Brahmavaivarta Purana · Chapter 2.33

yama uvāca //
pūrṇendumaṇḍalākāraṃ sarvakuṇḍaṃ ca vartulam //
atīva nimnaṃ pāṣāṇabhedaiśca khacitaṃ sati

na naśvaraṃ cāpralayaṃ nirmitaṃ ceśvarecchayā //
kleśadaṃ vai pātakināṃ nānārūpaṃ tadālayam

jvaladaṅgārarūpaṃ ca śatahastaśikhānvitam //
paritaḥ krośamānaṃ ca vahnikuṇḍaṃ prakīrttitam

mahacchabdaṃ prakurvadbhiḥ pāpibhiḥ paripūritam //
rakṣitaṃ mama dūtaiśca tāḍitaiścāpi santatam

prataptodakapūrṇaṃ ca hiṃsrajantusamanvitam //
mahāghorāndhakāraṃ ca pāpisaṃghena saṃkulam

prakurvatā kākuśabdaṃ prahārairvarṇitena ca//
krośārddhamānaṃ maddūtastāḍitena ca rakṣitam

tattakṣārodakaiḥ pūrṇaṃ nakraiśca pariveṣṭitam //
saṅkulaṃ pāpibhiścaiva krośamānaṃ bhayānakam

trāhīti śabdaṃ kurvadbhirmama dūtaiśca tāḍitaiḥ //
pracaladbhiranāhāraiḥ śuṣkakaṇṭhauṣṭhatālukaiḥ

viṇmūtraireva pūrṇaṃ ca krośamānaṃ ca kutsitam //
atidurgandhisaṃyuktaṃ vyāptaṃ pāpibhireva ca

tāḍitairmama dūtaiścāpyanāhārairupadravaiḥ //
rakṣeti śabdaṃ kurvadbhistatkīṭaireva bhakṣitam//

taptamūtradravaiḥ pūrṇaṃ mūtrakīṭaiśca saṃkulam //
yuktaṃ mahāpāpibhiśca tatkīṭairdaṃśitaṃ sadā

gavyūtimānaṃ dhvāntāktaṃ śabdakṛdbhiśca santatam//
maddūtaistāḍitairghoraiḥ śuṣkakaṇṭhauṣṭhatālukaiḥ

ślaiṣmapūrṇaṃ krośamitaṃ veṣṭitaṃ ceṣṭitaiḥ sadā //
tadbhojibhiḥ pāpibhiśca tatkīṭairbhakṣitaiḥ sadā

krośārddhaṃ garapūrṇaṃ ca garabhojibhiranvitam //
garakīṭairbhakṣitaiśca pāpibhiḥ pūrṇameva ca

tāḍitairmama dūtaiśca śabdakṛdbhiśca kampitaiḥ //
sarpākārairvajradaṃṣṭraiḥ śuṣkakaṇṭhaiḥ sudāruṇaiḥ

netrayormalapūrṇaṃ ca krośārddhaṃ kīṭasaṃyutam //
pāpibhiḥ saṃkulaṃ śaśvaddravadbhiḥ kīṭabhakṣitaiḥ

vasārasena pūrṇaṃ ca krośaturyyaṃ sudussaham //
tadbhojibhiḥ pātakibhirvyāptaṃ dūtaiśca tāḍitaiḥ

śukrapūrṇaṃ krośaturyyaṃ śukrakīṭaiśca bhakṣitaiḥ //
krandadbhiḥ pāpibhiḥ śaśvatsaṃkulaṃ vyākulairbhiyā//

durgandhiraktapūrṇaṃ ca vāpīmānaṃ gabhīrakam //
tadbhojibhiḥ pāpibhiśca saṃkulaṃ kīṭabhakṣitaiḥ

pūrṇaṃ netrāśrubhirnṛṇāṃ vāpyarddhaṃ pāpibhiryutam //
tāḍitairmama dūtaiśca tadbhakṣyaiḥ kīṭabhakṣitaiḥ

nṛṇāṃ gātramalaiḥ pūrṇaṃ tadbhakṣyaiḥ pāpibhiryutam //
tāḍitairmama dūtaiśca vyagraiśca kīṭabhakṣitaiḥ

karṇaviṭparipūrṇaṃ ca tadbhakṣyaiḥ pāpibhiryutam //
vāpīturyyapramāṇaṃ ca rudadbhiḥ kīṭabhakṣitai

majjāpūrṇaṃ narāṇāṃ ca mahādurgandhisaṃyutam //
mahāpātakibhiryuktaṃ vāpīturyyapramāṇakam

paripūrṇaṃ snigdhamāṃsairmama dūtaiśca tāḍitaiḥ//
pāpibhiḥ saṅkulaṃ caiva vāpīmānaṃ bhayānakam

kanyāvikrayibhiścaiva tadbhakṣyaiḥ kīṭabhakṣitaiḥ //
trāhīti śabdaṃ kurvadbhistrāsitaiśca bhayānakam

vāpīturyyapramāṇaṃ ca nakhādikacatuṣṭayam //
pāpibhiḥ saṃkulaṃ śaśvanmama dūtaiśca tāḍitaiḥ // २६ /!
prataptatāmrakuṃḍaṃ ca tāmraparyyunmukhānvitam //
tāmrāṇāṃ pratimālakṣaiḥ prataptairāvṛtaṃ sadā

pratyekaṃ pratimāśliṣṭai rudadbhiḥ pāpibhiryutam //
gavyūtimānaṃ vistīrṇaṃ mama dūtaiśca tāḍitaiḥ

prataptalohadhāraṃ ca jvaladaṅgārasaṃyutam //
lohānāṃ pratimālakṣaiḥ prataptairāvṛtaṃ sadā

pratyekaṃ sarvasaṃśliṣṭaiḥ śaśvadvicalitairbhiyā //
rakṣa rakṣeti śabdaṃ ca kurvadbhirdūtatāḍitaiḥ

mahāpātakibhiryuktaṃ dvigavyūtipramāṇakam //
bhayānakaṃ dhvāntayuktaṃ lauhakuṇḍaṃ prakīrtitam

dharmakuṇḍaṃ taptasurākuṇḍaṃ vāpyarddhameva ca //
tadbhojibhiḥ pāpibhiśca vyāptaṃ maddūtatāḍitaiḥ

adhaḥ śālmalivṛkṣasya tīkṣṇakaṇṭakakuṇḍakam //
lakṣapauruṣamānaṃ ca krośamānaṃ ca duḥkhadam

dhanurmāne kaṇṭakaiśca sutīkṣṇaiḥ pariveṣṭitam

pratyekaṃ kaṃṭakairviddhaṃ mahāpātakibhiryutam //
vṛkṣāgrānnipatadbhiśca mama dūtaiśca tāḍitaiḥ

jalaṃ dehīti śabdaṃ ca kurvadbhiḥ śuṣkatālukaiḥ //
mahābhayā'tivyagraiśca daṇḍasaṃbhinnamastakaiḥ //
pracaladbhiryathā taptataile jīvibhireva ca

viṣaughaistakṣakādīnāṃ pūrṇaṃ ca krośamānakam//
tadbhakṣyaiḥ pāpibhiryuktaṃ mama dūtaiśca tāḍitaiḥ

prataptatailapūrṇaṃ ca kīṭādiparivarjitam //
tadbhakṣyaiḥ pāpibhiryuktaṃ snigdhagātraiśca veṣṭitaiḥ

kākuśabdaṃ prakurvadbhiścaladbhirdūtatāḍitaiḥ //
mahāpātakibhiryuktaṃ dvigavyūtipramāṇakam

śastrakuṇḍaṃ dhvāntayuktaṃ krośamānaṃ bhayānakam //
śūlākāraiḥ sutīkṣṇāgrairlauhaśastraiśca veṣṭitam

śastratalpasvarūpaṃ ca krośaturyyapramāṇakam //
pātakibhirveṣṭitaṃ ca kuntaviddhaiśca veṣṭitam

tāḍitairmama dūtaiśca śuṣkakaṇṭhauṣṭhatālakaiḥ //
kīṭaiḥ saṃpīḍyamānaiśca sarpayānairbhayaṅkaraiḥ

tīkṣṇadantaiśca vikṛtairvyāptaṃ dhvāntayutaṃ sati //
mahāpātakibhiryuktaṃ bhītairvā kīṭabhakṣitaiḥ //
rudadbhiḥ krośamānaṃ ca mama dūtaiśca tāḍitaiḥ

atidurgandhisaṃyuktaṃ krośārddhaṃ pūyasaṃyutam //
tadbhakṣyaiḥ pāpibhiryuktaṃ mama dūtaiśca tāḍitaiḥ

dvigavyūti pramāṇaṃ ca himatoyaprapūritam //
tālavṛkṣapramāṇaiśca sarpakoṭibhirāvṛtam // ४९' //
sarpaveṣṭitagātraiśca pāpibhiḥ sarpabhakṣitaiḥ //
saṃkulaṃ śabdakṛdbhiśca mama dūtaiśca tāḍitaiḥ

kuṇḍatrayaṃ maśādīnāṃ pūrṇaṃ ca maśakādibhiḥ //
sarvaṃ kośārddhamānaṃ ca mahāpātakibhiryutam

hastapādādibhirbaddhaiḥ kṣatraiḥ kṣatajalauhitaiḥ //
hāheti śabdaṃ kurvadbhiḥ pracaladbhiśca santatam

vajravṛścikayoḥ kuṇḍaṃ tābhyāṃ ca paripūritam //
vāpyarddhaṃ pāpibhiryuktaṃ vajravṛścikadaṃśitaiḥ

kuṇḍatrayaṃ śarādīnāṃ taireva paripūritam //
tairviddhaiḥ pāpibhiryuktaṃ vāpyarddhaṃ raktalohitaiḥ

taptapaṅkodakaiḥ pūrṇaṃ sadhvāntaṃ golakuṇḍakam //
kīṭaiḥ saṃpīḍyamānaiśca bhakṣitaiḥ pāpibhiryutam

vāpyarddhaṃ paripūrṇaṃ ca jalasthairnakrakoṭibhiḥ //
dāruṇairvikṛtākārairbhakṣitaiḥ pāpibhiryutam

viṇmūtraśleṣmabhakṣyaiśca saṃyuktaṃ śatakoṭibhiḥ //
kākaiśca vikṛtākārairdhanurlakṣaṃ ca pāpibhiḥ

sañcālavājayoḥ kuṇḍaṃ tābhyāṃ ca paripūritam //
bhakṣitaiḥ pāpibhiryuktaṃ śabdakṛdbhiśca santatam

dhanuḥśataṃ vajrayuktaṃ pāpibhiḥ saṅkulaṃ sadā //
śabdakṛdbhirvajradagdhairantardhvāntamayaṃ sadā//

vāpīdviguṇayānaṃ ca taptaprastaranirmitam //
jvaladaṅgārasadṛśaṃ caladbhiḥ pāpibhiryutam

kṣuradhāropamaistīkṣṇaiḥ pāṣāṇe rnirmitaṃ param //
mahāpātakibhiryuktaṃ kṣataṃ kṣatajalohitaiḥ

durgandhilālāpūrṇaṃ ca tadbhakṣyaiḥ pāpibhiryutam //
krośamānaṃ gabhīraṃ ca mama dūtaiśca tāḍitaiḥ

taptatoye'ñjanākāraiḥ paripūrṇaṃ dhanuśśatam //
caladbhiḥ pāpibhiryuktaṃ mama dūtena tāḍitaiḥ

pūrṇaṃ cūrṇadravaiḥ krośamānaṃ pāpibhiranvitam //
tadbhojibhiḥ pradagdhaiśca mama dūtaiśca tāḍitaiḥ

kuṇḍaṃ kulālacakrābhaṃ ghūrṇyamānaṃ ca santatam //
sutīkṣṇaṣoḍaśāraṃ ca ghūrṇitaiḥ pāpibhiryutam

atīva vakraṃ nimnaṃ ca dvigavyūtipramāṇakam //
kandarākāranirmāṇaṃ taptodakasamanvitam

mahāpātakibhiryuktaṃ bhakṣitairjalajantubhiḥ //
pracaladbhiḥ śabdakṛdbhirdhvāntayuktaṃ bhayānakam

koṭibhirvikṛtākāraiḥ kacchapaiśca sudāruṇaiḥ //
jalasthaiḥ saṃyutaṃ taiśca bhakṣitaiḥ pāpibhiryutam

jvālākalāpaistejobhinirmitaṃ krośamānakam //
śabdakṛdbhiḥ pāpibhiśca caladbhiḥ saṃyutaṃ sadā

krośamānaṃ gabhīraṃ ca taptabhasmabhiranvitam //
śaśvaccaladbhiḥ saṃyuktaṃ pāpibhirbhasmabhakṣitaiḥ

taptapāṣāṇaloṣṭānāṃ samūhaiḥ paripūritam //
prāṇibhirdagdhagātraiśca yuktaṃ vai śuṣkatālukaiḥ

krośamānaṃ dhvāntamayaṃ gabhīramatidāruṇaiḥ //
tāḍitairmama dūtaiśca dagdhakuṇḍaṃ prakīrtitam

apyūrmiyuktatoyaṃ ca prataptakṣārasaṃyutam //
nānāprakāra vikṛtaṃ jalajantusamanvitam

dvigavyūtipramāṇaṃ ca gabhīraṃ dhvāntasaṃyutam //
tadbhakṣyaiḥ pāpibhiryuktaṃ daṃśitairjalajantubhiḥ

caladbhiḥ krandamānaiśca na paśyadbhiḥ parasparam //
uttaptasūrmikuṇḍaṃ ca kīrtitaṃ ca bhayānakam

asipatravanasyaivāpyuccaistāla taroradhaḥ //
krośārddhamānakuṇḍaṃ ca patatpatrasamanvitam

pāpināṃ raktapūrṇaṃ ca vṛkṣāgrātpatatāṃ param //
paritrāhīti śabdaṃ ca kurvatāmasatāmapi

gabhīraṃ dhvāntasaṃyuktaṃ raktakīṭasamanvitam //
tadasīpatrakuṇḍaṃ ca kīrtitaṃ ca bhayānakam

dhanuśśatapramāṇaṃ ca kṣurākārāstrasaṃkulam//
pāpināṃ raktapūrṇaṃ ca kṣuradhāraṃ bhayānakam

sūcīvāśyāstrasaṃyuktaṃ pāpiraktaughapūritam//
pañcāśaddhanurāyāmaṃ kleśadaṃ sūcīkāmukham

godhāhvajantubhedasya mukhākṛti bhayānakam //
kūparūpaṃ gabhīraṃ ca dhanurviṃśatimānakam

mahāpātakinā caiva mahākleśakaraṃ param //
tatkīṭabhakṣitānāṃ ca namrāsyānāṃ ca santatam

kuṇḍaṃ naramukhākāraṃ dhanuṣṣoḍaśamānakam //
gabhīraṃ kūparūpaṃ ca pāpiṣṭhaiḥ saṃkulaṃ sadā

gajendrāṇāṃ samūhena vyāptaṃ kuṇḍākṛti sthalam//
gajadantahatānāṃ ca pāpināṃ raktapūritam

tatkīṭabhakṣitānāṃ ca dīnaśabdakṛtāṃ sadā //
dhanuśśatapramāṇaṃ ca kīrttitaṃ gajadaṃśanam

dhanustriṃśatpramāṇaṃ ca kuṇḍaṃ vai gomukhākṛti //
pāpināṃ duḥkhadaṃ caiva gomukhaṃ parikīrttitam

bhramitaṃ kālacakreṇa santataṃ ca bhayānakam //
kumbhākāraṃ dhvāntayuktaṃ dvigavyūtipramāṇakam

lakṣamānavamānaṃ ca gabhīramativistṛtam //
kutracittaptatailaṃ ca kuṇḍābhyantaramantike

kutracittaptalauhādikuṇḍaṃ tāmrādikaṃ tathā //
kutracittaptapāṣāṇakuṇḍābhyantaramantike

pāpināṃ ca pradhānaiśca mahāpātakibhiryutam //
parasparaṃ na paśyadbhiḥ śabdakṛdbhiśca santatam

tāḍitairmama dūtaiśca daṇḍaiśca musalaistathā

ghūrṇamānaṃ patadbhiśca mūrcchitaiśca muhurmuhuḥ //
pātitairmama dūtaiścāpyatyūrdhvātpatitaiḥ kṣaṇam

yāvantaḥ pāpinaḥ santi sarvakuṇḍeṣu sundari //
caturguṇāḥ santi tatra kumbhīpāke ca dustare

suciraṃ patitāścaiva bhogadehavivarjitāḥ //
sarvakuṇḍapradhānaṃ ca kumbhīpākaṃ prakīrtitam

kālanirmitasūtreṇa nibaddhā yatra pāpinaḥ //
utthāpitāśca maddūtaiḥ kṣaṇameva nimajjitāḥ

niśvāsabandhāḥ suciraṃ kuṇḍānāmantare tathā //
atīvakleśayuktāśca bhogadehā anaśvarāḥ

daṇḍena musalenaiva mama dūtaiśca tāḍitāḥ //
prataptatoyayuktaṃ ca kālasūtraṃ prakīrtitam

avaṭaḥ kūpabhedaśca yatrodaṃ ca tadākṛti //
prataptatoyapūrṇaṃ ca dhanurviṃśatpramāṇakam

vyāptaṃ mahāpāpibhiśca dagdhagātraiśca santatam //
maddūtaistāḍitaiḥ śaśvadavaṭodaṃ prakīrtitam

yattoyasparśamātreṇa sarva vyādhiśca pāpinām //
bhavedakasmātpatatāṃ yatra kuṇḍe dhanuśśate

sarve ruddhāḥ pāpinaśca vyathante yatra santatam //
hāheti śabdaṃ kurvantastadevāruntudaṃ viduḥ /

taptapāṃsubhirākīrṇaṃ jvaladbhistu sudagdhakaiḥ //
tadbhakṣyaiḥ pāpibhiryuktaṃ pāṃsubhojaṃ dhanuśśatam

patatāṃ pāpināṃ yatra bhavedeva prakampanam //
pātamātreṇa pāpī vai bhavetpāśena veṣṭitaḥ

krośamāne ca kuṇḍe vai vidustatpāśaveṣṭanam //
dhanurviṃśatimānaṃ ca śūlaprotaṃ prakīrtitam

pātamātreṇa pāpī ca śūlena grathito bhavet //
patatāṃ pāpināṃ yatra bhavedeva prakampanam

atīva himatoye ca krośārddhaṃ ca prakampanam //
dadatyeva hi maddūtā yatrolkāḥ pāpināṃ mukhe

dhanurviṃśatimānaṃ ca tadulkābhiśca saṃkulam //
lakṣamānavamānaṃ ca gabhīraṃ ca dhanuśśatam

nānāprakārakrimibhiḥ saṃyuktaṃ ca bhayānakaiḥ //
atyandhakārakhyāptaṃ yatkūpākāraṃ ca varttulam

tadbhakṣyaiḥ pāpibhiryuktaṃ na paśyadbhiḥ parasparam//
taptatoyapradagdhaiśca caladbhiḥ kīṭabhakṣitaiḥ //
dhvāntena cakṣuṣā cāndhairandhakūpaṃ prakīrtitam

nānāprakāraśastraughairyatra viddhāśca pāpinaḥ //
dhanurviṃśatimānaṃ ca vedhanaṃ tatprakīrtitam

daṇḍena tāḍitā yatra mama dūtaiśca pāpinaḥ //
dhanuḥṣoḍaśamānaṃ ca tatkuṇḍaṃ daṇḍatāḍanam

nibaddhāśca mahājālairyathā mīnāśca pāpinaḥ //
dhanustriṃśatpramāṇaṃ ca jālabaddhaprakīrtitam

patatāṃ pāpināṃ kuṇḍe dehāścūrṇībhavanti ca //
lauhavedinibaddhāntaḥ koṭimānavamānakam

gabhīraṃ dhvāntayuktaṃ ca dhanurviṃśatimānakam //
mūrcchitānāṃ jaḍānāṃ taddehacūrṇaṃ prakīrtitam

dalitāḥ pāpino yatra maddūtairmusalaiḥ sadā //
dhanuṣṣoḍaśamānaṃ ca tatkuṇḍaṃ dalanaṃ smṛta m

pātamātre yatra pāpī śuṣkakaṇṭhauṣṭhatālukaḥ //
vālukāsu ca taptāsu dhanustriṃśatpramāṇakam

śatamānavamānaṃ ca gabhīraṃ dhvāntasaṃyutam//
jalāhārairvirahitaṃ śoṣaṇaṃ tatprakīrtitam

nānācarmakaṣāyodaiḥ paripūrṇaṃ dhanuḥśatam//
durgandhiyuktaṃ tadbhakṣyaiḥ pāpibhiḥ saṃkulaṃ mahat

śūrpākāramukhaṃ kuṇḍaṃ dhanurdvādaśamānakam//
taptalauhīvālukābhiḥ pūrṇaṃ pātakibhiryutam

antarā 'gniśikhānāṃ ca jvālāvyāttamukhaṃ sadā //
dhanurviṃśatimānaṃ ca yasya kuṇḍasya sundari

jvālābhirdagdhagātraiśca pāpibhirvyāptameva yat //
tanmahatkleśadaṃ śaśvatkuṇḍaṃ jvālāmukhaṃ smṛtam

pātamātrādyatra pāpī mūrchito vyathito bhavet//
tapteṣṭakābhyantaritaṃ vāpyarddhaṃ jihmakuṇḍakam

dhūmāndhakārayuktaṃ ca dhūmāndhaiḥ pāpibhiryutam //
dhanuḥśataṃ śvāsabaddhairdhūmāndhaṃ parikīrtitam

pātamātrādyatra pāpī nāgaissaṃveṣṭito bhavet //
dhanuḥśataṃ nāgapūrṇaṃ nāgaveṣṭanakuṇḍakam

ṣaḍaśītiśca kuṇḍāni mayoktāni niśāmaya //
lakṣaṇaṃ cāpi teṣāṃ ca kiṃ bhūyaḥ śrotumicchasi

iti śrībrahmavaivartte mahāpurāṇe dvitīye prakṛtikhaṇḍe nāradanārāyaṇasaṃvāde sāvitryupākhyāne yamalokasthanarakakuṇḍalakṣaṇaprakathanaṃ nāma trayastriṃśo'dhyāyaḥ