Brahmavaivarta Purana · Chapter 2.10

nārada uvāca //
śrutaṃ pṛthivyupākhyānamatīva sumanoharam //
gaṅgopākhyānamadhunā vada vedavidāṃ vara

bhārataṃ bhāratīśā pādājagāma sureśvarī //
viṣṇusvarūpā paramā svayaṃ viṣṇupadī satī

kathaṃ kutra yuge kena prārthitā preritā purā //
tatkramaṃ śrotumicchāmi pāpaghnaṃ puṇyadaṃ śubham

// nārāyaṇa uvāca //
rājarājeśvaraḥ śrīmansagaraḥ sṛryyavaṃśajaḥ //
tasya bhāryā ca vaidarbhī śaibyā ca dve manohare

satyasvarūpaḥ satyeṣṭaḥ satyavāksatyabhāvanaḥ //
satyadharmavicārajñaḥ paraṃ satyayugodbhavaḥ

ekakanyaścaikaputro babhūva sumanoharaḥ //
asamañja iti khyātaḥ śaibyāyāṃ kulavarddhanaḥ

anyā cārādhayāmāsa śaṅkaraṃ putrakāmukī //
babhūva garbhastasyāśca śivasya tu vareṇa ca

gate śatābde pūrṇe ca māṃsapiṇḍaṃ suṣāva sā //
taddṛṣṭvā ca śivaṃ dhyātvā rurodoccaiḥ punaḥ punaḥ

śambhurbrāhmaṇarūpeṇa tatsamīpaṃ jagāma ha //
cakāra saṃvibhajyaitatpiṇḍaṃ ṣaṣṭisahasradhā

sarve babhūvuḥ putrāśca mahābalaparākramā //
grīṣmamadhyāhnamārttaṇḍaprabhājuṣṭakalevarāḥ

kapilarṣeḥ kopadṛṣṭyā babhūvurbhasmasācca te //
rājā ruroda tacchrutvā jagāma maraṇaṃ śucā

tapaścakārāsamaṃjo gaṅgānayanakāraṇāt //
tapaḥ kṛtvā lakṣavarṣaṃ mriyate kālayogataḥ

dilīpastasya tanayo gaṅgānayanakāraṇāta //
tapaḥ kṛtvā lakṣavarṣa yayau lokāntaraṃ nṛpaḥ

aṃśumām̐stasya putraśca gaṅgānayanakāraṇāt //
tapaḥ kṛtvā lakṣavarṣaṃ mṛtaśca kālayogataḥ

bhagīrathastasya putro mahābhāgavataḥ sudhīḥ //
vaiṣṇavo viṣṇubhaktaśca guṇavānajarāmaraḥ

tapaḥ kṛtvā lakṣavarṣaṃ gaṅgānayanakāraṇāt //
dadarśa kṛṣṇaṃ hṛṣṭāsyaṃ sūryyakoṭisamaprabham

dvibhujaṃ muralīhastaṃ kiśoraṃ gopaveṣakam //
paramātmānamīśaṃ ca bhaktānugrahavigraham

svecchāmayaṃ paraṃ brahma paripūrṇatamaṃ vibhum //
brahmaviṣṇuśivādyaiśca stutaṃ munigaṇairyutam

nirliptaṃ sākṣirūpaṃ ca nirguṇaṃ prakṛteḥ param //
īṣaddhāsyaṃ prasannāsyaṃ bhaktānugrahakārakam

vahniśuddhāṃ śukādhānaṃ ratnabhūṣaṇabhūṣitam //
tuṣṭāva dṛṣṭvā nṛpatiḥ praṇamya ca punaḥpunaḥ

līlayā ca varaṃ prāpya vāñchitaṃ vaṃśatārakam //
tatrājagāma gaṃgā sā smaraṇātparamātmanaḥ //

taṃ praṇamya pratasthau ca tatpuraḥ saṃpuṭāñjaliḥ //
uvāca bhagavāṃstatra tāṃ dṛṣṭvā sumanoharam //
kurvatīṃ stavanaṃ divyaṃ pulakāñcitavigrahām

śrīkṛṣṇa uvāca //
bhārataṃ bhāratīśāpādgaccha śīghraṃ sureśvari

sagarasya sutānsarvānpūtānkuru mamājñayā //
tvatsparśavāyunā pūtā yāsyanti mama mandiram

bibhrato divyamūrttiṃ te divyasyandanagāminaḥ //
matpārṣadā bhaviṣyanti sarvakālaṃ nirāmayāḥ

karmabhogaṃ samucchidya kṛtaṃ janmani janmani //
nānāvidhaṃ mahatsvalpaṃ pāpaṃ syādbhārate nṛbhiḥ

gaṃgāyāḥ sparśavātena naśyatīti śrutau śrutam //
sparśanaṃ darśanāddevyāḥ puṇyaṃ daśaguṇaṃ tataḥ

mausalasnānamātreṇa sāmānyadivase nṛṇām//
koṭijanmārjitaṃ pāpaṃ naśyatīti śrutau śrutam

yāni kāni ca pāpāni brahmahatyādikāni ca//
nānājanmārjitānyeva kāmato'pi kṛtāni ca

tāni sarvāṇi naśyanti mausalasnānato nṛṇām //
puṇyāhasnānajaṃ puṇyaṃ vedā naiva vadanti ca

kecidvadanti te devi phalameva yathāgamam //
brahmaviṣṇuśivāyāśca sarve naiva vidanti ca

sāmānyadivasasnānasaṅkalpaṃ śṛṇu sundari //
puṇyaṃ daśaguṇaṃ caiva mausalasnānataḥ param

tatastriṃśadguṇaṃ puṇyaṃ ravisaṃkramaṇe dine //
amāyāṃ cāpi tattulyaṃ dviguṇaṃ dakṣiṇāyane

tato daśaguṇaṃ puṇyaṃ narāṇāmuttarāyaṇe //
cāturmāsyāṃ paurṇamāsyāmanantaṃ puṇya meva ca

akṣayāyāṃ ca tattulyaṃ naitadvede nirūpitam //
asaṃkhyapuṇyaphaladameteṣu snānadānakam

sāmānyadivase snānaṃ dhyānācchataguṇaṃ phalam //
manvantareṣu deveśi yugādiṣu tathaiva ca

māghasya sitasaptamyāṃ bhīṣmāṣṭamyāṃtathaiva ca //
tathā 'śokāṣṭamītithyāṃ navamyāṃ ca tathā hareḥ

tato'pi dviguṇaṃ puṇyaṃ nandāyāṃ tava durlabham //
daśapāpaharāyāṃ tu daśamyāṃ sumahatphalam

nandāsamaṃ ca vāruṇyāṃ mahatpūrvaṃ caturguṇam //
tataścaturguṇaṃ puṇyaṃ dvimahatpūrvake sati

puṇyaṃ koṭiguṇaṃ caiva sāmānyasnānato bhavet //
candrasūryoparāgeṣu smṛtaṃ daśaguṇaṃ tataḥ

puṇye'pyarddhodaye kāle tataḥ śataguṇaṃ phalam //
sarveṣāmeva saṅkalpo vaiṣṇavānāṃ viparyyayaḥ

phalasandhānarahitā jīvanmuktāśca vaiṣṇavāḥ //
matprītibhaktikāmāste sarvadā sarvakarmasu

guruvaktrādviṣṇumantro yasya karṇe viśetparaḥ //
jīvanmuktaṃ vaiṣṇavaṃ taṃ vedāḥ sarve vadanti ca

puruṣāṇāṃ śataṃ pūrvaṃ paitṛkaṃ ca paraṃ śatam //
mātāmahasya ca śataṃ mātaraṃ mātṛmātaram

bhaginīṃ bhrātaraṃ caiva bhāgineyaṃ ca mātulam //
śvaśruṃ ca śvaśuraṃ caiva gurupatnīṃ guroḥ sutam

guruṃ ca jñānadātāraṃ mitraṃ ca sahacāriṇam //
bhṛtyaṃ śiṣya tathā ceṭīṃ prajāḥ svāśramasannidhau

uddharedātmanā sārddhaṃ mantragrahaṇamātrataḥ //
mantragrahaṇamātreṇa jīvanmukto bhavennaraḥ

tasya saṃsparśanātpūtaṃ tīrthaṃ ca bhuvi bhārate //
tasyaiva pādarajasā sadyaḥ pūtā vasundharā

pādodakasthānamidaṃ tīrthameva bhaveddhruvam //
annaṃ viṣṭhā jalaṃ mūtraṃ yadviṣṇoraniveditam

khādanti no vaiṣṇavāśca sadā naivedyabhojinaḥ //
viṣṇorniveditānnaṃ ca nityaṃ ye bhuñjate narāḥ

pūtāni sarvatīrthāni teṣāṃ ca sparśanādaho //
viṣṇoḥ pādodakaṃ puṇyaṃ nityaṃ ye bhuñjate narāḥ

tatpāpāni palāyante vainateyādivoragāḥ //
teṣāṃ darśanamātreṇa pūtaṃ ca bhuvanatrayam

viṣṇoḥ sudarśanaṃ cakraṃ santataṃ tāṃśca rakṣati //
madguṇaśravaṇādye ca pulakāṅkitavigrahāḥ//

gadgadāḥ sāśrunetrāśca narāste vaiṣṇavottamāḥ //
putrādapi paraḥ sneho mayi yeṣāṃ nirantaram //
gṛhādyāśca mayi nyastāste narāḥ vaiṣṇavottamāḥ

ābrahmastambaparyantaṃ mattaḥ sarvaṃ carācaram //
sarveṣāmahameveśa itijñā vaiṣṇavottamāḥ

asaṃkhyakoṭibrahmāṇḍaṃ brahmaviṣṇuśivādayaḥ //
pralaye mayi līyante cetijñā vaiṣṇavottamāḥ

tejaḥsvarūpaṃ paramaṃ bhaktānugrahavigraham //
svecchāmayaṃ nirguṇaṃ ca nirīhaṃ prakṛteḥ param

sarve prākṛtikā matta āvirbhūtāstirohitāḥ//
iti jānanti ye devi te narā vaiṣṇavottamāḥ

ityevamuktvā deveśo virarāma tayoḥ puraḥ //
uvāca taṃ tripathagā bhaktinamrātmakandharā

gaṅgovāca //
yāmi cedbhārataṃ nātha bhāratīśāpataḥ purā //
tavājñayā ca rājendra tapasā caiva sāmpratam

yāni kāni ca pāpāni mahyaṃ dāsyanti pāpinaḥ //
tāni me kena naśyanti tadupāyaṃ vada prabho

katikālaṃ parimitaṃ sthitirme tatra bhārate //
kadā yāsyāmi sarveśa tvadviṣṇoḥ paramaṃ padam

mamānyadvācchitaṃ yadyatsarvaṃ jānāsi sarvavit //
sarvāntarātmantsarvajña tadupāyaṃ vada prabho

śrīkṛṣṇa uvāca //
jānāmi vāñchitaṃ gaṅge tava sarvaṃ sureśvari //
patiste rudrarūpo'yaṃ lavaṇodo bhaviṣyati

mamaivāṃśaḥ samudraśca tvaṃ ca lakṣmīsvarūpiṇī //
vidagdhāyā vidagdhena saṅgamo guṇavānbhuvi

yāvattyaḥ santi nadyaśca bhāratyādyāśca bhārate //
saubhāgyaṃ tava tāsveva lavaṇodasya saurate

adyaprabhṛti deveśi kaleḥ pañca sahasrakam //
varṣaṃ sthitiste bhāratyā bhuvi śāpena bhārate

nityaṃ vāridhinā sārddhaṃ kariṣyasi raho ratim //
tvameva rasikā devī rasikendreṇa saṃyutā

tvāṃ toṣayanti stotreṇa bhagīrathakṛtena ca //
bhāratasthā janāḥ sarve pūjayiṣyanti bhaktitaḥ

dhyānena kauthumoktena dhyātvā tvāṃ pūjayiṣyati //
yaḥ stauti praṇamennityaṃ so'śvamedhaphalaṃ labhet

gaṅgā gaṅgeti yo brūyādyo janānāṃ śatairapi //
mucyate sarvapāpebhyo viṣṇulokaṃ sa gacchati

sahasrapāpināṃ snānādyatpāpaṃ te bhaviṣyati //
madbhaktadarśane tāvattadaiva hi vinaśyati

pāpināṃ tu sahasrāṇāṃ śavasparśena yattava //
manmantropāsakasnānāttadaghaṃ ca vinaśyati

yatra yatra bhavedgaṅge mannāmaguṇakīrttanam //
tatraiva tvamadhiṣṭhānaṃ kariṣyasyaghamocanāt

sārddhaṃ saridbhiḥ śreṣṭhābhiḥ sarasvatyā dibhiḥ śubhe //
tattu tīrthaṃ bhavetsadyo yatra madguṇakīrttanam

yadreṇusparśamātreṇa pūto bhavati pātakī //
reṇupramāṇaṃ varṣaṃ ca sa vaikuṇṭhe vased dhruvam

jñānena tvayi ye bhaktyā mannāmasmṛtipūrvakam //
samutsṛjanti prāṇāṃśca te gacchanti hareḥ padam

pārṣadapravarāste ca bhaviṣyanti hareściram //
asaṃkhyakaṃ prākṛtikaṃ layaṃ drakṣyanti te narāḥ

mṛtasya bahupuṇyena tacchavaṃ tvayi vinyaset //
prayāti sa ca vaikuṇṭhaṃ yāvadasthnāṃ sthitistvayi

kāyavyūhaṃ tataḥ kṛtvā bhojayitvā svakarmakam //
tasmai dadāmi sārūpyaṃ taṃ karomi ca pārṣadam

ajñānī tvajjalasparśādyadi prāṇānsamutsṛjet //
tasmai dadāmi sārūpyaṃ taṃ karomi pārṣadam

anyatra vā tyajetprāṇāṃstvannāmasmṛtipūrvakam //
tasmai dadāmi sālokyamasaṃkhyapralayālayam

anyatra vā tyajetprāṇānmannāmasmṛtipūrvakam //
tasmai dadāmi sālokyaṃ yāvadvai brahmaṇo vayaḥ

tīrthe'pyatīrthe maraṇe viśeṣo nāsti kaścana //
manmantropāsakānāṃ ca nityaṃ naivedyabhojinām

pūtaṃ kartuṃ sa śakto hi līlayā bhuvanatrayam //
ratnendrasārayānena lokaṃ sa prayāti ca

madbhaktabāndhavā ye ye te te puṇyadhiyaḥ śubhe //
te yānti ratnayānena golokaṃ ca sudurlabham

yatra tatra mṛtā ye ca jñānājñānena vā sati //
jīvanmuktāśca te pūtā bhaktasannidhimātrataḥ

ityuktvā śrīharistāṃ ca tamuvāca bhagīratham //
stuhi gaṅgāmimāṃ bhaktyā pūjāṃ kuru ca sāmpratam

bhagīrathastāṃ tuṣṭāva pūjayāmāsa bhaktitaḥ //
dhyānena kauthumoktena stotreṇa ca punaḥ puna.

śrīkṛṣṇaṃ praṇanāmātha paramātmānamīśvaram //
bhagīrathaśca gaṅgāṃ ca so'ntarddhāya gato hariḥ

nārada uvāca //
stotreṇa kena dhyānena kena pūjākrameṇa ca //
pūjāṃ cakāra nṛpatirvada vedavidāṃ vara

śrīnārāyaṇa uvāca //
snātvā nityakriyāṃ kṛtvā dhṛtvā dhaute ca vāsasī //
pādau prakṣālya cācamya saṃyato bhaktipūrvakam

gaṇeśaṃ ca dineśaṃ ca vahniṃ viṣṇuṃ śivaṃ śivām //
sampūjayennaraśśuddhaḥ so'dhikārī ca pūjane

gaṇeśaṃ vighnanāśāya niṣpāpāya divākaram //
vahniṃ svaśuddhaye viṣṇuṃ muktaye pūjayennaraḥ

śivaṃ jñānāya tadināṃ śivāṃ buddhivivṛddhaye //
sampūjyaitallabhetprājño viparītamato'nyathā

dadhyāvanena taddhyānaṃ śṛṇu nārada tattvataḥ //
dhyānaṃ ca kauthumoktaṃ vai sarvapāpapraṇāśanam

śvetacampakavarṇābhāṃ gaṅgāṃ pāpapraṇāśinīm //
kṛṣṇavigrahasambhūtāṃ kṛṣṇatulyāṃ parāṃ satīm

vahniśuddhāṃśukādhānāṃ ratnabhūṣaṇabhūṣitām //
śaratpūrṇenduśatakaprabhājuṣṭakalevarām

īṣaddhāsaprasannāsyāṃ śaśvatsusthirayauvanām //
nārāyaṇapriyāṃ śāntāṃ satsaubhāgyasamanvitāma

bibhratīṃ kabarībhāraṃ mālatīmālyasaṃyutām //
sindūrabindulalitāṃ sārddhaṃ candanabindubhiḥ

kastūrīpatrakaṃ gaṇḍe nānācitrasamanvitam //
pakvabimbasamānaikacārvoṣṭhapuṭamuttamam

muktāpaṃktiprabhājuṣṭadantapaṃktimanoharām //
sucāruvakranayanāṃ sakaṭākṣamanoramām

kaṭhinaṃ śrīphalākāraṃ stanayugmaṃ ca bibhratīm //
bṛhacchroṇīṃ sukaṭhināṃ rambhāstambhapariṣkṛtām

sthalapadmaprabhājuṣṭapādapadmayugaṃdharām //
ratnābharaṇasaṃyuktaṃ kuṃkumāktaṃ sayāvakam

devendramaulimandāramakarandakaṇāruṇam //
surasiddhamunīndrādidattārghyaissaṃyutaṃ sadā

tapasvimaulinikarabhramaraśreṇisaṃyutam //
muktipradaṃ mumukṣūṇāṃ kāmināṃ svargabhogadam

varāṃ vareṇyāṃ varadāṃ bhaktānugrahakātarām //
śrīviṣṇoḥ padadātrīṃ ca bhaje viṣṇupadīṃ satīm

iti dhyānena cānena dhyātvā tripathagāṃ śubhām //
dattvā saṃpūjayedbrahmannupahārāṃśca ṣoḍaśa

āsanaṃ pādyamarghyaṃ ca snānīyaṃ cānulepanam //
dhūpaṃ dīpaṃ ca naivedyaṃ tāmbūlaṃ śītalaṃ jalam

vasanaṃ bhūṣaṇaṃ mālyaṃ gaṃdhamācamanīyakam //
manoharaṃ sutalpaṃ ca deyānyetāni ṣoḍaśa

dattvā bhaktyā saṃpraṇametstutvā tāṃ saṃpuṭāñjaliḥ //
saṃpūjyaivaṃprakāreṇa so'śvamedhaphalaṃ labhet

stotraṃ vai kauthumoktaṃ ca saṃvādaṃ viṣṇuvedhasoḥ //
śṛṇu nārada vakṣyāmi pāpaghnaṃ ca supuṇyadam

śrībrahmovāca //
śrotumicchāmi deveśa lakṣmīkānta namaḥ prabho //
viṣṇo viṣṇupadīstotraṃ pāpaghnaṃ puṇyakāraṇam

śrīnārāyaṇa uvāca //
śivasaṃgītasaṃmugdhaśrīkṛṣṇāṅgadravodbhavām //
rādhāṃgadravasambhūtāṃ tāṃ gaṅgāṃ praṇamāmyaham

yā janmasṛṣṭerādau ca goloke rāsamaṇḍale //
sannidhāne śaṅkarasya tāṃ gaṅgāṃ praṇamāmyaham //

gopairgopībhirākīrṇe śubhe rādhāmahotsave //
kārtikīpūrṇimājātāṃ tāṃ gaṃgāṃ praṇamāmyaham

koṭiyojanavistīrṇā dairghye lakṣaguṇā tataḥ //
samāvṛtā yā golokaṃ tāṃ gaṃgāṃ praṇamāmyaham

ṣaṣṭilakṣairyojanairyā tato dairghye caturguṇā//
samāvṛtā yā vaikuṇṭhaṃ tāṃ gaṃgāṃ praṇamāmyaham

viṃśallakṣairyojanairyā tato dairghye caturguṇā //
āvṛtā brahmalokaṃ yā tāṃ gaṃgāṃ praṇamāmyaham

triṃśallakṣairyojanairyā dairghye pañcaguṇā tataḥ //
āvṛtā śivalokaṃ yā tāṃ gaṃgāṃ praṇamāmyaham

ṣaḍyojanasuvistīrṇā dairghye daśaguṇā tataḥ //
mandākinī yendraloke tāṃ gaṃgāṃ praṇamāmyaham

lakṣayojanavirstārṇā dairghye saptaguṇā tataḥ //
āvṛtā dhruvalokaṃ yā tāṃ gaṃgāṃ praṇamāmyaham

lakṣayojanavistīrṇā dairghye ṣaḍguṇitā tataḥ //
āvṛtā candra lokaṃ yā tāṃ gaṃgāṃ praṇamāmyaham

yojanaiṣṣaṣṭisāhasrairdairghye daśaguṇā tataḥ //
āvṛtā sṛryyalokaṃ yā tāṃ gaṃgāṃ praṇamāmyaham//

lakṣayojanavistīrṇā dairghye ṣaṅguṇitā tataḥ //
āvṛtā satyalokaṃ yā tāṃ gaṅgāṃ praṇamāmyaham

daśalakṣai ryojanairyā dairghye pañcaguṇā tataḥ //
āvṛtā yā tapolokaṃ tāṃ gaṅgāṃ praṇamāmyaham

sahasrayojanā yā ca dairghye saptaguṇā tataḥ //
āvṛtā janalokaṃ yā tāṃ gaṃgāṃ praṇamāmyaham

sahasrayojanā''yāme dairghye saptaguṇā tataḥ //
āvṛtā yā ca kailāsaṃ tāṃ gaṃgāṃ praṇamāmyaham

pātāle yā bhogavatī vistīrṇā daśayojanā //
tato daśaguṇā dairghye tāṃ gaṃgāṃ praṇamāmyaham

krośaikamātravistīrṇā tataḥ kṣīṇā na kutracit //
kṣitau cālakanandā yā tāṃ gaṅgāṃ praṇamāmyaham

satye yā kṣīravarṇā ca tretāyāmindusannibhā //
dvāpare candanābhā ca tāṃ gaṃgāṃ praṇamāmyaham

jalaprabhā kalau yā ca nānyatra pṛthivītale //
svarge ca nityaṃ kṣīrābhā tāṃ gaṅgāṃ praṇamāmyaham

yasyāḥ prabhāva atulaḥ purāṇe ca śrutau śrutaḥ //
yā puṇyadā pāpahartrī tāṃ gaṅgāṃ praṇamāmyaham

yattoyakaṇikāsparśaḥ pāpināṃ ca pitāmaha //
brahmahatyādikaṃ pāpaṃ koṭijanmārjitaṃ dahet

ityevaṃ kathitaṃ brahmangaṃgāpadyaikaviṃśatim //
stotrarūpaṃ ca paramaṃ pāpaghnaṃ puṇyabījakam

nityaṃ yo hi paṭhedbhaktyā saṃpūjya ca sureśvarīm //
aśvamedhaphalaṃ nityaṃ labhate nātra saṃśayaḥ

aputro labhate putraṃ bhāryāhīno labhetpriyām //
rogānmucyeta rogī ca baddho mucyeta bandhanāt

aspaṣṭakīrtiḥ suyaśā mūrkho bhavati paṇḍitaḥ //
yaḥ paṭhetprātarutthāya gaṅgāstotramidaṃ śubham //

śubhaṃ bhavettu duḥsvapnaṃ gaṅgāsnānaphalaṃ labhet

nārāyaṇa uvāca //
bhagīratho'nayā stutyā stutvā gaṅgāṃ ca nārada //
jagāma tāṃ gṛhītvā ca yatra naṣṭaśca sāgarāḥ

vaikuṇṭhaṃ te yayustūrṇaṃ gaṅgāyāḥ sparśavāyunā //
bhagīrathena sā''nītā tena bhāgīrathī smṛtā

ityevaṃ kathitaṃ sarvaṃ gaṅgopākhyānamuttamam //
puṇyadaṃ mokṣadaṃ sāraṃ kiṃ bhūyaḥ śrotumicchasi

nārada uvāca //
śivasaṃgītasaṃmugdhe śrīkṛṣṇe dravatāṃ gate //
dravatāṃ ca gatāyāṃ ca rādhāyāṃ kiṃ babhūva ha

tatrasthāśca janā ye ye te ca kiṃ cakrurudyamam //
etatsarvaṃ suvistīrṇaṃ prabho vaktumihārhasi

nārāyaṇa uvāca //
kārttikīpūrṇimāyāṃ ca rādhāyāḥ sumahotsave //
kṛṣṇaḥ saṃpūjya tāṃ rādhāmavasadrāsamaṇḍale

kṛṣṇena pūjitāṃ tāṃ tu saṃpūjyādṛtamānasāḥ //
ūcurbrahmādayaḥ sarve ṛṣayaḥ sanakādayaḥ

etasminnantare kṛṣṇa saṃgītaṃ ca sarasvatī //
jagau sundaratānena vīṇayā ca manoharam

tuṣṭo brahmā dadau tasyai mahāratnāḍhyamālikām //
śiromaṇīndrasāraṃ ca sarvabradmāṇḍadurlabham

kṛṣṇaḥ kaustubharatnaṃ ca sarva ratnātparaṃ varam //
amūlyaratnakhacitaṃ hārasāraṃ ca rādhikā

nārāyaṇaśca bhagavanvanamālāṃ manoharām //
amūlyaratnakalitaṃ lakṣmīrmakarakuṇḍalam

viṣṇumāyā bhagavatī mūlaprakṛtirīśvarī //
durgā nārāyaṇīśānī viṣṇubhaktiṃ sudurlabhām

dharmabuddhiṃ ca dharmastu yaśaśca vipulaṃ bhave //
vahniśuddhāṃśukaṃ vahnirvāyuśca maṇinūpuram

etasminnantare śambhurbrahmaṇā prerito muhuḥ //
jagau śrīkṛṣṇasaṃgītaṃ rāsollāsasamanvitam

mūrcchāṃ prāpuḥ surāḥ sarve citraputtalikā yathā //
kṣaṇena cetanāṃ prāpya dadṛśū rāsamaṇḍalam

sthalaṃ sarvaṃ jalākīrṇaṃ hīnarādhāhariṃ tathā //
atyuccai ruruduḥ sarve gopā gopyaḥ surā dvijāḥ

dhyānena dhātā bubudhe sarvametadabhīpsitam //
gataśca rādhayā sārddhaṃ śrīkṛṣṇo dravatāmiti

tato brahmādayaḥ sarve tuṣṭuvuḥ parameśvaram //
svamūrttiṃ darśaya vibho vāñchitaṃ varameva naḥ

etasminnantare tatra vāgbabhūvāśarīriṇī //
tāmeva śuśruvuḥ sarve suvyaktāṃ madhurāṃ śubhām

sarvātmā'hamiyaṃ śaktirbhaktānugrahavigrahā //
mamāpyasyāśca he devā dehena ca kimāvayoḥ

manavo mānavāḥ sarve munayaścaiva vaiṣṇavāḥ //
manmantrapūtā māṃ draṣṭumāgamiṣyanti matpadam

mūrtiṃ draṣṭuṃ ca suvyagrā yūyaṃ yadi sureśvarāḥ //
karoti śambhustatraiva madīyaṃ vākyapālanam

svayaṃ vidhātā tvaṃ brahmannājñāṃ kuru jagadguro //
kartuṃ śāstraviśeṣaṃ ca vedāṃgaṃ sumanoharam

apūrvamantranikaraiḥ sarvābhīṣṭaphalapradaiḥ //
stotraiśca kavacairdhyānairyutaṃ pūjāvidhikramaiḥ

manmantraṃ kavacaṃ stotraṃ kṛtvā yatnena gopaya //
bhavanti vimukhā yena janānāṃ yatkari ṣyati

sahasreṣu śateṣveko manmantropāsako bhavet //
te te janā mantrapūtāścāgamiṣyanti matpadam //

anyathā ca bhaviṣyanti sarve golokavāsinaḥ //
niṣphalaṃ bhavitā sarvaṃ brahmāṇḍaṃ caiva vedhasaḥ

janāḥ pañcaprakārāśca yuktāḥ sraṣṭurbhave bhave //
pṛthivīvāsinaḥ kecitkecitsvarganivāsina

adhonivāsinaḥ kecidbrahmalokanivāsinaḥ //
kecidvā vai ṣṇavāḥ kecinmama lokanivāsinaḥ

idaṃ kartuṃ mahādevaḥ karotu surasaṃsadi //
pratijñāṃ sudṛḍhāṃ sadyastato mūrtiṃ ca paśyasi

ityevamuktvā gagane virarāma sanātanaḥ //
taddṛṣṭvā ca jagannāthastamuvāca śivaṃ mudā

brahmaṇo vacanaṃ śrutvā jñāneśo jñānināṃ varaḥ //
gaṅgātoyaṃ kare dhṛtvā svīcakāra vacastu saḥ

saṃyuktaṃ viṣṇumāyādyairmantrādyaiḥ śāstramuttamam //
vedasāraṃ kariṣyāmi kṛṣṇājñāpālanāya ca

gaṃgātoyamupaspṛśya mithyā yadi vadejjanaḥ //
sa yāti kālasūtraṃ ca yāvadvai brahmaṇo vayaḥ

ityukte śaṅkare brahmangoloke surasaṃsadi //
āvirbabhūva śrīkṛṣṇo rādhayā saha tatparaḥ

te taṃ dṛṣṭvā ca saṃhṛṣṭāḥ saṃstūya puruṣottamam //
paramānandapūrṇāśca cakruśca punarutsavam

kālena śambhurbhagavāñchāstradīpaṃ cakāra saḥ //
ityevaṃ kathitaṃ sarvaṃ sugopyaṃ ca sudurlabham

sā caivaṃ dravarūpā yā gaṅgā golokasambhavā //
rādhākṛṣṇāṅgasambhūtā bhuktimuktiphalapradā

sthāne sthāne sthāpitā sā kṛṣṇena paramātmanā //
kṛṣṇasvarūpā paramā sarvabrahmāṇḍapūjitā

iti śrībrahmavaivartte mahāpurāṇe nāradanārāyaṇasaṃvāde dvitīye prakṛtikhaṇḍe gaṅgopākhyānaṃ nāma daśamo'dhyāyaḥ