Brahmavaivarta Purana · Chapter 2.25

śrīnārāyaṇa uvāca //
yamasya vacanaṃ śrutvā sāvitrī ca pativratā //
tuṣṭāva parayā bhaktyā tamuvāca manasvinī

sāvitryuvāca //
kiṃ karma vā śubhaṃ dharmmarāja kiṃ vā'śubhaṃ nṛṇām //
karma nirmūlayantyeva kena vā sādhavo janāḥ

karmaṇāṃ bījarūpaḥ kaḥ ko vā karmmaphalapradaḥ//
kiṃ karmma tadbhavetkena ko vā taddhetureva ca

ko vā karmaphalaṃ bhuṅkte ko vā nirlipta eva ca //
ko vā dehī kaśca dehaḥ ko vā vai karmakārakaḥ

kiṃ vijñānaṃ mano buddhiḥ ke vā prāṇāḥ śarīriṇām //
kānīndriyāṇi kiṃ teṣāṃ lakṣaṇaṃ devatāśca kāḥ

bhoktā bhojayitā ko vā ko bhogaḥ kā ca niṣkṛtiḥ //
ko jīvaḥ paramātmā kastanme vyākhyātumarhasi

yama uvāca //
vedena vihitaṃ karma tanmaye maṅgalaṃ param//
avaidikaṃ tu yatkarma tadevāśubhameva ca

ahaitukī viṣṇusevā saṅkalparahitā satām//
karmmanirmmūlanātmā vai sā caiva haribhaktidā

haribhakto naro yaśca sa ca muktaḥ śrutau śrutam //
janmamṛtyujarāvyādhiśokabhītivivarjitaḥ

muktiśca dvividhā sādhvi śrutyuktā sarvasammatā //
nirvāṇapadadātrī ca haribhaktipradā nṛṇām

haribhaktisvarūpāṃ ca muktiṃ vāñchanti vaiṣṇavāḥ //
anye nirvāṇarūpāṃ ca muktimicchanti sādhavaḥ //

karmmaṇo bījarūpaśca santataṃ tatphalapradaḥ //
rūrmarūpaśca bhagavāñchrīkṛṣṇaḥ prakṛteḥ paraḥ

so'pi taddheturūpaśca karmma tena bhavetsati //
jīvaḥ karmaphalaṃ bhuṅkte ātmā nirlipta eva ca

ātmanaḥ pratibimbaṃ ca dehī jīvaḥ sa eva ca //
pāñcabhautikarūpaśca deho naśvara eva ca

pṛthivī vāyurākāśo jalaṃ tejastathaiva ca//
etāni sūtrarūpāṇi sṛṣṭiḥ sṛṣṭividhau hareḥ //

karttā bhoktā ca dehī ca svātmā bhojayitā sadā //
bhogo vibhavabhedaśca niṣkṛtirmuktireva ca

sadasadbhedabījaṃ ca jñānaṃ nānāvidhaṃ bhavet //
viṣayāṇāṃ vibhāgānāṃ bhedabījaṃ ca kīrttitam

buddhirvivecanārūpā jñānasaṃdīpinī śrutau //
vāyubhedāśca vai prāṇā balarūpāśca dehinām

indriyāṇāṃ vai pravaramīśvarāṇāṃ samūhakam //
prerakaṃ karmaṇāṃ caiva durnivāryaṃ ca dehinām

anirūpyamadṛśyaṃ ca jñānabhedaṃ manaḥ smṛtam //
locanaṃ śravaṇaṃ prāṇaṃ tvagjihvādikamindriyam

aṅgināmaṅga rūpaṃ ca prerakaṃ sarvakarmaṇām //
ripurūpaṃ mitrarūpaṃ sukhadaṃ duḥkhadaṃ sadā

sūryyo vāyuśca pṛthivī vāṇyādyā devatāḥ smṛtāḥ //
prāṇadehādibhṛdyo hi sa jīvaḥ parikīrttitaḥ

paramātmā paraṃ brahma nirguṇaḥ prakṛteḥ paraḥ //
kāraṇaṃ kāraṇānāṃ ca śrīkṛṣṇo bhagavānsvayam

ityevaṃ kathitaṃ sarvaṃ mayā pṛṣṭaṃ yathāgamam //
jñānināṃ jñānarūpaṃ ca gaccha vatse yathāsukham

sāvitryuvāca //
tyaktvā kva yāmi kāntaṃ vā tvāṃ vā jñānārṇavaṃ budham //
praśnaṃ yadyatkaromi tvāṃ tadbhavānvaktumarhati

kāṃ kāṃ yoniṃ yāti jīvaḥ karmaṇā kena vā yama //
kena vā karmaṇā svargaṃ kena vā narakaṃ pitaḥ

kena vā karmaṇā muktiḥ kena bhaktirbhaveddhareḥ //
kena vā karmaṇā rogī cārogī kena karmaṇā

kena vā dīrghajīvī ca kenālpāyuśca karmmaṇā //
kena vā karmmaṇā duḥkhī kena vā karmmaṇā sukhī

aṅgahīnaśca kāṇaśca badhiraḥ kena karmmaṇā //
andho vā kṛpaṇo vā'pi pramattaḥ kena karmmaṇā

kṣipto'tilubdhakaścaiva kena vā naraghātakaḥ //
kena siddhimavāpnoti sālokyādicatuṣṭayam

kena vā brāhmaṇatvaṃ ca tapasvitvaṃ ca kena vā //
svargabhogādikaṃ kena vaikuṇṭhaṃ kena karmmaṇā

golokaṃ kena vā brahmansarvotkṛṣṭaṃ nirāmayam//
narakaṃ vā katividhaṃ kiṃ saṃkhyaṃ nāma kiṃ tathā

ko vā kaṃ narakaṃ yāti kiyantaṃ teṣu tiṣṭhati //
pāpināṃ karmmaṇā kena ko vā vyādhiḥ prajāyate

yadyadasti mayā pṛṣṭaṃ tanme vyākhyātumarhasi

iti śrībrahmavaivartte mahāpurāṇe dvitīye prakṛtikhaṇḍe nāradanārāyaṇasaṃvāde karmmavipāke yamoktyanantaraṃ sāvitrīpraśno nāma pañcaviṃśo'dhyāyaḥ