñchuṣkakaṇṭhoṣṭhatālukaḥ //
svasatyabhaṅgabhītaśca maunībhūya vicintayan

sasmāra kṛṣṇaṃ dhyānenābhīṣṭadevaṃ kṛpānidhim //
tadanujñāṃ ca saṃprāpya svārddhāṅgāṃ tāmuvāca saḥ

niṣiddho'haṃ bhagavatā kṛṣṇena paramātmanā //
āgamārambhasamaye rādhākhyānaprasaṃgataḥ

madarddhāṃgasvarūpā tvaṃ na madbhinnā svarūpataḥ //
ato'nujñāṃ dadau kṛṣṇo mahyaṃ vaktuṃ maheśvari

madiṣṭadevakāntāyā rādhāyāścaritaṃ sati //
atīva gopanīyaṃ ca sukhadaṃ kṛṣṇabhaktidam

jānāmi tadahaṃ durge sarvaṃ pūrvāparaṃ varam //
yajjānāmi rahasyaṃ ca na tadbrahmā phaṇīśvaraḥ

na tatsanatkumāraśca na ca dharmaḥ sanātanaḥ //
na devendro munīṃdrāśca siddhendrāḥ siddhapuṅgavāḥ

matto balavatī tvaṃ ca prāṇāṃstyaktuṃ samudyatā //
atastvāṃ gopanīyaṃ ca kathayāmi sureśvari

śṛṇu durge pravakṣyāmi rahasyaṃ paramādbhutam //
caritaṃ rādhikāyāśca durlabhaṃ ca supuṇyadam

purā vṛndāvane ramye goloke rāsamaṇḍale //
śataśṛṃgaikadeśe ca mālatīmallikāvane

ratnasiṃhāsane ramye tasthau tatra jagatpatiḥ //
svecchāmayaśca bhagavānbabhūva ramaṇotsukaḥ

riraṃsostasya jagatāṃ patyustanmallikāvane //
icchayā ca bhavetsarvaṃ tasya svecchāmayasya ca

etasminnantare durge dvidhārūpo babhūva saḥ //
dakṣiṇāṃgaṃ ca śrīkṛṣṇo vāmārddhāṃgā ca rādhikā

babhūva ramaṇī ramyā rāseśā ramaṇotsukā //
amūlyaratnābharaṇā ratnasiṃhāsanasthitā

vahniśuddhāṃśukādhānā koṭipūrṇaśaśiprabhā //
taptakāñcanavarṇābhā rājitā ca svatejasā

sasmitā sudatī śuddhā śaratpadmanibhānanā //
bibhratī kabarīṃ ramyāṃ mālatīmālyamaṇḍitām

ratnamālāṃ ca dadhatī grīṣmasūryyasamaprabhām //
muktāhāreṇa śubhreṇa gaṃgādhārānibhena ca

saṃyuktaṃ vartulottuṃgaṃ sumeru girisannibham //
kaṭhinaṃ sundaraṃ dṛśyaṃ kastūrīpatracihnitam

māṃgalyaṃ maṃgalārhaṃ ca stanayugmaṃ ca bibhratī //
nitambaśroṇibhārārttā navayauvanasundarī

kāmāturaḥ sasmitāṃ tāṃ dadarśa rasikeśvaraḥ //
dṛṣṭvā kāntāṃ jagatkānto babhūva ramaṇotsukaḥ

dṛṣṭvā cainaṃ sukāntaṃ ca sā dadhāra hareḥ puraḥ //
tena rādhā samākhyātā purāvidbhirmaheśvari

rādhā bhajati taṃ kṛṣṇaṃ sa ca tāṃ ca parasparam //
ubhayoḥ sarvasāmyaṃ ca sadā santo vadanti ca

bhavanaṃ dhāvanaṃ rāse smaratyāliṃganaṃ japan //
tena jalpati saṃketaṃ tatra rādhāṃ sa īśvaraḥ

rāśabdoccāraṇādbhakto rāti muktiṃ sudurlabhām //
dhāśabdoccāraṇāddurge dhāvatyeva hareḥ padam //

kṛṣṇavāmāṃśasambhūtā rādhā rāseśvarī purā //
tasyāścāṃśāṃśakalayā babhūvurdevayoṣitaḥ

rā ityādānavacano dhā ca nirvāṇavācakaḥ //
tato'vāpnoti muktiṃ ca tena rādhā prakīrtitā

babhūva gopīsaṃghaśca rādhāyā lomakūpataḥ //
śrīkṛṣṇalomakūpebhyo babhūvuḥ sarvaballavāḥ

rādhāvāmāṃśabhāgena mahālakṣmīrbabhūva sā //
tasyādhiṣṭhātṛdevī sā gṛhalakṣmīrbabhūva sā

caturbhujasya sā patnī devī vaikuṇṭhavāsinī//
tadaṃśā rājalakṣmīśca rājasampatpradāyinī

tadaṃśā martyalakṣmīśca gṛhiṇāṃ ca gṛhe gṛhe //
dīpādhiṣṭhātṛdevī ca sā caiva gṛhadevatā

svayaṃ rādhā kṛṣṇapatnī kṛṣṇavakṣaḥsthalasthitā //
prāṇādhiṣṭhātṛdevī ca tasyaiva paramātmanaḥ

ābrahmastambaparyantaṃ sarvaṃ mithyaiva pārvati //
bhaja satyaṃ paraṃ brahma rādheśaṃ triguṇātparam

paraṃ pradhānaṃ paramaṃ paramātmānamīśvaram //
sarvādyaṃ sarvapūjyaṃ va nirīhaṃ prakṛteḥ param

svecchāmayaṃ nityarūpaṃ bhaktānugrahavigraham //
tadbhinnānāṃ ca devānāṃ prākṛtaṃ rūpameva ca

tasya prāṇādhikā rādhā bahusaubhāgyasaṃyutā //
mahāviṣṇoḥ prasūḥ sā ca mūlaprakṛtirīśvarī

māninīṃ rādhikāṃ santaḥ sevante nityaśassadā //
sulabhaṃ yatpadāmbhojaṃ brahmādīnāṃ sudurlabham

svapne rādhāpadāmbhojaṃ nahi paśyanti ballavāḥ //
svayaṃ devī hareḥ kroḍe chāyārūpeṇa kāminī

sa ca dvādaśagopānāṃ rāyāṇapravaraḥ priye //
śrīkṛṣṇāṃśaśca bhagavānviṣṇutulyaparākramaḥ

sudāmaśāpātsā devī golokādāgatā mahīm //
vṛṣabhānugṛhe jātā tanmātā ca kalāvatī

iti śrībrahmavaivartte mahāpurāṇe dvitīye prakṛtikhaṇḍe nāradanārāyaṇasaṃvādāntargata haragaurīsaṃvāde rādhopākhyāne rādhotpattitatpūjādikathanaṃ nāmāṣṭacatvāriṃśattamo'dhyāyaḥ