Brahmavaivarta Purana · Chapter 2.24

nārāyaṇa uvāca //
stutvā so'śvapatistena saṃpūjya vidhipūrvakam //
dadarśa tatra tāṃ devīṃ sahasrārkasamaprabhām

uvāca sā taṃ rājānaṃ prasannā sasmitā satī //
yathā mātā svaputraṃ ca dyotayantī diśastviṣā

sāvitryuvāca //
jānāmi te mahārāja yatte manasi varttate //
vāñchitaṃ tava patnyāśca sarvaṃ dāsyāmi niścitam

sādhvī kanyābhilāṣaṃ ca karoti tava kāminī //
tvaṃ prārthayasi putraṃ ca bhaviṣyati ca te kramāt

ityuktvā sā mahādevī brahmalokaṃ jagāma ha //
rājā jagāma svagṛhaṃ tatkanyā''dau babhūva ha

rājño dhanācca sāvitryā babhūva kamalā kalā //
sāvitrīti ca tannāma cakārāśvapatirnṛpaḥ

kālena sā varddhamānā babhūva ca dine dine //
rūpayauvanasampannā śukle candrakalā yathā

sā varaṃ varayāmāsa dyumatsenātmajaṃ tadā//
sāvitrī satyavantaṃ ca nānāguṇasamanvitam //

rājā tasmai dadau tāṃ ca ratnabhūṣaṇabhūṣitām //
sa ca sārdhaṃ kautukena tāṃ gṛhītvā gṛhaṃ yayau

sa ca saṃvatsare'tīte satyavānsatyavikramaḥ //
jagāma phalakāṣṭhārthaṃ praharṣaṃ piturājñayā

jagāma tatra sāvitrī tatpaścāddaivayogataḥ //
nipatya vṛkṣāddaivena prāṇāṃstatyāja satyavān

yamastajjīvapuruṣaṃ baddhvāṅguṣṭhasamaṃ mune //
gṛhītvā gamanaṃ cakre tatpaścātprayayau satī

paścāttāṃ sundarīṃ dṛṣṭvā yamaḥ saṃyaminīpatiḥ //
uvāca madhuraṃ sādhvīṃ sādhūnāṃ pravaro mahān

yama uvāca //
aho kva yāsi sāvitri gṛhītvā mānuṣīṃ tanum //
yadi yāsyasi kāntena sārdhaṃ dehaṃ tadā tyaja

gantuṃ marttyo na śaknoti gṛhītvā pāñcabhautikam//
dehaṃ ca yamalokaṃ ca naśvaraṃ naśvaraḥ sadāḥ

pūrṇaśca bharttuste kālaḥ hyabhavadbhārate sati //
sa karmaphalabhogārthaṃ satyavānyāti madgṛham

karmaṇā jāyate jantuḥ karmaṇaiva pralīyate //
sukhaṃ duḥkhaṃ bhayaṃ śokaṃ karmaṇaiva prapadyate

karmaṇendro bhavejjīvo brahmaputraḥ svakarmaṇā //
svakarmaṇā harerdāso janmādirahito bhavet

svakarmaṇā sarvasiddhimamaratvaṃ labhed dhruvam //
labhetsvakarmaṇā viṣṇoḥ sālokyādicatuṣṭayam

karmaṇā brāhmaṇatvaṃ ca muktatvaṃ ca svakarmaṇā //
suratvaṃ ca manutvaṃ ca rājendratvaṃ labhennaraḥ

karmaṇā ca munīndratvaṃ tapasvitvaṃ ca karmaṇā //
karmaṇā kṣatriyatvaṃ ca vaiśyatvaṃ ca svakarmaṇā

karmaṇā caiva śūdratvamantyajatvaṃ svakarmaṇā

svakarmaṇā ca mlecchatvaṃ labhate nātra saṃśayaḥ //
svakarmaṇā jaṅgamatvaṃ sthāvaratvaṃ svakarmaṇā

svakarmaṇā ca śailatvaṃ vṛkṣatvaṃ ca svakarmaṇā //
svakarmaṇā paśutvaṃ ca pakṣitvaṃ ca svakarmaṇā

svakarmaṇā kṣudrajantuḥ kṛmitvaṃ ca svakarmaṇā //
svakarmaṇā ca sarpatvaṃ gandharvatvaṃ svakarmaṇā

svakarmaṇā rākṣasatvaṃ kinnaratvaṃ svakarmaṇā //
svakarmaṇā ca yakṣatvaṃ kūṣmāṇḍatvaṃ svakarmaṇā

svakarmaṇā ca pretatvaṃ vetālatvaṃ svakarmaṇā//
bhūtatvaṃ ca piśācatvaṃ ḍākinītvaṃ svakarmaṇā

daityatvaṃ dānavatvaṃ cāpyasuratvaṃ svakarmaṇā //
karmaṇā puṇyavāñjīvo mahāpāpī svakarmaṇā

karmaṇā sundaro'rogī mahārogī ca karmaṇā //
karmaṇā cāndhaḥ kāṇaśca kutsitaśca svakarmaṇā

karmaṇā narakaṃ yānti jīvāḥ svargaṃ svakarmaṇā //
karmaṇā śakralokaṃ ca sūryyalokaṃ svakarmaṇā

karmaṇā candralokaṃ ca vahnilokaṃ svakarmaṇā //
karmaṇā vāyulokaṃ ca karmaṇā varuṇālayam

tathā kuberalokaṃ ca naro yāti svakarmaṇā //
karmaṇā dhruvalokaṃ ca śivalokaṃ svakarmaṇā

yāti nakṣatralokaṃ ca satyalokaṃ svakarmaṇā //
janolokaṃ tapolokaṃ maharlokaṃ svakarmaṇā

svakarmaṇā ca pātālaṃ brahmalokaṃ svakarmaṇā //
karmaṇā bhārataṃ puṇyaṃ sarvepsitavarapradam

karmaṇā yāti vaikuṇṭhaṃ golokaṃ ca nirāmayam //
karmaṇā cirajīvī ca kṣaṇāyuśca svakarmaṇā

karmaṇā koṭikalpāyuḥ kṣīṇāyuśca svakarmaṇā //
jīvasaṃcāramātrāyurgarbhe mṛtyuḥ svakarmaṇā

ityevaṃ kathitaṃ sarvaṃ mayā tattvaṃ ca sundari //
karmaṇā te mṛto bharttā gaccha vatse yathāsukham

iti śrībrahmavaivartte mahāpurāṇe dvitīye prakṛtikhaṇḍe nāradanārāyaṇasaṃvāde karmavipāke karmaṇaḥ sarvahetutvapradarśanaṃ nāma caturviṃśatitamo'dhyāyaḥ