Brahmavaivarta Purana · Chapter 2.32

sāvitryuvāca //
dharmarāja mahābhāga vedavedāṅgapāraga //
nānāpurāṇetihāsapāñcarātrapradarśakaḥ

sarveṣu sārabhūtaṃ yatsarveṣṭaṃ sarvasammatam //
karmacchede bījarūpaṃ praśaṃsyaṃ sukhadaṃ nṛṇām

yaśaḥpradaṃ dharmadaṃ ca sarvamaṃgalamaṃgalam //
yena yāmīṃ na te yāṃti yātanāṃ bhavaduḥkhadām

kuṇḍāni ca na paśyanti tatra naiva pataṃti ca //
na bhavedyena janmādi tatkarma vada suvrata

kimākārāṇi kuṇḍāni kāni teṣāṃ matāni ca //
kena rūpeṇa tatraiva sadā tiṣṭhaṃti pāpinaḥ

svadehe bhasmasādbhūte yāṃti lokāntaraṃ narāḥ //
kena dehena vā bhogaṃ bhuñjate vā śubhāśubham

suciraṃ kleśabhogena kathaṃ deho na naśyati //
deho vā kiṃvidho brahmaṃstanme vyākhyātumarhasi

nārāyaṇa uvāca // sāvitrīvacanaṃ śrutvā dharmarājo hariṃ smaran //
kathāṃ kathitumārebhe guruṃ natvā ca nārada

yama uvāca //
vatse caturṣu vedeṣu dharmo vai saṃhitāsu ca //
purāṇeṣvitihāseṣu pāñcarātrādikeṣu ca

anyeṣu sarvaśāstreṣu vedāṃgeṣu ca suvrate //
sarveṣṭaṃ sārabhūtaṃ ca maṃgalaṃ kṛṣṇasevanam

janmamṛtyujarārogaśokasantāpatāraṇam //
sarvamaṅgalarūpaṃ ca paramānandakāraṇam

kāraṇaṃ sarvasiddhīnāṃ narakārṇavatāraṇam //
bhaktivṛkṣāṃkurakaraṃ karmavṛkṣanikṛntanam

golokamārgasopānamavināśipadapradam//
sālokyasārṣṭisārūpyasāmīpyādipradaṃ śubhe

kuṇḍāni yamadūtaṃ ca yamaṃ ca yamakiṅkarān //
svapne'pi nahi paśyanti sati śrīkṛṣṇakiṅkarāḥ

harivrataṃ ye kurvaṃti gṛhiṇaḥ karmabhoginaḥ //
ye snāṃti haritīrthe ca nāśnanti harivāsare

praṇamaṃti hariṃ nityaṃ haryyarcāṃ pūjayanti ca //
na yānti te ca ghorāṃ ca mama saṃyamanīṃ purīm

trisandhyapūtā viprāśca śuddhācārasamanvitāḥ //
svadharmaniratāḥ śāntā na yānti yamamandiram

te svargabhogino'nye ca śuddhā devānyakiṃkarāḥ //
yāntyāyānti ca martyaṃ ca svargaṃ ca nahi nirvṛtāḥ //
nivṛttiṃ na hi lipsanti kṛṣṇasevāṃ vinā narāḥ

svadharmmaniratāścāpi svadharmaviratāstathā //
gacchanto martyalokaṃ ca durddharṣā yamakiṅkarāḥ

bhītāḥ kṛṣṇopāsakācca vainateyādivoragāḥ //
svadūtaṃ pāśahastaṃ ca gacchantaṃ taṃ vadāmyaham

yāsyasīti ca sarvatra haribhaktāśramaṃ vinā //
kṛṣṇamantropāsakānāṃ nāmāni ca nikṛntanam

karoti nakharāñjalyā citraguptaśca bhītavat //
madhuparkādikaṃ brahmā teṣāṃ ca kurute punaḥ

vilaṃghya brahmalokaṃ ca goloke gacchatāṃ satām //
duritāni ca naśyanti teṣāṃ saṃsparśamātrataḥ

yathā suprajvaladvahnau kāṣṭhāni ca tṛṇāni ca //
prāpnoti mohaḥ saṃmohaṃ tāṃśca dṛṣṭvā'tibhītavat

kāmaśca kāminaṃ yāti lobha krodhau tataḥ sati //
mṛtyuḥ palāyate rogo jarā śoko bhayaṃ tathā

kālaḥ śubhāśubhaṃ karmma harṣo bhogastathaiva ca //
ye ye na yānti yāmīṃ ca kathitāste mayā sati

śṛṇu dehasya vivṛtiṃ kathayāmi yathāgamam //
pṛthivī vāyurākāśaṃ tejastoyamiti sphuṭam

dehināṃ dehabījaṃ ca sraṣṭuḥ sṛṣṭividhau param //
pṛthvyādipañcabhūtaiśca yo deho nirmito bhavet

sa kṛtrimo naśvaraśca bhasmasācca bhavediha //
vṛddhāṅguṣṭhapramāṇena yo jīvaḥ puruṣākṛtiḥ

bibharti sūkṣmadehaṃ ca tadrūpaṃ bhogahetave //
sa deho na bhavedbhasma jvaladagnau mamālaye

jalena naṣṭo deho vā prahāre suciraṃ kṛte //
na śastre ca na cāstre ca sutīkṣṇe kaṇṭake tathā

taptadrave taptalauhe taptapāṣāṇa eva ca //
prataptapratimāśleṣe'pyatyūrdhvane'pi ca //

na ca dagdho na bhagnaśca bhuṃkte saṃtāpameva ca //
kathitaṃ devi vṛttāntaṃ kāraṇaṃ ca yathāgamam //
kuṇḍānāṃ lakṣaṇaṃ sarvaṃ nibodha kathayāmi te //

iti śrībrahmavaivartte mahāpurāṇe dvitīye prakṛtikhaṇḍe nāradanārāyaṇasaṃvāde sāvitryupākhyāne dvātriṃśattamo'dhyāyaḥ