Brahmavaivarta Purana · Chapter 2.9

nārada uvāca//
bhūmidānakṛtaṃ puṇyaṃ pāpaṃ taddharaṇena yat //
parabhūmau śrāddharūpaṃ kūpe kupadajaṃ tathā

ambuvīcībhūkhananabījatyāgajameva ca //
dīpādisthāpanātpāpaṃ śrotumicchāmi yatnataḥ

anyadvā pṛthivījanyaṃ pāpaṃ yatpraśnataḥ param //
yadasti tatpratīkāraṃ vada vedavidāṃ vara

nārāyaṇa uvāca//
vitastimātraṃ bhūmiṃ ca yo dadāti ca bhārate//
sandhyāpūtāya viprāya sa yāyādviṣṇumandiram

bhūmiṃ ca sarvasasyāḍhyā brāhmaṇāya dadāti yaḥ//
bhūmireṇupramāṇe ca varṣe viṣṇupade vaset

grāmaṃ bhūmiṃ ca dhānyaṃ ca yo dadātyādadāti yaḥ //
sarvapāpādvinirmuktau cobhau vaikuṇṭhavāsinau

bhūmidānaṃ ca tatkāle yaḥ sādhuścānumodate //
sa prayāti ca vaikuṇṭhaṃ mitragotrasamanvitaḥ

svadattāṃ paradattāṃ vā brahmavṛttiṃ harettu yaḥ //
kālasūtre tiṣṭhati sa yāvaccandradivākarau

tatputrapautraprabhṛtirbhūmihīnaḥ śriyā hataḥ //
sukhahīno daridraḥ syādante yāti ca rauravam

gavāṃ mārgaṃ viniṣkṛṣya yaśca sasyaṃ dadāti saḥ //
divyaṃ varṣaśataṃ caiva kumbhīpāke ca tiṣṭhati

goṣṭhaṃ taḍāgaṃ niṣkṛṣya mārgaṃ sasyaṃ dadāti yaḥ //
sa ca tiṣṭhatyasīpatre yāvadindrāścaturdaśa

na pañcapiṇḍamuddhṛtya snāti kūpe parasya yaḥ//
prāpnoti narakaṃ caiva na snānaphalameva ca

kāmī bhūmau ca rahasi bījatyāgaṃ karoti yaḥ //
snigdhareṇupramāṇaṃ ca varṣaṃ tiṣṭhati raurave

ambuvīcyambukhananaṃ yaḥ karoti ca mānavaḥ //
sa yāti kṛmidaṃśaṃ ca sthitistatra caturyugam

parakīye luptakūpe kūpaṃ mūḍhaḥ karoti yaḥ //
puṣkariṇyāṃ ca luptāyāṃ tāṃ dadāti ca yo naraḥ

sarvaṃ phalaṃ parasyaiva taptasūrmiṃ vrajettu saḥ //
tatra tiṣṭhati saṃtapto yāvadidrāścaturdaśa

parakīyataḍāge ca paṅkamuddhṛtya cotsṛjet //
reṇupramāṇavarṣaṃ ca brahmaloke vasennaraḥ

piṇḍaṃ pitre bhūtibhartturna pradāya ca mānavaḥ //
śrāddhaṃ karoti yo mūḍho narakaṃ yāti niścitam

bhūmau dīpaṃ yo'rpayati so'ndhaḥ saptasu janmasu //
bhūmau śaṃkhaṃ ca saṃsthāpya kuṣṭhaṃ janmāntare labhet

muktāmāṇikyahīraṃ ca suvarṇaṃ ca maṇiṃ tathā //
yaśca saṃsthāpayedbhūmau daridraḥ saptajanmasu

śivaliṅgaṃ śilāmarcyāṃ yaścārpayati bhūtale //
śatamanvantaraṃ yāvatkṛmibhakṣe sa tiṣṭhati

sūktaṃ mantraṃ śilātoyaṃ puṣpaṃ ca tulasīdalam //
yaścārpayati bhūmau ca sa tiṣṭhennarake yugam

japamālāṃ puṣpamālāṃ karpūraṃ rocanāṃ tathā //
yo mūḍhaścārpayedbhūmau sa yāti narakaṃ dhruvam

mune candanakāṣṭhaṃ ca rudrākṣaṃ kuśamūlakam //
saṃsthāpya bhūmau narake vasenmanvantarāvadhi

pustakaṃ yajñasūtraṃ ca bhūmau saṃsthāpayettu yaḥ//
na bhavedviprayonau ca tasya janmāntare janiḥ

brahmahatyāsamaṃ pāpamiha vai labhate dhruvam//
granthiyuktaṃ yajñasūtraṃ pūjyaṃ syātsarvavarṇakaiḥ

yajñaṃ kṛtvā tu yo bhūmiṃ kṣīreṇa nahi siñcati//
sa yāti taptasūrmiṃ ca saṃtaptaḥ sarvajanmasu

bhūkampe grahaṇe yo hi karoti khananaṃ bhuvaḥ //
janmāntare mahāpāpī so'ṅgahīno bhaveddhruvam

bhavanaṃ yatra sarveṣāṃ bhūmistena prakīrttitā///
vasuratnaṃ yā dadhāti vasudhā ca vasundharā

harerūrau ca yā jātā sā corvī parikīrttitā //
dharā dharitrī dharaṇī sarveṣāṃ dharaṇāttu yā

ijyā ca yāgabharaṇātkṣoṇī kṣīṇā laye ca yā //
mahālaye kṣayaṃ yāti kṣitistena prakīrtitā

kāśyapī kaśyapasyeyamacalā sthitirūpataḥ //
viśvambharā taddharaṇāccānantā'nantarūpataḥ

pṛthvī pṛdhukakanyātvādvistṛtatvānmahī mune

iti śrībrahmavaivartte mahāpurāṇe dvitīye prakṛtikhaṇḍe nāradanārāṇayasaṃvāde pṛthivyupākhyānaṃ nāma navamo'dhyāyaḥ