Brahmavaivarta Purana · Chapter 1.12

śaunaka uvāca //
ṛṣivaṃśaprasaṅgena babhūvurvividhāḥ kathāḥ //
upālambhena prastāvātkautukena śrutā mayā

prajā vā sasṛjuḥ ke vā ūrdhvaretāśca kaścana //
pitrā saha virodhena nāradaḥ kiṃ cakāra saḥ

pituḥ śāpena putrasya kiṃ babhūva virodhataḥ //
piturvā putraśāpena saute tatkathyatāṃ śubham

sautiruvāca //
haṃso yatiścāraṇiśca voḍhuḥ pañcaśikhastathā //
apāntaratamāścaiva sanakādyāśca śaunaka

etairvinā'nye bahavo brahmaputrāśca santatam //
sāṃsārikāḥ prajāvanto gurvājñāparipālakāḥ

apūjyaḥ putraśāpena svayaṃ brahmā prajāpatiḥ //
tenaiva brahmaṇo mantraṃ nopāsante vipaścitaḥ

nārado guruśāpena gandharvaśca babhūva saḥ//
kathayāmi suvistīrṇaṃ tadvṛttāntaṃ niśāmaya

gandharvarājaḥ sarveṣāṃ gandharvāṇāṃ varo mahān //
paramaiśvaryyasaṃyuktaḥ putrahīno hi karmaṇā

gurvājñayā puṣkare sa parameṇa samādhinā //
tapaścakāra śambhośca kṛpaṇo dīnamānasaḥ

śivasya kavacaṃ stotraṃ mantraṃ ca dvādaśākṣaram //
dadau gandharvarājāya vasiṣṭhaśca kṛpānidhiḥ

jajāpa paramaṃ mantraṃ divyaṃ varṣaśataṃ mune //
puṣkare sa nirāhāraḥ putraduḥkhena tāpitaḥ

virāme śatavarṣasya dadarśa purataḥ śivam //
bhāsayaṃtaṃ daśa diśo jvalantaṃ brahmatejasā

mahattejassvarūpaṃ ca bhagavantaṃ sanātanam //
īṣaddhāsaṃ prasannāsyaṃ bhaktānugrahakārakam

taporūpaṃ tapobījaṃ tapasyāphaladaṃ phalam //
śaraṇāgatabhaktāya dātāraṃ sarvasampadām

triśūlapaṭṭiśadharaṃ vṛṣabhasthaṃ digambaram //
śuddha sphaṭikasaṃkāśaṃ trinetraṃ candraśekharam

taptasvarṇaprabhājuṣṭajaṭājāladharaṃ varam //
nīlakaṇḍaṃ ca sarvajñaṃ nāgayajñopavītakam

saṃhartāraṃ ca sarveṣāṃ kālaṃ mṛtyuṃjayaṃ param //
grīṣmamadhyāhnamārttaṇḍakoṭisaṃkāśamīśvaram

tattvajñānapradaṃ śāṃtaṃ muktidaṃ haribhaktidam //
dṛṣṭvā nanāma sahasā gandharvo daṇḍavadbhuvi

vasiṣṭhadattastotreṇa tuṣṭāva parameśvaram //
varaṃ vṛṇuṣveti śivastamuvāca kṛpānidhiḥ //
sa yayāce hare bhaktiṃ putraṃ paramavaiṣṇavam

gandharvasya vacaḥ śrutvā cāha sīccandraśekharaḥ //
uvāca dīnaṃ dīneśo dīnabandhuḥ sanātanam

śrīmahādeva uvāca //
kṛtārthastvaṃ varādekādanyaccarvitacarvaṇam //
gandharvarāja vṛṇuṣe ko vā tṛpto'timaṅgale

yasya bhaktirharau vatsa sudṛḍhā sarvamaṅgalā //
sa samarthaḥ sarvaviśvaṃ pātuṃ karttuṃ ca līlayā

ātmanaḥ kulakoṭiṃ ca śataṃ mātāmahasya ca //
puruṣāṇāṃ samuddhṛtya golokaṃ yāti niścitam

trividhāni ca pāpāni koṭijanmārjitāni ca //
nihatya puṇyabhogaṃ ca haridāsyaṃ labhed dhruvam

tāvatpatnī sutastāvattāvadaiśvaryyamīpsitam//
sukhaṃ duḥkhaṃ nṛṇāṃ tāvadyāvatkṛṣṇe na mānasam

kṛṣṇe manasi saṃjāte bhaktikhaḍgo duratyayaḥ //
narāṇāṃ karmavṛkṣāṇāṃ mūlacchedaṃ karotyaho

bhavedyeṣāṃ sukṛtināṃ putrāḥ paramavaiṣṇavāḥ //
kulakoṭiṃ ca teṣāṃ te uddharantyeva līlayā

caritārthaḥ pumānekādvaramicchurvarādaho//
kiṃ vareṇa dvitīyena puṃsāṃ tṛptirna maṅgale

dhanaṃ saṃcitamasmākaṃ vaiṣṇavānāṃ sudurlabham //
śrīkṛṣṇe bhaktidāsyaṃ ca na vayaṃ dātumutsukāḥ

varayānyaṃ varaṃ vatsa yatte manasi vāṃchitam//
indratvamamaratvaṃ vā brahmatvaṃ labha durlabham

sarvasiddhiṃ mahāyogaṃ jñānaṃ mṛtyujayādikam //
sukhena sarvaṃ dāsyāmi haridāsyaṃ tyaja dhruvam

śaṅkarasya vacaḥ śrutvā śuṣkakaṇṭhoṣṭhatālukaḥ //
uvāca dīno dīneśaṃ dātāraṃ sarvasampadām

gandharva uvāca //
yatpakṣmacālanenaiva brahmaṇaḥ patanaṃ bhavet //
tadbrahmatvaṃ svapnatulyaṃ kṛṣṇabhakto na cecchati

indratvamamaratvaṃ vā siddhiyogādikaṃ śiva //
jñānaṃ mṛtyujayādyaṃ vā na hi bhaktasya vāñchitam

sālokyasārṣṭisāmīpyasāyujyaṃ śrīharerapi //
tatra nirvāṇamokṣaṃ ca na hi vāñchanti vaiṣṇavāḥ

śaśvattatra dṛḍhā bhaktirharidāsyaṃ sudurlabham //
svapne jāgaraṇe bhaktā vāñchantyevaṃ varaṃ varam

taddāsyaṃ vaiṣṇavasutaṃ dehi kalpataro varam //
tvāṃ prāpya labhate tuṣṭaṃ varaṃ sarvavaro'varaḥ

na dāsyasīdaṃ cecchambho varaṃ duṣkṛtinaṃ ca mām //
kṛtvā hi svaśiraśchedaṃ pradāsyāmi hutāśane

gandharvavacanaṃ śrutvā tamuvāca kṛpānidhiḥ //
bhaktaṃ dīnaṃ ca bhakteśo bhaktānugrahakārakaḥ

śrīśaṃkara uvāca //
haribhaktiṃ harerdāsyaṃ putraṃ paramavaiṣṇavam//
cirāyuṣaṃ ca guṇinaṃ śaśvatsusthirayauvanam

jñāninaṃ sundaravaraṃ gurubhaktaṃ jitendriyam //
gandharvarājapravaraṃ varemaṃ labha mā śucaḥ

ityuktvā śaṃkarastasmājjagāma svālayaṃ mune //
gandharvarājaḥ santuṣṭa ājagāma svamandiram

praphullamānasāḥ sarve mānavāḥ siddhakarmaṇaḥ //
nāradastasya bhāryyāyāṃ lebhe janma ca bhārate

suṣāva putraṃ sā vṛddhā parvate gandhamādane //
gururvasiṣṭho bhagavānnāma cakre yathocitam

bālakasya ca tasyaiva maṅgalaṃ maṅgale dine //
upa śabdo'dhikārthaśca pūjye ca barhaṇaḥ pumān //
pūjyānāmadhiko bālastenopabarhaṇābhidhaḥ

iti śrībrahmavaivartte mahāpurāṇe sauti śaunakasaṃvāde brahmakhaṇḍe nāradajanmakathanaṃ nāma dvādaśo'dhyāyaḥ